Teknik, langkahrapat ngajar semitan nyeliah nembiak leju belajar

 

Pengawa Opis Menteri Pelajar (KPM) bejalaika program sepemanjai maya lebuh ngiring proses bejadika nembiak bansa jemah ila udah dipejalaika nengah DidikTV KPM ti ditabur ba ntv7. Tu sebengkah pekara ti patut diberi puji. Inisiatif baka tu ulih  nimbang pelajar ti pukul rata ungkup semua nembiak ba menua tu enda milih bansa, pengarap, menua enggau tikas sosial.

Aku agi ingatka maya sekula menya, urung taun 1970-an. Besekula ba tikas sekula primari, bisi taga pengawa dalam sistem taga jam sekula, iya nya program Radio Pendidikan. Naka ga pengagit bala kami sekelas maya minggu ti alai kami diasuh mendingka audio ari slot Radio Pendidikan. Kebuah pia, laban tiap-tiap iti  sekula maya nya suba semina bisi sebuah radio ke nyadika juluk ati genap iku nembiak. Maya nya bedau bisi televisyen di Sarawak. Televisyen berengkah datai ke menua Sarawak dalam taun 1974.

Naka pengaga ati lebuh ulih mendingka slot Radio Pendidikan maya nya taja pan semina mendingka radio. Maya nya, pengajar ngasuh bala kami nulis semua pekara ti bisi didinga kami taja pan isi ke didinga kami nya bisi maya iya enda sama enggau turai pelajar tauka bebida enggau isi pelajar ti benung kami belajar. Tang nya ukai nyadika penanggul kami mendingka program nya.

Lantang bendar ati laban ulih nitih Radio Pendidikan. Nya ke ngujungka bala kami sebuat  meri fokus ngagai pekara ba program nya enggau penuh ati kami. Pengerindu belajar tauka nitihka nama-nama aja utai ti dikenataika pengajar meri empas ti lama tauka iya kiraka lama agi disimpan dalam pengingat siku-siku nembiak. Pemujur nembiak nengkua penemu bepanggai bendar ba kreativiti pengajar ngenataika penemu enggau pengelandik.

KPM nemu sereta mereti bendar ke pengawa pengajar ngajar enggau belajar (PdP) chara fizikal enggau medium bukai tauka belajar nengah mayuh leman chara. Tu patut nyadika budaya belajar ti semitan sereta nyadika praktis kemaya hari.

Berengkah ari 1 March tu, sesi besekula deka dibuka berenggat-renggat. Taja pan penusah pandemik COVID-19 bedau tentu temu maya pukas, KPM tetap ibuhka pemesai reti sesi belajar aktif. Iya patut bendar dipejalaika ngambika nembiak ulih nyapai juluk ati ti holistik.

Chara ngenataika penemu nengah mayuh macham medium tu endang setipak bendar enggau pemansang menua kemaya hari. Pemansang ba bidang teknologi pemadah enggau komunikasyen patut bendar dipegulaika ngambika iya setipak enggau guna belajar chara betungga mua.

Tanggung pengawa pengajar enda lanyan ketegal penatai teknologi pemadah enggau komunikasyen ke dunya pelajar kemaya hari. Nembiak tetap agi ngarapka kreativiti pengajar ngiring ngembing sida dataika mujur.

Nya alai, chara belajar ti semitan nyadi enti nembiak berasai lantang ati lebuh sida belajar. Belajar mungkur tiga aspek ti patut diberi prioriti, iya nya pengajar, nembiak enggau kereban. Lebuh ketiga-tiga aspek tu semampai besangkut paut enggau pangan diri dia belajar deka nyadi semitan agi. Pengawa pengajar ukai semina ngiri penemu ngagai nembiak sida tang lebih ari nya.

Pengajar mesti ulih narit ati nembiak ngagai nama-nama pekara ti deka dikenataika iya. Sida patut enggau naka ulih ngayanka kreativiti ti tinggi agi dikena narit ati sereta ngerinduka ati nembiak ngambika sida majak deka nitih ajar pengajar nya.

