Aturka Mayuh Agi Program Finansial

 

Aturka Mayuh Agi Program  Finansial 

 

KITAI suah ninga kes nipu ti bekaul enggau duit  taja pan maya menua kitai benung sigau lalu betapi enggau penanggul pandemik. Pekara tu nyadi nengah mayuh macham kelaing nyengkaum nengah telefon, skim kaya jampat, bemain ngena duit, ngakal duit pinjau ari bank sereta ngena chara chukai.

Individu ke beranakka puku ngaga pemutus penemu beranakka puku ti selama baka chunto meli enggau mayar rumah sereta nabung duit besediaka diri deka pinchin. Hal tu selalu nyadika kebuah sida napi risiko kena akal orang bukai laban ke  kurang penemu pasal  hal ngatur pejalai duit.

Kebuah faktor kes tu betambah iya nya ketegal agi mayuh orang enda nemu hal mina wang. Nya kebuah, kenu kua orang ke anda pasal finansial madahka literasi finansial nya beguna amat dikena nambahka penemu mensia mayuh lalu nagang kes baka tu ari terus nyadi.

Fokus literasi finansial ti patut diperatika iya nya ba hal meri sereta nambahka penemu senentang chara beranakka puku lalu mina duit enggau betul. Kebuah pia, laban mayuh amai sida ke rebak baru nya bengkerap ketegal kurang landik mina duit diri empu.

Kemaya hari tu mayuh amat produk financial enggau spesifikasyen ti kompleks ngujungka sida ti deka beranakka puku muntang bendar kena tipu. Sida jampat amat tetarit ati ke aktiviti beranakka puku ti bisi meri pulai untung ke tinggi. Kes ngakal baka tu suah nyadi laban ngena taktik danji  untung ke kelalu tinggi nya ngujung iya enda ulih dititihsereta dikeamatka.

Nambahka nya mega, produk finansial ti mebaka runding ngasuh sida ke beranakka puku ilap sereta layap lebuh ngaga timbang risiko pasal produk ti deka diambi. Tu ngujungka sida ngaga pemutus penemu finansial  ti enda setipak enggau pengulih risiko sida.

Gerempung Kerejasama enggau Pemansang Ekonomi (OECD) nerangka jaku literasi finansial nya pekara ti bisi kaul enggau elemen nemu, penemu, pengelandik, ulah enggau tebiat ti patut dikembuanka individu lebuh iya ngaga pemutus penemu pasal duit sereta ngambika ulih terus nyapai pengelantang finansial.

Penemu literasi finansial ulih  diterenak nengah kimpin enggau woksyop mina duit. Program tu ulih nambahka penemu minaka duit sereta tekala nya ulih nyediaka orang nya enggau ulah mina duit ti manah sebedau iya mutus deka beranakka puku.

Selabuh enggau nya mega, mayuh langkah rapat ulih diperambu dikena ngasilka rebak ke nemu mina duit. Tu nyengkaum ngemasukka isu finansial dalam silibus pelajar di sekula sekondari enggau universiti. Taja pia, lelemu ti enda dipraktikka mega tau ngasuh puntan lalu enda teasilka komuniti ti nemu mina duit indah enda baka sempama buah ubi laun dikali lunggar taun; buah empasa laun diempa chelum pun. Tu ngujungka tuju ke dekaka komuniti ti nemu pasal duit enda ulih nyadi realiti.

Nya kebuah, mayuh agi program baka seminar pasal wang patut diaturka.  Kebuah pia, laban lelemu pasal beranakka puku tu ukai diulih pia aja sereta  dikemeranka enggau semina ngenataika  diri ba sehari tauka dua seminar tang iya begunaka awak ti chukup dikena nengkua pengelandik pasal  wang.

Taja pia, program baka tu pan agi enda chukup kebal dikena nyeliahka diri ari  tepawah kena kelangkar orang. Kitai patut ngembuan ulah ti positif ngagai pengawa pasal beranakka puku. Lelemu enggau pengelandik nyadika pugu ngerembaika tebiat  nguna duit sereta nemu beranakka pugu enggau betul dalam komuniti.

Ambika chunto, bepelasarka konsep penyambung risiko-untung, pengawa beranakka puku ke meri untung ti tinggi mega ngembuan risiko ti tinggi. Reti nya, mayuh agi untung, tinggi agi ga risiko. Orang ke bisi penemu pasal finansial deka balat agi bejimatka pekara nya lebuh diberi untung ari beranakka puku nya tinggi tang enggau risiko ti baruh tauka nadai risiko.

