Pengelandik Bepikir Tikas Tinggi (PBTT)

 

Pengelandik bepikir tikas tinggi (PBTT) tauka suah agi dikumbai enggau jaku puntang iya nya KBAT bisi disebut dalam kurikulum enggau terang ngambika bala pengajar ulih ngalihka pekara nya ngagai pengawa ngajar enggau belajar (PdP). Kebuah pia, dikena meransang runding tauka pikir ti bestruktur enggau befokus ba bala nembiak sekula. Penerang PBTT nya befokus ngagai empat tikas pikir baka ke diayanka di baruh tu.

TIKAS PIKIR	PENERANG
Aplikasyen	Ngena penemu, pengelandik enggau ukur pemanah (nilai)  pekara dalam situasyen ti enda sebaka dikena bejalaika sesebengkah pengawa.
Analisis	Ngaga analisis penerang lalu magi iya ngagai sitak ti mit ngambika ulih meretika pekara nya enggau lenak agi sereta ulih ngaitka iya enggau pekara ba sitak bukai.
Nisih	Ngaga timbang penemu sereta pemutus penemu ngena penemu, peneleba, pengelandik enggau nilai sereta meri kebuah.
Nengkebang	Ngasilka idea, produk tauka chara ti kreatif sereta inovatif.

 

PBTT nya pengulih ngena penemu, pengelandik enggau ukur pemanah lebuh beperagam enggau ngaga reflesyen dikena mutarka penanggul, ngaga pemutus runding, berinovasyen sereta ulih nengkebang sesebengkah utai. PBTT mungkur pengelandik bepikir kritis, kreatif sereta ulih ngeraup penemu senentang sesebengkah pekara.

Pengelandik Bepikir Kritis nya pengulih dikena nisih sesebengkah idea ngena chara logik enggau rasional ngambika ulih ngaga timbang penemu ti engkeman bepelasarka dalih enggau evidens ti ulih diterima.

Pengelandik Bepikir Kreatif nya pengulih ngasilka tauka nengkebang sesebengkah utai baru sereta berega ngena daya imaginasyen ti tulin sereta bepikir enda nitihka runding selama.

Pengelandik Beperagam (menaakul) nya chara bepikir ti bestruktur enggau befokus dikena mutarka penanggul.

PBTT ulih diguna ba bilik kelas nengah aktiviti  ti betukuh beperagam, belajar chara inkuiri, mutarka penanggul enggau projek. Pengajar enggau nembiak mesti ngena kereban bepikir baka kar runding enggau kar minda sereta disempulang enggau tanya tikas tinggi dikena meransang nembiak bepikir.

Sanding Penemu:

Dokumen Standard Kurikulum dan Prestasi, Bahagian Pembangunan Kurikulum, 2018

Nguji Pengelandik Macha Tusun Kelima: Teknik Tanya Pilih Betul – Salah

 

Teknik Tanya Pilih Betul – Salah

Sama mega baka tanya objektif, tanya pilih betul-salah dikira sebansa tanya objektif. Kedua-dua teknik tu ngembuan risiko ari sukut saut nembiak. Dalam teknik tanya objektif A, B, C persin nembiak nyangka lalu nanda saut ti betul (nitihka teori probabiliti) iya nya 33.33%. Ba tanya pilih betul-salah nya 50%. Reti nya nengah chara nyangka aja, nembiak nya engka nyangka 20 saut ti betul dalam siti-siti peresa meretika teks ti ngundan 40 item pilih betul-salah. Ketegal pengelemi tu, nya kebuah iya enda tentu popular ba pengajar ke ngajar jaku. Kelimpah ari nya teknik tu nadai ngundan penteba diagnostik enti diperati ari sukut pemeri respons senentang penyilap nembiak milih saut ti salah.

 

Bisi dua chara teknik tu kala dikena nguji pengawa meretika teks, iya nya:

 

(a)  Ti enda bepanggai ba teks bacha.

(b) Ti bepanggai ba teks bacha.

