Nama kebuah orang Jipun rindu diau di Malaysia?

 

Jipun nya entara menua ti balat bendar mansang kelebih agi ba bidang ekonomi enggau injiniring. Taja pia, reta budaya sida agi tegap sereta dijaga enggau manah. Mayuh tempat di Jepun bisi dirintaika nyadi Unesco World Heritage Site. Nya kebuah Jipun entara menua ti suah dilawa bala temuai sereta nyadi menua ti deka alai sida diau kelebih agi bala ari Asia Tenggara. Suah amai sekeda ari kitai  bemimpi deka ngasaika pemanah enggau penyelai menua Jipun.

Dalam kitai gagit nemu sereta meda pengelebih menua orang, dipelabaka kitai empu enda naga Malaysia mega nyadi 'Menua Lumur 1' ti dipilih orang Jipun nyadika palan  alai diau. Nitihka penerang laman web Foreland Realty Network https://my.foreland- realty.com/ nengah pansik sida 14 taun bejurut (2006–2019) madahka Malaysia nyadi tempat keterubah dipilih orang Jipun alai sida diau ungkup timpuh ti lama. Mayuh macham faktor ketegal orang Jipun milih Malaysia nyadika tempat alai sida diau. Bepelasarka faktor tu, kitai nyangka berengkah bepikir sigi benasit mih kitai rayat Malaysia. Aram kitai bela beratika faktor tu.

Baka ke udah disebutka tadi, mayuh macham faktor ti ngasuh orang Jipun milih Malaysia nyadika palan alai sida diau. Program Malaysia My Second Home (MM2H) ti ditumbuhka raban penguasa Dagang Temuai Malaysia begulai enggau Opis Imigresen Malaysia ngemendarka orang Jipun diau di Malaysia sepengelama 10 taun. Peranak luar ke deka diau di Malaysia sereta ngembuan kriteria ti udah ditetapka  ulih minta tama program tu. Peminta ke mujur deka dikemendarka diau di Malaysia sereta mai bini, anak ke bedau berumah tangga ke agi baruh umur 21 taun lalu enggau apai indai sida ke berumur lebih ari 60 taun. Nengah program tu, mayuh orang Jipun minta diau di Malaysia lalu ngaga Malaysia nya baka rumah kedua sida.

Penuduk Jipun ke ba kandang  Pacific Circle of Fire, ba pati tiga plat tektonik, ngasuh Jipun nya menua ke seruran betapi enggau penusah kudi  baka tanah berenyang, tsunami, ribut taufan enggau penusah bukit berapi meletup. 70 ngagai 80 persin gaya mua bumi Jipun ti bebukit ngujungka Jepun nyadi menua ti suah betapi enggau penusah  tanah tusur ketegal ujan bangat.

Penusah tsunami ti balat nyadi dalam taun  2011 meri  empas ke dalam ba pengidup orang Jipun. Penusah ke ngasuh tsunami nyadi nya ngujungka eksiden ba palan nuklear di Fukushima. Penusah tu raya amat ngujungka Fukushima kemaya hari tu nyadi sebuah bandar ke udah danjan dibai bulan. Bebanding enggau Jipun, Malaysia menua ti likun sereta jarang betapi enggau penusah kudi ti balat. Nya mih kebuah, Malaysia nyadika palan ti ditapat orang ari menua bukai. Empas ari tsunami 2011 ngasuh mayuh orang Jipun pansut ari menua sida laban nangika efek radiasyen enggau empas ari kudi rampa menua ti bukai.

Mata duit Malaysia (Ringgit Malaysia) jauh baruh agi enti dibandingka enggau mata duit Jipun (yen). Orang Jipun ke milih deka ngentapka pendiau diri di Malaysia ngembuan penatai pemisi tauka duit simpan sida dalam yen. Pengulih sida bebelanja mega deka betambah. Lebuh sida diau di Malaysia, kuasa meli sida deka nyadi tiga tauka empat kali lipat lebih ari ke diau ba menua diri. Sida ulih meli mayuh macham barang ke guna besehari-sehari enggau rega ti jauh baruh ari di Jipun. Enggau nya mega, tikas pengidup sida deka nyadi tinggi agi bebanding enggau pengidup sida di Jipun. Nilai retanah di Malaysia mega jauh baruh agi bebanding enggau nilai retanah di Jipun. Atur meli sereta ngulihka  retanah di Malaysia di baruh program MMH2 mega enda tentu tusah. Tu meransang mayuh orang Jipun ke ngembuan rumah tauka alai diau ke manah agi bebanding enggau rumah tauka alai diau sida di Jipun.

Dipelabaka semua udah nemu Jipun nya menua empat musin, tang klimet di Malaysia semampai ujan enggau panas sepemanjai taun. Lebuh orang Jipun diau di Malaysia, sida enda kiruhka belanja ti besai dikena sida bebelika pekayan. Enti sida di Jipun, sida mesti nyediaka kos ti tinggi dikena meli pekayan laban pekayan tiap-tiap musin enda sebaka, kelebih agi maya musin chelap. Enti sida diau di Malaysia, tukuh gari ti sama ulih dikena sepemanjai taun.

Malaysia menua ti ngembuan mayuh macham fasiliti setanding enggau menua maju. Mayuh orang Jipun di Malaysia, dipeda diau ba pasar laban tempat tu ngembuan mayuh bengkah fasiliti ti digunaka sida. Alai diau di lantang sereta likun, kereban pengangkut  rama ti efisyen, rampa diau ti beresi, sereta menua ti likun sereta  harmoni nyadika ketegal orang Jipun nadai mayuh penanggul diau  di Malaysia. Ke bendar mega, di Malaysia mayuh pasar raya ti nyual barang ke guna orang Jipun baka pekakas, pemakai enggau kereban ke berapi ari Jipun. Ari sukut komunikasyen mega nadai bangat tusah laban majoriti rayat Malaysia bejaku dalam jaku English.

