Mayuh ‘semengat charut’ ba media sosial, patut ditagang sebedau raya

 

Enti kitai belematika komen netizen bekaul enggau karang tauka gambar ti diayanka ba media sosial dia kitai ulih meda penyakit enda lantang ati tauka ninding tauka chemuru munyi ku jaku orang kemaya hari majak nyadi senyadi. Penyakit tu tau mega dikumbai penyakit ‘charut semengat’ tauka  penyakit 'jiwa kacau' ba laman sosial. Peratika lebuh sesebengkah gambar dikunsika orang, tentu bisi komen cheruit (ciapan komen) ke dibantai lalu nya ngayanka gaya enggau identiti penulis tauka penguna media sosial nya empu baikka sida ngadang tauka enda utai ke udah dituliska sida nya. Mayuh macham chara orang nimbal pesan ke ayan dia lalu ulih dipeda sekalika nya nyukung tauka meri jaku pejah.

Aku ngambi chunto iya ke bisi nyadi apin lama ke udah ti bisi ayan ba surat berita. Bisi siku indu ke diau jauh ba tanah Chicago, Amerika Syarikat muatka gambar dalam ruang raban tukang sumai ti tebilang di menua tu. Ba laman nya bisi 1.5 juta orang nyadi raban. Gambar menu ke disumai ti diayanka iya dia iya nya sebansa pemakai tradisional Malaysia ti dikumbai nasi lemak . Gambar nasi lemak nya disempulangka iya enggau gambar seleju ba muak ke belakang. Leka seleju nya ulih dipeda neritik labuh ari jenila rumah iya. Sida ke nyukung gambar nya mayuh madahka idea nya manah. Baka nya mega bisi sida ke enda tentu lantang ati meda gambar nya, laban ba penemu sida gambar nya bisi ngayanka menua orang putih. Ba sida, gambar nya enda engkeman, nya alai sida tu minta gambar ti baka nya enda tau dikunsika agi ba raban nya.

Komen ngelanyai tauka ke ngundan elemen negatif enti dipekunsika enggau orang bukai tau ngasuh orang nya enda tetagangka asai ati diri empu lalu tau ngasuh orang stres. Penanggul tu tau nyadi balat lalu tau ngasuh orang nya munuh diri, enti sema pekara tu enda mujur ditagang.

Pengelicha Kanan (Bimbingan & Kaunseling) ba Pusat Pengajian Ilmu Pendidikan Universiti Sains Malaysia (USM), Dr Syed Mohamad Syed Abdullah madahka  penyakit charut semengat nya nyau majak ngerekai ba komuniti kitai kemaya hari tu.

Nitihka penemu iya, utai tu nyadi ketegal mayuh macham persepsyen enggau mega penemu ti bebida  dalam komuniti sereta mensia mayuh. Baka ke endang udah ditemu mayuh, genap iku individu ngembuan personaliti ke bebida lalu iya mungkur ulah, rega persepsyen enggau motivasyen ti bebida entara siku-siku.

Chara tiap-tiap individu nerima tauka belematika sesebengkah pekara tauka siti-siti utai nya ke ngasuh iya bebida. Enti kitai meda media sosial tu endang udah dikiraka trend kemaya hari ti lalu enda ulih diseliahka kitai. Nyau deka genap orang bekenaka media sosial kemaya hari tu. Nya alai enggau penatai sereta ubah pemansang  teknologi komunikasyen kemaya hari tu mih ke ngasuh media sosial tu nyadi kelaing ti tebilang ke dikena orang mayuh.  

Ubah ti semampai maya dikemaru, nyadi ketegal segang pemansang teknologi. Tu ti mai  inovasyen datai menatai lalu kelaing media sosial nya diperatika majak mudah narit ati bala penguna. Enggau fasiliti tu semua informasyen ulih disadung enggau lengkas, enggau mayuh sereta macham-macham agi pekara ke bukai. Pekara tu ngasuh pengidup mensia nyadi nyamai senyamai laban iya ulih mantu kitai enda milih endur kitai diau iya sigi ulih dikenataika enggau jampat ngena skala ti efisien agi ari ke ngelama tu.

Pekara  tu nyadi isu lebuh bisi sekeda penguna media sosial ke dipelabaka belaban arus penemu ari orang bukai lalu berengkah ngena media sosial tu ngena chara ti salah. Pekara ti nyadi tu bepun ari mayuh macham persepsyen sereta datai ari ulah bebida penemu dalam komuniti. Media sosial tu ke bendar manah lalu iya kelaing ti patut dikena enggau chara ti betul tang sekeda penguna nyau nguna iya ngena chara ti salah.

