Selamat Hari RTM Ke-76

Kena 1hb April 2022, Radio Televisyen Malaysia ngerami Hari RTM Ke-76 taun. Kena ngenangka Hari RTM Ke-76 sekali tu aku mai kitai sebuat ngenang sejarah pun radio tu ditumbuh ba menua kitai sereta pemansang iya nyentuk ngagai sehari tu.

Sejarah radio di Malaysia bepun ari taun 1921 lebuh siku injinir elektrik perintah Johor ke benama Al Birch, mai set radio keterubah ke menua tu. Nangkannya iya lalu numbuhka Gerempung Wireless Johor ti dipanchar nengah gelumbang angin 300 meter. Iya mega udah nya numbuhka  gerempung ti sebaka ba Pulau Pinang sereta Gerempung Wireless Malaysia di Kuala Lumpur.

Dalam taun 1930, Sir Earl ari Singapore Port Authority ngelancharka program penabur nengah gelumbang angin pandak tiap-tiap dua minggu baik nya kena hari Minggu tauka hari Tiga. Pengawa nya udah nya lalu ditampungka Gerempung  Wireless Malaysia, ti ngelancharka program  penabur sida ari Bukit Petaling, Kuala Lumpur ti dipanchar nengah gelumbang angin 325 meter. Kena 11 Mac 1937 pekara tu lalu ditangkanka pengawa Sir Shenton Thomas ke muka British Broadcasting Corporation Studio ke ngunaka pemanchar iya ba Caldecott Hill. Udah nya British Malaya Broadcasting Corporation lalu diambi Nengeri-Nengeri Selat sereta digaga nyadi sebagi ari Opis Menteri Pemadah British ke tebilang agi ti dikumbai Malaya Broadcasting Corporation  (Perbadanan Penyiaran Malaya).

Dalam taun 1942, ketegal Tanah Melayu dipegai Jipun dia perintah Britain di Singapura mega apus. Jipun lalu ngambi arus radio ke bisi nya lalu numbuhka arus  radio sida empu di Pulau Pinang, Melaka, Kuala Lumpur, Seremban enggau Singapura. Tuju nya dikena sida perintah Jipun nyadung berita propaganda sida. Taja pia, kena taun 1943, British pulai bekuasa lalu ngambil pulai stesyen-stesen radio nya tadi.

Kena 1hb April 1946, Opis Penabur ditubuhka di Singapura. Pemansang servis radio dilperatika majak beguna lebuh emergensi maya taun 1948. Maya keterubah iya taun 1950-an, pengawa penabur  di Malaya bepalan ba Jalai Young, Kuala Lumpur (diatu dikubai Jalai Cenderasari ) lalu dalam taun 1956 pindah ke Rumah Federal Kuala Lumpur. Ditu mih bidang penabur di Malaysia mansang. Beberapa buah stesyen radio lalu ditumbuhka ba selampur Malaysia nyengkaum di Sabah enggau Sarawak.

Dalam taun 1960, nya taun keterubah iya iklan komersial ditabur di radio lalu nyadika pun penatai pemisi ke baru ngagai perintah. Udah nya Malaysia ditumbuh kena 16 September 1963. Penabur ke gawa maya nya lalu ngena rambai jaku "INILAH RADIO MALAYSIA" ke lalu nyadika jaku pengelalu raban penabur maya sida gawa. Bidang penabur muka siti agi limpir sejarah baru lebuh  Angkasapuri berengkah ngeluarka program sida kena 6 Oktober 1969.

Radio enggau televisyen udah nya lalu dipegulaika ba baruh Opis Menteri Pemadah. Penumbuh channel keterubah iya nya Rangkaian Satu, meransang penumbuh channel ti kedua kena 17 November 1969. Ba  Kompleks Angkasapuri mega, pengawa ngemansangka bidang penabur regas amat dipejalaika baik nya ba radio tauka televisyen. Kaul pengawa radio nasional lalu berengkah gawa 24 jam dikena mela semua raban peninga kelebih agi sida ke bekereja syif malam.

Media elektronik nyadika pun penatai nerima enggau nyadung informasyen laban iya jampat, murah sereta ulih  ditabur terus ngagai bala peninga. Nya alai, ba penemu RTM, sida endang patut ngangkatka pengawa ngenataika informasyen seraya ke merindang bala peninga. Berindik ari penemu tu dia Radio Muzik lalu ditumbuhka kena  20 Jun 1975. Industri penabur Malaysia terus mansang enggau chukup pengeregas setipak enggau pemansang teknologi. RTM ke ba peringkat keterubah iya semina  manchar sistem radio sida ngagai sekeda stesyen aja diatu udah bisi 34 buah stesyen radio.

Pemansang Media baru meri impak ti besai ngagai pengawa nyadung  sereta ngerembaika berita tauka penerang ngagai mensia mayuh. Berindik ari realiti tu mih  RTM lalu nyingkang ke mua agi sereta numbuhka web streaming TV enggau Radio berengkah ari taun 1996. Berengkah ari taun 2012 servis lalu dikerembaika nengah chara mobile streaming. Kenyau ari taun 2013, RTM bisi ngembuan 3 stesyen TV (TV1, TV2, TVi enggau Galaksi Muzik) sereta 34 buah stesyen Radio ti ulih dipeda sereta dipending nengah web enggau Mobile streaming (RTM Mobile).

Diatu mega RTM mansang ke mua agi setipak enggau pemansang  teknologi kemaya hari sereta mantaika 6 stesyen TV (TV1, TV2, TV Okey, Berita RTM, Sukan RTM dan TV6) enggau 34 stesyen Radio ti ulih dipeda sereta dipending nengah web enggau Aplikasi RTMKLIK.

Selamat Hari RTM Ke-76!

Glosari :

bidang penabur – bidang penyiaran

kaul pengawa - rangkaian/network 

mela - memberi perkhidmatan