Segang Pemansang Ekonomi Gig

 

Segang Pemansang  Ekonomi Gig

Beberapa iti artikel ti udah dikenang aku dulu ari tu meri fokus ngagai pengawa bepikir ti bisi kaul enggau pengawa ti patut dikemeranka kitai mensia sereta iya mega regas dipelajar sereta dikerembaika ba sekula. Kesekali tu aku deka mai kitai ngelengka sesempa leka pinang lalu limpang mimit ari pengawa bepikir enggau pengawa sekula tang meri perati ngagai kenang pasal ekonomi. Pekara ti deka dikupas aku sekali tu iya nya pasal ekonomi gig tauka disebut gig ekonomy dalam jaku English.

Terminologi ‘gig’ tu ke bendar sebedau tu suah disebut bekaul enggau orang ke bemain musik ti digaji sekejap aja nitihka  pengelama sida bemain musik. Taja pia, leka jaku nya diatu nyau udah  masai dikena kemaya hari tu dikena orang bejaku pasal lanskap pengawa bukai.

Dalam ekonomi gig, pengawa temporari enggau kereja ti flesibel nya pekara ti tebalan nyadi ba bidang pengawa. Suah Iban nyebut nya pengawa sambil.  Pengawa sambil tu pengawa ti dikereja ke sangking lalu ukai batang pengawa ti dikereja dikena beridup. Tukang pengaji pengawa tauka teleba agi dikumbai dalam jaku Iban, tauke suah agi ngaji bala kontraktor enggau freelancers  ari sida ke ngaji pengereja pengawa ti tetap, pia ku American financial website Investopedia.

Terminologi ‘ekonomi gig’ tu keterubah iya ditempa siku pengarang berita sereta mega penulis ke benama Tina Brown dalam taun 2009 sepengudah ekonomi global ti raya bendar kusut maya nya suba. Jaku nya dikena iya mandangka pengawa ti balat agi dikereja sida ke kereja nyambil baka ba pengawa projek, pengawa konsultan enggau pengawa sambil ti bukai.

Terminologi ekonomi gig tu mega ngembuan gentilang nama. Sekeda terminologi bukai ke kala dikena nerangka pengawa ekonomi baru tu nyengkaum ekonomi kunsi tauka dalam jaku English disebut sharing economy, ekonomi koloboratif tauka coloborative economy, ekonomi mensia mayuh tauka crowd economy enggau ekonomi serambau tauka peer economy.

Sida ti dibungkur ekonomi gig tu nyengkaum sida ke kereja sambil, freelancers, kontraktor ke gawa ngati kediri enggau pengereja pengawa projek (project based workers). Pengereja pengawa projek tu orang ke beridup enggau pengawa ti nitihka peminta orang. Reti nya enti bisi orang minta sida ngaga utai tauka ngereja sesebengkah pengawa baru sida gawa.

Kemaya hari tu nyau semak empat juta orang bisi ditemu gawa sambil tauka nyadi freelancer di Malaysia (peda The Star 18 April 2021) lalu penyampau nya majak nambah. Ekonomi gig tu model ekonomi ti bepanggai ba freelancers tauka dikumbai mega “giggers” ke alai servis sida bepelasar ba pengelandik, kontrak timpuh ti pandak enggau pengawa ti fleksibel. Pengawa sida mega lebih ngagai mela bala orang ke bedagang enggau sida nengah chara online.

Nitihka ripot, ekonomi tu dipelabaka majak mansang kelebih agi dalam taun 2021 ketegal mayuh orang udah diketuka gawa maya pandemik Covid 19 tu ngerekai di menua kitai. Sida nadai jalai bukai dikena ngidupka diri lalu ketegal nya dipejal beridup nengah kelaing digital. Mayuh sida ke gawa nyadi pengereja gig tu sida ke nembiak rebak baru. Sida tu orang ke endang iya jingan dalam bidang teknologi.

Nya kebuah, enda ngalitka ati enti perintah udah ngelaika ekonomi gig tu nyadi sebengkah ari pun penatai ekonomi lalu iya deka nyadi siti ari perambu perintah ba Lumpar Pemansang Malaysia ke 12, (2021-2025). Ekonomi tu deka meri penatai pemisi ekonomi kelebih agi ba produk domestik kasar  (GDP) menua.

Bisi tiga komponen dalam ekonomi gig: tu nyengkaum freelancer ti dibayar bepelasarka kereja ti spesifik; pemeli tauka orang ti dekaka servis ti spesifik; enggau kompeni ti bisi kaul enggau kereja nengah kelaing digital baka GrabFood, Foodpanda, TaskRabbit, BungkusIt enggau servis e-hailing baka Grab enggau MyCar.

Makit kemaya hari tu majak berubah bereta enggau peminta ari raban pemeli. Tu mih nyadika faktor ke ngansak pemansang ekonomi gig lalu iya mega balat narit ati bala giggers. Sekeda ari kebuah orang gawa ba bidang tu iya nya ketegal jam gawa ti mentur agi lalu sida mega ulih milih kereja ti engkeman sereta setipak enggau pengulih sereta pengerindu diri.  Pengereja gig ngembuan awak ti fleksibel seagi-agi iya nembuka pengawa nitihka timpuh ti diberi. Nambahka nya pemansang teknologi mega balat mantu sida.

Kitai patut beterima kasih ke penatai digital ba jeman diatu laban pengereja gig ulih tama ke genap makit sereta ulih nambahka penatai pemisi sida lebih ari siti pun. Tu meri peransang ngagai bala nembiak rebak baru ngulihka penatai pemisi ti lebih ari sida ke endang nyenggala gawa ba kompeni besai.

Ba kes kompeni, kelebih agi sida ke baru mungkal bisness, sida deka agi ngaji freelancer ungkup pengawa ti enda lama dikena nembuka sesebengkah projek ari sida ke ngaji pengereja pengawa tetap. Adar ti baka tu ulih optimaka kos operasional sida enggau semitan agi.

Enti dikereja enggau betul pengawa gig baka tu dikelapung enggau mayuh macham penguntung. Tu nyengkaun bekereja enggau nadai besekat, pengelantang ati enggau runding sereta gaji ti chukup manah. Lalu ba kes pengawa freelance, raban pengereja pengawa ulih milih baka ni deka ngereja sesebengkah pengawa. Sida nadai bepanggai ba orang ke ngaji sida.

Nya alai ekonomi gig kemaya hari tu majak dikerinduka nembiak rebak baru. Aram mih kitai sama ngambi bagi ngayanka tanggung pengawa nyukung ekonomi menua.

Glosari:

freelancers – pengereja pengawa ti nadai besekat

mentur - fleksibel