Kreativiti tu ukai semina ba batang penemu sesebengkah  mata pelajara, tang pengajar patut nengkua akalchara, langkahrapat enggau teknik ti engkeman enggau pengulih nembiak.

Chara enggau gaya mantaika pekara mega patut meri empas pengelantang lalu narit ati sereta fokus nembiak, nyengkaum ngena elemen gian tauka bungah. Pengajar patut pandai mutar sereta napi situasyen lebuh ngenataika penemu ngambika maya belajar enda ngelejuka sida nembiak.

Nambahka nya, pengajar patut pandai ngena lebas jaku ti mudah diperetika nembiak. Maya tusah diatu, pengajar ke nyadi pemudah chara lebuh ngenataika penemu nya amat digunaka bendar. Chara ngenataika pekara terus ngagai nembiak nya endang diguna bendar laban lebuh bisi pengajar tentu bisi nembiak belajar. Tu ulih ngasilka maya enggau gaya belajar ti amat. Nembiak aus bendar ke penemu ari pengajar. Penatai nembiak enggau batang tubuh tauka chara virtual patut disediaka. Interaksyen dua piak entara pengajar enggau nembiak mesti bisi.

Respons terus ari raban nembiak deka ngenataika gaya belajar ti aktif. Enti pengajar mujur ngasilka gaya belajar ti aktif, dia kereban ngajar nya nyadi medium ti ngenapka proses belajar nya.

Guna kereban ngajar ti engkeman sereta autentik nyadi prioriti enti deka ngasilka pengawa belajar ti semitan. Diatu, kereban ngajar ke seruran dipilih nya baka kereban teknologi pemadah enggau komunikasyen , iya nya software enggau mega aplikasyen bukai ti suah dikena pengajar.

Pengerindu ngena teknologi pemadah enggau komunikasyen tu deka ngasuh sekeda nembiak enggau apai indai berasai kurang pemisi ketegal ke nadai fasiliti enggau akses internet. Nya alai, KPM nguji ngadaka situasen ti setimbang bepelasarka peminta pelajar ungkup semua.

Pengajar mega patut ngingatka diri empu, iya nya kereban ngajar semina medium tauka palan aja dikena ngajar. Utai ti pemadu beguna nya isi tauka batang pekara ti deka dibantaika sida ngagai nembiak. Batang pekara nya patut diperatika pengajar enggau silik ngambika iya ulih nitihka guna sereta engkeman tikas pemereti tauka pengulih nembiak bepelasarka mega kurikulum sekula.

Enti pengajar enda ngira batang pekara nya, tentu sida enda ulih ngajar enggau manah ngagai nembiak sida. Katika kitai semina bepikirka pengawa belajar mesti bepelasarka pemutus peresa tauka tisih ti digaga nembiak? Bah nama penyadi sida nembiak jemah ila? Tuju kitai mesti setipak enggau peneka nembiak, komuniti enggau menua kitai.

KPM udah nyediaka pun ti manah ngagai sekula, pengajar, nembiak enggau apai indai. Nya alai, nyangka pengajar patut mikirka chara bejalaika iya enggau semitan agi ngagai nembiak sida. Pengajar patut narak, ngelatih sereta ngiring nembiak ngambika sida mujur nyapai tuju Filosofi Pelajar Bansa.

Glosari:

Akalchara – approach

Langkahrapat - teknik

Upah enda ngemeranka adat basa ba media sosial

 

MEDIA sosial nyadi sebengkah ari  medium baru dikena ngenataika informasyen lebih iya jampat agi ari selama. Nitihka berita, naka bulan Januari 2020, pengguna aktif laman media sosial ba menua kitai diatu nyau datai 81 persin ari penyampau peranak menua tu empu. Semua informasyen baka berita, gambar enggau video ulih dikunsi ngujungka iya ulih nyadi viral sekejap mata.

Taja pia, lebuh ke kelalu gagit bekunsika informasyen dia bala penguna kadang-kadang enda ingatka adat basa. Lebuh bisi utai dikunsi sida diviral ba media sosial, bisi bala sekeda lalu terus meri komen sebedau mansik pengamat tauka validiti pekara nya. Enti utai ke dikunsi nya enda tentu ngerinduka ati, jaku jai enggau jaku changka enda berasai tepambur ari mulut. Tu tau ngasuh mayuh orang enda bebasaka pangan diri baik nya sama bansa tauka ukai. Empas ari nya tau bendar ngerusakka harmoni dalam komuniti.

