Jaku Iban tu siti ari mata pelajar elektif di sekula, sama sebaka enggau jaku etnik bukai baka jaku Kadazandusun di Sabah enggau jaku Semai di Semananjung Malaysia. Ari ketiga-tiga jaku etnik tu, jaku Iban dipeda nyulut agi laban iya udah dulu dipelajarka nembiak Iban. Jaku Iban udah bisi dalam kurikulum dalam taun 1968. Mata pelajar jaku Iban diterima formal dalam kurikulum nasional dalam taun 1988. Kenyau ari nya, pengawa ngangkatka jaku Iban ngagai tikas ke tinggi agi dipejalaika enggau ransing agi. Nya alai, dalam taun 2008 jaku Iban udah nyadi siti ari mata pelajar ti diperesa ba tikas Sijil Pelajaran Malaysia (SPM). Naka kediau udah 17 taun jaku Iban diajar datai ngagai tikas SPM. Mayuh bendar penguji sereta peneleba lebuh ngangkatka jaku Iban nya ke tikas SPM.
Penanggul nadai kereban bacha ti chukup kelimpah ari bup teks nya siti ari penanggul ti ditapi raban pengajar. Pia mega ari sukut personal ke ngajar mega nadai chukup sereta nadai peneleba ngajar ba tikas sekula sekondari tinggi. Penguasa sekula mega enda tentu ransing deka ngasuh bala nembiak ngambika subjek tu ba tikas SPM laban sida nadai ulih meda pemesai guna jaku Iban tu kelebih agi ba komuniti orang Iban. Nya alai mata pelajar tu dipeda sepiak mata aja ulih sekeda penguasa sekula enggau sekeda raban apai indai. Bala nembiak enggau pengajar ukai semina betapi enggau penanggul ke udah disebut di atas tang mega bala pengajar kelebih agi betapi enggau pemutus peresa ti enda tentu meransang nembiak enggau penguasa sekula. Penguasa sekula, nembiak enggau apai indai serebana madah anak sida enda bulih gred A dalam jaku Iban. Sigi amat, bah katika sida ke bulih A nya nama mega ruunding sida sepengudah ngambi peresa jaku Iban?
Sigi baka empas ari peresa, bisi nembiak mujur bisi enda, bisi ke bulih pemutus peresa ti manah lalu enda kurang mega sida ke enda ngenataika diri ba tikas pas aja. Tu baka orang ke bepekit belagu, enda semua ngenataika diri ba tikas final lalu lebuh final semina siku aja ke bulih numbur satu. Serebana nyadi tadi ukai tak diambika pending bengal ari sida ti betanggung pengawa. Nya alai, dalam taun 2020 Lembaga Peperiksaan enggau raban panel sida udah merambuka format peresa ti baru ti nisih semua pengelandik dalam jaku Iban. Tu meri peluang ngagai semua nembiak ke ngambi peresa jaku Iban nya ngayanka pengelandik ba jaku Iban nitihka tikas diri. Pengelandik nya mungkur pengelandik mending enggau bejaku, macha enggau nulis. Dalam taun 2021 format peresa ti baru udah mujur dikena nisih nembiak SPM jaku Iban. Sepengudah 17 taun ngajar, ngiring ngembing nembiak ba tikas SPM tentu pengajar ngembuan mayuh peneleba. Langkah rapat sereta strategi dikena mantu nembiak ngulihka pengelandik bejaku semampai diperambu ngambika bulih pemutus peresa ti lati.
Siti ari program ti ulih ngelatika nembiak dalam pengelandik bejaku Iban ba tikas SPM iya nya Program Cemerlang Akademik Bahasa Iban tauka nama puntang program tu iya nya POCEM. Program tu udah empat kali dipejalai enggau mujur. Program tu diatur Gerempung Bansa Dayak Sarawak (SDNU) Sibu enggau kerejasama Resource Pool Jaku Iban, Opis Pelajar Pelilih (PPD) Sibu.
Tuju program tu meri eksposure ngagai chalun Sijil Pelajaran Malaysia (SPM) senentang keretas Jaku Iban. Kelimpah ari nya, iya mega nambahka motivasyen sida ba subjek Jaku Iban nya. Ke baru tu diatur tu bisi 20 iku pengajar begulai enggau komiti pengatur program sereta raban Exco SDNU Sibu bisi enggau ngulu program tu.
