Ngeluarka asil kereja ‘pelesu’ ari raban akademik Malaysia entara ti tinggi ditemu dalam pangkalan data global

 

Data akademik ari Malaysia entara iya ke mayuh iya nya kira entara lebih 300 karang ti bisi ditemu dalam “jurnal pelesu” dalam pangkalan data global. Data akademik tu ditumbuhka dikena nyukat penuduk institut pelajar tinggi ninting taun di serata dunya.

Jurnal pelesu mega dikumbai predatory journals dalam jaku English. Iya dikeluarka bepelasarka kualiti pansik ti baruh ari standard. Isi pansik nya enda tentu ulih diarapka lalu suah agi artikel nya nyamai diterima sereta enda diperesa enggau silik. Ba mayuh  kes, penerima semina ngemeratka duit bayar aja.

Sepenyampau 324 jurnal ti dikeluarka ba serata dunya bisi  ditemu tama enda nitihka atur ke dalam Scopus.  Scopus  tu sebuah pangkalan data global ke bepalan di Belanda. Pengawa pengkalan data tu ngumpul lebih 30,000 jurnal mungkur bidang sains mensia, sains sosial, sains fizikal enggau sains pengerai.

Pengawa ke mantaika kes tu kelimpah ari bekelikuh pasal kualiti asil pansik ari universiti di Malaysia, mega ngasuh ranking ninting taun universiti Malaysia di tikas global enda tentu valid.

Enda kurang ari dua gerempung ti tebilang baka Times Higher Education enggau QS, bepanggai bendar ba data ari Scopus sebedau ngeluarka ranking ninting taun universiti serata dunya. Enti mayuh asil kereja raban akademik diambi Scopus, dia universiti bisi peluang ke manah agi nikika penuduk sida dalam ranking global.

Pengawa ke mantaika kes tu bepelasarka asil kereja dua iku raban ekonomi ari Czech Republic iya nya Vít Macháček enggau Martin Srholec ke ngasilka analisis bepelasarka menua tentang jurnal ti enda tentu valid ke bisi ditemu ba Scopus entara taun 2015 nyentuk ngagai 2017.

Taja pan mayuh agi pengarang tu asal ari menua ke mayuh tubuh baka India, Indonesia, Filipina enggau Mesir tang Malaysia dirintaika dalam raban menua asal ti pengabis tinggi dipelabaka ngayanka  kualiti kereja akademik lokal ti enda badas bendar.

Entara kriteria Scopus ungkup jurnal akademik ti diindekska dalam pangkalan data sida iya nya kualiti bala sidang pengarang nyengkaum pengawa ngeluarka artikel enggau chara konsisten.

Dalam taun 2014, mayuh agi artikel akademik Malaysia diindekska Scopus – nyau deka datai ke 47,000 – bebanding ari Thailand enggau Singapura. Taja pia, pansik Macháček enggau Srholec nungkapka Malaysia duduk di tangga kelima ari 20 buah menua ti pengabis aktif ngeluarka jurnal pelesu tu. Iya ti pengabis tinggi iya nya Kazakhstan enggau 17% artikel ditangkanka Indonesia (16.7%), Iraq (13%), Albania (12%) enggau Malaysia (11.6%).

Malaysia mega masuk dalam rintai 20 teratas jurnal pelesu dalam tiga bidang: sains pengerai, sains fizikal enggau sains sosial lalu iya bulih tempat kedua dalam sains fizikal enggau sains sosial.

Ba menua ke udah disebut di atas, pengawa ngeluarka jurnal pelesu terang bendar nyadi penanggul sistemik di tikas nasional, ukai semina ngaga sekeda kluster nitihka inkuiri Macháček enggau Srholec. Inkuiri tu tentu ngidupka baru kelikuh orang senentang isu nipu akademik di universiti ba Malaysia.

Nya kebuah bisi sekeda orang dalam raban komuniti akademik berasai dikeruga ketegal mayuh pansik dikira enda valid. Pansik ti dikeluarka dalam jurnal pelesu tu dipelanja ngena wang turu rama nengah geran ari perintah. Nambahka nya perintah udah ngangkatka lima universiti di Malaysia nyadi universiti pemansik. Tu nyengkaum Universiti Sains Malaysia, Universiti Malaya, Universiti Kebangsaan Malaysia, Universiti Putra Malaysia enggau Universiti Teknologi Malaysia. Agih belanja bejuta ringgit bisi diberika perintah ngagai universiti tu dalam tukuh geran pemansik enggau pemansang.

Enggau tebantai iya isu baru tu, nyangka tau meri pejah tambah ke bala pengkritik ti madahka Scopus enggau ranking universiti global enda ulih nyadi penyukat dikena nisih asil pansik. Ketegal ke kelalu obses deka nyapai ranking global ti tinggi agi, dia mayuh universiti di Malaysia nadai chara bukai kelimpah ari nyadika Scopus nya kayu penyukat nunda ku siku raban akademik kanan universiti perintah ti tebilang di Malaysia.

Sanding Penemu:

MalaysiaNow, Feb. 14.2021 

Mayuh ‘semengat charut’ ba media sosial, patut ditagang sebedau raya

 

Enti kitai belematika komen netizen bekaul enggau karang tauka gambar ti diayanka ba media sosial dia kitai ulih meda penyakit enda lantang ati tauka ninding tauka chemuru munyi ku jaku orang kemaya hari majak nyadi senyadi. Penyakit tu tau mega dikumbai penyakit ‘charut semengat’ tauka  penyakit 'jiwa kacau' ba laman sosial. Peratika lebuh sesebengkah gambar dikunsika orang, tentu bisi komen cheruit (ciapan komen) ke dibantai lalu nya ngayanka gaya enggau identiti penulis tauka penguna media sosial nya empu baikka sida ngadang tauka enda utai ke udah dituliska sida nya. Mayuh macham chara orang nimbal pesan ke ayan dia lalu ulih dipeda sekalika nya nyukung tauka meri jaku pejah.

