Idea ti genap negapka karang

 

Bahasa Iban nya mata pelajar ti bisi diperesa ba tikas Sijil Pelajaran Malaysia (SPM). Iya nguji nembiak dalam pengelandik macha enggau nulis dalam jaku Iban. Dalam genap peresa tentu bisi nembiak enda mujur, pas sereta bulih pemutus ti lati. Baka nya mega ba keretas Bahasa Iban tu.

Taja pan mayuh orang ngumbai bagi tanya sentang nulis karang dalam mata pelajar jaku Iban nya mudah dikuasa nyamai ditengkua tang agi mayuh ari calon SPM enda mujur tulihka mark ti tinggi.

Tiap-tiap iku individu nembiak ulih nguasa chara nulis karang ti bekualiti enti iya ulih nerangka jaku kunchi dalam tanya ti diberika maya peresa. Nya sebagi ari pekara ti patut ditemu enti deka ngulihka mark tinggi genap kali nulis.

Ke bendar nadai formula ti nyemetak alai bala nembiak ngulihka mark ti tinggi dalam karang. Sida enda ulih ngarapka pengasih ari raban pemeresa nulung sida meri mark ti tinggi. Meri mark ti tinggi ngagai karang ti jelan pemanah enda rentang ngagai nembiak ti bebendar nulis sereta ngayanka chara nulis ti lati. Nembiak mega enda patut semina ngarapka pengasih ari orang tang patut ngayanka pengulih diri ti tulin.

Idea ti chukup genap sereta mandangka penuai runding nya sebengkah pekara ti beguna lebuh nulis karang. Nya mih kebuah nembiak patut ngenataika idea ti genap sereta ngayanka penemuai runding dalam karang sida. Nembiak patut nemu sereta meretika baka ni ngenataika idea sida sentang sesebengkah tanya dalam karang ngambika ulih nulis enggau manah sereta bekualiti.

Enti deka ngulihka karang ti betikas tinggi sereta ba tikas A+, sida patut bagas macha mayuh macham kereban bacha lalu kereban bacha ti dipilih nya mesti bisi kaul enggau pekara ti ditulis. Nembiak ulih macha mayuh macham kereban bacha baka majalah Pegari, surat berita ungkup jaku Iban, Dewan Siswa enggau Dewan Masyarakat dikena ngenegapka karang sida.

Karang dalam mata pelajar jaku Iban sebaka enggau karang dalam keretas jaku bukai. Tanya karang dalam jaku Iban mega ngembuan elemen pengelandik bepikir tikas tinggi (PBTT). Iya bansa tanya ti minta nembiak ngenataika mayuh leman runding sentang sesebengkah isu. Ambika chunto, bisi tanya ti minta nembiak meri penemu diri ari aspek komuniti tauka menua. Nembiak ti bepikir tikas tinggi deka mantaika idea bukai ari iya ti dibacha tauka ari sukut logik lalu ukai semina nyaut sentang pugu pekara aja.

Ari asil karang ti baka nya ngayanka chara tikas nembiak nya ulih bepikir maya pengawa ngajar enggau belajar. Ari nya mega ulih diperatika pengulih pengajar meri input ngagai sida.

Chunto karang ti manah nya karang ti ngembuan isi ke chukup, bisi kerembai isi sereta bisi elemen jaku tuai tauka jaku sempama, jaku penanda kaul penemu enggau guna jalai jaku ti betul.

Bebachaka surat berita enggau kereban sanding ari Internet mega nyaup nembiak ngulihka penerang ti bisi kaul enggau ramu jaku (topik) ti deka ditulis dalam karang. Kelimpah ari nya, iya mega nambah mayuh leman isi dalam sesebengkah karang nya.

Nya alai, enti deka bulih mark ti lati ba pengawa nulis karang, nembiak enda ulih enda ngemeran sereta ngerejaka pekara ti udah dikenataika di atas tadi. 90 persin ari pemujur nya datai datai ari kitai empu.

Fakta

 

Dalam jaku English, ‘karang’ enggau ‘esei’ sama tau besilih guna sereta sama bela tau ngenyukupka penemu pangan diri. Karang nya empu suah dikaitka enggau leka jaku English ‘composition’ ti mai reti ‘... the art of composing, putting together and arranging e.g. a piece of writing of music’ (The Advanced Learner’s Dictionary of Current English, 1995).