Ironi iya, tu mih ke seruran nyadi. Media sosial bebebali nyadi palan alai betelat sereta bechakah enggau pangan diri tauka enggau orang bukai. Sida ke besetuju deka terus nyukung, tang iya ke enda nya deka terus mantah. Katika enda kini semua nemu iya tau mai empas ti negatif ngagai menua kitai? Katika mensia mayuh enda ibuhka pemesai guna nyaga adat basa enggau chara kitai bejaku enggau orang bukai?

Bebasa enggau bemoral tauka decency nya endang pekara ti dikemeranka genap bansa enggau pengarap. Iya mega nyadika sebengkah ari prinsip Rukun Menua. Nitihka Tuai Felo Universiti Kebangsaan Malaysia (UKM), Prof Datuk Dr Teo Kok Seong madahka bebasa nya ulah ke manah, decency tauka bemoral bisi kaul enggau moral individu.

Penteba bebasa enggau bemoral nya beguna amat dikena nentuka kaul mensia mayuh ari pupu raban bansa semampai rapit. Ulah nya patut dikemeranka ngambika nempa disiplin serata moral tinggi lalu tu tau mantu ngayanka komuniti ti harmoni. Tang enti diperatika ari utai ke nyadi kemaya hari, agi mayuh orang enda bepegai ba prinsip kelima Rukun Menua tu.

Dikena nyeliahka penanggul tu ari nyadi besai agi, Suruhanjaya Komunikasi enggau Multimedia (SKMM) patut meratika enggau silik semua informasyen ti enda valid sereta penerang ti enda manah.

Rayat mega patut nyeliahka diri nyadi orang kelalu jai, nempa  spekulasi selebubu ngapa tauka nyadung berita pelesu ti tau ngepunka penyarut nyadi.

Semua penguna media sosial patut ngemeranka  ‘adat basa’ sereta ‘bemoral’ lebuh ngenataika penemu diri sereta lebuh mantaika komen.

Rayat patut belematika Rukun Menua laban iya ukai semina prinsip disebut ba mulut aja, tang begunaka peranak menua tu betati sereta ngemeranka prinsip nya dalam pengidup sida besehari-sehari. Enti penyerakup rayat tegap, ekonomi deka ngerembai kelebih agi maya menua kitai diatu ke benung betapi enggau pandemik COVID-19.

 

Jaku Seletar majak pupus

 

Jaku ti enda dikena mudah deka pupus ari dunya tu pia ku orang ke tebangkar ba bidang lingusitik. Pekara tu bisi dikenataika orang ke anda ba bidang jaku ari Amerika ke benama Micheal Krauss dalam esei iya ke ditulis dalam taun 1991, The world's Languages in crisis. Dalam bup nya, iya madahka 6,000 bansa jaku deka pupus ba abad ke-21 tu lalu 50 persin ari nya nadai agi dikena bala generasyen ke biak tauka sida serak ke dudi bejaku enggau pangan diri.

Nitihka ripot Gerempung Saintifik enggau Budaya  PBB (UNESCO), entara taun 1950 ngagai 2010, sepenyampau 230 jaku ba dunya tu udah pupus. Nitihka pansik sida, tiga ari genap jaku ti dikena di dunya tu, ngundan kurang ari 1,000 iku penguna ngena jaku nya lalu tiap-tiap dua minggu bisi aja jaku lus ketegal orang ke penudi empu jaku nya parai.

Di Malaysia, sesetengah jaku raban minoriti mega deka pupus. Entara jaku nya iya nya iya nya jaku Seletar dikembuan bansa Orang Seletar di Johor. Kenu ku jaku tuai, dikelala bungai ari langgu, dikelala bansa ari jaku, nya rambai jaku dikena ngelalaka sesebengkah bansa. Sigi amat enti kitai meratika jaku Iban enggau jaku Melayu ti udah nyadika jaku bansa. Tang ba sekeda konteks baka kemaya hari tu, rambai jaku nya udah enda engkeman. Ditu aku deka mai kitai meratika kebuah rambai jaku dalam nya udah enda engkeman agi.