Aku ngambi chunto iya ke bisi nyadi apin lama ke udah ti bisi ayan ba surat berita. Bisi siku indu ke diau jauh ba tanah Chicago, Amerika Syarikat muatka gambar dalam ruang raban tukang sumai ti tebilang di menua tu. Ba laman nya bisi 1.5 juta orang nyadi raban. Gambar menu ke disumai ti diayanka iya dia iya nya sebansa pemakai tradisional Malaysia ti dikumbai nasi lemak . Gambar nasi lemak nya disempulangka iya enggau gambar seleju ba muak ke belakang. Leka seleju nya ulih dipeda neritik labuh ari jenila rumah iya. Sida ke nyukung gambar nya mayuh madahka idea nya manah. Baka nya mega bisi sida ke enda tentu lantang ati meda gambar nya, laban ba penemu sida gambar nya bisi ngayanka menua orang putih. Ba sida, gambar nya enda engkeman, nya alai sida tu minta gambar ti baka nya enda tau dikunsika agi ba raban nya.

Komen ngelanyai tauka ke ngundan elemen negatif enti dipekunsika enggau orang bukai tau ngasuh orang nya enda tetagangka asai ati diri empu lalu tau ngasuh orang stres. Penanggul tu tau nyadi balat lalu tau ngasuh orang nya munuh diri, enti sema pekara tu enda mujur ditagang.

Pengelicha Kanan (Bimbingan & Kaunseling) ba Pusat Pengajian Ilmu Pendidikan Universiti Sains Malaysia (USM), Dr Syed Mohamad Syed Abdullah madahka  penyakit charut semengat nya nyau majak ngerekai ba komuniti kitai kemaya hari tu.

Nitihka penemu iya, utai tu nyadi ketegal mayuh macham persepsyen enggau mega penemu ti bebida  dalam komuniti sereta mensia mayuh. Baka ke endang udah ditemu mayuh, genap iku individu ngembuan personaliti ke bebida lalu iya mungkur ulah, rega persepsyen enggau motivasyen ti bebida entara siku-siku.

Chara tiap-tiap individu nerima tauka belematika sesebengkah pekara tauka siti-siti utai nya ke ngasuh iya bebida. Enti kitai meda media sosial tu endang udah dikiraka trend kemaya hari ti lalu enda ulih diseliahka kitai. Nyau deka genap orang bekenaka media sosial kemaya hari tu. Nya alai enggau penatai sereta ubah pemansang  teknologi komunikasyen kemaya hari tu mih ke ngasuh media sosial tu nyadi kelaing ti tebilang ke dikena orang mayuh.  

Ubah ti semampai maya dikemaru, nyadi ketegal segang pemansang teknologi. Tu ti mai  inovasyen datai menatai lalu kelaing media sosial nya diperatika majak mudah narit ati bala penguna. Enggau fasiliti tu semua informasyen ulih disadung enggau lengkas, enggau mayuh sereta macham-macham agi pekara ke bukai. Pekara tu ngasuh pengidup mensia nyadi nyamai senyamai laban iya ulih mantu kitai enda milih endur kitai diau iya sigi ulih dikenataika enggau jampat ngena skala ti efisien agi ari ke ngelama tu.

Pekara  tu nyadi isu lebuh bisi sekeda penguna media sosial ke dipelabaka belaban arus penemu ari orang bukai lalu berengkah ngena media sosial tu ngena chara ti salah. Pekara ti nyadi tu bepun ari mayuh macham persepsyen sereta datai ari ulah bebida penemu dalam komuniti. Media sosial tu ke bendar manah lalu iya kelaing ti patut dikena enggau chara ti betul tang sekeda penguna nyau nguna iya ngena chara ti salah.

Endang amat munyi ku pengelicha nya, sigi bisi penanggul psikologi sereta kes ti mai empas mental sereta emosional ngagai individu ketegal ari empas utai ke ditulis tauka cheruit ti digaga bala penguna laman sosial. Enti individu ke nyadi tagit nya dikachau tauka diayah ba media sosial lalu enda nemu chara mutarka penanggul nya, tentu bendar iya deka meri impak besai ngagai emosyen sereta mental individu nya empu.

Taja pan kes nya dipeda agi mimit sereta jarang nyadi ba menua kitai tang pekara baka tu enda ulih dipeda sepiak mata aja laban ari kes ke mit nya mega tau nyadi besai sereta ngeruga pemaik, pengelantang, harmoni, psikologi lalu enggau minda orang Malaysia ke stabil. Nya alai kes ke mit baka tu  patut bendar diputar enggau lengkas laban ari sukut realiti sigi bisi kes orang munuh diri ketegal komen ba media sosial tu. Ari nya kitai ulih meda penguat empas enggau kuing runding ti diterima ketegal ari komen nya tadi. Nya mega kebuah hal baka tu patut diperatika kitai semua enggau serius.

Ari pemayuh komen enggau serebana ti kenataika ba kelaing sosial, mayuh agi ke mantaika pejah negatif ari jaku ti positif. Katika komuniti di Malaysia patut kebal agi,  tan kena anu lalu tebuka agi runding lebuh bekenaka literasi media lalu ukai agi baka suba ti balat ngayanka basa ngagai pangan diri? Nama runding kita dih senentang hal tu?

