Orang kemaya hari tu selalu bendar
ngudah utai sereta jampat nyalin idea orang bukai. Kitai suah bendar meda
sereta ninga kereban ke ditengkebangka ba blog orang disalin orang bukai baik
nya ba disalin ke surat berita tauka ba media bukai. Pengawa nyalin tiun lagu
orang mega siti agi chunto ti suah bendar didinga kitai kelebih agi ba bidang
pemerindang lagu Iban. Kenyau hari taun 60an nyentuk ke sehari pengawa nyalin
lagu orang ngagai lagu Iban agi dikerejaka sida ti nadai ngembuan penemu ti
tulin.
Pengawa nunda sereta nyalin tauka ngambi
idea orang enda pulai ke penyalah enti iya
betegalka deka bekunsi penemu tauka dikena ba pelajar sekula. Taja pia
sida ke ngambi idea tauka penemu orang bukai kadang-kadang enda ingat meri
kredit ngagai orang ke empu kereban nya. Enti nitih kitai patut
ngerembaika kreativiti kitai empu ngambika kitai ulih nyeliahka diri ari dikapit
sereta dirempah penemu orang bukai. Tu ngujungka imej enggau reputasyen orang
ke nyalin nya nurun enti dibandingka enggau orang ke empu karang nya tadi.
Isu plagiat tauka nyalin pengawa orang
udah suah didinga sereta balat bendar nyadi kemaya hari tu ketegal penengkebang
idea ukai semina diperatika sesebengkah raban aja. Nama pengelebih enti kitai
ngasilka buah runding diri enti kitai ulih niru idea orang bukai? Aram kitai
ngerintaika pengelebih enggau pengurang ulah baka tu nengah perati individu ke
bekuasa enggau ari sukut undang-undang.
Enti sema nuan nya nembiak sekula tauka
nembiak institut pelajar tinggi, tentuka sekeda ari pengawa ti diberi pengajar
tauka pengelicha nya digaga sereta ditembuka asil ari buah runding
diri lalu ukai nyalin ari bakih tauka ari media bukai. Baka sida ke
udah bekereja lalu gawa ba opis idea ti dibantaika ngagai bos nyangka nya
endang enggi diri empu lalu bisi nya mega diambi terus ari pun penyanding
bukai. Baka nya mega ba bala pedagang, sida nya entara raban ke udu bekaul
enggau pengawa nyalin hak nengkebang.
Chara kitai begari nya siti ari chunto
rutin besehari-sehari ti ulih dikaulka enggau isu tu. Taja pia, iya enda bangat
serius enti dibandingka enggau pengawa enchuri idea orang bukai lalu ngambu nya
nyadi idea diri empu.
DIBARUH
KUASA UNDANG-UNDANG
Dua akta ti ulih disakumka
enggau isu tu iya nya akta hak cipta enggau akta hal dagang.
Kedua-dua akta tu bekaul enggau idea nyalin sereta ngenchuri identiti enggau
asil pengawa orang bukai.
AKTA HAK CIPTA - Akta Hakcipta 1987
diubah ngagai Akta Hakcipta (ubah) 1997. Entara pugu kebuah pekara tu
diubah iya nya ketegal penanggul pemindah karya kuasa
penengkebang nengah Internet. Ba artikel tu rambai jaku hak cipta nya
diganti enggau rambai jaku kuasa penengkebang. Akta kuasa
penengkebang 1997 tu dikena negapka akta ti endang udah bisi sebedau tu. Iya
ngungkupka kuasa ngagai pemesai polis ngena waran ti dikeluarka majistret, tama
rumah tauka premis sebarang maya dikena iya ngiga sereta ngerampas nama-nama
salin utai ti ngelanggar kuasa penengkebang lalu ngena kuasa nya mega
nyerungkai tempat nya.
Entara pengawa ti dibaruh akta tu
nyengkaum pengawa litericha, muzik, seni, filem, rekoding bunyi enggau siaran. Genap hal tu bisi timpuh maya
ditetapka ungkup akta tu.
Enti diperatika ari sukut rama, kuasa
penengkebang ke bisi ba pengawa litericha, muzik tauka seni kelimpah ari gambar
bisi diungkupka ba penengkebang nya sepemanjai iya idup lalu mega 50 taun
sepengudah iya mati. Ba pengawa bukai, timpuh kuasa penengkebang nya dikira
sampai 50 taun sepengudah karya nya berengkah dikeluarka.
