Anang Kakang Ati Ngemaruka Penemu

 

Anang Kakang Ati Ngemaruka Penemu

Pikir nya tau disemaka baka chupai ti ulih diisi enggau mayuh leman penemu. Untak ulih ngerikod bejuta-juta penemu kenyau ari kitai agi mit nyentuk ke besai tuai. Enti nuan ulih ngasaika diri sereta mulaika pengingat, dia nuan nemu nuan enda ulih ngingatka semua penemu pekara nya enggau silik. Taja pia, penemu nya deka  majak nambah senambah setipak enggau pemagas nuan memproses informasyen nya.

Nya alai, anang kakang-kakang enti nuan bisi ati deka nambahka penemu nuan. Enggau sanding penemu ti majak mayuh dia nuan ulih ngauk sereta bulih penemu ti bekualiti lalu ulih dikena nuan lebuh dipinta ngaga analisis senentang sesebengkah penanggul.

Fungsyen penemu ba pekara ti dikereja nya endang semampai bisi kaul jaul enggau pangan diri. Kitai enda ulih ngena penemu literacha lebuh kitai bejakuka pekara teknikal baka pengawa bejaitka baju tauka miki paip ti rusak.

Kelimpah ari nya, pengawa ti sama tang situasyen ti bebida mega begunaka mayuh chara mutar. Ambika chunto, nuan siku ari orang ke gawa nyadi copywriter ke udah tebalan betapi enggau iklan sabun mandi ba televisyen. Nuan ngembuan penemu ti dalam sereta mayuh senentang produk sabun mandi. Nambahka nya, nuan mega nemu akal chara enggau tukuh sida ke enggau nuan besemekih dataika nuan mega nemu strategi dikena ngalah sida ke belaban enggau nuan dalam bisness nya. Kiraka enti dipeda enggau nemban agi, iklan nuan chukup meri pengarap ngagai raban pemeli ngujungka sida pan sanggup meli sabun nya.

Tang bisi sekali, nuan dipinta ngaga iklan pasal mi instan ke baru dikeluarka ba pasar. Ba televisyen, tentu chara mantaika iklan nya bebida enggau iklan sabun mandi ti kala digaga nuan ngelama tu. Lalu ba kes tu, nuan endang nadai kala betapi enggau pekara ti besangkut paut enggau pengawa ngaga mee instan.

Tentu ari nya, strategi ti suah dikena nuan ngaga iklan sabun enda semitan dikena ba pengawa ngaga iklan mi instan. Langkah ti patut diambi sereta dikena nuan nangkan nya iya nya nuan patut belajarka chara industri mi instan digaga, orang ke besemekih enggau pengawa tu sereta strategi iklan ti patut dikena.

Berindik ari nya, nuan patut ngerugangka pikir nuan lalu muai semua penemu nuan senentang iklan sabun. Utai ti patut dikerejaka nuan iya nya ngemaruka penemu nuan sampai ke nuan mujur nengkua informasyen ti engkeman enggau konteks kereja ti deka digagaka nuan. Bisi beberapa pekara ti patut digaga nuan:

• Ngurangka gentar lebuh bepikir. Hal tu suah bendar nyadi lebuh orang nya betapi enggau pekara baru tauka lebuh ngaga pengawa ti enda kala dikereja sebedau tu. Ba maya ke sama mega untak mesti bekereja enggau bendar.
• Aktiviti mending patut diberi prioriti. Dalam bilik aum, nuan mesti balat agi mending laban iya ulih mantu nuan nengkebang idea kediri empu.
• Nyediaka ruang baru dalam pikir.
• Nelebaka diri enggau penemu baru. Amat mih nuan baru nerima lalu ngerebila informasyen nya tang nuan enggau naka ulih mesti ngubah iya nyadi sebengkah pekara ti praktikal agi.