 

Bansa (a)

 

Teknik tu suah agi dikena ba peringkat sekula primari. Ba peringkat tu, tikas pemereti nembiak macha diuji bepelasarka pemereti sida macha ayat pandak. Genap iti ayat nya dikumbai siti penerang; ti tau dikira betul tauka salah nitihka penemu rama. Nembiak dipinta milih lalu nanda sekalika penerang nya ‘betul’ tauka ‘salah’ nitihka pemereti sida empu lebuh ke macha ayat nya. Peratika chunto tu:

 

1.	Burung ulih terebai. Durian nya sebansa jelu. Ai meku lubuh nyadi ais. Ikan enda nemu nyemerai. Mayau deka amat makai ikan. Tupai deka amat makai buah nyiur. Tikus deka amat nangkap mayau. Matahari tumbuh muak ke barat. Kerebau ulih terebai lalu sapi ulih niki pun kayu. Bayam nya sebansa sayur lalu adung nya sebansa ikan.	B		S
2.		B		S
3.		B		S
4.		B		S
5.		B		S
6.		B		S
7.		B		S
8.		B		S
9.		B		S
10.		B		S

 

 

Bansa (b)

 

Beberapa iti penerang (item) digaga bepelasarka sesebengkah genteran teks ti diberi ngagai nembiak. Sida diasuh macha sereta meretika teks nya. Nangkan penerang nya, nembiak dipinta milih lalu nanda sekalika iya nya ‘betul’ tauka ‘salah’ nitihka pemereti sida pasal kereban ti dibacha. Teknik bansa tu suah agi dikena ba peringkat sekula primari. Taja pia, iya mega ulih dikena ba peringkat sekula sekondari. Peratika chunto tu:

 

Bacha tibak teks di baruh tu enggau silik. Udah nya saut penerang nangkan nya sekalika betul tauka salah. Tanda √ ba ruang saut bagi genap iti penerang nya.

 

Bali nya sebuah pulau ti penuh enggau asil seni. Peranak menua nya mayuh agi bepengarap Hindu. Sida agi ngemeranka pengawa seni asal ti dibantaika sida ngagai bala temuai.

 

Tanda tradisional endang siti ari asil seni ti tinggi rega. Iya siti ari pekara ti narit ati raban temuai nemuai ngagai pulau tu.

 

Sebengkah tanda ti seruran dipeda raban temuai iya nya Tanda Barong. Enda jauh ari pasar Denpasar bisi sebuah panggau digaga ungkup mandangka tanda tu.

 

1.	Peranak menua Bali ke bepengarap Hindu mimit aja.	B		S
2.	Seni asal agi mengkang dikemeran di Bali.	B		S
3.	Seni nya sebansa tanda tradisional di Bali.	B		S
4.	Tanda Barong nya sebansa seni orang Bali.	B		S
5.	Denpasar nya siti agi tanda tradisional orang Bali.	B		S

 

Enti pengajar deka ngena teknik tu lebuh nguji pengelandik meretika teks, bisi jaku lalau ke patut dikingatka lebuh ngaga tanya tu:

 

(a)	Ba tiap-tiap penerang ti ditulis enda tau ngundan lebih ari siti idea tauka konsep.
(b)	Reti penerang nya mesti nemban lalu enda ulih dikelikuhka pengamat tauka penyalah iya.
(c)	Penerang mesti pandak, terus ngagai reti lalu ditulis ngena struktur jalai jaku ti mudah dipereti.
(d)	Penerang mesti ditulis betukuh positif. Penerang negatif semina maya ti enda ulih diseliahka.
(e)	Idar saut anang terang amat (ambika banding: B, S, B, S, B, S), tang patut ditaburka aja sepeneka ati.
(f)	Penyampau penerang betul enggau salah mesti kurang lebih sama pemayuh. Ambika banding, enti peresa nya ngundan 30 item, item-item nya mesti mungkur 15 item penerang ti betul enggau 15 item penerang ti salah lalu ditusun enda nitihka pola ti nyemetak. Kebuah pia, dikena nyeliahka nembiak nyangka kesemua nya ‘betul’ tauka kesemua nya ‘salah’ lalu bulih 100% betul sereta pas peresa nya ketegal ngena chara nyangka.  Tu engka deka nyadi enti kesemua 30 item ti ditulis nya penerang ti betul tauka kesemua item nya ngundan penerang ti salah. Nengah chara ti udah dipadah tadi risiko maksimum nembiak nyangka lalu pas ulih dikurangka ari 100% ngagai maksimum 50% aja.