Pensyarah Kanan Universiti Malaya, Dr Shamsul Rijal Yahaya bisi bekunsika pansik iya pasal semiotik sosial komuniti Seletar. Iya bisi madahka jaku Seletar diatu nyau majak deka pupus taja pan bansa sida nya agi mayuh diau mendam di Johor. Shamsul Rijal dalam program Bicara Karyawan ti diaturka opis Dewan Bahasa dan Pustaka (DBP) lalu dibantaika terus nengah laman sosial DBP berat-rat madahka, jaku Seletar nya betapi enggau penusah deka pupus enti dibanding enggau jaku komuniti Orang Asli ke bukai. Kebuah pia, nunda ku iya, laban kurang dikena bansa sida Seletar.

Penyampau tubuh nadai kaul enggau jaku tu ti majak pupus. Tanda-tanda jaku Orang Seletar nya berengkah deka pupus lebuh sida empu enda agi bejaku ngena jaku nya enggau pangan diri. Bepelasarka pansik Dr. Shamsul kenyau ari taun 2004 ngagai taun 2013, madahka jaku Seletar nya semina dikena sida raban ke tuai aja lalu sida ke nembiak redak bejaku ngena jaku Melayu. Enti ba diri sebilik, semina apai indai aja bejaku ngena jaku Seletar. Tu mih kelai jaku nya nyau deka pupus. Naka kediatu nadai mayuh pansik bisi digaga pasal Orang bansa Seletar taja pan sida nya bisi  unik mimit bebanding enggau raban orang Asli bukai di Malaysia.

Ari sukut sosio budaya, raban etnik Seletar semina bisi ditemu diau di Johor lalu leka jaku  Seletar nya empu pan dipelabaka asal ari leka jaku Selat ke madahka sida nya diau ba endur ti dikumbai Selat Melaka.

Sida diau ba pantai barat enggau selatan Johor. Orang Kuala tauka Orang Duano diau di pantai barat Johor iya nya di Batu Pahat (Kuala Rengit, Kuala Sanggerang dan Tanjung Segenting) enggau ba Pontian (Kuala Benut, Kuala Sungai Pontian enggau Kukup) tang Orang Seletar diau ba pantai selatan Johor iya nya Masai, Johor Bahru, Gelang Patah Pasir, Gudang enggau Tebrau.

Naka kediatu tu nitihka data rasmi ari Opis Pengintu Pengelantang Pendiau Orang Asli (JHEOA) ngerikodka penyampau Orang Seletar nya kira-kira 1407 iku. Raban komuniti tu dipasuk dalam raban Orang Laut lalu Orang Laut nya dibagi ngagai  Orang Kuala enggau Orang Seletar.

Orang Seletar tu ngembuan pengelebih ti nyelai ari orang bukai. Kelimpah ari nyadi pelayar ti landik sida mega ulih nyelam lebih ari lima minit nadai ngena nama-nama pekakas dikena enseput. Sida mega landik ngiga lubuk ti bisi mayuh ikan tauka dalam jaku sida  disebut 'lebog'. Pengawa tu endang pengawa ti dititi temali ari aki ini sida kelia.

Pansik ti digaga Shamsul Rijal senentang komuniti Seletar tu dikena iya ngulih degree ba tikas doktor filosofi. Pansik tu digaga lama ari selama ketegal peminta ari proses pansik nya empu ti mayuh sereta tusah kelebih agi maya ke diberengkah. Kebuah pia, komuniti Seletar tu ukai bansa ke mudah dirapatka orang bansa bukai. Tukang pansik enda ulih enda bisi inisiatif mimit ngena baju ti sama genap kali iya datai mansik sida dikena nentuka iya empu nyamai agi dikelala raban responden pansik. Sida bansa Seletar tu ukai bansa ke lawa. Sida tu bansa ke pemalu. Nya kebuah iya begunaka enam bulan keterubah dikena iya ngerapitka kaul diri enggau Orang Seletar tu. Lebuh sida udah pechaya ngagai iya nya baru sida berengkah rapat enggau iya lalu besedia dikerandauka.

