Penguasa sekula, pengajar sereta nembiak patut besedia mujurka PBS

 

Penguasa sekula, pengajar sereta nembiak patut besedia mujurka PBS

PBS tauka Tisih Ba Sekula kala dipejalaika Opis Pelajar Malaysia (KPM) dalam taun 2012. Aku asai ke kala ngenang sereta nulis senentang pekara tu ba blog aku Tempalai Kenang. Enti ngenang menua bukai baka Finland, sida sigi udah bejalaika PBS tu dalam taun 1948 lalu nadai nyadika penanggul nyentuk ngagai sehari tu. Diatu pekara tu datai baru ba menua kitai baka penyakit ke ngungkat. Laban isu tu utai ke dikerinduka aku sereta bisi kaul enggau sekula sereta nembiak nya alai aku datai baru ngenang pekara tu ngena naratif baru.

Menteri Pelajar bisi nerangka di Dewan Rayat madahka KPM deka meri  fokus ngagai pengawa ngangkatka Pentaksiran Berasaskan Sekolah (PBS) sepengudah Ujian Pencapaian Sekolah Rendah (UPSR) dibuai ari sistem peresa dalam taun 2021 lalu ditangkan enggau Pentaksiran Tingkatan Tiga (PT3) berengkah ari taun 2022.

PBS tau disemaka baka belayan padi, bisi tuju enggau kebuah. Tuju PBS nya dikena nisih  aspek intelek, emosyen, spiritual, selangkuh tubuh enggau sosial setipak enggau juluk ati Filosofi Pelajar Bansa. Pengawa tu berengkah dipejalaika ba peringkat sekula primari kenyau ari taun 2011, lalu PT3 nganti Penilaian Menengah Rendah (PMR) dalam taun 2012.

Isu muai UPSR enggau PT3 ari sistem pelajar sekula nerima timbal balas ari mensia mayuh  nyengkaum bala pengajar enggau apai indai. Bisi sekeda pengajar enggau sekeda kepala pengajar sekula primari madahka bala nembiak udah enda ransing agi belajar kenyau ari UPSR dibuai. Taja pan pengajar nya agi ngajar baka selama lalu nembiak pan belajar baka selama, tang baka ke nadai agi utai ke luar ari selama sepengudah UPSR nadai agi.

Dipelabaka ketegal sebedau UPSR dibuai ari sistem bala nembiak berumpak deka belajar, pia mega kepala pengajar enggau pengajar bela besemekih enggau penuh  semengat ngiring ngembing sereta ngajar nembiak sida. Semua tu ketegal siti tuju, iya nya deka nyapai pemutus ti pengabis manah dalam dalam peresa UPSR ungkup diri empu, apai indai, sekula, PPD enggau JPN. UPSR dikiraka beguna bendar laban iya nyadika sukat standard pengulih nembiak ba peringkat sekula primari.

Pemutus UPSR dikena nyadika tikas pengulih akademik nembiak. Nembiak ke ransing sereta bisi motivasyen bebendar deka ngulihka pemutus ti lati ngambika sida ulih  diterima tama ke sekula buding penuh. Apai indai mega ngembuan pengadang ti sama. Sida mega ngadang anak sida ulih masuk sekula ti manah. Diatu, semua nya baka ke udah nyadi buah kenang aja dalam sejarah pelajar menua.

Baka nya mih ubah ke nyadi ba sistem pelajar kitai. Ubah dipejalai ngambika pelajar nembiak enda belajar bepelasarka peresa. Kebuah pia, laban bisi penemu ke madah pengawa ke ngemeratkka peresa tau ngasuh nembiak sekula  berasai stres lalu enda rindu belajar.

Nambahka nya mega, bisi pengelicha kanan sebuah universiti ngaitka pekara tu enggau nembiak ke enda nurun sereta badu sekula. Sigi amat, enti nitih ke bendar nembiak patut berasai lantang belajar lalu penau sereta potensi sida mesti dikerembaika enggau manah.

Sistem enda bepaksi peresa

Nya alai, ditempa sistem ti fleksibel agi ke enda bepaksika peresa aja. Nya mih kebuah lalu ditumbuhka sistem PBS ti mungkur  komponen Tisih Bilik Kelas (Pentaksiran Bilik Darjah), Tisih Aktiviti Selangkuh Tubuh, Sukan enggau Kokurikulum (Pentaksiran Aktiviti Jasmani, Sukan dan Kokurikulum) sereta Tisih Psikometrik (Pentaksiran Psikometrik). Gempung tiga komponen tisih tu mih ke dikena ngambika ngayanka pengulih nembiak ke amat maya tengah taun enggau ujung taun.

Dikena nentuka PBS dipejalaika enggau manah sereta efektif, komitmen pengajar endang dikemeratka amat. Pengajar ukai semina patut ngajar bebendar, tang mega enggau ngerembaika penau sereta pengerindu nembiak nitihka kapasiti enggau potensi sida.

Kepala pengajar ke mega penguasa sereta tuai sekula mesti nentuka semua pejalai pengawa PBS diatur sereta dipejalaika enggau betul nitihka standard. Pia mega, apai indai patut nemu pemansang pelajar anak sida sepemanjai maya, nyengkaum nengah program dialog prestasi enggau sekula. Tanggung pengawa apai indai sigi berat laban sida mesti nentuka anak sida belajar di sekula lalu ngulang belajar di rumah.

Disimpulka enggau jaku pandak, pemujur PBS balat bepanggai ba faktor sedia raban penguasa sekula, pengajar enggau nembiak nya empu. Enda tinggal mega, Program dikena ngangkatka pengawa tu begunaka komitmen semua orang, kelebih agi apai indai ke nyadi stakeholder mesti diatur enggau komprehensif.

Glosari:

nisih – menilai

selangkuh tubuh – jasmani

sekula buding penuh - sekolah berasrama penuh

penau - bakat