 

Sanding Penemu

 

Abdul Aziz Abdul Talib 1983, “Menguji bacaan Bahasa Melayu Secara Diagnostik: Kaedah dan Tknik”, dalam Jurnal Dewan Bahasa, (Nov. 1983). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Psikolinguistik dan Pengajaran Bacaan Sekolah Rendah”,dalam Jurnal Dewan Bahasa, (Jun. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1996, Menguji Kemahiran Bahasa:Prinsip. Teknik dan Contoh, Kuala Lumpur: Dewan Bahasa dan Pustaka.

 

Clay, M.M. 1982. The Early Detection of Reading Difficulties. Auckland: Heinemann Publishers.

 

Nguji Pengelandik Macha Tusun Keempat : Teknik Tanya Objektif

 

Teknik betanya saut ngena chara tu dikiraka agi baru enti dibandingka enggau teknik ti tradisional agi baka teknik tanya chara tebuka. Pemanah teknik tanya chara tu dipeda ari penyamai bejalaika peresa tu lalu saut iya mega objektif ari sukut meri mark. Taja pia ngaga item betukuh objektif ukai pengawa ti mudah dikereja. Kebuah pia, item tanya ti ditempa nya begunaka pengelandik teknik enggau peneleba ari raban pengajar ke diasuh nempa item nya. Bisi mega penemu ba raban pengajar jaku ke madahka teknik tanya chara objektif tu nadai mai sebarang pemanah ari sukut pelajar jaku. Teknik tu enda meransang nembiak mantaika penemu sereta nulis ngena jalai jaku ti meruan. Kelimpah ari nya mega, teknik tu semina ngasuh nembiak bepelabaka aja lebuh ke ngiga saut ti betul.

 

Ketegal bisi pengelemi enggau pemanah dalam teknik tu, dia raban pengajar enda  diperansang ngena teknik tu suah, ambika banding maya nguji meretika teks ti betukuh formatif baka peresa minggu tauka peresa bulan. Taja pia, teknik tu ulih dikena sekali-dua  dalam peresa penggal, peresa tengah taun enggau ujung taun. Teknik tanya chara objektif berengkah dikena raban penguji di menua Amerika sepengudah Perang Dunya Kedua. Tuju iya digaga ngambika ngenyampatka maya sida meresa enggau meri mark laban iya semina ngena injin (mesin) tauka komputer. Tukuh iya ti objektif nya ke nyamin konsistensi enggau realibiliti ti tinggi entara raban pemeresa. Pengawa baka tu endang aruh iya dipejalaika di Amerika laban maya meresa keretas saut sida begunaka injin pemeri mark. Taja pia, sida mega ngasaika chara tanya objektif tu mega bisi pengelemi enti diperatika ari sukut pelajar. Iya enda diperansang dikena besehari-sehari ba bilik kelas; kelebih agi dalam bidang belajarka jaku. Lebuh bejuraika pengelemi enggau pemanah teknik tu, Oller (1979) kala madahka munyi tu:

 

In the overall perspective, multiple choice tests affords two principal advantages: ease of administration and scoring. They cost a great deal on the other hand in terms of preparation and counter productive instructional effects.

 

Dalam peresa meretika teks bacha ti ngena teknik chara objektif tu, nembiak ngembuan peluang milih sekeda pilih saut ke suah dikumbai opsyen dikena sida nentuka saut ti betul. Bisi empat tauka lima opsyen ti diberi. Ari sukut teknik ngaga item objektif, item objektif dibagi ngagai dua pekara iya nya stem tauka batang pekara disempulang enggau dijir pilih saut tauka opsyen. Bisi mega maya iya ngundan tiga pekara iya stimulus, stem enggau opsyen. Stimulus nya rambai jaku tauka ayat ti meransang nembiak bepikir sebedau sida macha batang pekara tauka stem. Ba rintai opsyen tauka pilih saut semina ngundan siti aja saut ti betul tauka nemban. Opsyen ti betul nya dikumbai key  tauka kunchi saut. Opsyen ti bukai nya dikumbai distrakter tauka “pengachau”. Semua opsyen ti dipilih nya mesti bisi ayan ba dalam teks bacha.

 

Stem tauka batang pekara ti deka ditanya suah ditulis ngena chara tanya tauka nembuka ayat.

 

Chunto Item ti Betukuh Tanya

 

Ni bagi nama di baruh tu indu nengeri menua Malaysia?
A	Kota Baru
B	Kota Kinabalu
C	Kuching
D	Kuala Lumpur

 

Ba tanya di atas nya, saut betul nya D; lalu A,B enggau C nya dikumbai distraktor tauka pengachau.

