Nguji Pengelandik Macha Tusun Keenam

Nguji Pengelandik Macha 

 

Teknik Tanya Chara Kloz

 

Teknik kloz nya sebengkah kereban dikena nguji pemereti macha teks ti berengkah dikena di Amerika maya taun lima puluh. Teknik tu mega dikumbai prosedur kloz, ditengkebang Wilson Taylor dalam taun 1953. Taylor bulih penemu nengkebang teknik tu ari asil pansik psikologi ti digaga raban psikologi Gestalt lebuh sida mansik konsep ‘closure’ dalam proses meratika chara mensia meda utai, meratika utai chara rama tauka meda ngena mata kasar dulu sebedau ulih meda sereta meretika sesebengkah enggau lenak agi. Dalam proses nya, kitai ulih ngena konsep tauka langkar rama ti udah diperetika kitai enggau dalam agi.

Wilson Taylor (1953) ngena teori psikologi Gestalt lalu ngemasukka iya ngagai proses macha iya nya ngusungka sekeda tempat dalam teks bacha. Ari nya pemacha deka diasuh ngisika endur lapang nya ngena leka jaku nitihka reti dalam teks nya. lebuh ngisi lapang nya pemacha enda ulih enda ngena cue linguistik ari sukut sintaksis enggau semantik nitihka reti leka jaku dalam konteks enggau struktur ayat enggau teks ti dibacha nya. Ketegal nya Moyle (1972) kala madahka teknik kloz tu munyi tu:

 

A technique based on the human tendency to complete an incomplete pattern or sequence. Thus, if a word is omitted from a sentence, the reader attempts to supply the word to complete the meaning.

 

Teknik ngena chara nguji kloz tu nyadika kereban nguji pengawa meretika teks udah kala dikena nembiak ba sekula primari enggau sekondari. Taja pia, teknik tu begunaka sekeda prosedur ari sukut ngaga instrumen peresa, chara peresa nya dipejalaika enggau chara iya diperesa. Semua pekara tu ukai utai ti mari dikereja lalu iya ulih dipejalaika pengajar jaku Iban. Ba peresa kloz nembiak dipinta ngisi endur lapang ba tibak teks bacha ti endang sengaja digaga puang ulih pengajar tauka pemeresa. Ba proses keterubah, nembiak dipinta meratika tibak teks nya chara ngelansa. Udah nya baru sida ulih nguji ngisi endur lapang nya ngena leka jaku ti engkeman ari sukut reti teks bacha nya. bepelasarka pemereti sida senentang teks nya baru sida nguji ngisi lapang nya ngena leka jaku ti engkeman nitihka reti teks.

(a)        Chara Milih Tibak teks Kena Nguji Kloz

Baka mega teknik bukai, teks ti diplih dikena nguji pengawa meretika teks mesti engkeman enggau tikas nembiak ti deka diuji nya. nitihka Oller (1979) peresa kloz ti standard ngena tibak teks ti enda kurang ari 250 leka jaku. Kebuah pia, ngambika ulih nempa 50 iti item kloz (tempat-tempat ti puang) enti pengajar nguna ratio tetap 1:5; reti nya bagi tiap-tiap iti leka jaku kelima dalam tibak teks bacha mesti dikusungka.

Tibak ti enda kurang ari 250 leka jaku (50 leka jaku dikeluarka tauka dikusungka) tauka enda kurang ari 350 leka jaku (70 leka jaku deka dikeluarka tauka dikusungka). Penyampau tu engkeman dikena nguji nembiak sekula sekondari. Tu dipeda ari sukut pengulih nembiak macha lalu enggau timpuh jam dikena sida nembuka tanya. Ungkup sekula primari pemanjai tibak teks nya entara 100 – 160 leka jaku, 15 (minimum) tauka 30 (maksimum) item kloz. Patut dikingatka mega tibak teks ti dipilih semina ari teks prosa aja. Leka main bedau kala dikena naka kediatu.

(b)        Chara Nempa Item Kloz (Milih Endur Lapang ti Deka dikusungka dalam Tibak Teks)

(i)           Ngena Ratio Tetap

Ratio tetap 1:5, 1:7 enggau 1:10 kala dikena lebuh ngaga item kloz. Taja pia, iya ti suah dikena iya nya ratio 1:5 baka ke udah disebut. Reti nya tiap-tiap leka jaku kelima dalam tibak teks nya deka nyadi item tanya. Ratio 1:5 suah agi dikena nguji pengelandik meretika teks bacha peringkat sekula sekondari enggau peringkat orang tuai. Taja pia, bisi mega ratio tu dikena ba peringkat primari atas, baka ba taun empat, lima enggau enam. Ratio 1:10 enggau 1:7 suah agi dikena ba peringkat primari baruh baka taun satu, dua enggau tiga.

(ii)          Ngena Ratio Tetap tang bisi Ubah Mimit

Taja pan bemalinka sesebengkah ratio tetap (baik nya 1:5, 1;7 tauka 1;10) pengajar tauka pemeresa ulih ngena chara iya empu lebuh milih leka jaku ti patut tauka enda patut dikeluarka tauka dikusungka. Enti langkah rapat nya dikira tusah ba nembiak (baka hari bulan, jam, nama tetap enggau leka jaku teknikal) reti nya leka jaku baka tu enda ibuh dikachau. Chara ngaga item kloz baka tu suah agi digaga dikena dalam bilik kelas. Taja pia, nitihka Taylor (1957) ngena ratio tetap sereta enda ngubah iya manah agi sereta engkeman agi dikena nguji pengelandik meretika teks ba peringkat orang tuai.

