Sepenyampau isu besai ti udah nyadi dalam taun 2020
indah enda baka cherita ngerau ke nyempulang kitai ngagai taun baru. Lebuh kitai
macha lalu mendingka jurai senentang taun baru enggau jalai perintah deka
nimbal sampi kolektif kitai sereta masu langit ari serang pemerinsa ti nadai
pengujung ba taun 2020 dia kitai tentu enda ulih enda agi berasai ngaru dalam
ati.
Nama utai ti tau ngasuh kitai berunding 2021 deka
nyadi taun ti manah agi ari diatu? Tu sekeda ari tanya ti bisi diangkatka lebuh
bejurai tauka bekelikuh enggau bala bakih. Baka mega orang bukai, kitai rindu
ke katarsis ti jampat, pengelepas ari tragedi ti semampai nyadi.
Kitai dekaka semua orang ulih berinteraksyen enggau
nadai besekat, enda ibuh bekenaka pemampul mulut enggau idung, ulih merap orang
ke dikerinduka kitai sereta ulih tinduk enggau jenak laban nemu bala tuai kitai
enda nganu, enda ngelese maya kitai meda sida bejaku ba berita tv.
Tang ari semua randau senentang penusah enggau
penanggul ti ditapi dalam taun tu pengidup kitai enda pulai baka selama tengah
malam taun baru tu. Pengachau, pengeregau enggau krisis enda nitih kalendar. Sigi
amai taun 2020 mayuh mai penusah. Uji kitai malik ke belakang sesempa leka
pinang lalu ngerintai penusah ke udah nyadi.
Iya berengkah ari letup Gunung Berapi Taal di
Filipina, penyakit buntak padang pasir ti pengabis balat di Kenya lalu kepenudi
gerah ari Gerempung Pengerai Sedunya (WHO) senentang penyakit koronavirus ke
nyadi emergensi pengerai global. Kitai mega bekunsi berita ribut ti pengabis
tebilang sepemanjai taun sereta pengangus ti pengabis balat nunu lebih empat
juta ika tanah ba nengeri California. Kitai mega suntuk maya ti berega dikena
mutarka ubah klimet lalu baka selama bisi mih sekeda pemesai menua enda
besetuju ngumbai nya semua nya tipu. Kitai mega sinu ninga rita orang tebilang
di Malaysia ke udah ninggal kelebih agi sida ti tebilang ba bidang pelajar,
pengarang berita sereta lumba enggau main. Udah terang amai kitai deka meri
tabi penyinu ati ngagai bala ke dikesayauka kitai dalam komuniti. Nya mih
sebengkah ari pusin pengidup kitai.
Taja pan menua kitai udah merambuka langkah rapat
dikena mutarka penyakit Covid-19 ari majak berampit tang agi bisi mega isu ti
bekaul enggau nya lalu enda ulih diputarka baka statistik penyampau ti udah
kena rampit ti enda tentu terang dipadahka. Taja pia kitai mesti terus nyaga
seraka enggau pangan diri lalu bekenaka pemampul mulut sereta terus ngajar
mensia mayuh ke majak nerima informasyen ti salah senentang risiko virus ti
majak ngerekai tu.
Taja pan vaksin coronavirus tetap deka disediaka
ungkup mensia mayuh, perintah patut meri pengarap ngagai sida senentang vaksin
nya nyengkaum sida ke kala ngelese atur seraka sosial tauka fizikal sereta
madahka penusah virus tu enda nyata.
Bah baka ni mega gaya peranak enggau rayat Malaysia ti
agi bedau bisi rumah, ti nadai duit simpan, nadai gaji tauka insuran pengerai
maya penyakit tu majak berampit?
Pemesai politik dipeda enggau naka ulih ngerejaka
pengawa sida bepelasarka agenda politik diri empu. Bisi mih ke ngerimbas
pending madahka sekeda tuai politik ari ti mantu rayat balat agi ngelaku pekara
ti enda ngenataika penguntung, mantaika ego orang vulgarian narsisis ti mai
empas ngagai juta peranak menua.
Enti kitai deka 2021 tu nyadi taun ti manah agi, kitai nadai jalai bukai tang ngayuhka perau diri empu. Kitai enda tentu ulih ngarapka orang bukai. Siti ari chara nya ngenataika penemu diri sereta nentuka pekara ti kenataika kitai nya bisi diputarka orang ti betanggung pengawa dalam pekara nya. Kebuah pia, ngambika sida ulih meri bantu ngagai juta rayat Malaysia sereta nyaga kitai ari demokrasi enggau penegap undang-undang. Kitai semua mesti betapi enggau realiti ti enda tentu manah, kasar sereta tau ngemediska kitai rayat selama. Kitai mega mesti ngembuan pengeliat ati sereta tan napi mayuh macham pekara. Kepenudi, kitai mesti nembuka taun 2021 ngangkatka penemu sains, fakta, demokrasi enggau pengasih dikena kitai ngantika semua ti udah lenyau dalam taun 2020.
Tiada ulasan:
Catat Ulasan