 

Sesebengkah esei nya mega sebengkah karang ke dikumbai karang pandak lalu ditulis dalam tukuh prosa. Iya ngembuan reti ke bejuraika sesebengkah pekara, ngenataika penemu tauka ngumbuk orang besetuju enggau sesebengkah tesis ti dibantaika senentang sesebengkah pekara. Sesebengkah esei mantaika penerang tauka topik iya enggau chara ti ukai teknikal lalu suah agi ngena anekdot, ilustrasyen enggau humor dikena nyukung pekara ti dikenataika nya. (M.H.Abrams, 1981:55).

 

Ari semua penerang di atas, kitai ulih nyimpulka penemu madahka karang ti manah nya karang ti ulih meransang pemacha macha ari pun sampai ke pengujung karang. Nya kebuah, lebuh nulis karang bisi empat pugu penteba ti patut bisi ba sebengkah karang ke nyengkaum fakta, chara nulis, gaya enggau lebas lalu kepenudi nya jalai jaku. Kesekali tu aku deka ngenang pasal fakta enggau penemu diri; iya nya penteba dalam sebuah karang.

 

Fakta nya datai ari jaku Latin: factus. Reti leka jaku fakta nya semua utai ke ditangkap indra mensia tauka data senentang pekara ti nyata nyadi lalu udah nyadi evidens ti terang (Wikipedia bahasa Indonesia). Pengawa ke ngumpul fakta nya ke dikumbai data. Fakta mega suah diarapka mensia mayuh senentang hal ti amat, sekalika nya ketegal sida udah kala napi hal nya ari semak, chara terus tauka ketegal sida dianggap udah nyeritaka baru peneleba orang bukai ti amat nyadi.

 

Dalam terminologi pelajar, fakta nya siti pekara asil ari ti dibelematika ari sesebengkah sukut ti objektif lalu sapa-sapa ulih ngaga verifikasyen senentang pekara nya. Nya kebuah dalam bidang pelajar, fakta seruran dikaitka enggau sesebengkah asil ti dibelemati chara amat-amat sereta diaku semua orang.  Fakta mega sebengkah pekara ti suah dibelemati chara betandu. Bisi penyanding ti standard deka mebang fakta.

 

A fact is something that has really occurred or is actually the case. The usual test for a statement of fact is verifiability—that is, whether it can be demonstrated to correspond to experience. Standard reference works are often used to check facts. Scientific facts are verified by repeatable careful observation or measurement (by experiments or other means). https://en.wikipedia.org/wiki/Fact

Dalam jaku mudah, fakta nya pekara tauka utai ti amat nyadi, ulih dipeda sereta bisi tanda tauka kelai.

 

Bisi dua leman fakta iya nya fakta rama enggau fakta spesifik tauka fakta ukai rama. Fakta rama nya pengamat ti udah diterima mensia mayuh sepa jaga tauka sepemanjai jeman ari kelia datai ke sehari tu; ambika banding mensia mayuh udah nerima fakta ti madahka matahari nya tenggelam di barat lalu  tumbuh angkat ari sepiak timur.  Fakta spesifik nya pengamat ti nyadi ba sesebengkah maya. Ambika banding, Badun macha bup, Gerempung Malaysia ditumbuh dalam taun 1963.

 

Ari bansa fakta diatu kitai meratika penteba fakta. Bisi beberapa penteba ayat fakta baka ti dirintaika di baruh tu;

 

• Ulih dibuktika pengamat.
• Ngembuan data ti nemban baka haribulan, endur, maya pekara nya nyadi.
• Ngembuan pun penatai berita ti ulih diarapka.
• Betukuh objektif ( ukai utai ti ditempa) ti disikap enggau data baka penerang tauka angka ti ngayanka pekara ti nyadi.
• Udah diterima pengamat pekara nya.
• Ulih nyaut sekeda tanya ti bepun enggau jaku tanya: nama, sapa, kemaya, berapa penyampau  sereta bisi saut ti betul.
• Ngayanka pekara ti udah nyadi.
• Penerang.
• Informasyen ari pekara ti amat nyadi.
• Ayat fakta nya ayat ti ngenuluka fakta nyata enggau asil ti ditemu. Iya suah digumpul ari mayuh pun penatai lalu nyadika penguat kelikuh, ambika banding, “bepelasarka tulis Leornado Da Vinci ...” munyi ku Shakespeare...”, “nitihka pansik ti dipejalaika BSI...” etb.
• Ayat fakta nya utai ti udah nyadi sereta disempulang enggau maya pekara nya nyadi. Ambika banding, “penusah angus ti bisi nyadi ba tanah Sungai Paon kemari bisi ngujungka 8 iku orang bebadi”. 