Glosari :

copywriter – penyalin berita iklan tauka ti bukai

mi instan – mi ti rumpas sereta jampat mansau

ngerugangka  -muangka utai

nengkua  - nguasa

gentar - kesal ati tauka runding

 

Napi pelajar sekula maya pandemik sereta pengelanchar mutarka pengawa pasca COVID-19

 

Di Malaysia, nembiak sekula baru udah tembu peremisi lalu diatu sida udah pulai belajar baru baka selama nitihka chara norma baru ti ditetapka perintah. Reti nya sida agi nampung pelajar sida ari rumah. Nya alai, besenutuk enggau pekara nya aku nguji deka ngaliska isu ti bekaul enggau pelajar maya pandemik sereta pengelanchar mutarka pengawa  pasca Covid-19. Ba hal tu, aku mai kitai raban pemacha meratika pengawa ti udah dikerejaka sida Opis Menteri Pelajar Jipun mutarka pekara tu ba menua sida. Aku ngarapka iya ulih nyadika peransang sereta sanding penemu raban pengajar di sekula.  Artikel tu ditulis bepelasarka artikel ti ditulis Prof Dr Shahnor Basri lalu diambi-bali aku ngambika engkeman dikenangka aku ba ruai tu.

Sebengkah ari sektor ti balat nerima empas maya pandemik Covid-19 tu iya nya sistem pelajar sekula. Iya enda ulih dipeda mata aja. Pengawa belajar tu besai bendar reti ba sesebengkah bansa enggau menua laban iya mega baka orang ke beranakka puku lalu asil iya semina ulih dipeda jemah ila. Ba iya ke nyadi maya pandemik Covid-19  mega baka nya.  Sapa-sapa ti ngembuan tanggung pengawa nya enda patut nyeliaka diri ari kena chara pejah seruri ngambika pekara nya ulih diputarka enggau manah.  

Pulai ngagai cherita di menua Jipun, maya bulan Mac 2020 Perintah Jipun udah ngerah sereta minta sektor pelajar sida ba semua peringkat ditutup. Taja pan baka nya, pengawa nya bisi nerima bantah ari bala rayat. Mensia mayuh balat betalat sereta mantah polisi nya nyengkaum sida raban parlimen Jipun.

Sida balat nangika seraka serak (generation gap) ulih nyadi enti polisi tu majak dipejalaika. Tu dipeda sida ari sukut sosialisasyen, ari ulah sivik nembiak rebak baru lalu ari penampung lelemu enggau pelajar sekula.

Berindik ari nya, dikena napi serebana enggau kritik rayat, dia Opis Menteri Pelajar, Budaya, Sukan, Sains enggau Teknologi Jipun (Ministry of Education, Culture, Sports, Science, and Technology (MEXT)) mupuk nusun baru taga pengawa enggau langkah rapat pengawa besekula ngambika semitan agi.

Sida berengkah enggau pengawa ngadarka baru hari sekula bebelat hari nitihka kelas, tikas pelajar enggau taun. Sida mega netapka penyampau nembiak ba sesebuah kelas iya nya entara 20-40 iku aja lalu nyediaka ba tiap-tiap iti mija enggau sapat vinil (vinyl shield). Tuju tu dikena nerenak penemu ngagai bala nembiak senentang pemesai guna nyaga seraka  sosial. Pengawa tu mega dipejalaika sida nengah kimpin ti dikumbai “Takahka diri chara fizikal – tang semak, chara spiritual” (Stay far apart physically — but close, spiritually).

Ba awak ti sama, siti petisyen udah mega  diatur raban penganda enggau raban pemansik ba bidang pelajar, ngansak perintah ngasuh saiz kelas digaga mit agi. Sida minta perintah ngereja atur nya enggau lengkas. Kelas mit ke ku sida nya semina 20 iku nembiak ungkup sesebuah kelas.

Besenutuk enggau nya, Instititut Pemansik Riken enggau kerejasama Universiti Kobe ngaturka simulasyen ti netapka kelas ke besai agi ulih dipejalaika tang mesti bisi sistem angin beresi sereta manah.

Ba hal tu, penulis meratika Jipun ngembuan perintah ke ibuh sereta siru amat ke pelajar sekula. Sida mendingka kritik enggau jaku pejah rayat lalu nyediaka chara mutar ti mai penguntung ukai semuti tak nyakal penemu raban pemejah. Raban parlimen bedebat lalu bejuraika semua peminta tu lalu ngiga chara mutar ti pengabis manah ungkup rayat enggau menua sida.

Berengkah ari pun pandemik, Opis Menteri Pelajar bejalaika langkah rapat ti agresif lalu enda nejuka raban pengajar ngedum sereta enda nemu utai ti deka digaga tauka bejalaika pengawa nadai malin ti meruan senentang chara bejalaika proses pengawa belajar enggau ngajar. Perintah nerangka enggau silik sekeda langkah rapat maya sekula sida diasuh ‘lock-down’.