Endang amat munyi ku pengelicha nya, sigi bisi penanggul psikologi sereta kes ti mai empas mental sereta emosional ngagai individu ketegal ari empas utai ke ditulis tauka cheruit ti digaga bala penguna laman sosial. Enti individu ke nyadi tagit nya dikachau tauka diayah ba media sosial lalu enda nemu chara mutarka penanggul nya, tentu bendar iya deka meri impak besai ngagai emosyen sereta mental individu nya empu.

Taja pan kes nya dipeda agi mimit sereta jarang nyadi ba menua kitai tang pekara baka tu enda ulih dipeda sepiak mata aja laban ari kes ke mit nya mega tau nyadi besai sereta ngeruga pemaik, pengelantang, harmoni, psikologi lalu enggau minda orang Malaysia ke stabil. Nya alai kes ke mit baka tu  patut bendar diputar enggau lengkas laban ari sukut realiti sigi bisi kes orang munuh diri ketegal komen ba media sosial tu. Ari nya kitai ulih meda penguat empas enggau kuing runding ti diterima ketegal ari komen nya tadi. Nya mega kebuah hal baka tu patut diperatika kitai semua enggau serius.

Ari pemayuh komen enggau serebana ti kenataika ba kelaing sosial, mayuh agi ke mantaika pejah negatif ari jaku ti positif. Katika komuniti di Malaysia patut kebal agi,  tan kena anu lalu tebuka agi runding lebuh bekenaka literasi media lalu ukai agi baka suba ti balat ngayanka basa ngagai pangan diri? Nama runding kita dih senentang hal tu?

Ba penemu aku dalam hal tu pengawa ke deka nyadika literasi media nya siti budaya ti patut bendar dikemeranka. Iya patut nyadika chuan enggau teladan kelebih agi ba sekula enggau budaya Malaysia nya empu. Komuniti menua tu enda ibuh bangat kebal sereta mega tebuka bendar runding ke semua pekara taja pan  daya pengetan, daya pengebal enggau minda ke tebuka nya sigi manah amat sereta patut dititih. Mayuh mega bala ke udah lama bekelala enggau pangan diri suah betundi mesan pangan diri ngena kuasa tat lebuh betapi enggau hal ti baka nya.

Taja pan kitai ke nyadi komuniti ke udah tuai runding patut ulih nerima penguji nya mega betatika taka sesebengkah pekara. Chukup mih enti kitai nitihka iya ke udah segenda bisi dalam konteks pelajar sekula enggau budaya Malaysia. Kitai dipinta seruran ngembuan runding ke tebuka, tan agi lalu semampai ngayanka adat basa lebuh ngemeranka literasi media.

Nambahka nya, kitai enda patut ngembuan ulah ke tan dianu sereta enda sensitif ke udah ti nyadi laban ba ujung hari iya tau mai empas ke enda manah ngagai komuniti kitai enti sema runding kitai kelalu tebuka sereta nadai besekat. Kitai sigi ulih berubah nitihka maya, berubah nitihka pemansang teknologi sereta berubah nitihka peminta kemaya hari tang kitai enda tau enda ngenanka kaul harmoni, kaul agama, kaul enggau mensia mayuh sereta ngenanka entiti budaya Malaysia ke endang udah lama bisi. Nilai tu endang sepa jaga udah bisi dalam chuan komuniti Malaysia lalu iya sama enggau identiti mulia ti semampai dikemeran kitai semua. Semua pekara tu tau enda ibuh digadaika kitai semua.

Komuniti ba menua tu, patut semampai  konsisten enggau nama-nama utai ke bisi lalu senurut enggau engkeman nitihka arus pemansang ngambika enda tinggal ari menua bukai enggau ari komuniti ke bisi.  Kebuah pia, laban Malaysia mesti nyingkang ke mua setipak enggau pemansang kemaya hari tang ba awak ke sama enda ninggalka nilai-nilai mulia adat basa, budaya enggau identiti ti nyadika tanda kitai nya peranak Malaysia.

Chara tiap-tiap individu tauka admin ke ngaturka media sosial baka whatsapp, telegram etb. mega patut dikemanahka agi kelebih agi lebuh sida tepedaka kes salah guna media sosial kemaya hari ke majak nyadi sereta ngerekai dalam komuniti. Kimpin narak mensia mayuh nyadi penguna media sosial ti pandai patut bendar diatur.

