Nembiak sekula tichir ari sistem pelajar menua

 

Nama kebuah nembiak sekula tichir ari sistem pelajar menua?

Siti ari pekara ke suah ngeruga mensia mayuh baka sida apai indai enggau pengajar nya isu pasal pekara pelajar. Sekali tu kitai ngenangka pekara ti bisi kaul enggau pemansang nembiak, kebuah sekeda nembiak nya enda teapuska pelajar sida.

Isu seranta, sistem pelajar ti bepuguka peresa enggau nembiak nadai pengerindu agi deka belajar, nya  faktor ti balat ngasuh nembiak enda nampung pelajar sida ngujungka sida techichir ari sistem pelajar menua. Tichir dalam konteks karang tu mai reti ke sama enggau leka jaku tecicir dalam jaku Melayu. Dalam diksyenari Iban-Melayu (Dewan Bahasa dan Pustaka)  ngayanka leka jaku tichir ti mai reti nitik baka ai lalu diksyenari Iban and English (Vinson and Joanne Sutlive) mega bisi nyebut leka jaku tichir/nichir ke diterang reti iya dalam jaku English iya nya drop. Ba konteks karang tu tichir ke dikena ditu mai reti drop out (English) tauka keciciran(BM).

Diatu kitai sama beratika kebuah nembiak sekula tichir ari sistem pelajar menua.

Penyeranta nyadika pun faktor kenyau ari suba dalam isu nembiak ke enda tembu pelajar lalu nitihka penemu sida ke tebangkar dalam bidang tu madahka hal tu deka majak nyadi enti enda diputarka. Ba penemu sida tu, Opis Menteri Pelajar patut numbuhka siti komiti dikena merati sereta mutarka pun faktor tu. Nitihka rekod, kali kepenudi perintah udah meratika isu tichir tu enggau serius amat iya nya maya ke mantaika Ripot Murad (Laporan Murad) kira-kira 50 taun ke udah.

Ripot  Murad ti betuaika Kepala Opis Pelajar Malaysia ke lama maya nya,  iya nya Tan Sri Murad Mohamed Noor, dibantaika ba taun 1972 sepengudah isu tichir tu nyadi serius.  Tuju ripot tu dikena mutarka penanggul nembiak ba menua pesisir tichir  ketegal panjuk penyeranta maya taun 1969.

Endang enda ulih disakalka agi, perintah kitai bisi berundingka mayuh langkah pengawa ti signifikan, tang taja pia, pejalai sekeda polisi dikena mutarka isu tu agi dikira enda nyerata chukup.  Nya mih kepenudi kitai amat meratika isu tu, iya nya nengah Ripot Murad. Udah nya nyentuka diatu nadai raban ti diungkup ke pekara tu udah ditumbuhka dikena meratika pekara tu enggau serius agi.

Munyi ke jaku tuai, enti enda diatu, kemaya? Nya alai, sepengudah 50 taun kitai nagasaika endang patut bendar ditumbuhka siti komiti ba peringkat nasional dikena mutarka isu tu ari peringkat pun iya.

Berita Harian (27 July 2022) bisi mantaika asil pansik Opis Statistik Malaysia ti dipejalaika opis nya kena taun 2019. Asil pansik nya ngeripotka 5.8 persin ari kira-kira 32 juta rayat Malaysia nadai besekula tauka tichir ari sistem pelajar menua. Pansik nya mega ngerekodka semina 22.1 persin nembiak nampung pelajar sida ke tikas ti tinggi agi udah Sijil Pelajaran Malaysia (SPM). Kelimpah ari nya, pukul rata nembiak  di menua tu semina nembuka pelajar sida ba Pom Empat tauka maya sida berumur 16 taun.

Nitihka penemu Pengelicha Kanan Psikologi Pendidikan Universiti Putra Malaysia (UPM) madahka bisi tiga pugu faktor ti ngasuh isu tichir tu nyadi  lalu ku iya pekara tu endang semampai bekaul. Ulah apai indai ke enda ibuhka pekara pasal pelajar mega ngasuh pekara tu raya agi nyadi.

Nya alai, enti kitai nyidi ripot data tichir kenyau ari suba, faktor nya tetap sebaka iya nya penyeranta, baik nya peranak menua ke diau di nengeri, pesisir tauka ke jauh di ulu sungai. Mayuh nembiak ari ruang bilik B40 mega ngasaika diri diserara ari undan kurikulum ba tikas iya ke kelalu  tinggi. Tu ngujungka sida enda rindu belajar. Nya nya mega ngasuh prestasi akademik sida enda manah ngujungka sida majak ngasaika diri dipulau ari sistem sekula ti kelalu ngemeratka pemutus peresa.

