Untung Naruh Duit

 

Untung Naruh Duit

Naruh duit nya siti ari pengawa  ti chukup manah lalu ulah ti manah baka nya patut bendar diterenak ngagai genap individu maya sida agi besekula. Ba karang aku sekali aku sigi milih leka jaku naruh tu dikena aku laban leka jaku ti diperatika aku jarang dikena nembiak kemaya hari tu. Leka jaku naruh sebaka reti nyimpan lalu naruh duit dalam tabung nya sama reti enggau rambai jaku   “nyimpan duit dalam tabung” lalu iya suah agi dikaitka enggau pengawa nyimpan duit keretas tauka syiling. Pengawa tu meri  empas positif disempulang enggau mayuh penguntung bukai asil ari duit ke ba  dalam tabung nya.

Naruh duit kemaya hari tu ulih dipejalaika ngena chara fizikal enggau chara internet banking bepanggai ba  fasiliti enggau pengelantang individu. Mayuh macham penguntung ari pengawa naruh duit baka ke dirintaika di baruh tu:-

Nerenak ulah enggau ajar manah

Ulah bekelimat lalu enda rua enggau belanja nya ulih nerenak pengawa betaruh tauka besimpanka duit. Enti bisi  tanggungjawab deka naruh duit ba diri empu, reti nya tetiap sen duit ti dipelanjaka tentu diperundingka enggau manah. Ambika banding, berapa penyampau duit ke patut dibelanjaka kitai lalu berapa ke patut ditaruh dalam tabung sereta berapa agi dikena bebelika barang keguna ninting hari, tetiap bulan bepelasar ke utai ti patut agi.

Ajar manah tu enti dikembuan sereta dikemeranka diri sebilik ulih mai empas positif ngagai penatai duit sida sebilik. Ulah ke betanggungjawab, bekelimat sereta enda rua enggau belanja ulih dipatih dalam pengidup besehari-sehari lalu iya ukai semina mungkur duit tang mega  nyengkaum moral enggau personaliti diri sebilik.

Ngirai Diri Deka Nampung Pelajar

Enti bisi bisi duit disimpan dalam tabung siku-siku nembiak sekula nya kiraka iya udah besedia deka nampung pelajar ke IPTA tauka ke IPTS. Duit tabung dikena mayar yuran belajar sepemanjai timpuh belajar lalu enda bangat bepanggai ba duit jali tauka sekulasip ti disediaka perintah/ Kompeni ti bisi kaul enggau perintah (GLC).

Nampung pelajar ke Universiti tauka Kolej tentu begunaka duit kelebih agi maya ngerejistaka diri sebedau bulih duit jali pelajar ungkup sida ke enda tentu bisi duit ba  tabung tang sekurang-kurang iya bisi kena nampung keguna dulu.

Pun Penatai Duit

Duit tabung dipasukka ke dalam saham-saham amanah/ unit trust/ koperasi. Asil ari simpan tauka tabung nya kitai deka  bulih dividen ninting taun finansial ke alai  duit nya diperanakka. Kiraka enda berasai duit tabung deka betambah ari taun ke taun.

Duit Simpan/ Tabung ke Penabat Maya Penusah

Duit tabung ulih dikena enti bisi penusah enggau pekara bukai ti enda disadang nyadi sereta begunaka duit. Ambika chunto, nyaup bala kaban belayan ke bisi tasah baka bah, pemati, eksiden enggau ti bukai.

Ngelempungka Tanggung Pengawa Apai Indai

Asil tabung ulih dikena mantu ngelempungka tanggung pengawa apai indai laban duit nya dikena bebelika kereban pelajar baka bebayarka yuran sekula, meli bup teks, kereban sukan enggau ke bukai. Apai indai mesti temegah ati sereta beterima kasih ngagai anak sida laban bisi ngembuan tanggungjawab enggau rukun pendiau deka  mantu diri sebilik.

Pengawa Nabung Nyadika Budaya

Pengawa naruh duit dalam tabung ulih nyadika budaya ba diri sebilik. Budaya naruh duit dalam tabung ulih diterenak ngagai bala anak kenyau sida agi mit. Lebuh pengawa tu udah masai digaga ba diri sebilik dia serak ke dudi tentu deka nitih ulah ke manah tu. Tambah mega pengawa tu pengawa ti badas lalu ulih dikena ngajar displin ngagai bala anak.