Ba penemu aku dalam hal tu pengawa ke deka nyadika literasi media nya siti budaya ti patut bendar dikemeranka. Iya patut nyadika chuan enggau teladan kelebih agi ba sekula enggau budaya Malaysia nya empu. Komuniti menua tu enda ibuh bangat kebal sereta mega tebuka bendar runding ke semua pekara taja pan  daya pengetan, daya pengebal enggau minda ke tebuka nya sigi manah amat sereta patut dititih. Mayuh mega bala ke udah lama bekelala enggau pangan diri suah betundi mesan pangan diri ngena kuasa tat lebuh betapi enggau hal ti baka nya.

Taja pan kitai ke nyadi komuniti ke udah tuai runding patut ulih nerima penguji nya mega betatika taka sesebengkah pekara. Chukup mih enti kitai nitihka iya ke udah segenda bisi dalam konteks pelajar sekula enggau budaya Malaysia. Kitai dipinta seruran ngembuan runding ke tebuka, tan agi lalu semampai ngayanka adat basa lebuh ngemeranka literasi media.

Nambahka nya, kitai enda patut ngembuan ulah ke tan dianu sereta enda sensitif ke udah ti nyadi laban ba ujung hari iya tau mai empas ke enda manah ngagai komuniti kitai enti sema runding kitai kelalu tebuka sereta nadai besekat. Kitai sigi ulih berubah nitihka maya, berubah nitihka pemansang teknologi sereta berubah nitihka peminta kemaya hari tang kitai enda tau enda ngenanka kaul harmoni, kaul agama, kaul enggau mensia mayuh sereta ngenanka entiti budaya Malaysia ke endang udah lama bisi. Nilai tu endang sepa jaga udah bisi dalam chuan komuniti Malaysia lalu iya sama enggau identiti mulia ti semampai dikemeran kitai semua. Semua pekara tu tau enda ibuh digadaika kitai semua.

Komuniti ba menua tu, patut semampai  konsisten enggau nama-nama utai ke bisi lalu senurut enggau engkeman nitihka arus pemansang ngambika enda tinggal ari menua bukai enggau ari komuniti ke bisi.  Kebuah pia, laban Malaysia mesti nyingkang ke mua setipak enggau pemansang kemaya hari tang ba awak ke sama enda ninggalka nilai-nilai mulia adat basa, budaya enggau identiti ti nyadika tanda kitai nya peranak Malaysia.

Chara tiap-tiap individu tauka admin ke ngaturka media sosial baka whatsapp, telegram etb. mega patut dikemanahka agi kelebih agi lebuh sida tepedaka kes salah guna media sosial kemaya hari ke majak nyadi sereta ngerekai dalam komuniti. Kimpin narak mensia mayuh nyadi penguna media sosial ti pandai patut bendar diatur.

Kitai enda ibuh nitihka gaya tauka chara menua bukai ke dipelabaka tebuka agi runding lebuh nyadi penguna media sosial. Tuduh penemu enggau runding ke tebuka sigi semampai diterima tang mesti bisi adar adat ti betul. Di Malaysia kitai enda ulih nyeliahka diri ari identiti enggau kelai kitai ke dikumbai orang Malaysia. Basa bekenaka media sosial mungkur sida ke biak enggau raban anak mit. Ukum enggau pekara ti engkeman patut diletak ngagai sapa-sapa ba media sosial ke ngelanyai agama tauka sigi nyereda ngasuh orang pedis ati. Enti diperatika ari sukut psikologi, sigi sinu mih kitai meda raban ke ‘charut semengat’ tu  laban sida tau dikiraka kitai orang ke enda bepengerai ari sukut mental.

Penguna  media sosial patut ngadangka diri senentang kuasa ke bisi ba sida lebuh sida berinteraksyen enggau orang di media sosial, ambika chunto kuasa sida ngeripot ngagai Suruhanjaya Komunikasi dan Multimedia Malaysia (SKMM) enti nyema bisi kes ke ngeruga orang.

Taja pia, belalauka peneleba enggau perati, bisi mega penguna media sosial ke betanggungjawab ngambi inisiatif diri empu, ambika chunto, meri jaku lalau, ngemetulka fakta, semampai ngingatka pangan diri, nyadi orang tengah sereta mayuh agi pekara bukai ke nagang raban ke charut penemu tu terus ngerembai sereta ngerekai. Tabi puji patut diberi ngagai penguna media sosial ke betanggungjawab tu. Ba kuasa enggau tanggung pengawa penguna laman sosial, raban penguna ulih milih enda ngibuh tauka ngelaung sida ke ngena media sosial tu enggau chara ti salah. Ke bendar iya, kitai patut bela ngaga diri enda nemu utai ke dikereja sida.

Ari  sukut psikologi, sida ke ngaga diri charut runding tu, kadang-kadang nyereda ngayanka diri baka nya ngambika dikeibuhkan orang sereta ngiga populariti kelebih agi lebuh sida mantaika sesebengkah pekara ti tau ngemediska ati sereta tau ngasuh orang ringat. Sida berasai gaga sereta puas ati lebuh orang mayuh enggau penguna media sosial ke bukai enda mukai-mukai tak kelang kabut deka meri respons sereta malas jaku sida. Tu pekara ke enda manah bendar.

