Untung Naruh Duit

 

Untung Naruh Duit

Naruh duit nya siti ari pengawa  ti chukup manah lalu ulah ti manah baka nya patut bendar diterenak ngagai genap individu maya sida agi besekula. Ba karang aku sekali aku sigi milih leka jaku naruh tu dikena aku laban leka jaku ti diperatika aku jarang dikena nembiak kemaya hari tu. Leka jaku naruh sebaka reti nyimpan lalu naruh duit dalam tabung nya sama reti enggau rambai jaku   “nyimpan duit dalam tabung” lalu iya suah agi dikaitka enggau pengawa nyimpan duit keretas tauka syiling. Pengawa tu meri  empas positif disempulang enggau mayuh penguntung bukai asil ari duit ke ba  dalam tabung nya.

Naruh duit kemaya hari tu ulih dipejalaika ngena chara fizikal enggau chara internet banking bepanggai ba  fasiliti enggau pengelantang individu. Mayuh macham penguntung ari pengawa naruh duit baka ke dirintaika di baruh tu:-

Nerenak ulah enggau ajar manah

Ulah bekelimat lalu enda rua enggau belanja nya ulih nerenak pengawa betaruh tauka besimpanka duit. Enti bisi  tanggungjawab deka naruh duit ba diri empu, reti nya tetiap sen duit ti dipelanjaka tentu diperundingka enggau manah. Ambika banding, berapa penyampau duit ke patut dibelanjaka kitai lalu berapa ke patut ditaruh dalam tabung sereta berapa agi dikena bebelika barang keguna ninting hari, tetiap bulan bepelasar ke utai ti patut agi.

Ajar manah tu enti dikembuan sereta dikemeranka diri sebilik ulih mai empas positif ngagai penatai duit sida sebilik. Ulah ke betanggungjawab, bekelimat sereta enda rua enggau belanja ulih dipatih dalam pengidup besehari-sehari lalu iya ukai semina mungkur duit tang mega  nyengkaum moral enggau personaliti diri sebilik.

Ngirai Diri Deka Nampung Pelajar

Enti bisi bisi duit disimpan dalam tabung siku-siku nembiak sekula nya kiraka iya udah besedia deka nampung pelajar ke IPTA tauka ke IPTS. Duit tabung dikena mayar yuran belajar sepemanjai timpuh belajar lalu enda bangat bepanggai ba duit jali tauka sekulasip ti disediaka perintah/ Kompeni ti bisi kaul enggau perintah (GLC).

Nampung pelajar ke Universiti tauka Kolej tentu begunaka duit kelebih agi maya ngerejistaka diri sebedau bulih duit jali pelajar ungkup sida ke enda tentu bisi duit ba  tabung tang sekurang-kurang iya bisi kena nampung keguna dulu.

Pun Penatai Duit

Duit tabung dipasukka ke dalam saham-saham amanah/ unit trust/ koperasi. Asil ari simpan tauka tabung nya kitai deka  bulih dividen ninting taun finansial ke alai  duit nya diperanakka. Kiraka enda berasai duit tabung deka betambah ari taun ke taun.

Duit Simpan/ Tabung ke Penabat Maya Penusah

Duit tabung ulih dikena enti bisi penusah enggau pekara bukai ti enda disadang nyadi sereta begunaka duit. Ambika chunto, nyaup bala kaban belayan ke bisi tasah baka bah, pemati, eksiden enggau ti bukai.

Ngelempungka Tanggung Pengawa Apai Indai

Asil tabung ulih dikena mantu ngelempungka tanggung pengawa apai indai laban duit nya dikena bebelika kereban pelajar baka bebayarka yuran sekula, meli bup teks, kereban sukan enggau ke bukai. Apai indai mesti temegah ati sereta beterima kasih ngagai anak sida laban bisi ngembuan tanggungjawab enggau rukun pendiau deka  mantu diri sebilik.

Pengawa Nabung Nyadika Budaya

Pengawa naruh duit dalam tabung ulih nyadika budaya ba diri sebilik. Budaya naruh duit dalam tabung ulih diterenak ngagai bala anak kenyau sida agi mit. Lebuh pengawa tu udah masai digaga ba diri sebilik dia serak ke dudi tentu deka nitih ulah ke manah tu. Tambah mega pengawa tu pengawa ti badas lalu ulih dikena ngajar displin ngagai bala anak.

Simpan Ungkup Jemah Ila

Duit ti disimpan deka diguna maya jemah ila, ari belajar nyentukka sida udah beruang bilik. Duit nya ulih dikena maya nampung pelajar, bekereja, bejadi melaki bini, ngaga tauka meli rumah enggau pengawa bukai ti nangkan nya.

Penutup

Pengawa naruh duit dalam tabung nya pengawa ti chukup badas lalu iya patut ditarakka ngagai bala anak/ nembiak kenyau ari mit ngambika sida bisi pun penatai duit berengkah ari sida agi mit.  Pengawa tu ulih ngajar pemesai reti duit sereta nemu ngena duit nya enggau chara ti betul. Bala apai indai enggau sida perintah patut meri kerejasama enggau peransang ba pengawa naruh duit dalam tabung, ngambika banding baka kerejasama enggau bank, kimpin nengah media masa, media sosial tauka media chelak meransang orang naruh duit sereta pengawa ke sama enggau nya munyi ke jaku tuai, simpan “mit-mit lama-lama nyadi bukit”.

Glossari:

kompeni bekaul enggau perintah – government linked company (GLC)

diperanakka - dilaburkan