Bauchar bup pugu nyediaka librari diri empu
Nitihka surat berita (Berita Harian) inisiatif Baucher Bup MADANI ti beungkus RM100 ungkup nembiak palan pelajar tinggi (IPT) bisi dipejalaika nyentuk ngagai 12 Disember tu. Iyai meri penguntung ngagai urung 500,000 iku nembiak di universiti perintah enggau peribit (UA), politeknik enggau kolej komuniti.
Inisiatif tu sebagi ari komitmen perintah ti seruran dipejalaika dikena ngelempungka tating belanja nembiak sereta nanam budaya macha ba raban nembiak rebak baru sereta nyadika pelasar ‘one-stop MySiswaPlace.’ Iya nyediaka lebih sejuta topik bup nyengkaum bup fizikal enggau e-bup ari lebih 250 penerbit.
Taja pia, penanggul ke bendar ukai semina proses nebus tauka meli bup aja, tang baka ni iya digaga nyadi peneleba macha ti tau meri penguntung ngagai nembiak universiti. Statistik taun nyin tadi chukup ngalitka ati lebuh lebih 7.8 juta bup udah ditebus enggau penyampau rega semua iya sepenyampau RM286 juta.
Siti pansik empas ari Book City Corporation (PKB) bisi tetemuka 94.5 persin nembiak ngaku baucher nya udah mujur nerenakka pengerindu macha, lalu 97.5 persin agi madahka nya amat meri penguntung kelebih agi ngagai ruang bilik ke kurang penatai pemisi.
Penyampau tu ngayanka respons ti nyelai, tang iya patut diperati enggau silik agi dikena nentuka pengada orang rebak baru ti bepenemu kritikal lebuh bup tu dibeli sereta dibacha sida enggau penuh pengangkun.
Baucher bup enda patut semina dikena meli bup popular enggau kasual aja laban nembiak ba peringkat tu benung ba renggat nempa idealisme, nilai nyadi tuai enggau kompas intelektual sida.
Nya alai, pengawa milih kereban bacha ukai semina seriran enggau bidang pelajar aja, tang mega ngemayuhka pemereti senentang pekara ba bidang sosial, ekonomi, sejarah enggau tamadun mensia.
Pansik Profil Macha Malaysia 2022/2023 udah ngayanka rayat Malaysia macha pukul rata 24 iti bup setaun. Tu madahka bisi nambah enti dibanding enggau 15 iti bup dalam taun 2014. Taja pia, timpuh jam bekenaka media rama jauh besai agi ari pengawa macha.
Nembiak universiti kemaya hari tu benung napi penerang ti kelalu mayuh lalu bechampur gaul enggau berita pelesu, teori konspirasyen sereta sensasionalisma ti murah. Ba jeman pengudah pemendar, pengawa milih kereban bacha ti manah nya ulih nyadika ubat ngagai runding, ngelatih diri dikena beratika fakta, nimbang penemu sereta nulak propaganda. Nya alai baucher RM100 tu ulih nyadika dinding ti ulih meri empas besai enti dikena enggau manah.
Bup ke dichelak agi relevan kemaya hari tu taja pan gajet enggau e-bup majak dikerinduka mensia mayuh. Mayuh orang pechaya peneleba macha bup fizikal lebih befokus, nyamai dipeda sereta ninggalka peragam ati ti dalam agi ari skrin digital.
Nengah duit RM100, nembiak universiti ulih berengkah ngaga librari mini diri empu ti ukai semina nyadi pun penyanding penemu, tang mega nyadika kelai pejalai pelajar sida. Taja pan nadai salah sida milih e-bup, tang sekurang-kurang iya siti salin bup ti dichelak patut nyadika pugu koleksyen dikena sida macha enggau bebendar. Tu besenutuk bendar enggau tema Pesta Bup Antarabansa Kuala Lumpur (PBAKL) 2025 ti berambaika leka jaku Reading, Leading laban iya mega ngemeratka bup saintifik nyadika tulang belakang nempa mensia mayuh ti kompetitif.
Nembiak universiti ke beranakka puku nengah baucher bup dalam karya tauka kalih saintifik ti beguna deka bulih lebih ari semina penerang laban sida benung ngansahka tanda kaul intelektual sida sereta ngirai diri nyadi tuai ti bekuasa jemah ila.
Ba dunya akademik kediatu mensia mayuh balat bendar diiri enggau teknologi pemintar tiru (AI). Nya alai, pengawa macha enggau dalam enda ulih diganti enggau macha penerang kedut tauka nengah chara begigaka penerang enggau jampat. Bup endang agi nyadika ruang dikena meretika isu ti kompleks enggau pintar sereta silik agi.
Nembiak ke milih bup sanding primari, karya runding kemaya hari enggau bup bacha rama baka biografi tauka novel ti bisi reti deka mai pulai ukai semina lambar ti dichelak tang peneleba, penemu enggau nilai ti ulih nempa diri sida.
Lebuh koleksyen mini tu majak nambah ari taun ke taun, iya ukai agi pasal baucher bup, tang librari personal ti nyadi saksi penumbuh intelektual nembiak.
Nya alai disimpulka ditu, Baucher Bup MADANI tu endang amat api penemu ti ditungkunka perintah. Taja pia, api nya semina deka terus mau enti bala nembiak empu angkunka iya enggau penuh penyedar, ngembuan pengerindu sereta bebendar.
Sanding Penemu:
Berita Harian, 24 September 2025
Bernama, 27 Ogos 2025
Kementerian Pendidikan Tinggi, Infografik 2025
Sites.google.com > probacamy
www.kotabuku.my
Tiada ulasan:
Catat Ulasan