ARUS KENANG

 

Iklan 'bekuasa' nguingka runding raban pengguna

PENGIKLAN ngembuan tuju ti besai dalam pengawa  bejualka sesebengkah produk kelebih agi ba era kemaya hari tu. Iklan mega bisi bekenaka mayuh leman pampang komunikasyen. Ba kenang kesekali tu aku nguji mai kitai bekenangka pasal pengawa iklan tauka bisi ga disebut sekeda orang nya pemandang bantai, tang ba kenang aku sekali tu aku deka ngena leka jaku iklan ti diinjau terus ari jaku Melayu.

Enti dibanding enggau dulu suba  pengawa ti bekaul enggau iklan tu bisi tusah mimit deka diterima mayuh bengkah lapis komuniti tang sehari tu iya ulih ngaturka diri lebih ari ke udah-udah, itah ulih dituju terus ngagai raban ti ditagaka. Iklan ke bendar nya sebengkah utai kayam minda. Iya nya mih kereban ti pengabis bekuasa, ulih ngumbuk pengguna sereta ulih ngenataika pesan ti nadai lapat ngena mayuh macham gerinek.

Pengiklan kemaya hari ulih dipeda ba dini-dini endur lalu iya mega mudah agi ngayanka diri ngagai mensia mayuh nengah internet. Ketegalka pemesai guna iya ba komuniti kemaya hari dia orang balat bendar pechaya ke pengawa ti bekaul iklan sereta chap sesebengkah barang nya jauh beguna agi ari produk nya empu.

Ba peringkat keterubah, iklan nya langkah rapat ti pengabis manah dikena ngelakuka produk. Enti bansa produk nya nadai ditabur ngagai mensia mayuh tentu deka tusah sesebengkah barang nya dijual. Tentu  mayuh orang nadai nemu barang nya bisi dijual di pasar nama agi enti iya pan besemekih enggau produk bukai ti nyau deka sebaka pendiau enggau barang nya. Nya kebuah pengawa iklan tu udah nyadi pengawa ti balat mai penguntung.

Taja pan pia, iklan mega ulih nguing runding sereta emosyen pengguna. Elemen sinu, baban, gaga, lantang tauka tusah ti dibantaika ba iklan selalu iya ulih ngeruga ati mensia mayuh. Ambika banding dalam iklan Aidilfitri PETRONAS mensia mayuh sigi semampai nganti iklan nya ninting taun, nganti cherita enggau tema ti deka dibantaika sida.

Iklan ti mujur sereta bekuasa nya iklan ti ulih ngeruga sereta negu emosyen genap iku orang. Iya ulih ngerempah runding sereta nimbang pemutus penemu individu sereta ngembuan kuasa umbuk. Ambika banding, ba sebuah kompeni kosmetik nguna model ti tebilang sereta bajik laban ku sida iya ulih narit pengerindu pengguna taja pan iya ke bendar nya nyangka individu pengguna nya endang sigi bajik lalu nadai mega begunaka produk dikena nganta.

Ke bendar kitai endang nadai ngasaika pengidup kitai dirempah pengiklan. Nya kebuah, ketegal pemesai guna iklan dalam pengidup kitai indah utai ti diirup enggau diempa maya enchelap pagi pan diputuska kitai belalauka iklan. Iklan dipelaba bisi mai pemanah tang enti enda berunding panjai, iya mega tau nganu kitai. Kitai ke pengguna tu patut pintar nyerenih ke jai enggau ke manah.