Dikena nentuka proses belajar ti semitan, Menteri METX mantaika sekeda langgur enggau proses belajar ti ngembuan tuju ti spesifik agi. Tu nyengkaum; besekula ba rumah ngena bup teks enggau kereban ngajar (Homeschooling using textbooks and paper teaching materials); besekula ba rumah ngena televisyen (Homeschooling using class movies taken by Board of Education); besekula ba rumah ngena teks enggau kereban digital (Homeschooling using digital textbooks and digital materials) lalu besekula ba rumah nengah chara online ti terus sereta interaktif (Homeschooling using live, interactive online courses) !

Ba pekara tu, Menteri Pelajar, Budaya, Sukan, Sains enggau Teknologi (MEXT) Jipun ukai semina baka abang ke begerah ngayanka diri sekali dua madahka sesi sekula dibuka enggau ditutup aja tang mega meri chara mutar ti memelan(beautiful solutions) ungkup sistem sekula sida.

Dikena ngayanka penyiru sida Jipun ngagai sektor pelajar sekula pasca COVID-19, sebengkah ‘blue print’ senentang pelajar pasca COVID udah mega disediaka lalu disara enggau chara kritikal ulih raban penganda, raban akademik, pemegai taruh (apai indai) enggau raban parlimen.

Pekara ti dipejuraika nya nyengkaum nambahka pengelaju transformasyen digital ungkup sektor pelajar, ubah ba pengawa raban pengajar (Changing Roles of Instructors) enggau beranakka puku ke jemah ila ba Infrastruktur ICT ungkup Servis Pelajar (Further Investment in ICT Infrastructure in the Education Service).

Baka nya mih tanggung pengawa perintah Jipun lebuh napi pandemik sereta pengelanchar mutarka pengawa  pasca Covid-19. Diarapka artikel tu ulih nyadika peransang sereta sanding penemu raban pemacha enggau pengajar di sekula. Arapka penemu nya enda mai kitai baka entawir ke ngansak orang bumai.  

 (Diambi-bali ari artikel tulisan Prof Dr Shahnor Basri, July 23, 2021, https://malaysiadateline.com)

Nguji Pengelandik Macha Tusun Keenam

Nguji Pengelandik Macha 

 

Teknik Tanya Chara Kloz

 

Teknik kloz nya sebengkah kereban dikena nguji pemereti macha teks ti berengkah dikena di Amerika maya taun lima puluh. Teknik tu mega dikumbai prosedur kloz, ditengkebang Wilson Taylor dalam taun 1953. Taylor bulih penemu nengkebang teknik tu ari asil pansik psikologi ti digaga raban psikologi Gestalt lebuh sida mansik konsep ‘closure’ dalam proses meratika chara mensia meda utai, meratika utai chara rama tauka meda ngena mata kasar dulu sebedau ulih meda sereta meretika sesebengkah enggau lenak agi. Dalam proses nya, kitai ulih ngena konsep tauka langkar rama ti udah diperetika kitai enggau dalam agi.

Wilson Taylor (1953) ngena teori psikologi Gestalt lalu ngemasukka iya ngagai proses macha iya nya ngusungka sekeda tempat dalam teks bacha. Ari nya pemacha deka diasuh ngisika endur lapang nya ngena leka jaku nitihka reti dalam teks nya. lebuh ngisi lapang nya pemacha enda ulih enda ngena cue linguistik ari sukut sintaksis enggau semantik nitihka reti leka jaku dalam konteks enggau struktur ayat enggau teks ti dibacha nya. Ketegal nya Moyle (1972) kala madahka teknik kloz tu munyi tu:

 

A technique based on the human tendency to complete an incomplete pattern or sequence. Thus, if a word is omitted from a sentence, the reader attempts to supply the word to complete the meaning.

 

Teknik ngena chara nguji kloz tu nyadika kereban nguji pengawa meretika teks udah kala dikena nembiak ba sekula primari enggau sekondari. Taja pia, teknik tu begunaka sekeda prosedur ari sukut ngaga instrumen peresa, chara peresa nya dipejalaika enggau chara iya diperesa. Semua pekara tu ukai utai ti mari dikereja lalu iya ulih dipejalaika pengajar jaku Iban. Ba peresa kloz nembiak dipinta ngisi endur lapang ba tibak teks bacha ti endang sengaja digaga puang ulih pengajar tauka pemeresa. Ba proses keterubah, nembiak dipinta meratika tibak teks nya chara ngelansa. Udah nya baru sida ulih nguji ngisi endur lapang nya ngena leka jaku ti engkeman ari sukut reti teks bacha nya. bepelasarka pemereti sida senentang teks nya baru sida nguji ngisi lapang nya ngena leka jaku ti engkeman nitihka reti teks.