 

Di atas nya tadi rintai penteba ayat fakta. Tu nya rintai chunto ayat fakta.

 

1	Peranak menua Sarawak nya tebal agi bepengarap kristian
2	Tunku Abdul Rahman nya menteri besai keterubah Malaysia
3	Kuching indu nengeri menua Sarawak
4	Matahari tenggelam di barat lalu tumbuh angkat di timur
5	1 jam sama enggau 60 minit
6	Gunung Merapi udah pechah lebih ari sekali
7	Indonesia nya menua ti mayuh pulau

 

Simpul Penemu

Fakta nya dikemeratka penulis lebuh nulis karang betukuh formal laban iya nyadika penyanding penemu dikena penulis nyukung pekara ti ditulis.

Kaul Pascamoden enggau Budaya sereta Seni Mensia Mayuh Kemaya hari tu

 

Tiap-tiap jeman bisi ngembuan penanggul iya empu. Iya enda ulih lari ari falsafah abad ke 20 ti udah ditempa pengerenjan daya bepikir. Pekara tu nyadi enti diperatika ari reaksyen ngagai bidang nya ba abad ke sebedau tu.

Bisi beberapa kelai ti ngasuh bala raban pemikir abad ke diatu ngaga simpul penemu sida senentang sistem filosofi ti udah diungkupka jeman tu. Simpul penemu sida nyengkaum krisis tikas peninggi sereta pemanah mensia sepengudah Perang Dunia I enggau II, penanggul ekonomi enggau penatai teknologi tinggi arus informasyen. Simpul penemu raban filosofi bepelasarka hal baka fenomenologi, positivisme-logik, vitalisme, ekstensialisme, filosofi analitik, pragmatisme enggau ke baru nya pascamodenisme.

Jean-Francois Lyotard, siku ari pemikir sereta raban filosofi Peranchis kala nulis bup ti dikumbai “The Post Modern Condition: A Report of Knowledge (1979)”. Nitihka penemu Jean, iya enda besetuju enggau atur pemikir modenisme iya nya jeman sepengudah Renaissance dataika pun abad ke 20. Ku iya, abad maya nya dikelaika enggau pemansang teknologi pemadah lalu amat relevan(ngena) enggau realiti(sengala) kemaya hari tu tauka realiti kontemporari.

Mayuh orang enda ngasaika era moden tu jauh tinggal enti diperatika ari sukut pemansang. Jeman tu berubah lebuh mensia mayuh tebal agi ngemeratka pengidup sosial enggau ekonomi. Nya alai sida tau dikumbai mensia pascaindustri iya nya mensia ti balat begunaka barang sereta bepakaika pemakai (konsumerisme).

Ba abad kediatu mega  kitai ulih meda penatai masyarakat media, kapitalisme multinasional enggau mayuh macham teknologi informatik ti baru sereta ti bisi kaul enggau komunikasyen.

Pengkritik pascamoden Amerika, Fredrick Jamerson dalam bup iya “Postmodernism: On the Cultural Logic of Late Capitalism (1984)” madahka pekara ti berubah tu ngenataika tukuh format baru dalam daya idup (budaya) enggau seni masyarakat.

Leka jaku tauka istilah pascamodenisme disebut enggau terang dalam bup Rudolf Pannwitz, “The Crisis of European Culture (1947)” ti nyaraka penemu senentang tukuh khas modeniti ti nyereminka pemenang ngagai pengachau ti nyadi.

Leka jaku ti sama mega dikena Arnold Tonybee dalam karang kedut iya “A Study of History (1947)”. Nitihka Arnold, reti pascamoden nya nerangka reti jeman politik ti berubah ari bepikir belalauka menua ngagai runding chara interaksyen global.

Penulis sereta tukang kritik sastera menua Amerika baka Irving Howe dalam esei iya “Mass Society and Postmodern Fiction (1959)” ngena leka jaku ti sama dikena midaka teks pascamoden enggau sastera agung moden.

Nya alai, pascamoden ukai nandaka peninggi daya idup baru sepengudah era moden tang iya nandaka daya idup ti deka tusur dudi hari ila.

Ba bidang litericha, arus pascamoden deka ngerapitka kaul entara daya idup ti tinggi enggau daya idup ti popular lalu ngemunaska bida di entara kedua-dua bengkah pekara nya.

Penulis pascamoden dikumbai penulis ke ulih nengkua mayuh bidang sereta teleba enggau realiti teknologi. Sida udah besedia matau mayuh bengkah mitos sereta dimensyen erotika.