Amat mih yuran di sekolah perintah nya nadai bebayar kenyau ari taun 2012 tang faktor nya agi nyadi isu laban nitihka pansik penyeranta ukai iya semina bekaul enggau faktor duit ringgit tang mega mungkur 'miskin roh enggau runding'. Chunto tu ulih dipeda ari pansik kar penyeranta ke dipejalaika ba sebuah nengeri ba Pantai Timur. Pansik nya ngayanka raban ke udu misikin tu enda tentu deka ngubah ulah diri. Taja pan sida bisi diberi benih sayur, sida lembau deka manjah sayur sida enggau ai ngujungka utai tanam nya mati. Lebuh ke ditanya raban pemansik senentang pengelandik sida, saut sida sigi nadai lalu sida mega enda tentu deka nerima ajar pasal pengelandik ti baru.  Taja pan enda semua ke ngembuan ulah baka tu tang raban ti 'miskin roh enggau duit' nya suah ngelanyaika isu pelajar lalu tu ti ngujungka isi tichir nya majak nyadi.

Mayuh  tichir maya PKP

Bisi mega raban ke tebangkar ba bidang pelajar mega pechaya mayuh agi nembiak tichir ari sistem pelajar tauka endang enda besekula sepemanjai  timpuh Perintah Mindah Betagang (PKP). Sida tu patut besekula tang ketegal enda ulih bejalaika tanggung pengawa sida ketegal faktor penyeranta, ketegal tinggal jauh di ulu sungai din kelimpah ari sida ke ada merinsa nadai rumah ba kandang pasar.

Statistik Pelajar Malaysia 2021 ti dikeluarka KPM maya taun 2021 mega ngayanka nembiak ke enda besekula.  Statistik nya mega ngayanka 90.31 persin ari 3.063 juta nembiak ke berumur enam taun ngagai 11 taun besekula primari; 84.06 persin ari 1.445 juta nembiak ke berumur 12 taun ngagai 14 taun ke sekula sekondari, lalu semina 77.87 persin ari 956,273 sida ke berumur 16 taun ke atas besekula di peringkat sekondari atas.

Nitihka ripot Gerempung Kerejasama enggau Pemansang Ekonomi (OECD), penyampau nembiak ke tichir ari sekula nambah kelebih agi ba menua ti  nutup sekula sida dalam timpuh maya ke  lama ketegal COVID-19.

Nya alai, isu raban ke  tichir ari sistem pelajar menua tauka sida ke endang nadai besekula nya patut bendar diputarka enggau manah dikena nyeliahka sida ari teparit enggau penyakit sosial sereta penanggul moral. Kebuah pia, laban tu tau nyasuh mayuh agi   kos dikeluarka perintah dikena mina palan penyuman.

Glosari:

isu tichir  - isu keciciran

penanggul moral  - masalah akhlak

pusat pemulihan­ - palan penyuman

 

5 Taba Waris Dunya terus tebilang

 

5 Taba Waris Dunya terus tebilang

NINTING taun, kena 7 Julai nya hari dikena nandaka taun Taba Waris Dunya ti diintu ba Malaysia sepengudah ke  diakun Gerempung Pelajar, Saintifik enggau Budaya (UNESCO) Gerempung Bansa-bansa Bersatu (PBB).

Taba Waris Dunya UNESCO nyadi palan ti pengabis beguna ngagai waris budaya enggau reta tengkira rampa menua ti udah   diterima  dalam Konvensyen Waris Dunya UNESCO.

Naka kediatu, UNESCO udah ngakunka lima palan besejarah di Malaysia nyadi Taba Waris Dunya, iya nya Taman Negara Mulu di Sarawak (2000), Taman Negara Kinabalu di Sabah (2000), Bandaraya Melaka di Melaka (2008), Georgetown, Pulau Pinang (2008) enggau Lembah Lenggong, Perak (2012).