(a)        Chara Milih Tibak teks Kena Nguji Kloz

Baka mega teknik bukai, teks ti diplih dikena nguji pengawa meretika teks mesti engkeman enggau tikas nembiak ti deka diuji nya. nitihka Oller (1979) peresa kloz ti standard ngena tibak teks ti enda kurang ari 250 leka jaku. Kebuah pia, ngambika ulih nempa 50 iti item kloz (tempat-tempat ti puang) enti pengajar nguna ratio tetap 1:5; reti nya bagi tiap-tiap iti leka jaku kelima dalam tibak teks bacha mesti dikusungka.

Tibak ti enda kurang ari 250 leka jaku (50 leka jaku dikeluarka tauka dikusungka) tauka enda kurang ari 350 leka jaku (70 leka jaku deka dikeluarka tauka dikusungka). Penyampau tu engkeman dikena nguji nembiak sekula sekondari. Tu dipeda ari sukut pengulih nembiak macha lalu enggau timpuh jam dikena sida nembuka tanya. Ungkup sekula primari pemanjai tibak teks nya entara 100 – 160 leka jaku, 15 (minimum) tauka 30 (maksimum) item kloz. Patut dikingatka mega tibak teks ti dipilih semina ari teks prosa aja. Leka main bedau kala dikena naka kediatu.

(b)        Chara Nempa Item Kloz (Milih Endur Lapang ti Deka dikusungka dalam Tibak Teks)

(i)           Ngena Ratio Tetap

Ratio tetap 1:5, 1:7 enggau 1:10 kala dikena lebuh ngaga item kloz. Taja pia, iya ti suah dikena iya nya ratio 1:5 baka ke udah disebut. Reti nya tiap-tiap leka jaku kelima dalam tibak teks nya deka nyadi item tanya. Ratio 1:5 suah agi dikena nguji pengelandik meretika teks bacha peringkat sekula sekondari enggau peringkat orang tuai. Taja pia, bisi mega ratio tu dikena ba peringkat primari atas, baka ba taun empat, lima enggau enam. Ratio 1:10 enggau 1:7 suah agi dikena ba peringkat primari baruh baka taun satu, dua enggau tiga.

(ii)          Ngena Ratio Tetap tang bisi Ubah Mimit

Taja pan bemalinka sesebengkah ratio tetap (baik nya 1:5, 1;7 tauka 1;10) pengajar tauka pemeresa ulih ngena chara iya empu lebuh milih leka jaku ti patut tauka enda patut dikeluarka tauka dikusungka. Enti langkah rapat nya dikira tusah ba nembiak (baka hari bulan, jam, nama tetap enggau leka jaku teknikal) reti nya leka jaku baka tu enda ibuh dikachau. Chara ngaga item kloz baka tu suah agi digaga dikena dalam bilik kelas. Taja pia, nitihka Taylor (1957) ngena ratio tetap sereta enda ngubah iya manah agi sereta engkeman agi dikena nguji pengelandik meretika teks ba peringkat orang tuai.

(c)         Ngenanka Topik Teks, Ayat keterubah enggau Ayat Kepenudi

Udah nyadi pekara selama, topik tibak teks, ayat keterubah enggau ayat kepenudi nya enda dikachau. Kebuah pia, ngambika meri penerang mimit senentang langkar cherita ti bekaul tibak teks nya. pengajar ulih ngepunka item kloz keterubah ba leka jaku kelima (enti milih ratio 1:5) dalam ayat kedua lalu ditangkanka ayat ti bukai. Pengawa nya diteruska semadi bisi endur puang ti enda patut ketegal nama tetap, haribulan, jam, angka enggau leka jaku teknikal. Endur lapang mesti digaga sama pemanjai iya nya kira-kira 5 sentimeter. Peratika chunto peresa kloz ti udah digaga dikena nguji penglenadik meretika teks.