(c)         Ngenanka Topik Teks, Ayat keterubah enggau Ayat Kepenudi

Udah nyadi pekara selama, topik tibak teks, ayat keterubah enggau ayat kepenudi nya enda dikachau. Kebuah pia, ngambika meri penerang mimit senentang langkar cherita ti bekaul tibak teks nya. pengajar ulih ngepunka item kloz keterubah ba leka jaku kelima (enti milih ratio 1:5) dalam ayat kedua lalu ditangkanka ayat ti bukai. Pengawa nya diteruska semadi bisi endur puang ti enda patut ketegal nama tetap, haribulan, jam, angka enggau leka jaku teknikal. Endur lapang mesti digaga sama pemanjai iya nya kira-kira 5 sentimeter. Peratika chunto peresa kloz ti udah digaga dikena nguji penglenadik meretika teks.

 

 

BAHASA IBAN

 

Peresa Pengelandik Macha

 

Pom Empat                                                                      Jam Ngaga: 25 minit

 

Ba tibak teks ti nangkan tu bisi sekeda leka jaku ti udah dikeluarka. Keterubah iya, bacha dataika abis lalu peretika cherita nya. Udah nya isi endur lapang. Siti endur lapang ungkup siti leka jaku aja. Leka jaku ti bisi sengkang baka “begotong-royong” dikira seleka leka jaku.

 

Nama sekeda guna arang? Mayuh agi arang dikena (1) __________ ngeluarka kuasa karan. Ba (2)__________ pengeluar kuasa karan, arang (3)__________ nyadika pun kuasa dikena (4)__________ injin turbine ti ngeluarka (5) __________ karan. Kelimpah ari nya, (6)__________ arang batu ti bukai nya (7)__________ dikena ngeluluhka besi, ngangatka (8)__________ ba menua chelap, melakinkan (9)__________ raya enggau ti bukai. (10)__________ aspek kualiti, arang ti (11)__________ manah nya arang anthracite. Arang (12)__________ pemadu berega sereta pemadu (13)__________ dikena ngangatka rumah ba (14) __________ chelap. Arang bituminous kurang (15)__________ manah tang iya murah lalu pemadu mayuh dikeluarka mensia. Arang ti bansa tu pemadu mayuh dikena ngeluarka kuasa karan enggau dikena ngeluluhka besi.

 

Leka jaku ti udah dikeluarka ari tibak asal teks baka ti dirintaika di baruh tu. Tu saut ti nemban nitihka tibak asal teks nya:

 

1.	mensia	9.	jalai
2.	palan	10.	Ari
3.	tu	11.	pemadu
4.	bejalaika	12.	ti
5.	kuasa	13.	mayuh
6.	guna	14.	menua
7.	baka	15.	agi
8.	rumah

 

 

Sanding Penemu

 

Abdul Aziz Abdul Talib 1983, “Menguji bacaan Bahasa Melayu Secara Diagnostik: Kaedah dan Tknik”, dalam Jurnal Dewan Bahasa, (Nov. 1983). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Teknik Kloz Sebagai Alat Menilai dalam Bidang Pendidikan Bacaan Bahasa Malaysia”,dalam Jurnal Dewan Bahasa, (Feb. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Psikolinguistik dan Pengajaran Bacaan Sekolah Rendah”,dalam Jurnal Dewan Bahasa, (Jun. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1996, Menguji Kemahiran Bahasa:Prinsip. Teknik dan Contoh, Kuala Lumpur: Dewan Bahasa dan Pustaka.

 

Clay, M.M. 1982. The Early Detection of Reading Difficulties. Auckland: Heinemann Publishers.

 

Drummond, D. & Wignell, E. (eds.)., 1979. Reading: A Source Book. London: Heinemann Educational Books.

 

Ebel, R.L. 1979. Essentials of Education Measurement. New Jersey: Prentice Hall Inc.

 

Ebel, R.L. 1980. Practical Problems in Educational Measurement. Lexington: D.C. Heath.

 

Heaton, J.B. 1979. Writing English Language Tests. London: Longman Group Ltd.

 

Lamberg, W.J. & Lamb, C.E. 1980. Reading Instruction in the Content Areas. Boston: Houghton Mifflin Co.

 

Pusat Perkembangan Kurikulum, Kementerian Pelajaran Malaysia 2005. Bahasa Iban Tingkatan IV : Huraian Sukatan Pelajaran. Kuala Lumpur: Dewan Bahasa dan Pustaka.

 

Moseley, D. & Caroline, D. 1977. Language and Reading Among Underachievers : A Practical Review of Research. Windsor: NFER Pub. Co.

 

Ragget, M.S. et. al. (eds.) 1979. Assessment and Teaching of Reading. London: Wardlock Educational.

 

Smith, F. 1980. Reading Cambridge : Cambridge University Press.