Mutarka isu sebedau SPM nyadi mandatori

 

Mutarka isu sebedau SPM nyadi mandatori

 

TUDUH PENEMU  ke deka ngasuh pelajar Pom Lima nya mandatori di sekula endang patut bendar dipuji, tang iya mega patut ditimpai ari sukut perspektif ti besai agi. Aku enda nemu berapa iku ari kitai bisi kala ninga perambu tu.

Nitihka ripot bisi lebih ari 20,000 iku nembiak sekula nadai enggau ngambi peresa Sijil Pelajaran Malaysia dalam kendang dua taun ke udah iya nya ari taun 2020 ngagai 2021.  Belalauka penerang ti diterima madahka kebuah nya pandemik Covid-19, isu diri sebilik enggau suntuk duit. Tu mih sekeda ari dalih nembiak sekula nya enda enggau orang bukai ngambi peresa SPM.

Akta pelajar madahka semua nembiak mesti nembuka pelajar primari sida sigi bisi tang akta nya nadai ngasuh nembiak sekula mesti nembuka pelajar sekondari sida. Tu mih kebuah mayuh nembiak sekula sekondari badu ba setengah jalai. Sida milih deka bekereja, mantu apai indai sida. Sekeda nya lalu nulung busines sida sebilik lalu iya ke bukai nya belajarka sekeda pengelandik ti tau dikerembaika sida nyadi pengawa ti meruan.

Sekeda ari nembiak tu, ketegal ke ransing sereta bagas gawa lalu ulih ngiga jereki sereta ulih napi pengidup. Tang nama kebuah sida tu milih enggai nembuka pelajar sekondari sida?

Nitih sida ke udah betungkapka pekara tu enggau silik madahka pugu kebuah nya sigi nadai bukai tang penyeranta. Besekula ba sekula sekondari ukai nya enda bebayar, taja pan bup teks sida dijali perintah lalu sida enda ibuh mayar yuran tang sida mega agi bebelika pekakas sekula ti bukai.  Anang enda ingat, penyuntuk duit ulih mejal bala nembiak badu besekula. Udah mayuh amat evidens ulih dikumpul ari pekara tu.

Enti diperatika ari sukut rama, bala nembiak ke enda nampung sekula nya endang sida ke lubah ba sukut akademik kenyau ari sekula primari. Mayuh ari sida tu ngembuan gred ti baruh. Sekeda nya enda nemu macha enggau nulis taja pan udah namatka pelajar enam taun sida ba sekula primari. Nya alai, sekeda apai indai ngasaika hal tu masau jam enggau puncha penatai sida nganjung anak sida ke sekula sekondari, ditambah mega enggau pemutus peresa sida ba Taun Enam ke enda manah. 

Nambahka nya mega, nembiak ke kurang ba akademik lebuh sida niki ke Pom Satu suah agi diagihka penguasa sekula ba kelas ujung ke alai sida ke kurang pandai digelumuka. Sekeda sida mega suah dikeduanka bala nembiak pandai ke bukai.

Kelimpah ari nya, bisi sekeda pengajar sengaja ngaga pengidup sida nembiak tu tusah lalu suah ngumbai sida tu ngenatai penanggul. Ketegal teperasa sereta enda besemengat, mayuh nembiak sekula suah  teruan ngujungka sida majak enda datai dalam timpuh besekula ungkup taun nya.   Nya kebuah, taja pan sida udah ninggalka sekula sida agi mengkang buta urup. Nya alai, ari sida nampung pelajar ke sekula sekondari, sida rindu agi bekereja makai gaji,  dikena nambah penatai pemisi sida sebilik. Taja pan bisi program seridi enggau pengaya ungkup nembiak muntat di sekula sekondari, tang mayuh ari program nya nadai diteruska penguasa sekula laban nadai komitmen ari kedua-dua piak iya nya nembiak enggau pengajar.

Sekula sekondari patut relevan sereta beguna ke nembiak sekula ti kurang ba bidang pelajar. Pengajar ke bagas sereta komited patut bendar diberi tanggung pengawa meratika sida.

Mesti bisi woksyop, nemuai sambil belajar enggau belajar chara hands-on-learning ungkup sida ke kurang ba sukut akademik tu. Sekula mega patut ngenataika guna nembiak tu ngambika sida ransing agi deka datai ke sekula atas pengingin ati sida empu sereta enda datai ketegal diansak apai indai tauka sekula. Belajar patut ngerinduka ati sereta ulih alai nambahka peneleba. Gaga  bilik kelas nya kondusif alai ngajar enggau belajar. Bilik kelas ti penuh dedat enggau bala nembiak ulih nyadi siti penguji ngagai bala nembiak enggau pengajar lalu ulih nekulka fokus enggau pelajar individu. Tingkatka infrastruktur di sekula enggau perengka guna ke baru.

Nembiak ke suntuk duit patut dibantu enggau mata duit sereta tambang bas patut ditanggung sida sekula. Pemakai maya enchelap pagi enggau pemakai tengah hari patut disediaka ungkup nembiak ke bisi suntuk belanja kelebih maya sida belelak sebedau nampung pelajar baru. Sekula patut ngembuan tanggung pengawa sereta meratika pendiau pengelantang genap iku nembiak. Lebuh kitai meda pekara tu enggau serius, baru kitai ulih ngasuh semua nembiak nembuka pelajar sekula sekondari sida.  Nembiak  patut ulih pansut enggau setipikit basic Pom Lima lebuh sida ninggalka sekula. Awak ti diperabiska ba sekula sekondari patut ulih ngubah siku-siku nembiak ari sukut fizikal, mental, spiritual enggau emosyenal. Nadai nembiak patut ditinggalka ari juluk ati holistik pelajar sekula sekondari tu.