Empas ari penatai pascamoden ulih dipeda ari penatai raban feminisme sereta enggau peminta tauka hak ti pukul rata enda ngira lelaki tauka indu.

Karya-karya  baka “The Second Sex (Simone De Beauvoir), Sexual Politics (Kate Millet), Feminine Mystic (Betty Frieden), The Mermaid & Minotour (Dorothy Dimerstein) nya sekeda ari karang ti bisi besaraka penemu pasal feminisme enggau hal ti nadai bebagi-mida antara indu enggau lelaki. Pengawa tu majak nyadi di menua Eropah asil pascamoden. Kelimpah ari nya mayuh agi karya ti mandangka peminta ti sama.

Dalam hal ti bekaul senentang pekara seni, daya idup enggau bansa kitai mar amat dipejuraika ketegal empas pascamoden. Tang kitai kemaya hari tu nyau nyadi barang konsumer ti dipedagang nengah arus hedonisme televisyen enggau media.

Tanda tauka evidens tu ulih diperatika ari program ti kenataika di kacha televisyen lalu kitai mayuh nyau enda nyereda nyadi orang ti ngeluluka cherita nya.

Adat basa sereta harmoni bepengidup ulih nyeliah pemenchi

 

Ku orang, adat basa enggau ulah enda ulih dijual beli. Nya sesebengkah utai ti patut dipuji sereta tumbuh ari ati genap iku kitai mensia. Indah, dalam jeman siber kemaya hari tu, adat basa ukai semuti ditemu kitai nengah chara kitai bejaku tang mega chara kita nulis dalam media sosial tauka suah agi disebut dalam jaku Iban nya media rama. Media rama nya nyengkaum Face Book, Instagram, WhatsApp enggau ke bukai.

Perangai kitai lebuh berinteraksyen sereta bekomunikasyen nyata bendar ngayanka imej kitai empu. Bisi maya kitai nadai pedulika geragayak ati orang bukai lebuh kitai bekomunikasyen, enda ngira  maya betunga mua tauka ba media rama. Jaku ti dipansutka kitai udu enda bepampul munyi ku jaku tuai udu chebur-chebur bejaku.

Nambahka nya mega, kitai jarang beterima kasih ngagai orang ke ngelingi kitai baka apai indai, anak-anak, tawing ke sama enggau gawa, sida ke berimbai pendiau enggau kitai tauka bala pekereja ari baruh kitai. Chara kitai ngenataika mesej bisi maya nya ngayanka ego tauka penyumbung kitai lalu tau ngasuh orang nyida lebuh nerima sereta macha mesej, kelebih agi lebuh ngena media rama dalam dunya ti nadai aris entara menua diatu.

Lebuh komunikasyen ke enda tentu manah tu nyadi iya tau ngasuh pangan diri  salah meretika jaku tauka ulah kitai nya. Suah bendar kitai ngambat penemu orang bukai lebuh meri komen ba media rama. Tu ke tau ngeruhka kaul entara mensia. Kiraka ukai pekara ti nyelai enti bisi sekeda orang berasai pedis ati lalu besarang dalam runding sida pekara ti negatif. Kemaya hari tu mensia mayuh chebur mulut iya nya udu changka bejaku. Sida mega udu betampungka berita ti enda menuku tauka selebebu ngapa.

Nya alai, kitai patut bendar diperangsang ngemeratka kaul ti manah enggau orang ti bekelingi enggau kitai sekalika sida nya tawing ke sama enggau kitai gawa, sida ke berimbai pendiau di gerija tauka ba genturung pendiau enggau kitai tauka sida ke semampai bisi kaul pengawa enggau kitai ninting hari. Kebuah pia, ngambika rampa endur bekereja, sembiang, belajar tauka tempat alai diau kitai harmonis sereta cherira agi.

Taja pia, utai ti ngenyinuka ati kitai kemaya hari tu iya nya hal kitai ke majak kurang berinteraksyen chara betunga mua enggau pangan diri. Kitai rindu agi ngena media rama nyadika kereban dikena kitai berinteraksyen taja pan iya suah agi nerenak asai ati ti benchi sereta bejaika pangan diri. Utai ti selalu dipeda nya bala mensia mayuh berani agi ngenataika asai ati sida ba media rama. Sida berani agi meri komen lalu suah agi komen ti negatif sereta jaku sindir.