 

Chunto Item ti Betukuh Nembuka Ayat

Indu nengeri menua Malaysia iya nya
A	Kota Baru.
B	Kota Kinabalu.
C	Kuching.
D	Kuala Lumpur.

 

Dalam chunto ti dibantaika di atas nya, ngayanka kedua-dua reti ti sebaka tang bansa tanya ti ngasuh nembuka ayat nya spesifik agi. Stem item ungkup chara nanya nya mudah agi ditulis tang iya mejal tukang ngaga item nya ngayanka pekara nya enggau terang. Stem nyangka tau nyadi panjai agi. Ba sesebengkah tanya objektif bagi tanya meretika teks bisi mega item betukuh mayuh bengkah pilih tauka aneka gabungan. Item bansa tu nya item ti bechampur bansa tanya enggau penerang.

 

Di baruh tu dirintaika sekeda lalau ke ulih dikena nyadika malin lebuh kitai deka ngaga item objektif ti bekualiti.

 

(a)	Reti tauka penanggul ti dibantai ba stem mesti terang, spesifik lalu enda lebih ari siti.
(b)	Stem mesti ditulis ngena jaku ti terang lalu enda kelabur ari sukut reti. Struktur ayat enda tau kompleks lalu terus ngagai reti pekara.
(c)	Iya ti manah amat nya, penyampau leka jaku ba stem nya mesti mayuh agi ari opsyen.
(d)	Saut ti betul nya mesti 100% betul tauka iya ti pengabis manah entara semua opsyen ti diberi.
(e)	Struktur ayat ba opsyen mesti sebaka tukuh enggau stem sesebengkah item peresa.
(f)	Seliah ari ngena leka jaku ti tau meri ulu lungga ngagai saut ti betul. Pekara tu ulih nyadi enti:
	(i)	bisi leka jaku ti sama enggau iya ke ba stem enggau opsyen ti betul.
	(ii)	saut ti betul ditulis enggau silik agi ari ke bukai.
	(iii)	meri dua pilih ti sama reti ngujungka nyamai nembiak nangkap saut ti salah.
(g)	Penyampau leka jaku ba genap iti opsyen mesti kurang lebih sama.
(h)	Ari siti item ngagai siti item, penuduk kunchi saut mesti berubah lalu enda statik. Ambika banding, anang ngaga A nyadika saut belama, tauka B enggau C aja ba tetiap item.
(i)	Opsyen ti salah enda tau nyata amat tauka segenda salah lebuh dibacha. Taja pan salah, opsyen nya mesti mega narit ati sekeda nembiak ke kurang meretika kereban ti dibacha sida. Mesti bisi nembiak milih opsyen ti salah.
(j)	Genap iti distraktor tauka pengachau mesti ngeruga runding nembiak, pemereti macha sida ti pandai enggau iya ke enda pandai.

 

 

Ba genap bengkah teknik ti dikena nguji pengawa meretika teks bacha, pengajar mesti ngemeratka pekara milih tibak karang tauka genteran teks. Tibak karang ti dipilih nya mesti ngayanka tuju macha enggau dalam agi lalu enda semuti macha pekara ti bekaul enggau bidang jaku tauka litericha aja. Kereban bacha ti dipilih mega patut diambi ari pun penatai ti bukai, ambika banding baka mata pelajar bukai ti patut dibacha sereta diperetika nembiak maya sida ba sekula. Tibak teks ti ngundan pekara ti nyadi, fakta, idea tauka penemu nya dikira kereban ti manah dikena nguji pemereti nembiak pasal kereban ti dibacha sida.

 

Pemanjai kereban bacha bepanggai ba penyampau item objektif ti deka ditempa sereta peringkat nembiak ti deka diuji nya. Ambika banding, baka selama tibak teks ti ngembuan 50 – 100 leka jaku nyangka engkeman ba tikas nembiak sekula primari, 200 – 300 leka jaku nya ungkup nembiak sekula sekondari baruh lalu 400 – 600 leka jaku nya ungkup sida ke ba sekondari atas. Sekat pemanjai teks ukai pekara ti enda tau enda dititih. Iya mega patut dipeda ari sukut tikas penggemar teks bacha nya. Teks ti mudah dipereti nyangka tau panjai agi ari teks ti mar dipereti. Taja pia, tikas penggemar patut engkeman enggau tikas nembiak ti deka diuji. Kelimpah ari milih teks ti engkeman dikena nguji nembiak, jaku ti dikena mega patut diperatika lebuh milih teks kelebih agi ari sukut struktur jalai jaku enggau lebas jaku ti dikena dalam teks ti dipilih nya.