Nitihka Perunding Psikologi Keluarga & Guaman Syarie, Suzana Ghazali (Bernama 17 March) madah orang ke ngaga pekara ti enda manah endang ngembuan kaul sakit mental tauka bisi penanggul ati. Nitihka iya, enti diperesaka profil sida ke ngaga perangai baka nya endang nyereda mega muka akaun sida dikena ngachau sereta ngeruga runding orang bukai. Sida berasai lantang ati lebuh sida ulih ngemaruhka  orang bukai. Sida tu ke bendar ngembuan penanggul ba diri empu, enda puas ati ke pengulih diri, enda lantang enggau utai ke dikemisika diri lalu nadai pengarap ngagai diri empu. Nya alai sida nguji ngemaruhka orang bukai lalu sida berasai lantang ati lebuh orang ke diayahka sida nya ngasaika diri asa sereta dikemaruhka. Ba sida tu mih   pemenang ku sida lalu sida berasai puas ati ke pemenang nya.

Pekara ti suah nyadi tu ukai sebengkah ari penanggul media sosial tang lebih ngagai penanggul individu ke bisi sakit mental. Jalai mutarka isu tu iya nya bala netizen ke  positif agi runding patut nyaup sida ke charut semengat nya lalu ukai ngembal sida enda beiga-iga. Enti sida majak diembal enggau jaku ke enda manah dipelaba pekara nya tau nyadi raya agi. Kelimpah ari nya, pengguna media sosial mega patut ngubah ulah sida sereta chara sida bekunsika  pekara. Sida patut bekunsika pekara ti semina bisi mai penguntung enggau pemanah ngagai orang bukai. Momen-momen manah ke dikenang chukup mih enti dikunsika enggau orang ke sempil enggau kitai aja. Enti kitai andal deka ngunsi nya ngagai semua orang, tentuka semengat kitai empu mega kering sereta ulih nerima komen ti negatif. Enti enda, ANANG KUNSI laban nuan semina mantu nambahka statistik pemayuh orang ti enda betul runding di luar din.

Aram mih kitai sama-sama nyaga diri empu, nyaga orang bukai lalu semampai bejimat lebuh mansutka sebarang jaku ba mua mayuh kelebih agi lebuh mantaika penemu ba kelaing media sosial. Anang nganti tepantup baru nengkadah.

Glosari:

ciapan – cheruit

ciapan twitter – cheruit twitter

nyereda - sengaja

Anang belelak ari pengangat global

 

taja PAN teori Sir Isaac Newton kala nyebut, ‘genap utai ke niki mesti nurun’, tang rambai jaku tu baka ke nadai engkeman dikena ba kes pengangat global. Kesuh pengangat majak niki ari sehari ke sehari lalu isu pengangat global tu baka ke nadai pengujung. Tiap-tiap pekara ti digaga mensia mayuh baik nya makai, ngirup, bekereja tauka tinduk bisi ngenataika pengangat ti dipindahka ngagai radiasyen. Tu ke meri empas ngagai kesuh pengawa rampa kandang endur kitai diau. Isu pengangat global mih isu ke uji dikupas sereta dikenangka aku sekali tu.

Utai ke dikena kitai ninting hari ti ngemansutka pengangat ulih dipeda ba dini-dini alai. Di rumah kitai ngena energi ari gas enggau elektrik lalu ke injin penyelap (air-conditioners), kipas, lampu, dapur elektrik, periuk enggau kendi elektrik dikena nanggar ai.

Gajet bukai nyengkaum heater ai, penyepu buk tauka hair blowers, seterika, penuchi vakum, injin rumput, peti ais, peti meku enggau pekakas pemerindang dalam rumah. Semua barang tu ngesuhka pengangat kelebih agi enti iya dikena maya siang tauka dikena siang malam.

Ba kes kereban pengangkut baka bas, teksi, motosikal, kerita api, bilun enggau kerita tu ukai semina ngeluarka pengangat tang mega ngamahka rampa menua. Kereban pengangkut tu mih ke mayuh ngenataika penanggul pengangat global.

Guna rumah, kedai enggau bandar ketegal pemansang penyampau tubuh mensia mega meri empas ngagai pengangat global. Kayu ditebang, kampung diensiang dikena meri ruang endur ngagai rumah enggau jalai. Enti rumah nyau majak mayuh digaga tentu iya mega setimbang enggau pemayuh opis, kedai, kilang. Semua tu digaga dikena napi pemayuh mensia. Enggau nya mega, mayuh agi jalai tar tauka metalik digaga dikena napi pemayuh trafik. Pemansang kampung konkrit mega nambahka empas pengangat global laban utai konkrit tu nyintak pengangat maya siang tang ngesuhka pengangat iya maya dini hari.

Enggau jaku nya, kitai ulih nyimpul penemu madahka endang nadai jalai bukai tang enda ulih enda mih kitai betapi enggau penusah hari ke angat dalam timpuh awak ti panjai.

MyDIGITAL nyediaka endur kondusif alai peluang bekereja

 

Apin lama ti udah, tentu bisi sekeda ari kitai sempat macha tauka ninga berita senentang juluk ati perintah ke deka mai pengawa digital ari Putrajaya ke menua pesisir. Tu perambu ti besai bendar sereta ukai pengawa ti anchi-anchi. Kitai mega bela nemu pengawa bekaul enggau ekonomi digital nyau majak ngerembai lalu tu ulih nyediaka peluang ti manah ungkup mensia mayuh jemah ila.

Dipelabaka perintah nemu penanggul seraka digital kelebih agi ba kandang endur menua pesisir. Kes Veveonah Mosibin ke niki pun kayu di Pitas, Sabah enggau Nurlieda Khaleeda Mohd Azmi ti ngaga langkau ba atas bukit di belakang rumah iya di Tanah Merah, Kelantan kala didinga kitai. Pengawa seduai tu semuti deka ngulihka akses internet. Penusah seduai nya muka mata semua orang nyengkaum raban perintah. Seduai dipejal ngereja pengawa baka nya ketegal deka nyaut tanya peresa universiti seduai nengah chara online.