Simpan Ungkup Jemah Ila

Duit ti disimpan deka diguna maya jemah ila, ari belajar nyentukka sida udah beruang bilik. Duit nya ulih dikena maya nampung pelajar, bekereja, bejadi melaki bini, ngaga tauka meli rumah enggau pengawa bukai ti nangkan nya.

Penutup

Pengawa naruh duit dalam tabung nya pengawa ti chukup badas lalu iya patut ditarakka ngagai bala anak/ nembiak kenyau ari mit ngambika sida bisi pun penatai duit berengkah ari sida agi mit.  Pengawa tu ulih ngajar pemesai reti duit sereta nemu ngena duit nya enggau chara ti betul. Bala apai indai enggau sida perintah patut meri kerejasama enggau peransang ba pengawa naruh duit dalam tabung, ngambika banding baka kerejasama enggau bank, kimpin nengah media masa, media sosial tauka media chelak meransang orang naruh duit sereta pengawa ke sama enggau nya munyi ke jaku tuai, simpan “mit-mit lama-lama nyadi bukit”.

Glossari:

kompeni bekaul enggau perintah – government linked company (GLC)

diperanakka - dilaburkan

 

 

Mutarka isu nengkua 3M nyeliah nembiak ningkilka diri ari sistem & alah pengarap ke diri empu

 

Mutarka isu nengkua 3M nyeliah nembiak ningkilka diri ari sistem & alah pengarap ke diri empu

Sistem pelajar bansa endang ngemeratka pengelandik macha, nulis enggau ngira tauka tebalan agi dikumbai 3M. 3M tu lebih agi ngagai nembiak Taun Satu, Dua enggau Tiga. Pengelandik 3M sigi beguna bendar dikena nentuka tikas pelajar nembiak datai ngagai peringkat ti nangkannya. Nembiak ke enda mujur nengkua pengelandik tu dinangika ulih ngenataika empas  psikologi ngagai sida empu lalu siti ari empas iya nya sida nadai ngembuan pengarap ngagai diri empu.

Sebedau COVID-19 ngerekai, raban penguasa sekula endang udah irau ati meda bala nembiak sida ke nadai pengulih ba 3M. Enti diperatika ari sukut rama, bala pengajar endang ngarapka mayuh nembiak ke tama Taun Satu udah ulih nengkua pugu pengelandik tu.

Pekara tu seriran enggau pemayuh sekula ungkup nembiak ke berumur empat ngagai enam taun enda ngira sekula nya sekula perintah tauka sekula prebet. Sekula baka nya endang nyikap nembiak sida enggau pengelandik 3M sebedau sida nyingkang tama ke Taun Satu. Sida sigi patut udah disikap enggau pelajar tumu dikena sida ngiraika diri masuk ke sistem ti besai agi ba tikas sekula primari.

Tang ari sukut realiti,  pelaba aku mayuh ari kitai bela nemu nama utai ke nyadi ngagai sekeda nembiak kelebih agi bala pengajar empu. Agi bisi nembiak ke enda tejapaika 3M ketegal mayuh kebuah. Nembiak ke enda nemu macha ABC sereta niap 123. Hal ti nyadi tu balat agi ngirauka ati lebuh COVID-19 ngerekai ke menua kitai.

Berindik ari pengawa ti nagang pengerekai penyakit tu, Atur Perintah Mindah Betagang (PKP) udah dipejalaika kena 18 Mac 2020 lalu ngujungka institusyen pelajar mega  ditutup. Semua institusyen pelajar ti mungkur sekula perintah enggau sekula prebet, nyengkaum sekula harian, sekula berasrama penuh, sekula antarabansa enggau ti bukai bela nadai sesi belajar betunga mua.

Hal tu mih entara kebuah ke ngasuh bala nembiak enda ulih nengkua 3M lalu ngirauka ati orang ke betanggung pengawa senentang pekara tu.  Nembiak maya tu mega dipejal ngipakka diri enggau chara belajar ti baru, iya nya ngajar enggau belajar di rumah (PdPR).

Enti disidi Manual PdPR Versyen Dua ti dikeluarka Opis Menteri Pelajar (KPM), Genteran 5.1 bisi nyebut 'tiada murid tercicir dalam pembelajaran' tauka nadai nembiak deka tinggal dalam pelajar. Tang, nama dih utai ke amat nyadi?

