Bejimat nyadung informasyen dikena nyeliahka salah pereti

 

Bejimat nyadung informasyen dikena nyeliahka salah pereti

 

Reti  teknologi informasyen enggau komunikasyen nitihka kalih iya ari diksyenari Dewan Bahasa dan Pustaka  nya  pasal pengawa ngulih, nyimpan, memproses enggau nyadung informasyen.

Teknologi informasyen enggau komunikasyen dalam reti rama nya sebengkah kereban tauka medium dikena ngemudahka mensia mayuh semampai ngaul sereta betukar informasyen enggau pangan diri.

Empai lama ke udah, teknologi informasyen enggau komunikasyen sinonim amat enggau kereban penyambung ke ngena aplikasyen baka WhatsApp ti berengkah diguna dalam taun 2009 enggau Te­legram ke dikena kenyau ari taun 2013.

Kemaya hari tu, WhatsApp dikena lebih ari 2 bilion mensia lalu baka nya mega ratus juta pengguna Te­legram nyadika kereban dua iti tu kelaing ti jampat sereta mudah dikena bekomunikasyen enggau bekunsi informasyen.

Ari hal diri empu ngaga hal bedagang, bekereja, besekula enggau ke bukai semua  nya begunaka kelaing tu dalam pengidup besehari-sehari. Pemantas pemansang teknologi informasyen enggau komunikasyen nya nyengkaum penatai aplikasyen bukai endang dikira balat ngubah pengidup bekomuniti dunya ngagai gaya idup digital.

Taja pia, sesebengkah teknologi ti ditengkebang sereta digaga bepelasarka invosyen dikena ngenyamaika pengidup mega tau mai empas ti enda manah enti iya disalahgunaka kitai.

Ambika banding, energi nuklear nya sebengkah arus pun penatai  elektrik, tang enti disalahguna ketegal diambi nyadika kereban senyata iya tau nyadi sebengkah pekakas ti tau ngerusakka mensia enggau rampa menua.

Baka nya mega dalam konteks teknologi informasyen enggau komunikasyen lebuh disalahguna iya ulih nyadi pekakas ti ulih ‘ngeregu’ sosio komuniti.

Orang ke tebangkar ba bidang Sosiologi, madah, pemansang teknologi informasyen enggau komunikasyen nya utai ke patut diterima. Teknologi informasyen enggau komunikasyen ti sofistikated enti ditimpai ari sukut positif ulih nyadika perengka guna dikena bekunsi lelemu enggau pekara ke bukai. Penatai teknologi informasyen enggau komunikasyen baka WhatsApp enggau Telegram nentuka  informasyen ulih disadung enggau lengkas keguna mensia mayuh.

Taja pia, lebuh iya di­salah guna  iya mega tau ngenataika konflik. Pekara tu enda manah ke pemansang enggau pemaik sesebengkah komuniti tauka menua.

Nya alai, genap iku kitai enda tau enda bejimat lebuh ngena  teknologi informasyen enggau komunikasyen tu laban kitai mesti nemu empas iya besai bendar lalu nyengkaum kitai empu. Teknologi tu mega mantu mantaika pedagang ngagai mensia mayuh. Taja pia, iya mesti dikena enggau betul laban informasyen ti dikunsika dia kadang-kadang tau ngasuh sekeda orang salah pereti. Ambika chunto, pedagang ke ngayanka gambar iya ke mujur nyual kuih dikena iya meri pengarap ngagai mensia mayuh tau disalah peretika sekeda orang ke ngumbai iya nya nguji ngayanka pengulih diri.

Nya kebuah kitai enda ulih enda bejimat lebuh ngena WhatsApp, Telegram enggau nama-nama teknologi komunikasyen ke bukai ngambika enda disalah peretika orang ke macha jaku kitai.