Penanggul akses internet agi bisi didinga kitai. bepelasarka statistik, 90 persin endur ke udah dibungkur nya agi bisi penanggul akses internet. Bisi kandang endur ke ulih datai internet, tang kualiti iya enda manah. Penanggul deka akses internet ukai semina ba menua pesisir, tang mega ba nengeri besai indah baka Putrajaya pan bisi blind spot. Ambika banding endur aku diau ba Jalai Ipoh, Kuala Lumpur bisi penanggul arus internet kelebih agi ba bilik rumah baka apartmen enggau kondominium. Penanggul baka nya mega nyadi ba menua pesisir ke nadai mesegit tauka menara komunikasyen. Bisi mega mesegit komunikasyen ke enda meruan manah kelimpah ari ditambah enggau faktor geografi.

Taja pan sekula udah dibuka tang servis internet ti bekualiti nya beguna bendar laban iya sebagi ari norma baru. Kereban dikena akses internet dibeli apai indai ungkup anak sida nitih proses Belajar enggau Ngajar Di Rumah (PdPR) ukai mai pengerugi ngagai sida sebilik. Mayuh agi belajar chara hibrid – betunga mua enggau chara online deka dipejalaika udah tu ila.

Raban pedagang mega napi penanggul ti sebaka. Mayuh pedagang mikro, mit sereta jelan pemesai (PMKS) nadai akses ngagai internet. Sida mega begunaka penemu tauka pengelandik dikena 'bemain' ba dunya siber. Enti semina nepu barang ba aplikasi e-dagang enggau laman sosial ukai dikira chukup. Raban sida tu mesti mega nengkua pengelandik bejual ngena chara online dikena nentuka produk sida ulih narit ati pemeli.

Seraka digital mega nyadi entara serak sida ke tuai enggau serak sida ke biak. Kemaya hari tu mayuh bendar pengawa udah dipejalaika ba alam siber. Nyadi tu ke ngenusahka sida ke tuai. Ambika chunto, bank mayuh nutup pampang sida lalu ngalihka servis pengawa ba bank ngagai servis online tauka ngena mesin. Tu tau bendar ngenataika penanggul ngagai sida ke nadai seling pasal penemu digital. Seraka ti baka tu beguna siti langkar pengawa (blueprint) ti beripih dikena mutarka penanggul nya laban iya begunaka chara mutar ti holistik.

Iya ke bendar isu digital tu ukai pekara baru ba menua kitai tu. Dalam taun 1996, perintah bisi mantaika Koridor Raya Multimedia (MSC) ti mungkur kandang segi tiga berengkah ari KLCC ngunjur ke Cyberjaya enggau Padang Penerebai Bilun Antarabansa Kuala Lumpur (KLIA). Sekeda polisi bekaul enggau teknologi pemadah tauka digital mega dipenyadika maya nya. Beserimbai enggau pekara nya mih Menteri Besai bejadika MyDIGITAL enggau Langkar Pengawa (Blueprint) Ekonomi Digital Malaysia, 19 Februari ke udah.

MyDIGITAL, pelasar dikena menua kitai nyadi pengulu bagi menua Asia tenggara  ba ekonomi digital lalu ngulihka pemansang sosioekonomi inklusif, betanggung pengawa sereta tan setipak enggau  Tinjau Pemansang Pengelantang Sama tauka Wawasan Kemakmuran Bersama (WKB) 2030. Langkar pengawa tu dikena nentuka  ekonomi menua majak kompetitif.

Unit Perancang Ekonomi (UPE) diberi tanggung pengawa ngelangkarka MyDIGITAL lalu numbuhka Opis Ngatur Ubah Strategk tauka Pejabat Pengurusan Perubahan Strategik (SCMO) ke tuju iya meratika pejalai pengawa nya. Langkar pengawa tu digaga ungkup timpuh datai ke taun 2030. Iya ngadarka sekeda tagit pengawa. Pekara ti beguna bendar nya ungkup rayat kelebih agi sida ke ari raban B40 enggau M40 dikena ngerapitka sereka digital nya.

Nama utai ke diulihka orang menua enggau raban nya ari MyDIGITAL?

Keterubah, perintah deka ngangkatka pemansang infrastruktur digital dikena nentuka servis internet ulih diakses ba dini-dini endur. Nitihka perambu sida maya taun 2025 ila dipelabaka genap isi rumah ulih akses internet. Nadai ngira dini endur sida, peluang enggau penguntung ari ekonomi digital ulih diguna enggau penuh.

Kemaya hari tu, pengawa ngaga infrastruktur digital benung regas dipejalaika nengah Pelin Kaul Digital Menua tauka Pelan Jalinan Digital Negara (JENDELA). Entara inisiatif iya nya ngaga 940 mesegit komunikasyen baru ba nengeri enggau tisi nengeri dikena ngaga  optik fibre  ngambika ulih ngangkatka kualiti sereta dandang broad band.

RM21 bilion udah dibeperanakka puku sepemanjai lima taun program JENDELA lau diarapka ulih mutar penanggul ngulihka internet ba menua pesisir nyengkaum Sabah enggau Sarawak.

Kedua, nentuka semua nembiak sekula bulih  kereban dikena akses internet nengah program 'MY Device' ba pengujung 2025. Program tu deka  dipejalaika berenggat-rengat bepun ari raban B40. Pengawa ngena kereban internet maya belajar nya endang beguna bendar dikena nerenakka budaya digital.

Ketiga, mayuh agi kelaing digital deka disediaka dikena bejualka asil betanam betupi enggau PMKS chara terus ke pemeli, ari kebun terus ke atas mija. Tu ulih nambahka asil penatai pemisi orang betanam betupi, kelimpah ari ngurangka kos pemakai ungukup rayat.