Kitai patut ingat pengawa beranakka puku ulih digaga bepelasarka tuju  timpuh ti pandak tauka timpuh panjai. Kelimpah ari ngiruhka diri dalam mayuh bengkah pengawa beranakka puku, untung ari sesebengkah pengawa tu mega begunaka awak ti panjai.

Program literasi finansial ti dipejalaika sepemanjai maya ulih nerenak penemu lalu  mantu individu ngelala bagi ke betul sereta nyeliahka diri ari majak ditipu. Seminar pelajar finansial ti semitan patut diperati lalu ditisih sepemanjai maya ngambika ulih nentu sereta nyeliahka ari kena tipu.

Atur raban penguasa kelebih agi senentang tukuh produk finansial ti bebalut mesti diteritka dikena nentuka produk ke dienjukka raban pedagang nya enda ngasuh mensia mayuh charut.

Nya alai, enggau pengelandik ti ditengkua sereta ulah  enggau tebiat ti betul senentang pengawa mina wang dia raban komuniti dikearapka sensitif agi ngagai genap pengawa beranakka puku ngambika bela ulih terus nyeliahka diri ari terus kena tipu kelimpah ke bulih pengelantang finansial.  

Glossari:

beranakka puku – pelaburan, melabur

 

Iklan 'bekuasa' nguingka runding raban pengguna

PENGIKLAN ngembuan tuju ti besai dalam pengawa  bejualka sesebengkah produk kelebih agi ba era kemaya hari tu. Iklan mega bisi bekenaka mayuh leman pampang komunikasyen. Ba kenang kesekali tu aku nguji mai kitai bekenangka pasal pengawa iklan tauka bisi ga disebut sekeda orang nya pemandang bantai, tang ba kenang aku sekali tu aku deka ngena leka jaku iklan ti diinjau terus ari jaku Melayu.

Enti dibanding enggau dulu suba  pengawa ti bekaul enggau iklan tu bisi tusah mimit deka diterima mayuh bengkah lapis komuniti tang sehari tu iya ulih ngaturka diri lebih ari ke udah-udah, itah ulih dituju terus ngagai raban ti ditagaka. Iklan ke bendar nya sebengkah utai kayam minda. Iya nya mih kereban ti pengabis bekuasa, ulih ngumbuk pengguna sereta ulih ngenataika pesan ti nadai lapat ngena mayuh macham gerinek.

Pengiklan kemaya hari ulih dipeda ba dini-dini endur lalu iya mega mudah agi ngayanka diri ngagai mensia mayuh nengah internet. Ketegalka pemesai guna iya ba komuniti kemaya hari dia orang balat bendar pechaya ke pengawa ti bekaul iklan sereta chap sesebengkah barang nya jauh beguna agi ari produk nya empu.

Ba peringkat keterubah, iklan nya langkah rapat ti pengabis manah dikena ngelakuka produk. Enti bansa produk nya nadai ditabur ngagai mensia mayuh tentu deka tusah sesebengkah barang nya dijual. Tentu  mayuh orang nadai nemu barang nya bisi dijual di pasar nama agi enti iya pan besemekih enggau produk bukai ti nyau deka sebaka pendiau enggau barang nya. Nya kebuah pengawa iklan tu udah nyadi pengawa ti balat mai penguntung.

Taja pan pia, iklan mega ulih nguing runding sereta emosyen pengguna. Elemen sinu, baban, gaga, lantang tauka tusah ti dibantaika ba iklan selalu iya ulih ngeruga ati mensia mayuh. Ambika banding dalam iklan Aidilfitri PETRONAS mensia mayuh sigi semampai nganti iklan nya ninting taun, nganti cherita enggau tema ti deka dibantaika sida.

Iklan ti mujur sereta bekuasa nya iklan ti ulih ngeruga sereta negu emosyen genap iku orang. Iya ulih ngerempah runding sereta nimbang pemutus penemu individu sereta ngembuan kuasa umbuk. Ambika banding, ba sebuah kompeni kosmetik nguna model ti tebilang sereta bajik laban ku sida iya ulih narit pengerindu pengguna taja pan iya ke bendar nya nyangka individu pengguna nya endang sigi bajik lalu nadai mega begunaka produk dikena nganta.

