Pemesai
universiti ba menua tu ngembuan inisiatif meri peransang tinggi ngagai raban akademik
ngambika sida regas ngasilka karya ti betukuh setengah saintifik tauka popular
ke dikeluarka mayuh bengkah institusyen media perugu.
Enti
diperatika bisi sekeda universiti enda nerima karya ti betukuh popular ke diasilka
raban akademik sida. Enti pekara tu majak nyadi, iya tau bendar mai empas ke
enda manah ba timpuh ti panjai ngagai pengetan pemansang pengerembai penemu ba
menua kitai kelebih agi ba pengawa mindahka penemu tinggi ke diasilka nengah
pansik ba institut pelajar tinggi ungkup pemereti ati mensia mayuh.
Endang
diaku mega raban akademik dilatih ba bidang pelajar tinggi, ngembuan tanggung
pengawa ngasilka karang tauka karya saintifik ti diterima gentura 'komuniti
saintifik,' raban ti tebangkar ba bidang pemansik penemu sida.
Pia
mega, raban akademik endang semampai nguji enggau naka ulih ngangkatka tikas
pengulih sida ngelala sereta nerima sida nyadi raban dalam komuniti saintifik nya.
Pengawa tu begunaka fokus ti silik enggau pemagas ngasilka karya saintifik
tinggi ti dikeluarka nengah jurnal betikas antarabansa. Ari nya sida dikiraka nerima
puji asil pengawa ke nyadika juluk ati semua raban akademik.
Taja
pia, juluk ati ke deka ngasilka karya saintifik tinggi betikas antarabansa ukai
sebengkah kereja enggau tanggung pengawa
raban akademik ke endang raban intelektual rama ke bekereja ba mayuh bengkah institut
pelajar tinggi.
Sida
mega ngembuan pengeransing narak mensia mayuh kelebih agi maya ngangkatka
kualiti pemereti ati enggau pikir senentang mayuh leman pekara dalam pengidup
enggau tamadun mensia kemaya hari bepelasarka chara saintifik ti udah diakun
sereta valid.
Tanggung
pengawa raban intelektual rama narak mensia mayuh balat nyadi beguna agi di
menua ke agi benung mansang baka Malaysia.
Kebuah pia, laban penyampau rayat bepeluang ngulihka pelajar ba tikas tinggi agi bisi sekat sereta kurang. Mayuh ari rayat
ba menua ke benung mansang semina bepeluang ngulihka pelajar sida naka tikas
sekondari tauka primari aja.
Ba
situasyen enggau realiti baka tu, raban akademik tauka intelektual rama ba institut pelajar tinggi ngembuan tanggung
pengawa narak mensia mayuh ke nadai peluang belajar ngagai tikas tinggi ketegal
mayuh macham faktor rampa alai diau, ekonomi enggau budaya. Mayuh mega institut
pelajar tinggi mereti amat kereja enggau tanggung pengawa sida ke menua enggau
bansa. Nya alai, raban akademik diperansang enggau masuk sereta meri servis
sida nengah servis perunding enggau chara licha.
Universiti
mega diperansang ngatur mayuh tukuh seminar ti mungkur mensia mayuh. Pengawa ke
ngemasukka diri sereta meri bantu chara baka tu dikira sebagi ari komponen tisih dalam pemansang servis raban akademik
di universiti. Pemesai universiti patut terus meri sukung sereta nerima sida
raban akademik enggau bala mensia mayuh ari sukut mata duit, logistik tauka
tisih servis. Nengah sukung tu, iya dikira ngamatka konsep Universiti Ungkup
Komuniti ti kala nyadika slogan dunya pelajar tinggi sebedau tu.
Dalam
konteks tu, pemeri raban akademik dalam tukuh tulis karya saintifik popular betukuh
artikel ba majalah, esei tauka bup patut diakun sereta enda ulih enda diterima enggau
patut ari bala sida pemesai universiti kemaya hari. Dikena meri terima kasih ke
pemeri nya, pemesai universiti disadangka ngangkatka penyampau mark tisih
ngagai asil saintifik popular lalu ngangkat iya ngagai siti tikas ke tinggi
agi. Tu ulih meri peransang enggau pengeransing ngagai raban akademik ngambika
sida deka terus meri penemu sida ba bidang penulis ti betukuh baka ke udah
disebut nya. Karang ti betukuh popular ngembuan tanggung pengawa ti besai
sereta berat kelebih agi enti ditimpai ari sukut rama pasal sesebengkah
penanggul sereta isu kemaya hari ti
semampai ngerembai dalam komuniti.
Pengawa
media popular sigi semitan amat nyadi penyambung komunikasyen ti terus sereta
jampat ari raban intelektual enggau mensia mayuh. Reti nya mensia mayuh mesti
semampai diiri enggau pemereti ati sereta penemu ti nemban bepelasarka chara
saintifik dalam pengawa meretika sesebengkah isu ti bisi kait enggau pemesai
reti pengidup besehari-sehari.
Reti
nya mega iya ulih nyeliah mensia mayuh ari bepanggai ba penatai fakta ti
setengah amat, selebubu ngapa tauka 'gosip' dalam sesebengkah isu penemu. Nya alai,
endang nadai orang bukai kelimpah ari sida intelektual rama ke udah diakun tau
ulih mantu sereta meri pemereti ati bepelasarka pekara ti amat.
Tulis
tauka karya saintifik intelektual rama ti dikeluarka majalah tauka surat berita ambika
chunto nyadika sanding penemu mensia mayuh. Iya kereban komunikasyen ti
pengabis badas entara intelektual rama enggau komuniti.
Ukai
semua hal saintifik ulih diputar enggau
chara ngeluarka karya saintifik ba jurnal
betikas antarabansa. Ukai ngumbai jurnal tu enda beguna dalam pengawa teori enggau
aplikasyen penemu tang iya ukai kereban komunikasi ti semitan dikena intelektual
rama mantaika penemu sida ngagai komuniti mensia mayuh. Sida begunaka kereban media
popular kelebih agi dikena mutarka sebarang pekara ti tau nyaru penemu tauka
penerang tentang sesebengkah pekara ke ngerekai dalam komuniti.
Kemaya
hari tu, pengawa raban intelektual rama ke nyadika malin enggau penarak
komuniti senentang chara ti manah napi pengerekai penyakit berampit sigi dipeda
besai amat guna. Mayuh bendar penemu saru enggau berita pelesu disadung ngagai komuniti senentang pandemik COVID-19, ambika
chunto iya ti bekaul enggau pemanah enggau pengurang vaksin COVID-19. Penerang ti
disadung baka tu patut diakun pengamat enggau jampat sereta saintifik ari
raban intelektual rama kelebih agi sida ke ba palan pelajar tinggi.
Nya
alai, sida intelektual rama mesti semampai sensitif ke pemansang saintifik ti
bisi dalam komuniti lalu enda ulih enda mutarka enggau jampat pekara nya nengah
bejaku ba mua mayuh tauka licha nengah mayuh leman kereban media popular. Pemeri raban akademik
endang beguna bendar sereta patut diberi tabi puji ari pemesai universiti kemaya hari.
Glosari:
media
perugu -
media arus perdana
Tiada ulasan:
Catat Ulasan