Sebengkah agi utai ke unik pasal sejarah Orang Seletar ke nyeritaka sida nya dikumbai Orang Laut iya nya pengawa sida ke nirika ruang bilik bejadi melaki bini ba  perau ti betajukka kajang. Sida semina berengkah pindah ke darat dalam taun 1974. Pemindah sida ke darat bepun ari peminta Sultan Johor maya nya. Iya mega lalu meri sida tanah endur sida diau berumah iya nya ba kandang Danga Bay. Kemaya hari tu bisi semilan buah genturung pendiau Orang Seletar lalu iya ti pengabis jauh iya nya Kampung Kong Kong.

Nya alai, semua aktiviti pengidup sida sebedau pindah ke darat semina dalam perahu. Nya kebuah, dalam sistem jaku sida nadai leka jaku ti bekaul enggau leka jaku rumah tang sida bisi leka jaku ti dikumbai sida 'dok'. Enti kitai nanya rumah, sida lalu nyebut dok. Dinding pan disebut sida dok. Tu siti ari evidens ke madah sida nya asal iya Orang Laut.

Maya jeman kolonial, Orang Seletar mega ampit enggau ngelaban Belanda ke maya nya bekuasa penuh ba menua Indonesia. Pengelandik sida nyelam lama ngujungka sida ulih ngerusakka kapal Belanda.

Sebengkah agi penyelai bansa sida tu iya nya lebuh begulai enggau diri sama diri dalam komuniti Seletar sida endang bejaku ngena jaku Seletar tang lebuh bisi pengerami perintah sida pan automatik bejaku dalam jaku Melayu. Pekara tu endang iya narit ati kitai nama agi  laban bisi sekeda ari kitai deka agi bejaku ngena jaku bansa bukai lebuh baum tauka maya pengawa perintah.

INFO

Lima tikas pemupus jaku nitihka UNESCO

Vulnerable – Agi bisi nembiak bejaku ngena jaku nya tang semina ba sekeda endur aja baka ba kandang rumah aja.

Definitely endangered – Bala nembiak nadai agi belajarka jaku apai indai sida di rumah.

Severely endangered – Jaku nya dikena bala aki ini enggau orang tuai, generasyen lama aja lalu sida ke generasyen baru (apai indai) semina meretika jaku nya tang enda nemu ngena jaku nya lebuh berandau enggau bala anak sida.

Critically endangered – Semina dikena sida raban ke tuai aja berandau enggau pangan diri tang jaku sida enda betelipi sereta enda lanchar.

Extinct – Nadai agi orang bejaku ngena jaku nya.

Napi limpah informasyen

 

RAMBAI JAKU information overload keterubah iya dikena saintis sosial, Profesor Bertam Gross dalam bup iya, The Managing of Organizations maya taun 1964. Bertam Gross parai dalam taun 1997. Iya kala gawa nyadi profesor sains politik di Hunter College. Udah nya information overload dipopularka Alvin Toffler dalam bup iya ke laku amat dijual, iya nya Future Shock (1970).

Taja pia reti information overload dalam konteks bup Bertam enda sebaka enggau reti iya ke dikena maya digital kemaya hari tu. Information overload tauka limpah informasyen kemaya hari tu udah nyadi siti penanggul besai sereta begunaka langkah rapat ngatur, mereti enggau ngembuan disiplin ti tinggi dikena napi fenomena ke datai maya era digital kemaya hari tu.

Tu ke bendar entara virus ti patut diputar ngena pengelandik lebuh kitai nyingkang ngagai era baru globalisasyen. Kebuah pia, globalisasyen nya empu mai reti dunya ti nadai garis entara menua lebuh mensia ba serata dunya berandau enggau pangan diri nengah arus Internet. Tu ke nyadika pun penambah laman sesawang ke nyadi kebuah penerang nya regas amat disadung kin kitu.