Keempat, inisiatif perintah nengah MyDIGITAL bisi jalai narit orang beranakka puku ke beungkus RM70 bilion dikena ngemansangka infrastruktur digital. Kelimpah ari nya, 500,000 kereja baru ulih disediaka maya taun 2025 ila. Nya kebuah, asil dagang mansang ngerembai ketegal ekosistem ekonomi digital, kelimpah ari nyediaka peluang gawa ari sukut nambahka pengelandik enggau ngelatih baru pengelandik.

Kelima, digital ngelui aris entara sereta muai mayuh birokrasi ke nekul pengawa bejualka produk ba sesebuah menua. Enggau chara tu, produk deka datai terus ngagai jari penguna kepenudi enda kira dini sida diau. Reti nya, iya ulih ngerembaika penumbuh industri bukai baka serbis logistik.

Asia Tenggara nya makit internet keempat besai di dunya lalu ngembuan 360 juta penguna. Enggau peluang makit tebuka tu, perintah ulih naga langkar pengawa tu dikena narit ati 875,000 PMKS nerima guna e-dagang. Naka kediatu, lebih 490,000 PMKS udah ngena iya. Ambika chunto, kompeni Tasneem Natural bejalaika dagang bejualka produk anak mit udah mujur nambahka asil jual sida datai ke RM5 juta dalam taun 2020 lalu ngembuan 7,000 ejen serata Malaysia, Brunei enggau Singapura sepengudah ke ngena kelaing e-dagang.

Aspek digital mega deka nambah penyampat perintah meri servis ti pengabis manah ngagai rayat. Pengawa ulih dikemudahka agi sereta enda begunaka awak ti  lama. Taja pia, iya ti beguna bendar iya nya kerejasama semua piak, mensia mayuh enggau prebet. Perintah enda ulih bejalaika pengawa tu kediri.

MyDIGITAL deka nyediaka menalan ti kondusif amat dikena numbuh mayuh agi peluang kereja enggau pengawa dagang. Arapka udah tu ila, penanggul ti kala ditapi Veveonah enggau Norlieda enda nyadi agi.

Menua kitai ngembuan pelasar ti tegap dalam pengawa digital. Kitai ke bendar udah berengkah dulu ari menua bukai di Asia Tenggara. Potensi ulih dikerembaika agi, semina iya begunaka kitai ke mesti bejalaika iya. Perintah udah nguji ngerapitka seraka ke bisi sereta nyediaka komuniti ti lanchar ba pengawa digital ungkup jemah ila.

Glosari:

kelaing - platform

Pengerami Hari Indu Sedunya 2021

Pengerami Hari Indu Sedunya tauka mega disebut Hari Indu Antarabansa diintu ninting taun dikena ngingat sereta ngeramika tanggung pengawa orang indu dalam mayuh bengkah bidang pengawa. Taja pan enda digerahka nyadi pemisi rama di Malaysia, mayuh leman pengawa tauka aktiviti bisi diatur sereta dipejalaika dikena ngintu hari tu.

Orang indu enda milih sida nya indai orang, bini orang, pengajar universiti tauka sekula, menyadi indu, tauka ke bukai patut bendar diterima enggau penuh pengasih laban sida mih kelai basa kitai ke sida iya lalu tanggung pengawa sida nya besai amat reti dalam pengidup kitai semua besehari-sehari. Orang indu mayuh nulung dalam pemansang menua, pengerembai institusyen ruang bilik sereta negapka komuniti penyayau.

Haribulan Hari Indu Sedunya

Hari Indu diintu kena 8 MAC ninting taun dikena ngintu sereta ngeramika tanggung pengawa sida ke indu ti nyadi tukang rintis ngagai pemansang generasyen.

Tema Hari Indu di Malaysia

Di Malaysia, tema pengerami Hari Indu 2021 iya nya; Indu Angkat Napi Penguji (Wanita Bangkit Mendepani Cabaran).

Tema Hari Indu tu dipilih Opis Menteri Pemansang Orang Indu enggau Diri Sebilik dikena ngeringka semengat ngelaban orang indu ke enda mudah belelak napi penguji dalam pengidup sida. 

Gaya pendiau orang indu ke lemi ukai nyadika penekul sida nyingkang ke mua tang enggau penglemi pendiau sida nya mih bisi disimpan pengering ti tegap sereta ngembuan semengat ti kering baka besi waja.

Taja pan dunya kemaya hari betapi enggau pandemik Covid-19 tang penusah ke semampai ditapi ngajar kitai semua tetap angkat napi penguji tu. Nya alai, sama-sama mih kitai belematika tema Hari Indu tu ti sinonim enggau utai ke nyadi kemaya hari tu. Aram mih kitai bela ngayanka tanda sukung kitai ngagai sida ke indu.

Hashtag tauka tanda pagar ti dikena taun tu  iya nya; 

#InduAngkatNapiPenguji

#InduBesiMenua

#HariIndu2021

Pengerami Hari Indu di Malaysia

Tuju pengerami hari indu diintu di Malaysia iya nya dikena;

1.    Meri tanda puji ngagai raban orang indu dalam mayuh bengkah bidang pengawa.

2.    Ngenatai penerang enggau penemu ngambika sida ke indu ngembuan  daya bepekit dikena nyapai kaul bekunsika penemu entara lelaki enggau orang indu

3.    Tanda penyiru perintah ke tanggung pengawa orang indu ke nyadi pugu pengangkat pemansang menua, pemansang institusyen ruang bilik enggau penegap komuniti penyayau.

