Mutarka isu nengkua 3M nyeliah nembiak ningkilka diri ari sistem & alah pengarap ke diri empu

 

Mutarka isu nengkua 3M nyeliah nembiak ningkilka diri ari sistem & alah pengarap ke diri empu

Sistem pelajar bansa endang ngemeratka pengelandik macha, nulis enggau ngira tauka tebalan agi dikumbai 3M. 3M tu lebih agi ngagai nembiak Taun Satu, Dua enggau Tiga. Pengelandik 3M sigi beguna bendar dikena nentuka tikas pelajar nembiak datai ngagai peringkat ti nangkannya. Nembiak ke enda mujur nengkua pengelandik tu dinangika ulih ngenataika empas  psikologi ngagai sida empu lalu siti ari empas iya nya sida nadai ngembuan pengarap ngagai diri empu.

Sebedau COVID-19 ngerekai, raban penguasa sekula endang udah irau ati meda bala nembiak sida ke nadai pengulih ba 3M. Enti diperatika ari sukut rama, bala pengajar endang ngarapka mayuh nembiak ke tama Taun Satu udah ulih nengkua pugu pengelandik tu.

Pekara tu seriran enggau pemayuh sekula ungkup nembiak ke berumur empat ngagai enam taun enda ngira sekula nya sekula perintah tauka sekula prebet. Sekula baka nya endang nyikap nembiak sida enggau pengelandik 3M sebedau sida nyingkang tama ke Taun Satu. Sida sigi patut udah disikap enggau pelajar tumu dikena sida ngiraika diri masuk ke sistem ti besai agi ba tikas sekula primari.

Tang ari sukut realiti,  pelaba aku mayuh ari kitai bela nemu nama utai ke nyadi ngagai sekeda nembiak kelebih agi bala pengajar empu. Agi bisi nembiak ke enda tejapaika 3M ketegal mayuh kebuah. Nembiak ke enda nemu macha ABC sereta niap 123. Hal ti nyadi tu balat agi ngirauka ati lebuh COVID-19 ngerekai ke menua kitai.

Berindik ari pengawa ti nagang pengerekai penyakit tu, Atur Perintah Mindah Betagang (PKP) udah dipejalaika kena 18 Mac 2020 lalu ngujungka institusyen pelajar mega  ditutup. Semua institusyen pelajar ti mungkur sekula perintah enggau sekula prebet, nyengkaum sekula harian, sekula berasrama penuh, sekula antarabansa enggau ti bukai bela nadai sesi belajar betunga mua.

Hal tu mih entara kebuah ke ngasuh bala nembiak enda ulih nengkua 3M lalu ngirauka ati orang ke betanggung pengawa senentang pekara tu.  Nembiak maya tu mega dipejal ngipakka diri enggau chara belajar ti baru, iya nya ngajar enggau belajar di rumah (PdPR).

Enti disidi Manual PdPR Versyen Dua ti dikeluarka Opis Menteri Pelajar (KPM), Genteran 5.1 bisi nyebut 'tiada murid tercicir dalam pembelajaran' tauka nadai nembiak deka tinggal dalam pelajar. Tang, nama dih utai ke amat nyadi?

Kes nembiak ke ningkilka diri bisi direkodka, ambika banding maya bulan Disember 2021 bisi diripotka di Johor, 20 persin ari 130,000 nembiak tikas tu nadai pengulih ba pengelandik 3M. Nembiak nadai ati deka belajar ketegal skrin peranti ti dikena nya kelalu lama ditambah mega enggau rampa alai belajar ti enda kondusif.

Iya ti balat agi ngirauka ati iya nya lebuh nembiak ke endang enda ulih belajar ketegal penanggul ekonomi. Hal tu meri empas negatif ngagai tikas pengulih 3M nembiak sida. Kebuah pia, laban sida napi penusah meretika undan isi pelajar.

Tu ngujungka nembiak ke enda mujur teulihka pugu pengelandik tu deka balat agi napi mayuh macham empas  negatif ari aspek psikologi. Sida ngasaika diri baruh, dipulauka bala bakih sereta enda nangkap utai ke dipelajar ketegal enda teulihka pengelandik 3M. Tu ngujungka sida nadai ati agi deka belajar.

Penanggul tu mih ke rarat ngagai isu ke balat agi ngirauka ati iya nya isu nembiak ke ningkilka diri ari belajar. Dalam hal tu, sida sekula enggau apai indai patut nembuan tanggung pengawa kediri empu dikena mutarka penanggul rama tu. Raban sekula ulih numbuhka komiti dikena merambu strategi  ti silik agi, ambika chunto ngaturka kem literasi 3M. Apai indai mega patut sama-sama begerempung ngayan sereta matih pengelandik 3M ngagai anak sida kenyau ari mit.

Enti disimpulka enggau jaku puntul, isu nengkua pengelandik 3M enda patut dipeda sepiak mata aja laban ba era globalisasyen kemaya hari tu, bidang pelajar patut dikemeratka agi dikena mutarka isu baka buta urup, buta lumur enggau isu badu sekula. Iya mega ngembuan tuju  deka ngadaka serak nembiak rebak baru ke bepenemu sereta ngembuan sergah diri ke mega ulih meri penguntung ngagai pengelantang bansa enggau menua.

Glosari:

nengkua - menguasai

ngipakka diri - menyesuaikan diri

rampa alai belajar – persekitaran pembelajaran

undan isi pelajar – kandungan isi pelajaran

pugu pengelandik – asas kemahiran

nadai ati agi deka belajar – tidak berminat dalam pelajaran