Mutarka isu sebedau SPM nyadi mandatori

 

Mutarka isu sebedau SPM nyadi mandatori

 

TUDUH PENEMU  ke deka ngasuh pelajar Pom Lima nya mandatori di sekula endang patut bendar dipuji, tang iya mega patut ditimpai ari sukut perspektif ti besai agi. Aku enda nemu berapa iku ari kitai bisi kala ninga perambu tu.

Nitihka ripot bisi lebih ari 20,000 iku nembiak sekula nadai enggau ngambi peresa Sijil Pelajaran Malaysia dalam kendang dua taun ke udah iya nya ari taun 2020 ngagai 2021.  Belalauka penerang ti diterima madahka kebuah nya pandemik Covid-19, isu diri sebilik enggau suntuk duit. Tu mih sekeda ari dalih nembiak sekula nya enda enggau orang bukai ngambi peresa SPM.

Akta pelajar madahka semua nembiak mesti nembuka pelajar primari sida sigi bisi tang akta nya nadai ngasuh nembiak sekula mesti nembuka pelajar sekondari sida. Tu mih kebuah mayuh nembiak sekula sekondari badu ba setengah jalai. Sida milih deka bekereja, mantu apai indai sida. Sekeda nya lalu nulung busines sida sebilik lalu iya ke bukai nya belajarka sekeda pengelandik ti tau dikerembaika sida nyadi pengawa ti meruan.

Sekeda ari nembiak tu, ketegal ke ransing sereta bagas gawa lalu ulih ngiga jereki sereta ulih napi pengidup. Tang nama kebuah sida tu milih enggai nembuka pelajar sekondari sida?

Nitih sida ke udah betungkapka pekara tu enggau silik madahka pugu kebuah nya sigi nadai bukai tang penyeranta. Besekula ba sekula sekondari ukai nya enda bebayar, taja pan bup teks sida dijali perintah lalu sida enda ibuh mayar yuran tang sida mega agi bebelika pekakas sekula ti bukai.  Anang enda ingat, penyuntuk duit ulih mejal bala nembiak badu besekula. Udah mayuh amat evidens ulih dikumpul ari pekara tu.

Enti diperatika ari sukut rama, bala nembiak ke enda nampung sekula nya endang sida ke lubah ba sukut akademik kenyau ari sekula primari. Mayuh ari sida tu ngembuan gred ti baruh. Sekeda nya enda nemu macha enggau nulis taja pan udah namatka pelajar enam taun sida ba sekula primari. Nya alai, sekeda apai indai ngasaika hal tu masau jam enggau puncha penatai sida nganjung anak sida ke sekula sekondari, ditambah mega enggau pemutus peresa sida ba Taun Enam ke enda manah. 

Nambahka nya mega, nembiak ke kurang ba akademik lebuh sida niki ke Pom Satu suah agi diagihka penguasa sekula ba kelas ujung ke alai sida ke kurang pandai digelumuka. Sekeda sida mega suah dikeduanka bala nembiak pandai ke bukai.

Kelimpah ari nya, bisi sekeda pengajar sengaja ngaga pengidup sida nembiak tu tusah lalu suah ngumbai sida tu ngenatai penanggul. Ketegal teperasa sereta enda besemengat, mayuh nembiak sekula suah  teruan ngujungka sida majak enda datai dalam timpuh besekula ungkup taun nya.   Nya kebuah, taja pan sida udah ninggalka sekula sida agi mengkang buta urup. Nya alai, ari sida nampung pelajar ke sekula sekondari, sida rindu agi bekereja makai gaji,  dikena nambah penatai pemisi sida sebilik. Taja pan bisi program seridi enggau pengaya ungkup nembiak muntat di sekula sekondari, tang mayuh ari program nya nadai diteruska penguasa sekula laban nadai komitmen ari kedua-dua piak iya nya nembiak enggau pengajar.

Sekula sekondari patut relevan sereta beguna ke nembiak sekula ti kurang ba bidang pelajar. Pengajar ke bagas sereta komited patut bendar diberi tanggung pengawa meratika sida.

Mesti bisi woksyop, nemuai sambil belajar enggau belajar chara hands-on-learning ungkup sida ke kurang ba sukut akademik tu. Sekula mega patut ngenataika guna nembiak tu ngambika sida ransing agi deka datai ke sekula atas pengingin ati sida empu sereta enda datai ketegal diansak apai indai tauka sekula. Belajar patut ngerinduka ati sereta ulih alai nambahka peneleba. Gaga  bilik kelas nya kondusif alai ngajar enggau belajar. Bilik kelas ti penuh dedat enggau bala nembiak ulih nyadi siti penguji ngagai bala nembiak enggau pengajar lalu ulih nekulka fokus enggau pelajar individu. Tingkatka infrastruktur di sekula enggau perengka guna ke baru.