Kes nembiak ke ningkilka diri bisi direkodka, ambika banding maya bulan Disember 2021 bisi diripotka di Johor, 20 persin ari 130,000 nembiak tikas tu nadai pengulih ba pengelandik 3M. Nembiak nadai ati deka belajar ketegal skrin peranti ti dikena nya kelalu lama ditambah mega enggau rampa alai belajar ti enda kondusif.

Iya ti balat agi ngirauka ati iya nya lebuh nembiak ke endang enda ulih belajar ketegal penanggul ekonomi. Hal tu meri empas negatif ngagai tikas pengulih 3M nembiak sida. Kebuah pia, laban sida napi penusah meretika undan isi pelajar.

Tu ngujungka nembiak ke enda mujur teulihka pugu pengelandik tu deka balat agi napi mayuh macham empas  negatif ari aspek psikologi. Sida ngasaika diri baruh, dipulauka bala bakih sereta enda nangkap utai ke dipelajar ketegal enda teulihka pengelandik 3M. Tu ngujungka sida nadai ati agi deka belajar.

Penanggul tu mih ke rarat ngagai isu ke balat agi ngirauka ati iya nya isu nembiak ke ningkilka diri ari belajar. Dalam hal tu, sida sekula enggau apai indai patut nembuan tanggung pengawa kediri empu dikena mutarka penanggul rama tu. Raban sekula ulih numbuhka komiti dikena merambu strategi  ti silik agi, ambika chunto ngaturka kem literasi 3M. Apai indai mega patut sama-sama begerempung ngayan sereta matih pengelandik 3M ngagai anak sida kenyau ari mit.

Enti disimpulka enggau jaku puntul, isu nengkua pengelandik 3M enda patut dipeda sepiak mata aja laban ba era globalisasyen kemaya hari tu, bidang pelajar patut dikemeratka agi dikena mutarka isu baka buta urup, buta lumur enggau isu badu sekula. Iya mega ngembuan tuju  deka ngadaka serak nembiak rebak baru ke bepenemu sereta ngembuan sergah diri ke mega ulih meri penguntung ngagai pengelantang bansa enggau menua.

Glosari:

nengkua - menguasai

ngipakka diri - menyesuaikan diri

rampa alai belajar – persekitaran pembelajaran

undan isi pelajar – kandungan isi pelajaran

pugu pengelandik – asas kemahiran

nadai ati agi deka belajar – tidak berminat dalam pelajaran

 

Ubah klimet tauka resa klimet?

 

Ubah klimet tauka resa klimet?

Sapa ke deka madah ngagai kitai semampai orang ke betanggung pengawa ngaga pemutus penemu ti nemban senentang rampa menua? Nya alai, pengirau ati orang mayuh kemaya hari lebih befokus ngagai pengidup marin di tasik enggau tasik besai lalu nama-nama utai bukai ke ulih nyaup ngelakuka biodiversiti nya.

Nya kebuah, ba kenang aku sekali tu aku nguji ngupas isu ti bisi kaul enggau ai sereta empas iya ngagai pengidup sereta penatai pemisi kitai.

Pekara keterubah ti patut disebut iya nya "ubah klimet" ke bendar nya ba penemu aku nya "resa klimet" ti suah agi nyadi.

Endang tusah bendar deka diperetika baka mega kitai nya empu ke enda meretika pemesai penanggul tu lalu ubah ke majak nyadi ngelingi kitai. Nama kebuah agi mayuh ari kitai ngasaika kitai diau ba tempat ti likun lalu ulih ngerarikan diri ari kudi ke nyadi?

Tang pengasai mensia mayuh nya nadai ulih dibuktika enggau fakta. Ambika banding,  bah ke ngampuh Mumbai dalam taun 2005, enggau Chennai dalam taun 2015, udah  mai penusah ngagai semua orang ba bandar di India lalu mungkur semua orang, enda ngira sida nya kaya tauka miskin, lemi tauka iya ti bekuasa. Tamadun bandar moden nyau rerengkap ngerengkap semua orang ke diau dalam genturung nya. Reti nya semakin maju pengidup kitai, semakin enda temu tunga mega utai ke nyempulang pemansang nya.

Kemaya hari tu, pengangat global balat bendar dikenangika semua mensia di dunya lalu tu ukai utai ke ulih diputarka enggau chara nukarka injin penyelap tauka air condition ngagai iya ke manah agi. Pengangat global ngelelaka lapis ais kutub, ngasuh tikas ai tasik majak tinggi, ngampuh mayuh pasar enggau nengeri ke semak tebing tasik, mai kemarau enggau lapar pungkang nyadi, lalu ngubah landskap politik menua ke enda ulih diambi pulai baka selama. Taja pia, semua utai tu endang nadai dalam agenda perintah ke megai sesebengkah menua. Kitai semampai nguji nyeliah sereta nyangkal utai ke nyadi tu.