Sida tu rindu agi ‘bejaku’ dalam media rama, nganjung mayuh leman notis, nengah media sosial lalu enda agi ngena chara selama baka ke betemu mua lebuh deka madahka sesebengkah pekara. Notis tauka nama-nama informasyen ti deka dikenataika mudah agi dikenataika enggau chara merubuhka semua pekara nya sekali nengah media rama. Tu kadang-kadang tau ngujungka berita ti deka dikenataika nya suah agi enggau chara ti enda beradat sereta bebasa.

Jaku enggau gaya nulis chara robot ti enda ngiraka asai ati pangan diri majak nyadika chara bejaku ti standard nengah media rama. Adab enggau ukur pemanah lebuh bejaku enggau berinteraksyen terus pupus sereta retai ketegal segang pemansang jeman moden. Kemaya hari tu bala netizen udah nadai agi bekenaka jaku betapis sereta puitis, tang jaku tauka komen ti kasar sereta jaku ti tau nganu orang mayuh. Nya ke suah agi ayan ba media rama.

Kemaya hari tu mensia mayuh udah kelalu kurang bejuraika sesebengkah nengah jalai betunga mua baka kitai ke berandau ruai di rumah panjai. Mayuh orang ngumbai bejurai nengah jalai bejurai sereta betunga mua nya chara renggat sida niang Begiling kelia; reti chara ti udah bendar ngejang ari ubah pemansang dunya kemaya hari tu. Komuniti kemaya hari tu lantang agi ngena chara mudah bekomunikasyen. Sida nadai nemu diri sida udah muai ke tisi sebengkah adat enggau rukun pendiau ti manah dalam kaul entara pangan diri.

Nengah media rama mega, mesej ti deka dikenataika nya kadang-kadang tau ngasuh orang bukai salah pereti. Taja pia enti ulih duduk betunga mua sereta berandau ari ati ke ati, iya nyamai agi dikena ngenataika mesej ke bisi maya nya enda ulih diterima orang bukai. Mayuh orang ngiarka tisi elemen adat enggau basa lebuh bisi pengawa enggau orang ke ngelingi sida. Sida nganggap orang ke ngelingi sida nya semua baka robot ti nadai ngembuan ati enggau emosyen.

Adat basa enggau jaku basa ke bendar nya ulih nempa orang nyadi mensia ti menuku laban nengah jaku ti manah sereta komunikasyen maya betunga mua, dia mayuh pekara ulih diputarka enggau manah lalu ngeledaka sekeda raban mensia senentang pengilap tauka sesebengkah pekara ti iya empu mega enda nemu nya pun ujung.

Enti diperatika ari sukut rama, dia adat basa sereta ukur pemanah tu bisi kaul entara mensia enggau Petara, kelimpah ari kaul entara  sama mensia lalu pia mega kaul iya enggau rampa menua. Ulah ti manah nengah adat basa ulih ngasuh pengidup kitai harmoni sereta nyeliahka pemenchi sereta ngelantangka rampa dunya kitai semua.

Budaya Iban ti dipeturunka ari aki ini kelia endang semampai ngemeratka rukun pendiau ti bebasaka pangan diri lebuh bekomunikasyen sereta bejaku enda ngira nya maya betunga mua tauka nengah media rama. Nambahka nya, komunikasyen ti manah ulih nempa pengidup mensia ti kurang nerima stres lalu semampai berasai lantang.

Ketegal nya, udah chukup maya kitai mulaika diri ngagai chara selama ti ngemeranka adat basa sereta nukuh komunikasyen ti ngena chara betunga mua. Pengawa berandau sereta bejurai enggau manah ulih ngurangka asai ati mensia ti ego ke seruran deka nyadi hero media rama lalu lebuh nyadi bos ti megai orang ngena chara kuku besi sereta enda bebasaka orang ke ari baruh iya.

Enti diperatika ari sukut rama mega, semua mensia nya sama. Kitai tu semua sama enda ngira bansa, pengarap enggau status pengidup kitai. Ba pengujung pengidup kitai mega sama. Kitai ukai mai pangkat enggau status pengidup kitai ke dalam pendam tang semua kitai tu deka nyadika pun pemakai ulat. Kitai semina mai bekau pengawa ti udah digaga kitai sepemanjai idup kitai maya kitai betunga mua enggau Petara.

Nya alai kepenudi iya kitai semua endang patut ngurangka ego tauka penyumbung lalu ngemeranka adat basa lebuh berinteraksyen enggau orang bukai. Nadai rugi kitai manah enggau orang bukai ngena chara ngemeranka ajar manah laban pengelantang idup ngasuh kitai idup harmoni munyi ku jaku tuai; anchur tubuh diperakaka urat, budi manah meruan dikeingat.