Ninting taun sida udah mujur ngangau pengelicha ke tebangkar ba sekeda bidang datai meri penerang sereta perangsang ngagai bala nembiak. Edisyen keempat POCEM tu tadi bisi mantaika dua iku speaker ti bepeneleba iya nya Matius Mangai Entu enggau Jit Kayan ti ngembing nembiak nengah sesi licha enggau woksyop ngambika sida ulih nengkua subjek Jaku Iban enggau silik agi. Program sehari nya dipenyadika Sapit Chairman SDNU Sibu, Johnady Janton, ngarika Chairman SDNU Sibu Chambai Lindong.
Baka belayan padi lebat bebuah, baka nya mega tiap utai ke nyadi bisi tuju enggau kebuah. Program POCEM tu dikarapka ulih ngasilka mayuh nembiak ti lati dalam jaku Iban.
Amat munyi ku Tuan Johnady, pemujur bala nembiak ukai semina deka mai nama sereta basa ngagai sekula tang mega meri pangka ti besai ngagai penyulut komuniti enggau nengeri Sarawak.
Ngemeratka pemesai guna kerejasama entara gerempung ukai dikuasa perintah (NGO) baka SDNU enggau palan pelajar dalam ngangkatka jaku Iban sigi patut bendar diatur munyi ku penemu pengari Resource Pool Bahasa Iban, PPD Sibu Kennedy Wong. Kerejasama entara NGO baka SDNU enggau sekula beguna amat laban iya ngulaika pengelandik praktikal NGO, bantu duit ringgit enggau infrastruktur pelajar sekula dikena mutarka guna komuniti lalu ngangkatka akses mata pelajar jaku Iban ngagai nembiak. Naka mih pemanah enti sema gerempung ukai dikuasa perintah bukai kelimpah ari SDNU pampang Sibu bisi ngatur kerejasama enggau raban pengajar dalam ngangkat subjek baka jaku Iban tu. Di Sarawak tu mayuh ga NGO ti bisi kaul enggau komuniti Iban patut ngambi peluang ti manah baka tu tang nya semua bepanggai ba kitai empu munyi ku jaku orang tuai, enti amat ka alah enda, enti enggai bisi pan dikumbai kitai nadai.
Pengeransing enggau niat ti amat ari SDNU Sibu enggau PPD Sibu ti nguji ngansah pengelandik jaku Iban sigi patut bendar dipuji laban iya tentu mai asil ti positif ngagai semua. Objektif program tu mega ukai semina deka ngasilka nembiak ke bulih pemutus peresa ti manah dalam mata pelajar tu tang laban jaku tu nyadi pesaka budaya ti berega sereta patut dijaga kelebih agi ari komuniti Iban empu. Pengawa ngenegapka pengelandik nembiak ba subjek tu ukai semina beguna ungkup penyulut SPM, tang mega dikena nentuka jaku enggau budaya Iban meruan idup sereta ditampung ngagai rebak dudi hari ngambika iya enda mudah retai ketegal jeman.
Pengawa ngasilka nembiak ti lati dalam jaku Iban begunaka komitmen tinggi ari semua ti bisi betanggung pengawa dalam mata pelajar tu. Bala apai indai patut bendar meransang anak sida belajarka jaku Iban amat mih sida iya Iban, agi mayuh leka jaku enggau budaya Iban ke patut dipelajar, enda ngilah baka orang Melayu ti belajarka jaku Melayu di sekula. Baka nya mega pengajar enggau penguasa sekula patut meri peluang ngagai nembiak nguji pengelandik iya. Nya alai, nembiak enda patut ditagang ari belajarka jaku Iban sereta meresa pengulih diri.
Program baka tu endang patut bendar diteruska dikena nentuka nembiak besedia agi napi peresa SPM, seraya ke ngenegapka identiti diri sereta waris jaku Iban.
Sanding penemu:
Utusan Borneo 6 Oktober 2025
Tiada ulasan:
Catat Ulasan