 

Pengerami hari indu ba tikas Malaysia diintu nengah mayuh macham aktiviti ari mayuh bengkah opis tauka gerempung sekalika Opis Menteri, NGO enggau ke bukai. Taja pan nadai pemisi rama ungkup Hari Indu di Malaysia, tang mayuh macham aktiviti bisi diatur baka dialog, forum, licha enggau ti bukai dikena ngangkat penuduk raban orang indu.

Pengerami formal ungkup hari nya deka ditabur Opis Menteri Pemansang Orang Indu enggau Mensia Mayuh nengah kelaing media sosial sida baka Facebook, Twitter, Instagram enggau Laman Web – https://www.kpwkm.gov.my/

Opis Menteri Ti Ngatur Pekara Orang Indu di Malaysia

Di Malaysia Opis Menteri ti bekuasa dalam pekara orang indu iya nya Opis Menteri Pemansang Orang Indu enggau Mensia Mayuh (KPWKM) ti dipegai terus baruh Opis Pemansang Orang Indu.

Misi besai KPWKM iya nya  nyerakupka perspektif orang indu enggau mensia mayuh ke dalam arus perugu pemansang menua sereta negapka institusyen ruang bilik ngagai pengelantang sosial.

Menteri Pemasang Orang Indu enggau Ruang Bilik ke diatu iya nya Datuk Seri Rina Mohd Harun lalu Sapit Menteri iya nya Dato’ Siti Zailah Mohd Yusoff.

Rintai Menteri Orang Indu ke suba

No.	Nama	Maya Mangku Pengawa
1.	Dato’ Seri Dr. Wan Azizah Dato’ Dr. Wan Ismail	21 Mei 2018 – 24 Februari 2020
2.	Dato’ Sri Rohani Abdul Karim	16 Mei 2013 – 21 Mei 2018
3.	Dato’ Sri Mohammad Najib Tun Abdul Razak (Pemangku)	8 April 2012 – 15 Mei 2013
4.	Tan Sri Shahrizat Abdul Jalil	10 April 2009 – 8 April 2012
5.	Tan Sri Dr. Ng Yen Yen	19 Mac 2008 – 9 April 2009
6.	Tan Sri Shahrizat Abdul Jalil	17 Januari 2001 – 18 Mac 2008

  

Nguji Pengelandik Nulis Tusun Kesatu

 

 

1.           Pengelandik Nulis Dalam Komunikasyen

 

Taja pan pugu pengelandik jaku nya baka mending, bejaku enggau macha nya dikemeratka agi tang pengelandik nulis dikira pengelandik jaku ti pengabis beguna sereta pengelandik ti pengabis tinggi ti patut dipelajarka nembiak. Kedua-dua pugu pengelandik jaku iya nya bejaku enggau nulis dikira pengelandik ngasil enggau ngenataika komunikasyen. Entara kedua-dua pengelandik tu, nulis tusah agi dipelajarka nembiak. Nembiak sekula balat agi belajar, belatih sereta nguna pengelandik bejaku (dalam situasyen enda formal tauka formal) enti dibandingka enggau aspek nulis. Ketegal nya Donn Byrne (1921) kala mida pengelandik bejaku ari pengelandik nulis baka ke disebut di baruh tu:

 

Writing, on the hand, is learnt through a process of instruction. We have to master the written form of the language and to learn certain structures which are less used in speech, or perhaps not used at all, but which are important for effective communication in writing.

 

Peratika bida entara bejaku enggau nulis baka ti dirintai baruh tu:

 

(a) Bejaku dipelajar ba peringkat ke agi tumu. Ba mayuh nembiak mit, sida berengkah belajar bejaku maya umur 1 ½ - 2 taun; lalu belajar nya nengah chara enda formal. Pengelandik macha enggau nulis diajar dudi agi, iya nya maya umur sida 6 – 7 taun tauka maya umur 4 – 5 taun enti diajar ba prasekula.

(b) Bejaku ulih ngena jaku dialek tang nulis begunaka jalai jaku, sintaksis enggau vokabulari ti betul sereta standard.

(c)  Orang ke bejaku ngena nyawa (gaya munyi, entak, rhythm), jari enggau mua ulih ngenataika reti enggau idea. Penulis semina ngena leka jaku ba atas keretas dikena ngenataika reti.

(d) Orang ke bejaku ngena pauses enggau intonasyen. Penulis ngena tanda bacha baka tanda titik, koma, koma betitik, tanda tekenyit enggau tanda bacha ti bukai.

(e) Orang ke bejaku nyebut tang penulis nyepil.

(f)   Bejaku suah agi nyadi tekala nya sereta enda diperambuka dulu. Nulis begunaka awak dikena nyediaka pekara ti deka ditulis. Suah mega kitai meresa dulu sereta ngubah pekara ti ditulis enti patut.

(g) Orang ke bejaku enggau orang ke mending selalu iya betunga mua. Entara orang ke bejaku enggau peninga bisi interaksyen ti aktif. Enti peninga nya meretika utai ke disebut, dia iya lalu nagutka pala. Tu kira nimbal orang ke bejaku nya. Baka nya mega enti iya ke ninga nya enda mereti tauka enda setuju iya ulih ngeriutka kening, ngilikka pala, ngelih jaku tauka nanya iya ke bejaku nya ngambika iya ulih nerang pekara nya baru silik agi. Ba penulis, timbal balas pemacha enda dipeda terus kemaya nya. Iya dipelabaka enda bulih respon kemaya nya ari pemacha dikena iya nemu orang nya meretika tauka enda pekara ti ditulis iya. Enti pemacha enda nemu nama utai ke ditulis iya ke nulis tentu enda nemu mega lalu iya nadai peluang deka nerang kemaya nya.