Nembiak ke suntuk duit patut dibantu enggau mata duit sereta tambang bas patut ditanggung sida sekula. Pemakai maya enchelap pagi enggau pemakai tengah hari patut disediaka ungkup nembiak ke bisi suntuk belanja kelebih maya sida belelak sebedau nampung pelajar baru. Sekula patut ngembuan tanggung pengawa sereta meratika pendiau pengelantang genap iku nembiak. Lebuh kitai meda pekara tu enggau serius, baru kitai ulih ngasuh semua nembiak nembuka pelajar sekula sekondari sida.  Nembiak  patut ulih pansut enggau setipikit basic Pom Lima lebuh sida ninggalka sekula. Awak ti diperabiska ba sekula sekondari patut ulih ngubah siku-siku nembiak ari sukut fizikal, mental, spiritual enggau emosyenal. Nadai nembiak patut ditinggalka ari juluk ati holistik pelajar sekula sekondari tu.

 

 

 

Jaga aset pesaka bansa kena ngetanka identiti Malaysia

 

Jaga aset pesaka bansa kena ngetanka identiti Malaysia

Pengawa mina  kereban pesaka dalam jaku mudah, mai reti sistem enggau chara ngatur aset waris pesaka. Waris pesaka tu dibagi ngagai dua iya nya iya ke sengenda ulih dipeda enggau ke enda nyata. Hal tu bekaul enggau proses nentu, nyaga enggau ngenanka aset waris pesaka bepelasaka tuju pemesai guna iya ba mensia mayuh.

Kelimpah ari nya, iya mega bekaul enggau pengawa nyaga ngena chara sistematik lebuh ke ngetanka nilai budaya ti bisi ba aset waris budaya ngambika ulih dipeda tauka diasaika serak nembiak kediatu enggau jemah ila.

Begembar enggau Akta Waris Bansa 2005 (645) pengawa nyaga aset waris pesaka nya endang tanggung pengawa semua kelebih agi penjaga waris sepengudah pekara tu digazetka Opis Waris Menua (Jabatan Warisan Negara). Pengawa ngazet tu nyukung juluk ati Polisi Budaya Menua 2021 dalam hal ngangkatka industri seni, budaya enggau waris menua.

Bisi tujuh pugu pekara dikemeratka lebuh pengawa bejalaika seni, budaya enggau waris pesaka jemah ila.

Iya mungkur budaya nilai tinggi, pemaik entara mensia mayuh, nyaga enggau ngintu waris budaya, pemansang enggau pengerembai budaya, pengawa ngangkatka budaya, pengawa mungkalka ekonomi budaya sereta ngelatika budaya.

Nya kebuah, waris pesaka tu patut dijaga laban pemesai guna aset nya ngagai pengawa nukuhka sejarah, tradisyen enggau praktis sereta identiti sesebengkah bansa.

Asil ari ti asal ke diempu rakyat 

Ba hal bukai mega nengah pengawa bekunsika identiti waris pesaka, iya ulih ngayanka pengasai bempuka pesaka ba rayat, lalu tu ulih nerenak semengat rinduka waris budaya Malaysia. Nya alai, aset waris budaya patut diintu enggau manah ngambika ulih ngetanka identiti kitai ke nyadi peranak Malaysia. Taja pia, bisi mayuh macham isu enggau penanggul dipantaika bekaul pengawa mina waris pesaka di menua kitai ke enda ba tikas ti manah.

Empas ari pekara tu iya nya aset waris pesaka kitai bisi udah kena gadai, rusak, sereta rubuh  pia aja laban nadai orang ngetan sereta ngazetka pesaka nya. Ambika chunto, isu bangunan, monumen, artifak, taba waris pesaka ti nadai kuasa mina ke patut ari semua raban ti betanggung pengawa. Ujung-ujung, taba enggau bangunan waris pesaka nya dirumpang sereta diempiakka pia aja.

Tu meri empas ngagai pengawa nukuhka identiti sereta memori kolektif mensia mayuh. Kelimpah ari nya, bisi mayuh bengkah taba enggau bangunan waris pesaka digazetka Opis Warisan Menua, tang baka ke ditempaya pia aja mega sepengudah digazet.

Nya alai, kitai mesti belajar ari chunto pengawa minaka waris pesaka dunya ti manah. Entara pengawa ke manah nya nyengkaum pengawa meransang penyaga waris enggau  komuniti sama-sama enggau minaka aset waris pesaka tu. Komuniti patut sama-sama meri pengulih diri dalam proses mina  waris pesaka ari aspek sejarah, peneleba enggau penemu lokal lebuh ngaga pemutus penemu.

