Mayuh bala nembiak kemaya dia belajar ari rumah sekumbang pandemik Covid-19 tu ngerekai. Enggau awak ti chukup mayuh nya kelebih agi lalu ditangkanka enggau peremisi sekula, dia bala apai indai berasai tusah deka ngasuh sida duduk terenah di rumah.
Program televisyen enggau main ba komputer semina ulih ngenan sida mindah sekejap aja. Udah nya sida lalu berasai leju. Taja pia, siti ari chara ngasuh minda tauka runding terenah sereta merindang sida iya nya enggau chara bebachaka bup.
Nembiak redak enggau orang besai tuai ke udah ngembuan pengerindu enggau media chelak nemu pemesai reti leka jaku ba sesebengkah lambar bup. Bisi sekeda nya berasai tusah deka ngelengkaka sereta nyeraraka diri ari bup pama sida udah berengkah bejalai, mantau sereta kiruh enggau pengawa romance ke bisi dalam bup ti dibacha sida nya. Pengelantang enggau pengaga lebuh udah nunyau diri enggau pengawa macha nya enda ulih ditiu enggau leka jaku.
Apai indai ke deka ngumpan sereta nerenak bala anak ngambika sida ngembuan pengerindu macha iya nengah chara meransang sida milih siti bup ke dikerinduka sida. Apai indai patut meli bup ke anak sida lalu mai sida ke kedai bup. Bai mega sida ke librari rama lalu registerka sida nyadi raban librari nya.
Ba kandang menua ti dibaruh perintah mindah betagang dia apai indai ulih ngelawa Internet enggau anak sida lalu meli bup ngena chara online. Apai indai mega patut berunding numbuhka librari mit di rumah diri empu. Sida ulih ngumpul bup tauka majalah.
Peremisi sekula nya maya ti manah dikena bala nembiak ngambi peluang macha enggau ekstensif dikena ngisi maya lepa seraya ngerinduka ati diri macha mayuh leman bup. Peninggi reti macha enda ulih dikemaruhka pia aja laban iya udah ditemu ulih ngubah idea pengidup siku-siku individu.
Budaya macha ulih nerenak ulah ti manah, ngilir runding sereta ngerembaika penemu enggau peneleba. Iya nyadika andau entara pengawa ngulihka penemu enggau pengelandik linguistik sereta mai penguntung ti signifikan nengah peneleba virtual, pengawa ngulihka penemu, ngasahka runding sereta ngerembaika pemansang emosional.
Nya kebuah pengawa nerenakka ulah macha ba nembiak nya pengawa ti patut dikemeratka.
Macha ba bala anak mega mai pemanah dalam timpuh awak ti panjai. Sida lalu ngembuan pengerindu deka macha sereta belajar sepemanjai maya.
Apai indai patut ngagihka awak dikena sida sebilik macha ari ti meda cherita ba televisyen. Apai indai patut nyadika chunto model orang ke rindu macha maya lepa laban iya nadai tentu reti enti apai indai empu enda ngayanka ulah nya tang semina ngasuh bala anak aja macha. Asuh bala anak idup sereta besai dikelingi enggau mayuh bup ngambika sida mansang rindu ke bup sereta rindu bebachaka bup.
Nya alai, kitai sama
bela ngarapka nembiak ngisi maya sida di rumah enggau macha mayuh leman bup
laban nya tentu ulih muka runding sida ngagai penemu baru lalu nyediaka sida nyadi
pasport matau mayuh leman penemu sereta nyikap sida enggau kereban dikena
belajarka utai baru.
Tiada ulasan:
Catat Ulasan