Alun penatai penerang tu ditengkebang nyadi sebengkah pengidup sosial ti baru. Dunya nyau baka ke sempit lalu informasyen tauka penerang betekang baka mua hari ke ngiga dengah iya. Pengawa ke kelalu gagitka teknologi sereta disempulang enggau penemu sosial ti tinggi nya tau nyadi pangkup ngagai kitai semua. Teknologi mega bisi pengurang enti iya enda digaga baka  ‘mensia’ ulih mensia nya empu.

Teknologi ti dikena  ke enda ngira aspek mensia tau bendar muka ruang ngagai informasyen ti enda nemban sereta enda amat tau mega dikumbai penerang selebebu ngapa. Informasyen endang beguna laban ngena informasyen nya mih kitai ulih megai dunya. Mensia ke bisi informasyen ulih nengkua sereta bekuasa ke atas orang bukai.

Ketegal nya mih dunya nyau majak mit laban teknologi mega nyau majak sophisticated kelebih agi lebuh informasyen nya nyau laju ari peluru leka bangkang, pantas ari upas kesulai tandang; pengelaju enggau penyampat ke enda ulih dirundingka akal mensia sebedau tu. Ambika chunto, baka utai ke nyadi ba New York diatu deka datai terus ke jari kitai maya nya mega ba menua bukai ke jauh beribu batu ari New York.

Profesor sosiologi di Universiti Kent, United Kingdom, Frank Furedi nyemaka limpah informasyen nya baka bah ti ulih nenggelamka kitai dalam alun umbak data. Kebuah pia laban limpah informasyen ngenyadi seraka entara informasyen dipereti ti ngasuh kitai bepikir ngambika kitai meretika agi pekara nya.

Ketegal kelalu mayuh informasyen ti datai ngagai kitai nengah pekakas elektronik kelebih agi baka telefon pintar tau ngasuh kitai puntan ngatur sereta napis enggau mudah ngujungka kitai diparit pemedis limpah informasyen ke dikumbai Frank Fureli nya baka bah. Analogi iya mudah, kitai begunaka ai lalu ukai bah.

Enti kitai dipangkup limpah infomasyen dia kitai tau pulai nyadi orang ke nadai utai temu. Kebuah pia, laban kitai enda mujur ngumpul sereta mantis penerang ti patut diguna ke datai ari endur ti nadai autoriti.

Media sosial baka Facebook, Twitter, e-mel enggau Instagram nyadi pelantar  ngundan sereta mai mayuh macham informasyen ngagai kitai. Enti kitai nadai ngembuan disiplin ti kering sereta penemu ti chukup senentang limpah informasyen dia kitai tentu nyadi dengah limpah informasyen sosial tauka social information overload.

Nitihka siti pansik ke dipejalaika McKinsey Global Institute dalam taun 2017 madahka  28% ari maya bekereja diabiska enggau pengawa meresa e-mel. Nama penyadi enti kitai enda ulih ngatur penerang tu lalu iya nyau majak nyadi senyadi? Enti diperatika ari sukut bukai, enti kitai enda mujur ngatur limpah informasyen tu enggau manah, iya deka meri empas ngagai penyampat enggau penemban kitai ngaga sesebengkah pemutus penemu. Reti nya fenomena baka tu tau ngasuh kitai minah lebuh ngaga pemutus runding laban dirempah penerang sereta balat bepanggai ba informasyen ke mayuh leman.  

Nya alai kita enda ulih enda nyingkang ke mua napi sebarang fenomena limpah informasyen ti baka tu. Bisi sekeda tips ti tau nyadika lalau kitai lebuh betapi enggau pekara tu. Keterubah, tapis sereta tentuka penatai informasyen nya. Enti enda berapa manah kiraka tau dilengka pia aja.  

Kedua, sekat informasyen ti tama ke pekakas kitai empu  baka telefon pintar. Ketiga, tentuka kitai ke bekuasa ke atas infomasyen nya ukai iya ke megai kitai. Ananag ngasuh kitai empu tubuh nyadi ulun ngagai informasyen nya. Pechaya mih, ba luar din besun-sun manipulator, konspirator tauka scammer ke benung ngiga dengah iya. Nya alai, anang enda besedia napi limpah informasyen. Nya maya hari betutus maya mega maya hari bebini, tutus gerai bini mati. Arapka kitai enda baka sempama tu.