Sapa ke ngelala sereta kala gawa enggau aku sereta sida ke kala macha blog aku tentu nemu aku nya endang ngembuan pengerindu nulis. Aku bisi dua iti blog iya Blog Tempalai Kenang enggau Blog Arus Kenang . Ba Blog Tempalai Kenang aku bisi negrichau 849 iti karang lalu ba Blog Arus Kenang aku bisi nulis 90 iti artikel.
Nulis ba blog begunaka tikas pengeransing enggau mood ti tinggi, sama baka nulis novel tauka jerpan ti chukup manah. Ngetanka momentum enggau pengeransing ngeblog ukai pengawa ti mudah.
Penulis profesional pan kekadang betapi enggau penanggul tu lalu suah lenyau pengeransing tauka penemu deka neruska pengawa nulis. Pia mega aku ke semina ngerichau sengapa kada dikena aku bekunsi penemu kelebih agi ngagai bala nembiak ke bisi ngambi mata pelajar Bahasa Iban di sekula ngelama tu.
Aku endang rindu nulis ari suba, ari sekula ke bendar ukai semina kreatif aja tang nyengkaum artikel senentang isu enggau realiti pengidup. Nyadi siku introvert, nya ngasuh aku ulih berandau enggau mudah agi, ulih mantai penemu enggau mayuh. Taja pia, diatu udah chukup masuk ke dua taun nadai nulis utai kreatif tang ukai reti nya kau udah kelupa senentang sekeda isu ke nyadi kemaya hari. Aku irau ati laban nangika aku muai pengerindu nya, lalu lenyau penemu nulis kreatif sereta enda ulih diambi pulai. Kenyau ari pun taun tu 2024, aku baka ke badu nulis ba alam maya, tauka kebendar iya sebarang bansa karang kelebih agi ba blog aku empu.
Lebuh pengidup meri nuan buah limau lalu mali nyadi ai limau munyika ku jaku English madahka aku berunding deka ngalap dulu ari nulis enda lama ngichaka nulung aku napi penanggul aku ngelama tu. Ngelama belelak enda lama, aku bisi nulis pasal sekeda penanggul din, ditu dia tang nya ukai amat selampur tang semina ba media rama baka whatsapp enggau telegram.
Keterubah iya, aku berunding deka begunaka awak sebulan dua dikena napi penanggul kediatu lalu aku deka mulaika diri ngagai pengawa nulis baka selama.
Diatu amat aku enda mansutka artikel ninting hari tang indah ba maya timpuh regas (peak period), aku enda ulih nulis lebih ari dua tauka pemadu mayuh tiga iti artikel seminggu.
Taja pan runding enda pansut ninting hari tang aku nguji nulis mega ninting hari. Penemu amat mayuh, ke bendar nyau bisi lebih 300 iti perambu ti bedau tembu ditu enggau din. Arapka udah aku ngemansutka karang tu ba blog aku sekali tu lalu ngujungka aku ulih terus mantaika penemu aku baka ke ngelama tu.
Nya aja dulu.
Tiada ulasan:
Catat Ulasan