 

 

BAHASA IBAN

 

Peresa Pengelandik Macha

 

Pom Empat                                                                      Jam Ngaga: 25 minit

 

Ba tibak teks ti nangkan tu bisi sekeda leka jaku ti udah dikeluarka. Keterubah iya, bacha dataika abis lalu peretika cherita nya. Udah nya isi endur lapang. Siti endur lapang ungkup siti leka jaku aja. Leka jaku ti bisi sengkang baka “begotong-royong” dikira seleka leka jaku.

 

Nama sekeda guna arang? Mayuh agi arang dikena (1) __________ ngeluarka kuasa karan. Ba (2)__________ pengeluar kuasa karan, arang (3)__________ nyadika pun kuasa dikena (4)__________ injin turbine ti ngeluarka (5) __________ karan. Kelimpah ari nya, (6)__________ arang batu ti bukai nya (7)__________ dikena ngeluluhka besi, ngangatka (8)__________ ba menua chelap, melakinkan (9)__________ raya enggau ti bukai. (10)__________ aspek kualiti, arang ti (11)__________ manah nya arang anthracite. Arang (12)__________ pemadu berega sereta pemadu (13)__________ dikena ngangatka rumah ba (14) __________ chelap. Arang bituminous kurang (15)__________ manah tang iya murah lalu pemadu mayuh dikeluarka mensia. Arang ti bansa tu pemadu mayuh dikena ngeluarka kuasa karan enggau dikena ngeluluhka besi.

 

Leka jaku ti udah dikeluarka ari tibak asal teks baka ti dirintaika di baruh tu. Tu saut ti nemban nitihka tibak asal teks nya:

 

1.	mensia	9.	jalai
2.	palan	10.	Ari
3.	tu	11.	pemadu
4.	bejalaika	12.	ti
5.	kuasa	13.	mayuh
6.	guna	14.	menua
7.	baka	15.	agi
8.	rumah

 

 

Sanding Penemu

 

Abdul Aziz Abdul Talib 1983, “Menguji bacaan Bahasa Melayu Secara Diagnostik: Kaedah dan Tknik”, dalam Jurnal Dewan Bahasa, (Nov. 1983). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Teknik Kloz Sebagai Alat Menilai dalam Bidang Pendidikan Bacaan Bahasa Malaysia”,dalam Jurnal Dewan Bahasa, (Feb. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Psikolinguistik dan Pengajaran Bacaan Sekolah Rendah”,dalam Jurnal Dewan Bahasa, (Jun. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1996, Menguji Kemahiran Bahasa:Prinsip. Teknik dan Contoh, Kuala Lumpur: Dewan Bahasa dan Pustaka.

 

Clay, M.M. 1982. The Early Detection of Reading Difficulties. Auckland: Heinemann Publishers.

 

Drummond, D. & Wignell, E. (eds.)., 1979. Reading: A Source Book. London: Heinemann Educational Books.

 

Ebel, R.L. 1979. Essentials of Education Measurement. New Jersey: Prentice Hall Inc.

 

Ebel, R.L. 1980. Practical Problems in Educational Measurement. Lexington: D.C. Heath.

 

Heaton, J.B. 1979. Writing English Language Tests. London: Longman Group Ltd.

 

Lamberg, W.J. & Lamb, C.E. 1980. Reading Instruction in the Content Areas. Boston: Houghton Mifflin Co.

 

Pusat Perkembangan Kurikulum, Kementerian Pelajaran Malaysia 2005. Bahasa Iban Tingkatan IV : Huraian Sukatan Pelajaran. Kuala Lumpur: Dewan Bahasa dan Pustaka.

 

Moseley, D. & Caroline, D. 1977. Language and Reading Among Underachievers : A Practical Review of Research. Windsor: NFER Pub. Co.

 

Ragget, M.S. et. al. (eds.) 1979. Assessment and Teaching of Reading. London: Wardlock Educational.

 

Smith, F. 1980. Reading Cambridge : Cambridge University Press.

 

 

  

Pengelandik Bekomunikasyen

 

Komunikasyen nya sebengkah proses ti mungkur pengawa bekunsi enggau mindah idea, informasyen enggau mesej enggau orang bukai ba maya enggau tempat ti udah ditetapka. Komunikasyen nyengkaum pengawa bejaku enggau nulis, bekomunikasyen ngena visual, ngena chara verbal enggau ukai verbal.  Bekomunikasyen entara pangan diri beguna bendar dalam pengidup kitai lebuh ti begulai sejalai dalam sebuah komuniti.

