Empas ari anak kitai ke tegian gajet enggau internet

Empas ari anak kitai ke tegian gajet enggau internet

 

Kaul entara Internet enggau mensia maya jeman digital diatu chukup rapit  baka api enggau asap, enda ulih diseraraka kitai laban kemaya hari tu semua kitai bela balat bendar bepanggai ba perengka tu.

 

Taja pia, enda ulih dienggaika mega, mayuh pekara tauka hal positif ti ulih dikaukka kitai maya ngelawa Internet. Nambahka nya mega iya tetap mai empas ke negatif  ba fasiliti ti udah disediaka ngagai selampur dunya. Ari sukut logik, kitai sigi nadai kuasa nyaga sereta nagang semua aktiviti ti dikerejaka mensia mayuh maya bekena servis nya laban genap iku orang ngembuan hak kediri empu.

 

Enti ditimpai enggau mata kasar, kemaya hari tu mensia mayuh suah agi bekenaka telefon pintar, enda milih  dini-dini endur sida, baik nya benung begelumu enggau diri sebilik tauka maya enggau bala bakih. Enda ngira tuai tauka biak, telefon semampai enda meleka ari jari taja pan nadai tentu bisi utai berat ke deka dipeda ba skrin gajet nya.

 

Ba sida ke nembiak, terang bendar ngayanka sida tu rindu agi ngemedungka diri dalam bilik diri empu lalu bemain komputer tauka telefon ngena servis Internet enti dibanding enggau nembiak suba tauka kelia. Nembiak jeman suba suah agi bemain enggau bakih sida di luar.

 

Nambahka nya mega,  bisi sekeda nya kelalu gian enggau pengawa nya ngujungka sida jampat ransi enti enda disagi ngena telefon tauka ringat lebuh dirara ketegal tinduk laun laban ke kiruh ngelawa Internet. Nitihka  Ripot Eksekutif Dapatan Kajian Tanda Aras Tahap Keselamatan Siber Dalam Kalangan Murid Sekolah dan Ibu Bapa 2021/2022, ulah nya mih entara kelai sida nembiak tu udah tegian enggau gajet.

 

Ripot nya dikeluarka Bahagian Sumber dan Teknologi Pendidikan (BSTP), Opis Menteri Pelajar Malaysia (KPM). Pansik tu udah nyidi 16,908 respons ari nembiak sekula enggau apai indai ba selampur Malaysia. Komen ari Menteri Komunikasyen enggau Multimedia, madahka nembiak ke gian  Internet mega deka agi bemain telefon pintar ari ke pansut bemain enggau bala bakih. Sida ke kelalu gian ngena servis tu mudah ringat enda enda diasuh ngena telefon pintar tauka tinduk laun ketegal ke kisuk ngelawa Internet.

 

Penyampau sida ke tegian Internet di Malaysia naka kediatu chukup mayuh enti dibanding enggau menua bukai. Ari pansik tu mega, ulah ke gian internet tu nyadi bepun ari tikas penemu bala apai indai ke agi baruh senentang pekara tu. Ari nya, iya ulih ngenataika risiko pengelikun siber ngagai nembiak rebak baru.

 

Nambahka nya mega, ulah ke gian nya ulih ngasuh bala anak  tepawah enggau akses undan internet ti enda engkeman, risiko transaksyen maya online,  pengawa mina jaku tama (kata laluan) ti pandak, kena ruga orang ti enda dikelala sereta kena umpan orang ke minta data.

 

Nya alai, bala apai indai patut ngemeratka pekara beratika  aktiviti bala anak sida maya anak sida online ngambika ulih nagang pengawa ti enda manah ari nya. Endang amat, nadai siku orang ulih dikelaungka ari kes tegian tu, tang taja pia ba kes nembiak redak pekara tu balat bendar ngirauka ati laban sida tu mih pelapis serak kitai diatu ungkup jemah ila. Munyi ku lansa leka sampi, pechah periuk tanah, ganti periuk tani, padam bulan diganti matahari, parai orang ke tuai ganti tubuh kami, pambu orang ke dulu, ganti sida ke dudi.  

 

Enti bala anak ditejuka pia aja ari pun, tentu tusah alai kitai deka ngempuk baru personaliti sida laban sida udah tebalan enggau pengawa nya besehari-sehari.  Kitai enggai meda sida kelalu obses enggau dunya siber ngujungka sida enda ingatka realiti pengidup ke patut ditapi sida tetiap hari. Apai indai tauka penjaga patut terit agi enggau bala anak sida senentang isu tu laban enti dilakka aja tentu nya ila tauka ngenataika penusah.

