Entara isu ti ngirauka ati
AMAT ngirauka ati lebuh media mantaika berita senentang nembiak ke ditemu malu pengajar iya ketegal ti enda puas ati dikena ukum disiplin. Nitihka surat berita, Berita Harian, pekara tu nyadi di Hulu Selangor. Siku nembiak ke berumur 15 taun malu pengajar disiplin iya ketegal ti enda puas ati kena ukum pengajar disiplin. Pekara baka tu ke bendar entara sekeda ari kes ke suah nyadi sepemanjai maya. Taja pia, ari sukut kes bukai iya mega ngayanka tikas ulah enggau rega diri ke dikembuanka bala nembiak kemaya hari tu.
Enti diperatika ari perspektif pelajar, pekara ti ditapi nembiak rebak baru kemaya hari tu iya nya senentang pengelenyau konsep narak sida enggau chara ti konsisten napi pekara tu. Pelajar ba sekula kemaya hari tu balat agi meri fokus ngagai pengawa belajar, iya nya dikena ngulihka pengelati dalam peresa, tang kurang ngemeratka proses narak, ngajar adab sereta nuku pemanah ulah.
Nya alai, proses narak nembiak enda ulih enda beorientasyenka pengawa nukuh personaliti, pemai ulah, watak sereta seregah diri setipak enggau iya ke disebut dalam sistem pelajar menua.
Nambahka nya mega, kaul kerejasama entara pengajar enggau apai indai nya teras tauka pugu ngagai pekara tu. Apai indai nya raban ke nyadi tulang belakang dalam proses pelajar nembiak. Proses pelajar anak endang patut berengkah nyadi bepun ari umur sida agi biak lalu terus dalam pengawa nukuhka kaul sereta narak sida nengah chunto teladan, ngelara maya ti patut enggau meri jaku lalau.
Taja pia, enti diperatika utai ke nyadi kemaya hari tu, pengawa nya udah dilempaika ngagai bala pengajar magang-magang. Kitai bela nemu pengawa pengajar endang bisi sekat iya nya maya sida ba sekula aja. Enti pengawa tu majak dipejalaika sida aja, baka ni kati asil manah dikedeka nya ulih nyadi.
Ditetak ngena jaku pandak, pengawa narak nembiak sekula patut bendar dikereja ngena chara kolektif, iya nya chara kerejasama entara pengajar, apai indai sereta komuniti ti bekelingi enggau sida. Tuduh penemu sereta langgur idea napi penguji dalam pelajar patut bendar diperatika enggau serius sereta dipeda ari konteks ti mayuh leman, kelimpah ari jalai mutar ti selampur.