(h) Bejaku suah agi ke enda formal. Leka jaku, frasa (rambai jaku) enggau ayat ulih ditandu dikena narit ati, nerangka reti, negapka penemu etb. Ambika banding, kitai suah nyebut jaku munyi tu, “Iya ke aku nya munyi tu... tauka “ Uji aku nerang sekali agi,” enggau chunto bukai. Tang maya nulis pekara ti ditulis nya formal sereta padat agi. Sesebengkah asil tulis  bepun sereta ngerembai nitih atur, adar sereta tusun ti logik lalu enda ngena mayuh pampang penerang sangking tauka penerang tambah.

(i)   Orang ke bejaku suah agi ngena ayat ti mudah sereta suah agi leka jaku nya dipegulaika ngena leka jaku ‘enggau’, ‘tang’ enggau ‘nyadi’. Penulis ngena ayat ti kompleks agi baka jaku ‘besenutuk enggau nya’, ‘nambahka nya’ etb. Ambika banding lebuh kitai bejaku kita nyangka munyi tu, “Apai iya udah tuai tang kuat,” tang lebuh nulis kitai nyangka nulis nulis munyi tu, “Taja pan apai iya udah tuai, iya agi kuat”. Reti nya gaya jaku enggau jalai jaku lebuh bejaku enggau nulis nya endang bisi bida.

 

Ketegal bisi sekeda bida, nya kebuah pengelandik nulis mar sereta lubah agi dipelajar ari pengelandik bejaku tauka macha. Pengelandik dalam aspek nulis ulih diajar nengah chara ti formal. Orang ti sepenemu enggau runding tu iya nya Ann Raimes (1983:5) laban iya kala madah munyi tu:

                

         

When we look at those differences, we can see that our students will not just “pick up” writing as they learn other language skills. We have to teach writing...

 

Penemu Ann Raimes nya sigi amat lalu dipelabaka semua pengajar ke ngajar subjek jaku (language subject) besetuju enggau iya. Sebedau nembiak ulih ngasilka sesebengkah karya ti manah (karang, ripot, esei, surat, teks jaku ba mua mayuh, minit aum, jerpan etb.) bisi pengelandik bukai ti patut dipelajar sereta ditemu sida. Peratika grafik 1 ti ngayanka pengelandik ti patut dikembuan lebuh ngasilka sesebengkah karya.

         Grafik 1

 

SINTAKSIS Struktur ayat, kompleksiti ayat, milih gaya etb.	ISI Bisi kaul, terang sereta logik	PROSES NULIS Bulih idea, nyediaka langkar, nulis deraf, meresa sereta nyeruri deraf, nulis versyen kepenudi
	Idea ti terang, betusun sereta semitan
JALAI JAKU Betul ari sukut formula subjek enggau predikat, jaku pengawa etb.		PEMACHA Individu / raban taga penulis
MEKANIS Tulis jari ulih bacha, sepil, tanda bacha etb.		TUJU NULIS Dikena nerang, nyerita, ngeripot, nyara, ngelikuh, ngajum etb.
TUSUN Pengerembai idea, kaul entara genteran, nitih logic topic, tema tauka jerita	MILIH LEKA JAKU Vokabulari, sempama, penemban reti jaku ti dikena

 

Sanding Penemu

 

Abdul Aziz Abdul Talib 1983, “Menguji bacaan Bahasa Melayu Secara Diagnostik: Kaedah dan Tknik”, dalam Jurnal Dewan Bahasa, (Nov. 1983). Kuala Lumpur: Dewan Bahasa dan Pustaka.

Abdul Aziz Abdul Talib 1984, “Teknik Kloz Sebagai Alat Menilai dalam Bidang Pendidikan Bacaan Bahasa Malaysia”, dalam Jurnal Dewan Bahasa, (Feb. 1984). Kuala Lumpur: Dewan Bahasa dan Pustaka.

Abdul Aziz Abdul Talib 1984, “Psikolinguistik dan Pengajaran Bacaan Sekolah Rendah”, dalam Jurnal Dewan Bahasa, (Jun. 1984). Kuala Lumpur: Dewan Bahasa dan Pustaka.

Abdul Aziz Abdul Talib 1996, Menguji Kemahiran Bahasa:Prinsip. Teknik dan Contoh, Kuala Lumpur: Dewan Bahasa dan Pustaka.

Clay, M.M. 1982. The Early Detection of Reading Difficulties. Auckland: Heinemann Publishers 

Drummond, D. & Wignell, E. (eds.)., 1979. Reading: A Source Book. London: Heinemann Educational Books.

Ebel, R.L. 1979. Essentials of Education Measurement. New Jersey: Prentice Hall Inc.

Ebel, R.L. 1980. Practical Problems in Educational Measurement. Lexington: D.C. Heath.

Heaton, J.B. 1979. Writing English Language Tests. London: Longman Group Ltd.

Lamberg, W.J. & Lamb, C.E. 1980. Reading Instruction in the Content Areas. Boston: Houghton Mifflin Co.

Pusat Perkembangan Kurikulum, Kementerian Pelajaran Malaysia 2005. Bahasa Iban Tingkatan IV : Huraian Sukatan Pelajaran. Kuala Lumpur: Dewan Bahasa dan Pustaka.

Moseley, D. & Caroline, D. 1977. Language and Reading Among Underachievers : A Practical Review of Research. Windsor: NFER Pub. Co.

Ragget, M.S. et. al. (eds.) 1979. Assessment and Teaching of Reading. London: Wardlock Educational.

Smith, F. 1980. Reading Cambridge : Cambridge University Press.