 

Penguasa sekula, pengajar sereta nembiak patut besedia mujurka PBS

 

Penguasa sekula, pengajar sereta nembiak patut besedia mujurka PBS

PBS tauka Tisih Ba Sekula kala dipejalaika Opis Pelajar Malaysia (KPM) dalam taun 2012. Aku asai ke kala ngenang sereta nulis senentang pekara tu ba blog aku Tempalai Kenang. Enti ngenang menua bukai baka Finland, sida sigi udah bejalaika PBS tu dalam taun 1948 lalu nadai nyadika penanggul nyentuk ngagai sehari tu. Diatu pekara tu datai baru ba menua kitai baka penyakit ke ngungkat. Laban isu tu utai ke dikerinduka aku sereta bisi kaul enggau sekula sereta nembiak nya alai aku datai baru ngenang pekara tu ngena naratif baru.

Menteri Pelajar bisi nerangka di Dewan Rayat madahka KPM deka meri  fokus ngagai pengawa ngangkatka Pentaksiran Berasaskan Sekolah (PBS) sepengudah Ujian Pencapaian Sekolah Rendah (UPSR) dibuai ari sistem peresa dalam taun 2021 lalu ditangkan enggau Pentaksiran Tingkatan Tiga (PT3) berengkah ari taun 2022.

PBS tau disemaka baka belayan padi, bisi tuju enggau kebuah. Tuju PBS nya dikena nisih  aspek intelek, emosyen, spiritual, selangkuh tubuh enggau sosial setipak enggau juluk ati Filosofi Pelajar Bansa. Pengawa tu berengkah dipejalaika ba peringkat sekula primari kenyau ari taun 2011, lalu PT3 nganti Penilaian Menengah Rendah (PMR) dalam taun 2012.

Isu muai UPSR enggau PT3 ari sistem pelajar sekula nerima timbal balas ari mensia mayuh  nyengkaum bala pengajar enggau apai indai. Bisi sekeda pengajar enggau sekeda kepala pengajar sekula primari madahka bala nembiak udah enda ransing agi belajar kenyau ari UPSR dibuai. Taja pan pengajar nya agi ngajar baka selama lalu nembiak pan belajar baka selama, tang baka ke nadai agi utai ke luar ari selama sepengudah UPSR nadai agi.

Dipelabaka ketegal sebedau UPSR dibuai ari sistem bala nembiak berumpak deka belajar, pia mega kepala pengajar enggau pengajar bela besemekih enggau penuh  semengat ngiring ngembing sereta ngajar nembiak sida. Semua tu ketegal siti tuju, iya nya deka nyapai pemutus ti pengabis manah dalam dalam peresa UPSR ungkup diri empu, apai indai, sekula, PPD enggau JPN. UPSR dikiraka beguna bendar laban iya nyadika sukat standard pengulih nembiak ba peringkat sekula primari.

Pemutus UPSR dikena nyadika tikas pengulih akademik nembiak. Nembiak ke ransing sereta bisi motivasyen bebendar deka ngulihka pemutus ti lati ngambika sida ulih  diterima tama ke sekula buding penuh. Apai indai mega ngembuan pengadang ti sama. Sida mega ngadang anak sida ulih masuk sekula ti manah. Diatu, semua nya baka ke udah nyadi buah kenang aja dalam sejarah pelajar menua.

Baka nya mih ubah ke nyadi ba sistem pelajar kitai. Ubah dipejalai ngambika pelajar nembiak enda belajar bepelasarka peresa. Kebuah pia, laban bisi penemu ke madah pengawa ke ngemeratkka peresa tau ngasuh nembiak sekula  berasai stres lalu enda rindu belajar.

Nambahka nya mega, bisi pengelicha kanan sebuah universiti ngaitka pekara tu enggau nembiak ke enda nurun sereta badu sekula. Sigi amat, enti nitih ke bendar nembiak patut berasai lantang belajar lalu penau sereta potensi sida mesti dikerembaika enggau manah.

Sistem enda bepaksi peresa

Nya alai, ditempa sistem ti fleksibel agi ke enda bepaksika peresa aja. Nya mih kebuah lalu ditumbuhka sistem PBS ti mungkur  komponen Tisih Bilik Kelas (Pentaksiran Bilik Darjah), Tisih Aktiviti Selangkuh Tubuh, Sukan enggau Kokurikulum (Pentaksiran Aktiviti Jasmani, Sukan dan Kokurikulum) sereta Tisih Psikometrik (Pentaksiran Psikometrik). Gempung tiga komponen tisih tu mih ke dikena ngambika ngayanka pengulih nembiak ke amat maya tengah taun enggau ujung taun.