Ke bendar kitai endang nadai ngasaika pengidup kitai dirempah pengiklan. Nya kebuah, ketegal pemesai guna iklan dalam pengidup kitai indah utai ti diirup enggau diempa maya enchelap pagi pan diputuska kitai belalauka iklan. Iklan dipelaba bisi mai pemanah tang enti enda berunding panjai, iya mega tau nganu kitai. Kitai ke pengguna tu patut pintar nyerenih ke jai enggau ke manah.

Konsep belajar bepelasarka video patut dikemeranka agi

 

Konsep belajar bepelasarka video patut dikemeranka agi

Lebuh pandemik balat nyadi  dia sistem pelajar menua kitai mega betapi enggau penanggul ti serius. Penanggul diperatika nyadi dalam kaul telekomunikasyen ngujungka iya meri impak ti besai ngagai proses ngajar enggau belajar (PdP). 

Taja pia, tabi puji patut diberi ngagai perintah ketegal ngaktifka baru DidikTV. Opis Menteri Pelajar (KPM) nya mih pugu alai mutarka pengurang dalam pekara tu.

Diatu, pandemik nyau majak ulih dijaga sereta dikurangka lalu pia mega proses PdP betunga mua mega berengkah diaktifka baru nitihka prosedur operasyen standard (SOP) ti terit.

Taja pan baka nya, konsep belajar bepelasarka video enda patut enda dikena. Iya patut bendar diangkatka kenyau ari tikas sekula nyentuk ngagai  universiti. Teknologi video ukai semina semitan dikena maya PdP tang iya mega dikira enda bangat mar sereta jampat ditengkua bala tukang tarak.

Penguji ti pengabis besai lebuh ngangkatka teknologi video dalam PdP iya nya kurang konten pelajar ti bekualiti baik nya ari sukut pedagogi tauka produksyen. Tu ngujungka pengajar enggau pengelicha enda ulih enda belajar nyadi penengkebang konten. Ambika chunto ba mata pelajar Bahasa Iban amat mimit bendar video ti bisi kaul enggau mata pelajar nya udah diasilka.

Endang amat konten video PdP ulih diakses nengah DidikTV KPM tauka kelaing bukai baka YouTube, tang video ti pengabis manah nya sigi patut datai ari pengajar tauka pengelicha nya empu sereta dituju ngagai nembiak sida. Dikena ngemayuhka konten video PdP ti engkeman sereta diperetika nembiak ba menua tu dia raban pengajar enggau pengelicha patut nengkua pengelandik ngaga video PdP.

Realiti iya, teknologi video kemaya hari tu enda bangat tusah digaga baka ke agi suba. Semina dalam timpuh seminggu aja, tukang tarak ulih ngasilka konten video ti dikena nyukung proses PdP.

Mayuh aplikasyen ngaga video ulih dipelajar sekalika iya ke nadai bebayar tauka bebayar. Indah komputer personel kitai empu pan sigi udah lama bisi semina enda diguna kitai enggau maksima.  Lebuh pengelandik ngaga video PdP bepedagogi enggau produksyen ngembuan kualiti tinggi ulih ditengkua, dia sekeda chara video nya ulih diguna dalam proses PdP.   

Ungkup aktiviti sebedau kelas tauka licha, video 'penerang' sepengelama satu ngagai dua minit ulih diasilka dikena mantu nembiak besedia sebedau sida ke kelas betunga enggau pengajar tauka pengelicha tauka maya sida betemu nengah online. Data pansik empirikal meri bukti video penerang nya sigi dipeda sereta dibelematika nembiak lalu ulih mantu sida belajar sebedau aktiviti belajar ke bendar dipejalaika.

Awak dalam kelas tauka licha nambahka nya ulih nyadika latih enggau proses nambahka lelemu lebuh nadai pengajar tauka pengelicha. Tu ulih nyeliahka sida ari muai jam nerangka nya maya sida berengkah ngajar laban pekara nya udah dulu ditemuka bala nembiak.

Sepengudah kelas tauka licha, aktiviti pandak bepelasarka video ulih nyadika latih tambah. Taja pia tentu isu pengulih internet ti stabil enggau pekakas komputer, tablet tauka telefon pintar tau mega ngasuh pengawa tu puntan.

Iya ke bendar, peluang asil ari pandemik global patut amat diguna kena ngubah sistem pelajar ngambika iya  bepusatka pekara jemah ila. Matih nembiak bediri kediri lalu ngadaka tukang tarak ke lalu mega nyadi penengkebang konten ti maju ulih dikeamatka nengah  proses ngangkatka teknologi video PdP.