Fasa tu  mungkur siti proses berunding bepelasarka fakta entara komuniti enggau sida ke ngaga pemutus tauka raban penguasa lokal (PBT ) lebuh ke ngasilka polisi tauka malin ngemina pengetan waris pesaka.

Dalam pengawa ke bebaika komuniti sama bela enggau minaka waris pesaka,  bisi sekeda chunto ti ulih nyadika teladan lalu tu nyengkaum konsep Album Tebuka baka ke bisi di Helsinki, Finland. Projek Album Tebuka tu ngembuan tuju  nyimpan pengingat komuniti senentang nengeri sida, kelebih agi iya ke bekaul enggau waris pesaka nengeri enggau pengawa digital foto arkib ngati kediri. Pun tuju iya nya ngambika rayat nemu pemesai reti identiti waris pesaka menua.

Projek tu dikumbai galeri foto digital. Iya diasilka nengah chara online. Projek tu ngumpul lalu ngaga foto digital ari arkib personal enggau album diri sebilik. Iya  ngambarka waris pesaka lalu nadai udah kala ditemu dalam dokumen sejarah perintah.

Nengah pengawa ngedigitalka foto sereta nyimpan nya ngena chara online, iya ulih nyimpan foto ngambika bisi dipeda serak rebak dudi jemah ila. Reti nya, projek tu mai mensia mayuh nambahka foto personal sida ba gempung koleksyen foto menua. Aktiviti tu mega enda sengaja ngasuh mensia mayuh milih foto personal sida ngambika bisi dipantaika ba pameran visual kelimpah ari ke nyadi kurator.

Kelimpah ari nya, pengawa raban ti betanggungjawab dalam Konsep Mina Segulai mega disukung lebuh nentuka pengawa minaka waris pesaka enggau manah kelimpah ari kerejasama ke diaturka entara PBT, penyaga waris pesaka, institusyen waris pesaka, gerempung ukai perintah (NGO) enggau orang periman. Ambika chunto, di Amsterdam, Belanda, raban penguasa bandar raya nya ngaturka  Hari Waris Pesaka dikena ngintu pesaka sida lalu madahka pemesai reti waris pesaka nya ngagai mensia mayuh.

Maya Hari Waris Pesaka nya orang ti tama ke taba enggau bangunan waris peska nya nadai bebayar. Iya mega nyengkaum sida pemina pesaka, orang periman, volunteer ti dilatih enggau raban bukai ti bisi kaul enggau pengawa nya. Aktiviti budaya mega bisi diaturka maya nya.

Kelimpah ari nya, pengawa mina waris pesaka mega balat bekaul enggau pengawa nyeliahka pengerusak aset pesaka. Tu mungkur pengawa mina risiko kudi ngenyit ke nyadi lalu tau ngerusakka aset pesaka di Malaysia. Pengawa tu patut bendar dikemaru sereta dikemanahka agi.

Nadai pesaka nadai komuniti 

Mayuh malin ulih dipelajarka mensia mayuh senentang tukuh enggau struktur bangunan sesebuah taba waris pesaka bepelasarka pengawa ke kala digaga di menua tasik. Nya alai, tukuh struktur bangunan lama ke agi bediri tegap kemaya hari meri malin ngagai kitai chunto  ramu tukuh struktur bangunan ti likun ungkup sesebengkah kandang menua ke semampai betapi enggau kudi. Iya meri  peduman ngagai mensia mayuh kemaya hari tu lebuh ngaga bangunan baru ba endur ke berisiko kudi.

Langkar kereja mina waris pesaka ti tegap sereta tan patut bepelasarka sistem orientasyen  strategik betimpuh panjai lalu iya mungkur raban komuniti ba tempat nya empu lebuh ngaga pemutus penemu. Tu setipak enggau taba waris pesaka bukai ti kompleks agi baka bandar besejarah enggau landskap budaya.

Aset waris pesaka nya manifestasyen identiti enggau budaya sesebengkah komuniti. Enti nadai komuniti, tentu nadai mega pesaka. Nya alai, rayat Malaysia patut belajar lalu beteladanka pemujur menua bukai lebuh ngintu sereta nyaga waris pesaka sida, tang enggi kitai ngena chuan menua kitai empu.

Di simpulka ngena jaku puntul, pengawa mina waris pesaka tu endang iya bepelasar ari pengawa ti badas lalu iya patut mai semua raban orang nyengkaum penyaga pesaka, komuniti, industri, pemina pesaka, NGO, perintah enggau local council lebuh ngemujurka pengawa tu.

Glosari:

mina - mengurus

penguasa lokal – Pihak Berkuasa Tempatan (PBT)

Album Tebuka - Open Album

pemina pesaka - pengurus warisan