Begari Menyana

 

Begari Menyana

Baikka ungkup pengawa manah tauka enda manah, kod etika begari tu endang patut bendar dikemeratka kitai. Kebuah pia, laban nya mih gaya kitai ngayanka pendiau diri ba mua mata mensia mayuh lalu kelebih agi ba profesion kitai empu.

Nitihka sosiologist, taja pan atur begari menyana patut diteritka tang sida mega ngasaika iya mega bisi ngembuan pengelentur. Nitihka mandal professor Dr. Nor Azlili, atur kod etika begari tu endang udah dikemeranka mensia kenyau ari 200 taun ti udah (The Sun, July 29. 2021).

Kod etika begari ke disebutka tu ngenangka atur tauka adat begari ungkup genap iku orang nitihka umur, bansa enggau status sosial sida. Kod begari keterubah iya ditempa maya berengkah kurun ke-19. Penempa keterubah kod begari tu endang diungkupka raban pengereja pengawa enggau nembiak sekula.

Iya ukai semina strategi dikena neritka disiplin tang mega dikena napi peminta  raban kapitalisma, industri enggau pengangkat sekeda menua. Semua pekara tu bereta nyadi. Taja pia, ketegal bungkah pemansang dunya sereta penatai era moden  dia mayuh orang meratika atur kod etika begari tu ari sukut ke sempit agi. Nitihka ripot ba surat berita The Sun, bisi siku indu ditagang tama ke palan betuchuk vaksin di Pulau Pinang ketegal ke enda nitihka atur kod begari. Indu nya enda diasuh tama ke Kompleks Masyarakat Penyayang nya ketegal gari ke dikena iya enda akur enggau atur begari ba premis nya. Taja pia, pekara nya udah diputarka laban atur nya semina mungkur orang ke gawa  ba opis nya tauka sida ke datai baum ba kompleks nya.

Tu mih siti ari mayuh chunto atur kod etika begari ke bisi dibantaika ba papan notis opis-opis perintah enggau prebet. Kelebih agi baka hospital enggau klinik. Endang amat, sida ke bekuasa ngembuan tanggung pengawa nyaga undang-undang ngambika pejalai  pengawa sida jurus sepemanjai maya lalu tu mega nyengkaum kod begari.

Taja pia, bisi maya prinsip etika begari tu belaban enggau penemu orang mayuh. Nya alai, ba hal tu, endang patut  sama-sama begempung ngurangka konflik.  Ba kes ke di Pulau Pinang nya, konflik nya tau bendar enda meransang orang betuchuk.

Atur kod etika begari ngembuan empas  ngagai psikologi, chara besosial enggau pemujur akademik siku-siku kitai. Dipelaba tentu kitai kala ninga rambai jaku English ke munyi tu – You are what you wear, reti nya chara nuan begari ngayanka sapa nuan ke bendar. Kod begari bisi kaul ti rapit enggau identiti, seregah profesional, pengelikun enggau pemeresi siku-siku kitai.

Ambika chunto, maya kitai ngayanka budaya tentu mega kitai nitihka kod etika begari ti udah diletakka komuniti  kitai baik nya ungkup ke lelaki tauka indu.

Naka kediatu perintah lalu bedau nempa sebengkah set malin kod begari ti patut dikena ba palan betuchuk vaksin COVID-19. Amat mih bedau bisi disediaka perintah, kod etika begari menyana enda udah nyadika budaya rayat Malaysia. Agi mega, nadai mih nya pulai ke salah enti kitai begari enggau menyana lebuh kitai nurun ke sesebengkah palan baik nya palan betuchuk, klinik tauka opis.

Nambahka nya mega, sida ke neritka adat enggau kuasa patut meda pekara tu ari sukut realiti pengidup besehari-sehari. Baka ba kes betuchuk vaksin COVID-19 nya tadi sida enda ulih neritka atur enti nadai etika kod begari ti udah disediaka laban tu tau ngasuhka pemujur pengawa meri vaksin ngagai mensia mayuh puntan baka menasan jalai jelu.

Siti agi ti patut dikereja sida ke bekuasa nya meri memo senentang kod etika begari ngagai opis di baruh pegai sida ngambika sida ke di baruh kuasa sida nya enda sengapa ngaga atur nitihka penyamai diri empu. Tu mega ulih ngelantang sereta meri basa ngagai sida ke datai ngagai opis kitai.