AKTA HAL DAGANG – Ba baruh Akta Hal
Dagang 2011, individu ti ditemu salah nyual barang tiru ulih ditinggang ukum
mata duit RM10,000 bagi genap iti unit barang ti dirampas tauka diukum jil enda
lebih ari tiga taun.
TUNDA
CHARA ORANG JIPUN
Pengawa plagiat nya sebengkah ulah ti
negatif nama agi enti kitai nunda 100 persin idea asal sesebengkah pekara.
Dalam bup Kenapa saya tidak berfikir begitu? asil karang Ainon Mohd enggau
Abdullah Hassan madahka dikira enda nunda tauka ngupi enti kitai
nunda baka chara orang Jipun.
Enti kitai deka bepikir baka sida, kitai
mesti nentuka tikas kreativiti kitai tinggi taja pan inovasyen kitai enda
setipak enggau enggi sida. Chunto ti nyata ditunda orang Jipun nya dalam hal
ngasilka produk. Produk ti pengabis dulu ditunda sida nya oven
microwave asil ditengkebang lalu dijual kompeni Motorola.
Pemesai oven nya mesai sebuah jemari. Taja pia saiz nya enda
engkeman enggau komuniti orang Asia. Tu ngujungka kompeni Jipun ngubah baru
oven nya nitihka saiz ke mit agi lalu ulih diengkah ba atas mija mit.
Enti nuan empu orang ke gawa bedagang,
dipelabaka manah nuan ngerembaika idea ke udah bisi nya nyadi produk ti
bekualiti agi lalu ulih nerima peminta mensia mayuh. Chara ke patut nya
nyengkaum mansik gaya ulah raban pemeli sereta mendingka sebana sida enti
produk asal nya enda ngemuaska ati sida. Asilka produk nuan enggau konsep sama
tang penuh enggau penteba ti dikedekaka bala pemeli.
BAKA
NI DEKA NGASILKA IDEA BARU?
IDUPKA BARU IDEA LAMA – Nitihka penemu
pengarang bup Steal Like an Artist, Austin Kleon senentang isu tu
madahka enti kitai ngetu nguji ngasilka sesebengkah pekara reti nya kitai deka lenyau
kuasa nengkebang sesebengkah pekara baru. Nya tau ngujungka kitai
berisiko tinggi agi lalu nitihka pekara ti meri inspirasyen ngagai kitai.
“Idea baru baka idea gaul tauka remix nya
siti tauka lebih idea ti ditemu kitai. Enti kitai tusah ngiga idea ke chulin, pelabaka
kerembaika aja idea ke bisi nya lalu ditambahka enggau buah runding ti baru,”
pia ku Austin Kleon.
PANSUT KE RAMPA DUNYA LUAR – Enti kitai
dekaka sesebengkah pekara ti baru dia kitai enda patut ditangkup enggau rutin
ti sama baka pama ti semampai ditangkup tachu. Giga awak dikena kitai pansut
sereta bekungsi idea enggau orang bukai kelebih agi ari orang ti enda
dikelala. Nyangka semina berandau aja pan ulih meri inspirasyen ti bebida
sereta ulih dipugar nyadi idea. Anang enda ngusung kedai bup sereta ngabiska
awak kitai dia ngansau sereta ngulihka mayuh macham penemu. Besosial mega
entara chara dikena kitai ngulihka idea ti engkeman ari orang bukai ngambika
ulih dipegulaika enggau idea kitai empu.
KEREMBAIKA
INSPIRASYEN
Enti ngelama tu kitai semina bebasaka
sekeda individu ti beberita dalam pengidup besehari-sehari tang diatu awak
patut diungkup ngagai kitai empu mega ngerembaika inspirasyen diri. Kitai patut
ngiga sesebengkah pekara ti baru dalam pampang ti bebida. Ba pengawa orang ke
merindang orang bukai, taja pan iya ba dalam raban penyanyi R & B tentu iya
enda milih deka mendingka sebarang genre dikena iya ngulihka inspirasyen melodi
ti bebida.
Pelajarka penemu baru lalu kerembaika
enggau idea ari mayuh bunsu penemu. Enti nuan nya orang ke belajar
ba universiti sereta benung kisuk begagaka ripot semester kepenudi, pulaska untak dikena nuan ngerembaika
idea ngambika ulih ngaga karya nuan empu asil ari kereja bebendar diri empu,
munyi ku penulis tebilang Perancis, Marchel Duchamp. “Aku enda pechayaka seni
tang aku pechaya ngagai orang ke ngasilka seni,” pia ku Marchel Duchamp. Uji
pereti sereta pikirka reti besilup ari jaku iya nya.