 

Baka kes ke udah bisi nyadi di Sepanyol apin lama ti udah, siku nembiak lelaki ke berumur 15 taun udah ditemu munuh apai indai enggau menyadi lelaki iya udah ti bekelikuh enggau sida sebilik pasal Wi-Fi. Nitihka ripot, indai nembiak nya mutuska akses Internet dikena ngukum anak iya ketegal prestasi pelajar sekula iya ke nurun lalu enggau ulah ti enda tentu deka nyaup ngaga kereja di rumah. Berindik ari pengawa indai iya nya, nembiak nya ngambi senapang patah lalu nimbak sida sebilik maya sida pulai ke rumah.

 

Tebiat tegian tu enda patut dikumbai kitai utai ti mudah laban iya ulih ngasuh  mental orang nya sakit ngujungka iya ulih ngaga pengawa ti enda disangkaka kitai.

 

Enti generasyen serak tu rusak ketegal tegian nya, nadai orang ulih melaba nama utai ke nyadi ngagai pemansang komuniti enggau menua kitai jemah ila.  Nya alai, genap iku kitai mesti ngaga siti tagit ti lati sereta nyadi peranak digital ti betanggung jawab ngagai diri empu enggau orang bukai kelebih agi ungkup jemah ila. Nengah chara tu, menua kitai tentu ulih nukuh komuniti digital ti bepenemu, tan sereta tegap napi penguji siber ke majak dinamik seriran enggau ubah jeman.

  

Nabur Informasyen Nengah Blog

 

 

Kemaya hari tu nya dunya dipeda baka ke  nadai lapat entara menua. Pemansang enggau ubah teknologi pemadah ngasuh mayuh macham informasyen ngerekai enggau naka penyampat sereta naka penyauh ngelimpas garis menua di dunya. Sekalika nya informasyen nya positif tauka negatif, semina sekali ketik aja lalu semua nya utai ulih tebantai ba mua mata kitai. Nya mih pemanah nabur penerang nengah internet. Lebuh ti bejaku pasal internet, kitai enda ulih lari ari ngaitka pekara tu enggau laman web.

Mayuh macham laman web bisi ditengkebang dikena ngenataika penerang ti nyerangkum aspek politik, ekonomi enggau sosial. Kemaya hari tu, semua penerang ulih dilawaka kitai enggau mudah amat. Nyau beribu-ribu rayat ba serata dunya tu nyadika media sosial nya kelaing alai ngenataika pengasai ati diri nitihka sukut diri empu.

Iya ke pengabis tebilang kemaya hari tu nya laman ti dikumbai blog ti tau dikumbai kitai bup chara online. Iya nyadika sebuah diari alai kitai nulis tauka ngerikodka pekara ti nyadi dalam pengidup kitai. Nengah blog mih alai orang ngenataika penemu terus ke dunya siber.

Nengah chara tu, mayuh orang udah mujur nempa sebuah komuniti ke meruan besilih idea, besilih pengerindu sereta ngeluarka jaku pejah dikena nyeruri sesebengkah isu. Lalu nengah komuniti tu mega sesetengah orang ke ngasilka blog nya diperatika baka individu ke bisi kredibiliti. Iya bepanggai ba kategori tauka bansa blog ke uji dikenataika iya. Blogger tu ngembuan idea enggau fokus  kediri empu dikena sida iya ngenataika penerang ngagai raban ke nitihka pemansang blog sida nya. Bisi mega nengah blog tu mega sida bulih asil penatai pemisi.

Enda kira mih nama-nama penerang ti deka dikenataika nengah blog tauka kitai ke nyadi pemacha lalu deka meri komen, tuduh penemu patut dikenataika enggau beretika sereta bebasa bepelasarka adat begulai enggau pangan diri. Nya alai, tabur mih pekara ti positif ti tau mai penguntung orang bukai. Beri mih penerang ti beguna sereta nemban ke pengelantang semua orang di dunya.