 

Lebuh sesebengkah teks ti engkeman udah dipilih, pengajar patut suah macha sebedau nyeruri tauka ngedit (enti patut) ngambika teks nya nadai ngembuan penyilap ari sukut sepil, tanda bacha, jalai jaku etb. Iya ti manah amat nya, maya nempa item objektif, gaga lebih ari ti dipinta. Item nya mega patut dibacha suah, diubah tauka diedit dataika pengajar nya puas ati lalu nadai bisi penyilap tauka pengelemi agi ari aspek teknik penumbuh iya. Item ti enda manah lalu enda ulih diseruri mesti dibuai. Semina item ti manah aja dipilih lalu dikena, iya nya sepengudah pengajar macha baru lalu nandu bacha genap iti item ti dpilih iya tadi.

 

Ni penyampau item objektif ti patut digaga ba sesebengkah teks bacha? Tu ukai pekara ti tetap. Penyampau tu bepanggai ba isi teks bacha nya, pemanjai teks lalu awak tauka jam ke diungkup ngagai nembiak nyaut peresa nya. Ambika banding, baka selama awak ti diberi dikena nyaut siti-siti item objektif iya nya 1 ½ minit. Tu nyengkaum awak macha teks ti diberi. Ambika chunto, 45 minit diberi ngagai nembiak nyaut tanya meretika teks ti ngundang 30 iti item objektif tauka 1 ½ jam nyaut peresa ti ngundan 60 iti item. Lebuh peresa ba bilik kelas, pengajar dipejal nitihka awak ti ungkup dalam taga jam belajar sekula, baka 40 – 45 minit tiap-tiiap taga jam belajar. Enti iya baka tu dia penyampau item ti engkeman nya kira-kira entara 25 – 30 item objektif. Ba tikas sekula primari, timpuh awak ungkup ngajar  nya pandak agi, iya nya 30 minit. Enti awak nyampau tu dikena nguji nembiak meretika teks dia 20 item objektif nya dikira engkeman.

 

Sanding Penemu

 

Abdul Aziz Abdul Talib 1983, “Menguji bacaan Bahasa Melayu Secara Diagnostik: Kaedah dan Tknik”, dalam Jurnal Dewan Bahasa, (Nov. 1983). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Teknik Kloz Sebagai Alat Menilai dalam Bidang Pendidikan Bacaan Bahasa Malaysia”,dalam Jurnal Dewan Bahasa, (Feb. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1984, “Psikolinguistik dan Pengajaran Bacaan Sekolah Rendah”,dalam Jurnal Dewan Bahasa, (Jun. 1984). Kuala Lumpur: Dewan Bahasa dan Pustaka.

 

Abdul Aziz Abdul Talib 1996, Menguji Kemahiran Bahasa:Prinsip. Teknik dan Contoh, Kuala Lumpur: Dewan Bahasa dan Pustaka.

 

Clay, M.M. 1982. The Early Detection of Reading Difficulties. Auckland: Heinemann Publishers.

 

Drummond, D. & Wignell, E. (eds.)., 1979. Reading: A Source Book. London: Heinemann Educational Books.

 

Ebel, R.L. 1979. Essentials of Education Measurement. New Jersey: Prentice Hall Inc.

 

Ebel, R.L. 1980. Practical Problems in Educational Measurement. Lexington: D.C. Heath.

 

Heaton, J.B. 1979. Writing English Language Tests. London: Longman Group Ltd.

 

Lamberg, W.J. & Lamb, C.E. 1980. Reading Instruction in the Content Areas. Boston: Houghton Mifflin Co.

 

Pusat Perkembangan Kurikulum, Kementerian Pelajaran Malaysia 2005. Bahasa Iban Tingkatan IV : Huraian Sukatan Pelajaran. Kuala Lumpur: Dewan Bahasa dan Pustaka.

 

Moseley, D. & Caroline, D. 1977. Language and Reading Among Underachievers : A Practical Review of Research. Windsor: NFER Pub. Co.

 

Ragget, M.S. et. al. (eds.) 1979. Assessment and Teaching of Reading. London: Wardlock Educational.

 

Smith, F. 1980. Reading Cambridge : Cambridge University Press.