Kitai enda ibuh nitihka gaya tauka chara menua bukai ke dipelabaka tebuka agi runding lebuh nyadi penguna media sosial. Tuduh penemu enggau runding ke tebuka sigi semampai diterima tang mesti bisi adar adat ti betul. Di Malaysia kitai enda ulih nyeliahka diri ari identiti enggau kelai kitai ke dikumbai orang Malaysia. Basa bekenaka media sosial mungkur sida ke biak enggau raban anak mit. Ukum enggau pekara ti engkeman patut diletak ngagai sapa-sapa ba media sosial ke ngelanyai agama tauka sigi nyereda ngasuh orang pedis ati. Enti diperatika ari sukut psikologi, sigi sinu mih kitai meda raban ke ‘charut semengat’ tu  laban sida tau dikiraka kitai orang ke enda bepengerai ari sukut mental.

Penguna  media sosial patut ngadangka diri senentang kuasa ke bisi ba sida lebuh sida berinteraksyen enggau orang di media sosial, ambika chunto kuasa sida ngeripot ngagai Suruhanjaya Komunikasi dan Multimedia Malaysia (SKMM) enti nyema bisi kes ke ngeruga orang.

Taja pia, belalauka peneleba enggau perati, bisi mega penguna media sosial ke betanggungjawab ngambi inisiatif diri empu, ambika chunto, meri jaku lalau, ngemetulka fakta, semampai ngingatka pangan diri, nyadi orang tengah sereta mayuh agi pekara bukai ke nagang raban ke charut penemu tu terus ngerembai sereta ngerekai. Tabi puji patut diberi ngagai penguna media sosial ke betanggungjawab tu. Ba kuasa enggau tanggung pengawa penguna laman sosial, raban penguna ulih milih enda ngibuh tauka ngelaung sida ke ngena media sosial tu enggau chara ti salah. Ke bendar iya, kitai patut bela ngaga diri enda nemu utai ke dikereja sida.

Ari  sukut psikologi, sida ke ngaga diri charut runding tu, kadang-kadang nyereda ngayanka diri baka nya ngambika dikeibuhkan orang sereta ngiga populariti kelebih agi lebuh sida mantaika sesebengkah pekara ti tau ngemediska ati sereta tau ngasuh orang ringat. Sida berasai gaga sereta puas ati lebuh orang mayuh enggau penguna media sosial ke bukai enda mukai-mukai tak kelang kabut deka meri respons sereta malas jaku sida. Tu pekara ke enda manah bendar.

Nitihka Perunding Psikologi Keluarga & Guaman Syarie, Suzana Ghazali (Bernama 17 March) madah orang ke ngaga pekara ti enda manah endang ngembuan kaul sakit mental tauka bisi penanggul ati. Nitihka iya, enti diperesaka profil sida ke ngaga perangai baka nya endang nyereda mega muka akaun sida dikena ngachau sereta ngeruga runding orang bukai. Sida berasai lantang ati lebuh sida ulih ngemaruhka  orang bukai. Sida tu ke bendar ngembuan penanggul ba diri empu, enda puas ati ke pengulih diri, enda lantang enggau utai ke dikemisika diri lalu nadai pengarap ngagai diri empu. Nya alai sida nguji ngemaruhka orang bukai lalu sida berasai lantang ati lebuh orang ke diayahka sida nya ngasaika diri asa sereta dikemaruhka. Ba sida tu mih   pemenang ku sida lalu sida berasai puas ati ke pemenang nya.

Pekara ti suah nyadi tu ukai sebengkah ari penanggul media sosial tang lebih ngagai penanggul individu ke bisi sakit mental. Jalai mutarka isu tu iya nya bala netizen ke  positif agi runding patut nyaup sida ke charut semengat nya lalu ukai ngembal sida enda beiga-iga. Enti sida majak diembal enggau jaku ke enda manah dipelaba pekara nya tau nyadi raya agi. Kelimpah ari nya, pengguna media sosial mega patut ngubah ulah sida sereta chara sida bekunsika  pekara. Sida patut bekunsika pekara ti semina bisi mai penguntung enggau pemanah ngagai orang bukai. Momen-momen manah ke dikenang chukup mih enti dikunsika enggau orang ke sempil enggau kitai aja. Enti kitai andal deka ngunsi nya ngagai semua orang, tentuka semengat kitai empu mega kering sereta ulih nerima komen ti negatif. Enti enda, ANANG KUNSI laban nuan semina mantu nambahka statistik pemayuh orang ti enda betul runding di luar din.

Aram mih kitai sama-sama nyaga diri empu, nyaga orang bukai lalu semampai bejimat lebuh mansutka sebarang jaku ba mua mayuh kelebih agi lebuh mantaika penemu ba kelaing media sosial. Anang nganti tepantup baru nengkadah.

Glosari:

ciapan – cheruit

ciapan twitter – cheruit twitter

nyereda - sengaja