Komunikasyen mega pekara tauka utai ti diguna genap individu ninting hari. Kenyau ari ada, komunikasyen endang udah bisi. Kaul chunging enggau indai sereta rampa alai iya diau ngasuh chunging nya meri respons. Respons nya mih ti dikumbai komunikasyen. Proses komunikasyen ti disebut di atas deka ngerempah kaul diri sebilik enggau komuniti ke alai iya begulai.

Kelimpah ari nya, proses nya mega nyaup nembiak bulih pemujur enti kitai bejakuka dalam konteks nembiak tauka nembiak sekula. Komunikasyen deka dipeda semitan agi enti  iya ke ngenataika jaku enggau penerima iya belajarka hal bekaul enggau komunikasyen.

Proses Komunikasyen deka bejalai lanchar lebuh kedua-dua piak meretika kriteria baka ke didijir ba baruh tu:

a. Nemu tirai juru pangan diri

b. Ngembuan pengerindu enggau prinsip bepikir tauka runding ti sama

c. Ngembuan ulah positif lebuh nerima penemu orang

d. Bebasaka pangan diri lebuh ke bekomunikasyen enda ngira status tauka ekonomi.

Leka jaku komunikasyen nya asal iya ari leka jaku communiatus (jaku Latin) ti mai reti bekunsika utai. Pekara tu engkeman enggau penerang di atas. Theodorson G. Theodorson dalam bup iya A modern dictionary of sociology nerangka reti komunikasyen nya proses ngirum informasyen, pikir tauka runding, ulah tauka emosyen ari siku orang ngena simbol.

Scramm, (1971) dalam bup The process and effects of mass communication nerangka komunikasyen nya pengawa bekunsi orientasyen senentang siti set kelai ti ngujung ngagai pengulih reti ti sama.

Nitihka Ronald (1975) dalam bup iya Fundamental Concept in Human Communication, madahka komunikasyen nya nyadi ari kaul kitai ti mungkur pengawa bejaku enggau diri empu enggau pengawa ti belamati lalu meri reti ngagai pekara dalam rampa diri kitai empu.

Bepelasarka penemu bala sarjana ti disebut di atas, komunikasyen ulih dibagi ngagai dua bansa iya nya komunikasyen intrapersonal enggau komunikasyen interpersonal. Kedua-dua komunikasyen tu ngembuan penteba ti terang midaka ari tukuh tiap bansa nya.

Glosari:

Chunging – bayi

Sanding Penemu:

Gail E.Myers & Michelle Totela Myers (1992). The Dynamics of Human Communication a Laboratory Approach. McGraw-Hill, the University of California

Husin Fateh Din, Nazariyah Sani (2013). Bahasa Melayu Kontekstual. Penerbitan Multimedia Sdn. Bhd.

Phil. Astrid S. Susanto (1974), Komunikasi Dalam Teori dan Praktek, Binacipta Percetakan Cikapundung, Bandung

Ronald L.Applbaum. (1975) Fundamental Concept in Human Communication. Canfield Press, Univerisity of Michigan

Scramm, W., & Robert, D.F. (Eds.) (1971) The process and effects of mass communication (Rev. Ed.). Urbana, IL; University of Illinois Press

Theodorson G. Theodorson. A. (1969). A modern dictionary of sociology. New York: Thomas Y. Crowell.

Plato: Reti enggau Tirai Juru Fakta Nya Beguna

 

Siku raban filosofi Greek kelia ke benama Plato nerang sereta madahka mayuh pemereti ati orang di dunya tu ke bendar nunda ku iya dirempah ulih ilusyen ti dikumbai sereta dianggap sida realiti tauka pengamat. Iya nerangka pekara nya bepelasarka chunto kes seraban orang ti ditan ba dalam gua. Tu munyi penerang iya.

Sida duduk ngadap belakang lalu semina meda dinding gua. Ba mua gua nya bisi unggun api ti benung mau bendar. Udah nya, ba entara unggun api enggau raban ti ditan nya bisi seraban nembiak ke bekereja ngangkatka guni gandum, kayu, engkeramba enggau utai bukai. Sida ke ditan nya semina ulih meda ayuk objek ti diangkatka nembiak nya lalu sida nganggap ayuk nya objek ti amat.

Nyau kepuas sida ke meratika nembiak nya dia bisi siku ari sida ti kena tan nya malik ke belakang lalu tepedaka objek ti amat ke dibai bala nembiak nya. Iya lalu mutuska diri deka bediri lalu pansut ari gua nya.

