Jaku Iban patut dikena dalam semua pengawa

Raban bansa Dayak di menua tu kelebih agi bansa Iban patut temegah ati bejaku ngena jaku diri empu dalam semua pengawa ke dikereja sida ninting hari. Enggau chara nya jaku Iban ulih angkat mansang baka jaku Mandrin enggau Tamil.

 

Nambahka nya mega nengah chara tu kitai ulih ngenanka jaku Iban ari ke lenyau ngapa enda diguna baka sekeda jaku bansa bukai ke nadai agi diguna kelebih agi ba bala nembiak rebak baru diatu. Dalam dunya nitihka pansik bisi 7,000 bansa jaku. Pansik ari UNESCO madahka lebih ari setengan deka pupus ari dunya tu ila. Siti ari chunto jaku nya bisi di Malaysia iya nya jaku Jedek. Rayat Malaysia enggau sida ke tebangkar pasal jaku di Malaysia enda nemu bisi jaku bansa Jedek semadi ditemu sereta dipadah pemansik ari Sweden. Jaku bansa Jedek tu nitihka pemansik ari Sweden madahka diguna ba sebuah genturung pendiau di Kelantan. Jaku Jedek tu kurang lebih munyi jaku Jahai. Sida nganganggarka bisi 280 iku aja orang ke bejaku jaku tu.  

 

Nya alai, jaku Iban deka lenyau enti kita enda berani nguna tauka malu bejaku ngena jaku diri empu nya. Tambah mega, raban bansa Iban ke diau di nengeri tu tau lenyau adat ke dikembuan kenyau ari aki ini kitai kelia. Nya alai, bala Iban empu patut meransang sida ke bansa diri enda malu nguna jaku bansa diri empu laban jaku Iban chukup mayuh guna ngagai kitai Dayak kelebih agi ngagai Dayak Iban. Diatu kitai ulih meda ba You Tube, bansa bukai di Semenanjung baka bansa Melayu pan nemu belagu lagu Iban, nama agi enti sida tu diajar jaku Iban nyangka iya mega tau ngerembai enggau regas agi.

 

Kelimpah ari nya,  tuai-tuai Iban patut regas mega meransang raban bansa diri ke ngembuan pelajar tinggi sama beserakup ngangkat sereta ngemansangka jaku Iban awakka ulih mansang baka jaku bansa bukai lalu diguna ba tikas ke lebih tinggi. Naka kediatu nadai udah kala didinga bala ke tuai bisi besebutka meransang sida ke biak belajarka jaku Iban. Tu nyangka ketegal sida nadai meda pemesai reti enti jaku nya jemah ila tak tau apus ari dunya.

 

Dalam kitai meransang bala Iban bejaku, kitai patut ngubah runding enggau chara bepikir ba kitai Dayak Iban kelebih agi bala nembiak kemaya hari tu. Runding ke negatif pasal pengerembai jaku Iban suah bendar nyadika batu penekul ngagai pengetan enggau pemansang jaku Iban. Kebuah pia, laban sida nyamai agi bejaku ngena jaku Melayu tauka nyelitka jaku Melayu dalam jaku Iban sida.   

 

Nya kebuah, mensia mayuh kelebih agi bansa Iban empu patut meri sukung ke chukup badas ngagai raban nembiak sereta ngelalau ngena jaku ajar minta sida belajarka jaku Iban nyentuk ngagai tikas ke pemadu tinggi. Diatu jaku Iban bisi diajar ba sekula ari primari nyentuk ngagai sekondari. Reti nya, jaku Iban bisi diajar sampai ke tikas SPM. kelimpah ari nya jaku Iban bisi mega diajar ba sekeda institut pelajar tinggi baka ba Universiti Malaysia Sarawak (UNIMAS) enggau Universiti Perguruan Sultan Idris (UPSI). Mayuh apai indai agi saru lebuh deka ngasuh anak sida ngambi mata pelajar jaku Iban di sekula. Kebuah pia, sida apai indai tu balat ngemeratka pemutus peresa. Sida ke ngumbai jaku Iban nya mar balat agi sida ke ngembuan juluk ati bulih gred A ba jaku Iban.  

 

Dikena ngenegapka jaku Iban di sekula, raban pengajar patut diberi kus dikena sida nambahka pengelandik sereta ngemansangka jaku Iban ke diajar sida ba sekula. Jaku Iban ukai semina dipelajarka ba sekula primari enggau sekondari aja, tang mega patut dipelajar sampai ngagai tikas ke lebih tinggi baka palan pematih pengajar tauka universiti.

 

Kelimpah ari chara di atass, siti ari chara ke mujur ulih meri pemansang iya nya ngaga mayuh pansik bekaul enggau jaku Iban. Pengawa tu ulih digaga nembiak universiti ke ngambi bidang pelajar jaku enggau budaya Iban begulai enggau pengelicha jaku iban ba institut pelajar tinggi baik nya ba Institut Pematih Pengajar tauka universiti.  

 

Nambahka nya, bala Raban Gerempung Ukai Perintah (NGO) mega patut nunjukka sukung sida dikena ngemansangka jaku Iban sampai ngagai tikas ke pemadu tinggi. Enti kitai beratika mayuh bendar NGO ti bekaul enggau sosio-budaya bisi ditumbuhka. Tu nyengkaum Sarawak Dayak National Union (SDNU), Sarawak Dayak Iban Association (SADIA), Association of Educational Development of Iban Language (AEDIL), Akademi Sarawak Dayak Iban Association (ASDIA), Ngepan Ajat Asal Sarawak (NGASI), Dayak (DAMA), Sarawak Iban Writers Association (SIWA), Kelab Ngepan Betong (KNB), Kelab Gagung Sarawak (KGS). Enti diperatika ari sukut objektif gerempung tu ditumbuh, mayuh ari gerempung tu nadai ngemeratka pemansang enggau pengerembai jaku Iban nyadika sebagi ari objektif sida. Semina AEDIL aja ke chakah agi nyukung ngemansangka jaku Iban ketegal mayuh ari raban dalam gerempung tu bala pengajar.

 

Kelimpah ari NGO, bisi mega gerempung wang turu ke dikumbai foundation tauka yayasan. Iya ti bisi nya Yayasan Tun Jugah (YTJ) enggau Yayasan Kebudayaan Dayak. Sekeda ari objektif YTJ iya nya ngenan sereta ngelakuka budaya, seni enggau jaku Iban, bejalaika pansik sereta nyediaka kereban intelektual tauka kereban pelajar baka bup ungkup orang ke bepelajar enggau rebak dudi, ngumpul, ngerekod, ngalih semua tukuh jerita Iban ungkup nembiak rebak dudi.

 

Enggau sekeda chara ke udah dipejuraika di atas, nadai kebuah jaku Iban tu enda ulih mansang. Enti kitai siru ke bansa diri tentu kitai mega siru ke jaku. Kebuah pia, kenu ku jaku tuai, dikelala bansa ketegal jaku. Enda nemu mih nama penyadi enti kitai ke empu bansa udah enda temegah ke jaku diri ketegal pemutus peresa kitai ba jaku Iban enda datai ba tikas ke dekaka kitai. Kitai anang enda ingat kitai belajarka jaku kitai empu ukai ketegal deka bulih gred tang ketegal penemu enggau pengelandik. Berindik ari semua pekara tu, raban bansa bukai mega ulih belajarka jaku Iban sereta ngelala pemanah adat bansa kitai.