  

Bantaika jaku ti ngerinduka ati orang ke ninga

Bantaika jaku ti ngerinduka ati orang ke ninga

Penatai teknologi baru baka kelaing alai kitai ngenataika berita, jaku pesan ba media sosial chukup manah sereta beguna ngagai kitai semua. Dia mih alai kitai ngenataika buah kenang enggau komen senentang sesebengkah isu ke bisi nyadi ngelingi kitai. Kelimpah ari nya kitai mega selalu ninga jaku ba mua mayuh, jaku lalau pengarap enggau ke bukai mega. Tang kemaya hari tu enti kitai beratika  udah bisi trend sekeda raban mensia nguji deka nelebaka pengawa ti enda manah baka pengawa nyengkal, nyumpah enggau bejaku kamah maya ngenataika jaku kelugi tauka lebuh meri komen senentang sesebengkah isu. Iya ukai semina nyadi ba mensia mayuh, tang mega nyadi sebagi ari isi pekara orang ke bejaku ba mua mayuh baik maya meri licha tauka meri jaku lalau.

Hal baka tu enda patut nyadi kelebih agi enti leka jaku nya pansut ari mulut orang bepelajar tinggi, bepangkat tinggi tauka orang ke bejalaika pengarap. Sida tu mih nyadika teladan nyadika chuan ngagai mensia mayuh. Iya ke patut nya, mensia ti ngembuan akal runding ti gerai nyamai ulih midaka entara ti manah enggau ke enda. Tu nyengkaum jaku enggau rambai jaku ke dipilih kitai maya kitai bejaku ba mua mayuh.

Leka jaku ti dipilih patut leka jaku ti ngayanka pemanah sereta ngembuan penemu dalam ngambika kitai enda terunda-runda nitih orang bejaku jai.  Pelabaka tentu nyau deka selampur agama ngelalau umat iya enda bejaku jai laban bejaku jai tau ngujungka nyadi jaku petenah. Taja pan kitai deka bekunsi penemu, bantaika mih ngena jaku ti manah didinga enti enda, manah agi ga kitai diau diri aja.

Mantaika jaku ti enda manah ukai sebengkah hal ti ulih dianggap 'normal' tauka teleba ba mensia mayuh. Enti kitai mantah lalu enda setuju enggau sida ke nguji nelebaka budaya kamah dalam jaku kelugi, kitai patut mega ngembuan ulah ti  sama mantah sereta ngenggaika budaya chabul mulut tauka mantaika jaku ti jai. Kitai patut enggau naka ulih nentuka leka jaku ke pansut ari mulut kitai selamat ari bejaku pasal hal ti jai.

Respons ke madahka leka jaku kamah nya jaku  ti udah masai dikena mensia mayuh nya sekeda ari chara sekeda orang ke deka ngamatka pemanah jaku kamah nya.  Tu tau ngujungka orang nerima jaku jai nyadika jaku ti teleba dikena lebuh berandau tauka bejaku ba mua mayuh.

Sekeda orang enda ngasaika pemesai empas ari utai ke dikenataika iya. Ulah ti enda bejimat lebuh bejaku, bejaku bepelasarka sentimen enggau emosyen, semua tu tau disema baka kitai ke nganjung paung empa jani. Nyangka ba dunya kitai ulih meri seribu satu dalih dikena  ngamatka ulah kitai nya tang ungkup orang ke bisi agama tentu maya hari kepenudi ila kitai deka diakimka Petara.

Nya alai, aram mih kitai sama-sama nyaga mulut kitai empu ari ngemansutka jaku ti enda manah. Tu dikena dikena ngingatka nuan enggau aku. Taja pan leka jaku nya dikira jaku ke tebalan dikena sekeda orang, tang anang mih kitai nyadika iya masai dikena dalam pengidup kitai. Penyamai mulut nyebut laban dilah kitai mensia endang enda betulang bisi maya iya balat agi nganu ari duku tauka mata pedang ti tajam. Duku ti tajam, enti dipeda sigi ngasuh takut tang dilah ke betulang, enda berasai ulih nganu sereta nyimaka ati orang.

Sebedau nyurutka diri, aku ninggalka tiga ayat ti diambi aku ari bup Kudus pasal jaku ti enda manah nyangka tauka nyadi pagar kitai semua.

Anang mansutka jaku ti jai, tang semina nyebut jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga. [Epesus 4:29]

Anang bejaku kamah, tauka bejaku beli, tauka enda senunuh bejaku laban utai nya enda patut; tang beri terima kasih ngagai Allah Taala. [Epesus 5:4]

Tang diatu buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang, enggau jaku ti kamah. [Kolosi 3:8]

Nya aja, mupuk aku!👦

Glosari:

nyengkal - mencarut  

nyumpah - memaki hamun