Ba luar gua nya, dia iya baru meda realiti dunya baka rumput, jelu, pun kayu enggau matahari. Iya terus meretika utai ti dipeda iya ke ngelama tu dianggap iya realiti nya semina kelemayang tauka ilusyen aja.

Ba kes tu, Plato nerangka ngagai kitai nya mayuh pekara rama ke dianggap kitai betul ngelama tu tang iya ti bendar ukai pekara ti betul. Kitai jampat bendar pechaya ke realiti ti semina diasaika kitai ngena pancaindera lalu nganggap utai ti dipeda, didinga enggau diasaika kitai nya betul.

Nitihka penemu Plato, pengamat utai ti bendar nya ukai semina diasaika ngena pancaindera aja tang mega ari sukut idea. Pancaindera enda selampur laban iya semina ngenataika ngagai kitai ari sukut tukuh fizikal aja tang pekara ti dikemeratka agi nya idea ti nukuhka utai nya.

Ba proses bepikir, fakta ti dipeda enggau didingaka kitai nadai meri sebarang reti  enti kitai empu enda meretika reti pekara nya. Ambika chunto, nuan dipaduka nyadi siku tukang tasat lalu sekali nuan tepedaka siti blok kedai angus. Fakta ti terang amat ke ulih dipikirka nuan maya nya iya nya kedai nya angus. Taja pia, nuan enda ulih nasat lebih ari nya dikena nuan nemu kebuah kedai nya angus. Pekara ti ditemu nuan deka meri reti enggau kebuah kedai nya angus. Nuan ulih melaba mayuh leman kebuah ari pekara ti ditemu nuan nya.

Nuan ke nyadi tukang tasat patut belajarka motif enggau kelai ti ulih mai nuan ngagai pun kebuah kedai nya angus.

Enti nuan majak meretika tirai juru enggau reti nya, nuan deka meda sebengkah  penyadi utai enggau penanggul ti terang agi. Pikir nuan pan deka luas agi dikena nuan bejalaika proses kognitif iya nya proses mensia ngulihka penemu senentang dunya, ti nyengkaum chara bepikir, belajar, nangkap, ngingat enggau mereti senentang sesebengkah utai ti nyadi. Kepengujung iya, nuan ulih tetemuka simpul penemu ti nemban asil ari pikir enggau runding ti rasional.

Glosari:

Pancaindera – lima pengasai iya nya asai, peda, dinga, tegu, sium  

tirai juru – latar belakang  

Bepikir Pan Bisi Maya Tau Salah

 

Ba tusun karang aku ke sekali tu aku agi ngupas randau pasal pengelandik bepikir. Baka pengawa bukai mega, pengawa bepikir mega tau salah enti kitai nadai besedia. Kala tauka enda nuan ngereja sesebengkah aktiviti ti betandu tang nadai kala bulih asil ti dikedaka nuan? Enti kala, nuan nyangka patut meratika baru proses chara nuan bepikir sekalika nya betul tauka enda sebedau aktiviti nya dipejalaika nuan.

Mayuh pengawa ti nadai beguna digaga ketegal proses bepikir ti enda disempulang enggau pemereti ati ti terang enggau tuju ti dalam. Pikir enggau runding kitai ulih diputarbelitka kitai enggau mayuh macham pekara.

Keterubah, pekara tu nyadi ketegal ke enda ngembuan fokus ti nemban. Lebuh nuan enda fokus maya bepikir dia perati nuan ngagai sesebengkah pekara suah bendar kena regau pekara bukai ti nadai bekaul enggau iya ti dipikirka nuan. Pemereti nuan senentang pekara nya deka nyadi kelabur sereta beserepan.

Kedua, kelalu mayuh penerang ti dipansa, dipeda ngelingi nuan tang mayuh ari informasyen tu nadai ngembuan kualiti ti ulih nyadika malin nuan.  Kadang-kadang sekeda ari penerang nya pekara ti enda engkeman, spekulasyen ti nadai evidens ti tegap, superstitious lalu tu tau ngerempahka chara nuan nisih sesebengkah pekara. Mendingka pekara ti selebebu ngapa endang ngerinduka ati kitai ari ke ninga fakta, enda pia?