Pengawa ngakunka palan tu nya sebengkah pengawa ti proaktif dikena nerenak pengerindu mensia mayuh ke sejarah enggau waris menua. Kebuah pia, laban Malaysia tu menua ti sarat enggau reta pesaka sejarah, budaya enggau sains ngambika bisi dipelajar mensia mayuh ari serata dunya. Nambahka nya iya lalu ulih ngerembaika pemansang industri dagang temuai di Malaysia, kelimpah ari ngintu palan ti beguna nya ari rusak ketegal segang arus moden.

Georgetown taba waris tebilang

Perintah Pulau Pinang kenyau ari 2010 mega udah ngeletak 7hb Julai nyadi hari peremisi rama di negeri nya dikena ngakun sereta ngeramika ulang taun Georgetown nyadi Taba Waris Dunya.

Georgetown, kuta metropolitan ba timur laut Pulau Pinang nya bandar raya ti pengabis lama di Malaysia udah Melaka, ngembuan mayuh taba waris sejarah enggau genturung pendiau lama. Ngelama ke udah mansang nyadi taba waris tebilang, bandar raya tu agi ngenanka tukuh sereta nyaga bangunan lama nyentuk ke sehari tu.

Bandar raya tu bisi kandang endur ti lebih 259 hektar lalu tu mungkur 3,853 bangunan waris lama enggau 1,160 struktur bangunan moden ke mengkang dijaga sereta ditanka ari sukut tukuh bangunan nya.

Mayuh bekau sejarah ulih dipeda baka, sekeda laras meriam, peluru enggau senyata di Kota Cornwallis (1786), menara jam Queen Victoria enggau dijir bangunan kolonial ti agi tegap bediri ba kandang endur Padang Kota.

Rintai rumah sembiang baka Masjid Lebuh Acheh, Masjid Kapitan Keling, Kuil Kuan Yin, Kuil Sr Mariamman enggau Gerija St George nya ngayankan pupu raban pengarap ti udah lama ngentapka diri di Pulau Pinang kenyau ari menua nya keterubah iya dibuka dalam taun 1700-an. Kelimpah ari nya mayuh mega penyelai waris budaya ke bukai di bandar raya nya.

Melaka bandar raya besejarah

Pengawa ngakunka Melaka nyadi Taba Waris Dunya UNESCO endang iya nemban amat laban Melaka ngembuan mayuh tempat besejarah ti tinggi rega iya kenyau ari Jeman Sultan Melayu Melaka. Iya diangkatka nyadi Taba Waris Dunya UNESCO kena 7hb Julai 2008.

Melaka endang nyadika palan besejarah ti ditapatka bala temuai laban iya ngembuan mayuh leman penyelai kelebih agi ari tukuh seni ngaga rumah ke udah beratus-ratus taun lama. Melaka udah direkodka entara palan pedagang ti pengabis popular di dunya sereta ngembuan penyangkai kapal ti beguna bendar di Asia Tenggara maya nya suba.

Mayuh bekau sejarah waris perintah Portugis, Belanda sereta British ngujungka negeri nya entara pugu palan ti ditapatka bala temuai ari dalam enggau ari menua tasik.

Taman Negara Gunung Mulu

Taman tu jelai agi dikumbai Taman Negara Mulu. Tu taman ti pengabis besai di Sarawak lalu ulih ngasuh temuai terus matau sereta ngasaika mayuh macham bansa utai tumbuh, pemanah rampa menua enggau pengidup siga ke bisi ba kandung endur nya.

Taman Negara Mulu ngembuan tukuh geografi ti nyelai tauka unik. Pemesai kandang taman tu iya nya 52,864 hektar. Taman tu ngundan tujuh belas zon utai tumbuh lalu bisi kira-kira 3,500 spesies utai tumbuh vaskular gua batu kapur ke ngasuh endur tu berega amat.

Temuai ulih nengah Jalai Kanopi Mulu ti tau ngerinduka ati sida meda utai tumbuh enggau pengidup siga ba endur nya. Ba jalai  sepemanjai 480 meter tu pun kayu ti pengabis panjai di dunya bisi mega tumbuh ditu. Nya alai, endang enda ulih disakalka agi, Taman Negara Mulu tu digazetka UNESCO nyadi pusat waris tengkira rampa dunya kena November 2000 oleh.

Taman Negara Kinabalu bisi ekologi mega

Taman Negara Kinabalu, di Sabah ke ba utara Pulau Borneo mega  dianggap taman ti pengabis lama di Sabah. Taman tu betiraika Gunung Kinabalu ti bediri temegah memelan udah  diakun nyadi Taba Waris Dunya, kena 2hb Disember 2000.