Dikena nentuka PBS dipejalaika enggau manah sereta efektif, komitmen pengajar endang dikemeratka amat. Pengajar ukai semina patut ngajar bebendar, tang mega enggau ngerembaika penau sereta pengerindu nembiak nitihka kapasiti enggau potensi sida.

Kepala pengajar ke mega penguasa sereta tuai sekula mesti nentuka semua pejalai pengawa PBS diatur sereta dipejalaika enggau betul nitihka standard. Pia mega, apai indai patut nemu pemansang pelajar anak sida sepemanjai maya, nyengkaum nengah program dialog prestasi enggau sekula. Tanggung pengawa apai indai sigi berat laban sida mesti nentuka anak sida belajar di sekula lalu ngulang belajar di rumah.

Disimpulka enggau jaku pandak, pemujur PBS balat bepanggai ba faktor sedia raban penguasa sekula, pengajar enggau nembiak nya empu. Enda tinggal mega, Program dikena ngangkatka pengawa tu begunaka komitmen semua orang, kelebih agi apai indai ke nyadi stakeholder mesti diatur enggau komprehensif.

Glosari:

nisih – menilai

selangkuh tubuh – jasmani

sekula buding penuh - sekolah berasrama penuh

penau - bakat

 

Apai Indai Napi Rega Barang Ti Majak Niki

 

Apai Indai Napi Rega Barang Ti Majak Niki

 

Apai indai kemaya hari enda ulih enda dipejal napi pengawa ngatur belanja sekula anak sida ke majak niki entara 30 ngagai 40 persin. Sekeda barang sereta servis sekula ti udah lalu dipelabaka niki iya nya kereban belajar baka kereban tulis enggau bup not, pemakai di kantin sekula enggau tambang bas.

Bepelasarka pansik surat berita Sinar Harian madahka sekeda kedai bup enggau kereban sekula  ba kandang Lembang Klang  enggau sekeda barang udah berengkah niki rega. Barang ti niki rega tu nyengkaum semua kereban tulis baka bup latih enggau keretas A4. Barang tu niki entara 50 sen ngagai RM1. 

Mayuh apai indai ke bisi anak ti agi besekula  madahka serebana diri laban dipejal  ngeluarka belanja ti lebih. Enti taun sebedau tu belanja siku anak ke agi besekula nya kira-kira entara RM300, diatu udah niki ngagai RM400.

Bala  pedagang mega ngaku hal nya kesekali tu bebida bebanding enggau iya ke sebedau tu ketegal barang ti udah betaun-taun enda niki rega mega niki.

Nambahka nya, kos tambang kereban pengangkut mega dipelabaka niki bepun ari bulai July tu. Kebuah pia, laban kos miki enggau kereban ganti kereta ti niki enggau ngenyit. Taja pia, Presiden Gerempung Bas Sekula Federal Malaysia, meri jamin kos tambang bas tauka van sekula niki ba tikas minimum aja lalu enda tak nating bala apai indai. Iya madahka, anggar kos tambang bas sekula ke niki nya mega bebida laban penyampau iya bemalinka kandang endur enggau status komuniti dia. Kebuah pia, laban perintah nadai agi nyaga sereta meratika rega tambang bas sekula berengkah 1hb Januari 2015.

Kelimpah ari nya, bala apai indai mega betapi enggau rega pemakai di kantin sekula ti niki ketegal kos barang basah mega niki. Nitihka berita, pekara nya bisi dikunsi siku tauke kantin sekula ari Ipoh, Perak. Iya madahka barang ke diguna nya terang-terang amat niki rega sereta balat nanting sida ke bedagang. Taja pia iya empu ngaku enda kempang niki rega pemakai laban iya mega nemu ukai semua apai indai ulih ngeluarka belanja ti lebih ngagai bala anak sida.

Nya alai, enti diperatika kos belanja sekula ke niki tu ukai semina ngasuh komuniti raban B40 aja ke irau ati  tang mega iya mungkur sida bukai ke jelan penatai pemisi. Sida  mega sama bela bisi ngasaika kos daya idup ti niki enggau ngenyit.