Enti deka bejalaika proses bepikir enggau chara betul, pekara ti enda tau enda dikereja iya nya nyediaka situasyen bepikir ti tenai. Kenu ku orang, mudah agi meda ikan ba ai ti chiru bebanding enggau ai ti keruh. Sebaka mega enggau proses bepikir. Nuan deka mudah agi meretika situasyen enggau penanggul ti ditapi nuan enggau manah agi enti nuan ngembuan pikir ti tenai.

Runding enggau pikir ti tenai mega deka mai nuan ngaga analisis dikena merambuka chara nuan mutarka penanggul ari penanggul nya empu. Dikena bejalaika proses bepikir enggau manah, bisi sekeda pekara ti patut dikerejaka nuan.

Glosari:

superstitious - takhayul

ngerempahka - mempengaruhi

 

Kebuah Ngembuan Pengarap

 

Pekara ti mida mensia enggau jelu iya nya pengulih mensia bepikir. Genap aktiviti ti digaga mensia tentu iya bepun ari proses bepikir. Tu nyadi ukai semina ketegal pengingin enggau instinct. Ambika chunto, tumu pagi siti nuan dani lalu ngasaika diri lapar. Lebuh nuan deka enchelap pagi dia nuan berundingka dua pemakai ti deka diempa nuan iya nya asi guring enggau telu guring.

Keterubah iya, nuan berunding deka mutuska penemu sekalika makai asi guring tauka telu guring tauka kedua-dua nya sekali. Kedua, nuan berundingka proses enggau chara nyumai ngujungka asi guring tauka telu guring nya mansau sereta ulih diempa.

Taja pia, ba situasyen ti bebida, bepikir ulih mega nyadi aktiviti ti tusah dikereja. Tu suah agi nyadi lebuh bisi pekara berat lalu bepikir nya mai empas ti besai amai.

Lebuh nuan deka mutuska penemu deka bebini tauka belaki, tentu nuan ngaga timbang penemu enggau proses bepikir ti serius sereta matang agi penemu ari selama. Iya enda ngemudah baka berundingka deka makai asi guring tauka telu guring.

Lebuh kitai ngaga penyilap tauka penyalah, dia apai indai kitai selau besebutka jaku munyi tu, ‘pikir dulu anak sebedau nuan bejaku tauka ngereja pengawa’. Jaku nya ngembuan reti ti besilup ti madahkan empas ti deka ditapi kitai sepengudah ngereja sesebengkah pengawa kelebih agi udah kitai bepikir enggau dalam agi. Lebuh nuan nebah radio enggau nyarih dia orang ke berimbai pendiau enggau nuan enda tentu rinduka ulah nuan nya tang ba penemu nuan mendingka radio enggau volium ti nyarih nya siti chara dikena nuan ngenyamaika ati diri.

Pandai tauka enda orang nya ditentuka nengah akal runding iya. Baka nya mega lebuh betapi enggau penanggul ti besai, tentu nuan deka bepikirka enggau naka ulih chara mutarka penanggul nya.

Untak bekereja ngiga jalai pansut ti pengambis mudah. Iya deka meri sekeda jalai mutar enggau chara ti semitan sebedau nuan netapka siti tauka dua pemutus ti pengabis manah.

Nemban tauka enda penanggul nya ulih diputarka bepanggai bendar ba chara  mutar ti diperetika nuan empu. Dalam agi penemu nuan, mayuh agi mega chara dikena nuan mutarka sesebengkah penanggul nya.

Nya alai, nuan ulih nambahka penerang enggau sanding penemu ari pekara rama ti dipratikka, trivia, penganda enggau mega nengah raban filosi. Pekara ti patut dikeingatka nya, ukai semua penerang nya engkeman sereta ulih diguna setipak enggau penemu nuan. Nuan empu patut milih iya ti engkeman aja ba penemu nuan.

Bepikir nya pugu ari semua pengawa kitai. Aktiviti ti digaga nuan baka neriba kerita, ngelawa laman internet, nulis, mutuska penemu, semua tu asil ari proses bepikir.

Bepikir mega ngayankan pengelepas mensia ari semua pekara. Tu ulih dipeda ari tukuh lagu ti ditengkebang, utai ti diukir tauka didero, karang ti ditulis, rumah tauka bangunan ti digaga, filem tauka pansik dalam bidang pelajar ti dipejalaika. Bepikir ngasuh nuan ngaga pemutus penemu enggau nadai besekat.   

Glosari:

instinct - naluri

enchelap pagi  - sarapan pagi

penganda  - pakar