Aturka Mayuh Agi Program Finansial

 

Aturka Mayuh Agi Program  Finansial 

 

KITAI suah ninga kes nipu ti bekaul enggau duit  taja pan maya menua kitai benung sigau lalu betapi enggau penanggul pandemik. Pekara tu nyadi nengah mayuh macham kelaing nyengkaum nengah telefon, skim kaya jampat, bemain ngena duit, ngakal duit pinjau ari bank sereta ngena chara chukai.

Individu ke beranakka puku ngaga pemutus penemu beranakka puku ti selama baka chunto meli enggau mayar rumah sereta nabung duit besediaka diri deka pinchin. Hal tu selalu nyadika kebuah sida napi risiko kena akal orang bukai laban ke  kurang penemu pasal  hal ngatur pejalai duit.

Kebuah faktor kes tu betambah iya nya ketegal agi mayuh orang enda nemu hal mina wang. Nya kebuah, kenu kua orang ke anda pasal finansial madahka literasi finansial nya beguna amat dikena nambahka penemu mensia mayuh lalu nagang kes baka tu ari terus nyadi.

Fokus literasi finansial ti patut diperatika iya nya ba hal meri sereta nambahka penemu senentang chara beranakka puku lalu mina duit enggau betul. Kebuah pia, laban mayuh amai sida ke rebak baru nya bengkerap ketegal kurang landik mina duit diri empu.

Kemaya hari tu mayuh amat produk financial enggau spesifikasyen ti kompleks ngujungka sida ti deka beranakka puku muntang bendar kena tipu. Sida jampat amat tetarit ati ke aktiviti beranakka puku ti bisi meri pulai untung ke tinggi. Kes ngakal baka tu suah nyadi laban ngena taktik danji  untung ke kelalu tinggi nya ngujung iya enda ulih dititihsereta dikeamatka.

Nambahka nya mega, produk finansial ti mebaka runding ngasuh sida ke beranakka puku ilap sereta layap lebuh ngaga timbang risiko pasal produk ti deka diambi. Tu ngujungka sida ngaga pemutus penemu finansial  ti enda setipak enggau pengulih risiko sida.

Gerempung Kerejasama enggau Pemansang Ekonomi (OECD) nerangka jaku literasi finansial nya pekara ti bisi kaul enggau elemen nemu, penemu, pengelandik, ulah enggau tebiat ti patut dikembuanka individu lebuh iya ngaga pemutus penemu pasal duit sereta ngambika ulih terus nyapai pengelantang finansial.

Penemu literasi finansial ulih  diterenak nengah kimpin enggau woksyop mina duit. Program tu ulih nambahka penemu minaka duit sereta tekala nya ulih nyediaka orang nya enggau ulah mina duit ti manah sebedau iya mutus deka beranakka puku.

Selabuh enggau nya mega, mayuh langkah rapat ulih diperambu dikena ngasilka rebak ke nemu mina duit. Tu nyengkaum ngemasukka isu finansial dalam silibus pelajar di sekula sekondari enggau universiti. Taja pia, lelemu ti enda dipraktikka mega tau ngasuh puntan lalu enda teasilka komuniti ti nemu mina duit indah enda baka sempama buah ubi laun dikali lunggar taun; buah empasa laun diempa chelum pun. Tu ngujungka tuju ke dekaka komuniti ti nemu pasal duit enda ulih nyadi realiti.

Nya kebuah, mayuh agi program baka seminar pasal wang patut diaturka.  Kebuah pia, laban lelemu pasal beranakka puku tu ukai diulih pia aja sereta  dikemeranka enggau semina ngenataika  diri ba sehari tauka dua seminar tang iya begunaka awak ti chukup dikena nengkua pengelandik pasal  wang.

Taja pia, program baka tu pan agi enda chukup kebal dikena nyeliahka diri ari  tepawah kena kelangkar orang. Kitai patut ngembuan ulah ti positif ngagai pengawa pasal beranakka puku. Lelemu enggau pengelandik nyadika pugu ngerembaika tebiat  nguna duit sereta nemu beranakka pugu enggau betul dalam komuniti.

Ambika chunto, bepelasarka konsep penyambung risiko-untung, pengawa beranakka puku ke meri untung ti tinggi mega ngembuan risiko ti tinggi. Reti nya, mayuh agi untung, tinggi agi ga risiko. Orang ke bisi penemu pasal finansial deka balat agi bejimatka pekara nya lebuh diberi untung ari beranakka puku nya tinggi tang enggau risiko ti baruh tauka nadai risiko.

Kitai patut ingat pengawa beranakka puku ulih digaga bepelasarka tuju  timpuh ti pandak tauka timpuh panjai. Kelimpah ari ngiruhka diri dalam mayuh bengkah pengawa beranakka puku, untung ari sesebengkah pengawa tu mega begunaka awak ti panjai.

Program literasi finansial ti dipejalaika sepemanjai maya ulih nerenak penemu lalu  mantu individu ngelala bagi ke betul sereta nyeliahka diri ari majak ditipu. Seminar pelajar finansial ti semitan patut diperati lalu ditisih sepemanjai maya ngambika ulih nentu sereta nyeliahka ari kena tipu.

Atur raban penguasa kelebih agi senentang tukuh produk finansial ti bebalut mesti diteritka dikena nentuka produk ke dienjukka raban pedagang nya enda ngasuh mensia mayuh charut.

Nya alai, enggau pengelandik ti ditengkua sereta ulah  enggau tebiat ti betul senentang pengawa mina wang dia raban komuniti dikearapka sensitif agi ngagai genap pengawa beranakka puku ngambika bela ulih terus nyeliahka diri ari terus kena tipu kelimpah ke bulih pengelantang finansial.  

Glossari:

beranakka puku – pelaburan, melabur