Meratika penguji ditapi pengajar, nembiak maya PdPR

 

Siti ari isu ti semampai dikenang aku ditu iya nya bekaul enggau pandemik COVID 19 sereta pengawa ti bekaul enggau sekula baik nya pengajar tauka nembiak. Kebuah pia, isu tu mih ke semak bendar ba ati aku. Kesatu, ketegal pandemik tu benung nyerang genap menua di dunya lalu kedua laban bala pengajar enggau sekula semampai rapit enggau pengawa aku.

Kitai bela udah ninga genap hari kes COVID-19 majak niki lalu sekeda nengeri bisi ngeripotka penyampau ulih berampit (Ro) ti majak niki lalu tau ngasuh ati kitai irau. COVID-19 mega bisi ditemu nyadi di sekula. Naka Oktober 2020, lebih 1,000 kes positif ke marit bala nembiak sekula bisi direkod nyadi kenyau ari pun alun ketiga pandemik COVID-19 nyerang menua tu. Berindik ari hal tu, Opis Menteri Pelajar (KPM) ngasuh sekula ditutup lalu mansutka jaku gerah madahka pengawa ngajar enggau belajar dipejalaika ba rumah (PdPR) nitihka timpuh ti ditetapka.

Bepelasarka sejarah pandemik dunya, timpuh pandemik suah agi beretan sepengelama satu ngagai tiga taun. Nya alai, kitai bedau ulih manjung di pala wong, apin ulih betempap dada taja pan  program vaksinasyen benung dipejalaika perintah enggau regas ba menua tu.

Pengawa nutup sekula ketegal pandemik enda ulih enda deka meri impak timpuh ti panjai ngagai  sektor pelajar menua tu. Data UNESCO ngayankan ari sukut global, angka nembiak ti tisir ari sekula majak betambah empas ari pandemik COVID-19 tu.

Taja pan Opis Menteri Pelajar bejalaika singkang ti proaktif ngaturka PdPR ngambika pengawa belajar terus dipejalaika, tang iya mega patut dipeda nengah chara selampur sereta sistemik, ukai semuti meri fokus ngagai aspek infrastruktur enggau modaliti aja.

Mayuh pekara ti patut diperatika enggau silik sereta diputuska lebuh mikirka isu PdPR tu laban semua pekara tu endang bisi bekait kupit entara siti enggau ke bukai lalu iya deka meri impak ngagai pelajar sereta nembiak sekula.

Tu nyengkaum pengelandik pengajar lebuh nukuh adar pengawa chara online, pengelandik ngajar ari jauh, pengelandik lelemu pengajar empu dalam isi pekara teknologi enggau pedagogi, pengadang enggau pengelandik apai indai maya  mantu anak sida belajar, pengadang nembiak ari sukut emosyen, sosial enggau kognitif, fasiliti infrastruktur ti bisi lebuh bejalaika PdPR, fleksibiliti undan kurikulum, tisih ti engkeman, sereta mayuh agi ke bukai.

Sigi amat patut mih genap sida ke diparuk dalam PdPR baka sekula, pengajar, apai indai enggau nembiak, patut bendar meratika enggau silik penguji ti ditapi sida. Lalu ari nya, strategi ti tegap dikena bejalaika PdPR ulih diatur sereta mega ngira mega pemesai guna genap pemegai taruh tu.

Glosari:

tisir ari sekula – school dropout