Asia, nya pusat ngagai empas pengangat global lalu baka nya mega penyampau penusah tu ke udah nyadi dia. Enti kitai betungkapka pekara tu enggau silik agi  dia kitai beratikaka penyampau orang ke kena penusah tu ba selampur planet tu sigi mayuh nya betugung ba menua di Asia.

Siti chunto iya nya ba Delta Bengal ba Bangladesh enggau  setengah agi menua sepiak ari Bengal Barat. Tu sebengkah ari menua ke dedat enggau mensia di dunya. Lebih 250 juta orang diau natam endur ke semina seperempat saiz Nigeria.

Emperan Bengal ke seruran diampuh bah enda patut tengelam ngenyampat pulau Pasifik Tuvalu. Tang  penyampau tubuh rayat Tuvalu kurang ari 10,000, tang bah ke ngampuh sebagi ari pulau Bhola di Bangladesh ngujungka 500,000 iku orang pindah ke palan ke selamat agi. Ketegal penyampau tubuh ke mayuh nya, kudi menua ke pengabis balat kala nyadi ba Delta Bengal.

Tikas ai tasik ke niki semina dua meter mega ulih ngasuh kira-kira 6,000 kilometer persegi ba kandang endur ke baruh ti ami amat nya, baka Sunderbans diampuh bah. Tu ngujungka bejuta-juta iku mensia pindah sereta pansut ari endur ti enda likun nya ke tanah ti tinggi agi. Nambahka nya mega, nadai perintah – baik nya India tauka Bangladesh ulih nagang gelinah pasang surut bala mensia tu ke ngelarika diri.

Nya alai, ubah klimet ti majak nyadi tu endang mai penusah ti balat ukai semina ngagai endur ba tebing tasik tang mega ngagai menua pesisir ke alai bejuta-juta nyawa enggau daya idup mensia udah dikeruga ketegal kemarau bemusin, bah enggau gaya hari ke ekstrem.

Taja pan pekara tu enda manah, iya dipeda keredi ketegal krisis ai ti majak nyadi enggau jampat di Asia. Mayuh sungai ti nankan penyampau tubuh peranak menua  baka China, Asia Selatan enggau Asia Tenggara semua nya bepun ari Himalaya tauka di Tibet. Ai ti disimpan dia betukuh  tekang ais glasier lalu nya mih ke  ngasuh 47 persin peranak dunya peridi. Tang menua tu balat angat dua kali jampat agi ari kadar global, lalu nitihka sekeda  anggar madahka satu petiga deka lenyau maya taun 2050.

Lebuh glasier Himalaya majak lela, variasyen pengararat sungai ba emperan deka betambah, enggau tikas pengabis baruh ti enda kala nyadi sebedau tu maya  musin kemarau sereta bah besai maya musin panas. Pengidup setengah bilion orang di Asia Selatan mega berisiko.

Isu rampa menua seruran dipeda ari sukut langkar kereja ekonomi sereta dikira ngena analisis kos-penguntung. Perintah antarabansa meda iya nengah chara tu lalu ngena perspektif sida nya ba orang bukai. Taja pia, pekara ti ngasuh gaga ati iya nya lebuh mayuh raban aktivis beserekang penemu senentang isu nya lalu ngena sukut penemu sida ti bemoral agi.

Siku orang ke tebilang tampak rita di India suba benama Mahatma Gandhi. Kitai nemu Mahatma Gandhi nya digela apai menua India, berambunkan nyawa diri, roh enggau nyawa, dalam pengawa iya nguji nagang India ari nerima guna model industri Barat ungkup ekonomi menua sida tang pengawa iya enda mujur.

Mayuh menua di dunya nadai ngaga pemutus penemu ti betul sereta nemban. Uji kitai ngenang utai ke udah nyadi baka pengawa ke bechiping  ti nyata bendar nyadi ba sukut pelajar, gaji sereta disempulang ke enggau kudi ekologi ke semampai deka nyadi. Sapa madah kitai ngelama tu udah ngaga pemutus penemu ti betul semadi mih orang nya beli? Tempap dada lalu tanya diri empu!