Taman Kinabalu nya sebuah kandang endur ti ngembuan ekologi ti alai mayuh leman habitat. Tu mungkur kandang baruh tropika, kandang kampung hujan tropika, nyentuk ngagai kandang kampung bukit tropika, kampung setengan alpine sereta ngagai  kandang babas mit. Tu  nyadikan endur ke dikumbai Palan Utai Tumbuh Mayuh Leman Asia Tenggara (Pusat Kepelbagaian Tumbuhan Asia Tenggara).

Perintah nengeri mega komited deka ngemansangka Tapak Waris Dunya Kinabalu tu nyadika palan ti ditapatka temuai sereta nyadi palan budaya betikas dunya.

Lembang Lenggong tapak arkeologi

Lembang Lenggong, di Perak nya sebuah tapak arkeologi.  Evidens  bisi ngayangka mensia udah bisi diau dia kenyau ari jeman Paleolitik. Barang arkeologi ti pengabis tebilang kala ditemu di Lenggong tu iya nya rangkah mensia ke dikumbai Orang Perak (Perak Man), ti berumur 11,000 taun. Rangkah tu ditemu maya taun 1990.

Pekakas batu ti berumur 100,000 taun ditumbak semak Kampung Geluk enggau Kampung Temelong lalu Gua Harimau nya taba ke alai bala arkeologis tetemuka pekakas ti digaga ari engkeraju maya Jeman Engkeraju.

Enggau semua bukti prasejarah asil pansik sereta utai ke ditemu nya ngujungka Lembang Lenggong ke nyadi Waris Arkeologi Lembang Lenggong  nya mega digazetka  UNESCO nyadi Taba Waris Dunya kena bulan Julai 2012.

Mayuh palan ti bepotensi diakun UNESCO

Malaysia ngembuan mayuh potensi waris sejarah, budaya ti ulih  diintu sereta diaduka baru ngambika ulih diakunka nyadi Tabak Waris Dunya UNESCO. Pengawa nyaga sereta ngintu sejarah menua tu patut bendar dipajakka. Kebuah pia, laban iya ngayanka peninggi rega sejarah ke ulih diangkat sereta dibelematika perintah enggau rayat Malaysia  ngambika bisi dipeda serak dudi jemah ila.

Raban bekuasa nengeri enggau perintah besai patut meri fokus ti  lebih ngagai aset menua ti besejarah kelimpah ari iya ke udah diakunka UNESCO. Sepengudah diakunkan UNESCO raban bekuasa enggau rayat Malaysia patut nyaga, ngintu, nyeruri waris nya seraya ke nikika tikas fasiliti sosial dikena ngemudahka temuai datai ke palan nya. Pengawa nyaga sereta ngintu nilai sejarah enggau pemanah aset tu ngayankan tanggung pengawa menua laban pengawa ngakunka palan nya  diberi gerempun dunya. Iya ukai mudah, tang iya manah dikena nyungkak industri dagang temuai menua sereta ulih ngangkatka ekonomi rakyat enggau menua.

Ngembuan nilai sejarah ti tinggi

Iya ke amat nya, di Malaysia tu mayuh aset menua ti bepotensi dichirikan nyadi Taba Waris Dunya baka Lembang Bujang di Merbok, Kedah laban pengelama palan tu dikira lama agi ari Melaka.

Kelimpah ari nya, Kampung Laut di Kelantan, Tapak Arkeologi Sungai Batu, di Kedah nya sekeda aset sejarah menua ti bepotensi diangkatka mega laban ngembuan nilai sejarah ti tinggi sereta nyadi tempat ti pengabis beguna dalam sejarah di Asia Tenggara menya. Nya kebuah palan tu patut bendar dibelemati sereta ditemegahka.

Kelimpah ari aset besejarah nya, Malaysia mega ulih mantaika aset pemanah rampa menua baka Taman Negara Pahang, Taman Royal Belum enggau Taman Negara Tanjung Piai. Taman tu sebaka mega enggau Taman Negara Gunung Mulu sereta Taman Negara Kinabalu ti  patut ditemegahka laban pemanah rampa menua nya ke bisi mayuh leman flora fauna, pemanah sungai, ai terjun, danau enggau paya bakau.

Glosari:

Taba Waris Dunya – Tapak Warisan Dunia

diakun - diiktiraf

lembang – lembah

Jeman Engkeraju  - Zaman Gangsa