Kos perubat di Jipun tinggi amat. Peranak Jipun mesti ngambi  insurans ari baruh program National Health Insurance dikena nampung kos berubat. Sida kompeni insurans semina deka nanggung 70 persin ari kos berubat, lalu lebih nya ditapi individu nya empu. Enti  sida diau di Malaysia, kos perubat jauh baruh agi, taja pan sida nerima servis ba klinik tauka hospital prebet. Klinik enggau hospital perintah mega nerima pesakit peranak menua bukai, enggau bayar ti baruh agi. Di Jipun, bisi siti sistem perubat ke dikumbai 'tarai mawashi'. Pesakit ke bisi kes emergensi enda diterima sida hospital ketegal sekeda faktor. Situasyen enggau gaya tu balat agi nyadi maya penyakit Covid-19 ngerekai. Utai ke baka nya nadai udah nyadi di Malaysia, kelebih agi ba hospital perintah. Hospital di Malaysia besedia nerima nama bansa kategori pesakit lalu besedia ngubat enti dipinta.

Nengah faktor ti udah  dipejuraikan di atas, endang patut amat rayat Malaysia beterima kasih sereta benasit laban mayuh bendar pengelebih ke bisi dikembuanka menua kitai. Ari sukut realiti, sigi mayuh orang ari menua luar rinduka Malaysia. Malaysia menua ti unik laban rayat iya idup harmoni. Ulah ke mentas sereta tebuka kitai ke tinggi lebuh nerima orang luar, ngasuh sida enda ngasaika diri dipulauka taja pan ukai diau ba menua diri. Nya alai, aram mih kitai sama nerima Malaysia ke dikerinduka kitai tu.

Glosari :

retanah – hartanah

raya – besai amat, udu, bendar

 

 

Polis dan Masyarakat Berpisah Tiada – Tema Hari Polis 2022

Dipelabaka semua orang nemu enti kitai besebutka leka jaku polis. Bepelasarka peneleba nembiak mit mih orang ke  suah amat diemba ditangkap polis enti sida machal. Nya kiraka udah nyadi evidens madahka nyau deka selampur orang nemu sapa polis.

Beserimbai enggau Hari Polis Malaysia, aku sekali tu datai baru deka ngenang enggau ngelansa senentang pengawa polis. Ukai ketegal aku tu tebangkar ba pekara tu tang dikena aku meri basa ngagai raban polis beserimbai enggau Hari Polis taun tu. Tema Hari Polis taun 2022  iya nya Polis dan Masyarakat Berpisah Tiada. Enti dikalihka ngagai jaku Iban kenu ku aku kurang lebih munyi tu – Polis enggau Mensia Mayuh Enda Mudah Beserara. Semaka kalih aku nya enda tentu engkeman barang ku kita mih nyeruri iya nitihka penemu diri.

Pengawa nyadi polis tu endang udah lama dikemeranka di Malaysia. Enti kitai nyidi ke belakang sejarah pengawa polis tu dia kitai beratika pengawa tu bepun enggau Charter Pengerentang di Pulau Pinang dalam taun 1807. Taja pia, nitihka rekod sejarah, pengawa polis tu endang udah bisi maya jeman Sultan Melaka. Maya nya endang udah bisi undang-undang enggau pengawa neritka undang-undang. Taja pia, undang-undang maya nya balat agi ngemeratka undang-undang adat tauka undang-undang syariah. Pengawa neritka adat enggau undang-undang maya nya dipejalaika Temenggung enggau raban hulubalang. Temenggung nya orang ke ngembuan tanggung pengawa nyaga pengelikun menua Melaka nyengkaum kandang istana. Pengawa iya maya nya nangkap orang ke jai, ngaga rumah pasung sereta bejalaika pengawa ngukum orang ke salah. Maya nya mega, kereja enggau tanggung pengawa polis dipegulaika enggau pengawa soldadu.

Nangkan jeman sultan Melaka nya jeman kolonial. Pemerintah keterubah maya jeman koloni nya Portugis. Lebuh Portugis merintah Melaka, pengawa polis tu dipegai bala soldadu Portugis. Udah nya dalam taun 1511, menua Melaka berubah nyadi komuniti kosmopolitan. Berindik ari tu Portugis merintah Melaka ngena siti sistem ke dikumbai ‘sistem kapitan’. Lebuh Belanda ngerampas Melaka ari kuasa Portugis, sida agi ngenanka sistem kapitan nya kelimpah ari ke ngena sistem baru iya nya sistem perintah soldadu. Lebuh orang Eropah nyau majak mayuh di Melaka, dia sida numbuhka siti raban polis ke dikumbai ‘Burgher Guard’. Raban tu betuaika orang Belanda lalu sida ke dibaruh pegai iya nya orang Melaka. Taja pan udah bisi sistem baru, penghulu agi majakka pengawa iya baka ke maya jeman Melayu tradisional. Maya British datai merintah pengawa polis agi dipangku raban Burgher Guard.

Gempung polis moden di Malaysia ditumbuh maya 25 March 1807 asil ari Charter Pengerentang di Pulau Pinang ti dikeluarka perintah British di Pulau Pinang. Sistem polis tu bechuanka sistem ti beripih sereta teratur nitihka sistem polis British. Pengawa baru lalu ditumbuhka ke dikumbai High Sheriff dan Deputy Sheriff. Seduai tu dibantu peranak menua ke diambi bekereja sereta diberi gaji. Nama pengawa sida tu Petty Constable. Pengawa sida tu nyaga pengelikun menua Pulau Pinang. Orang Barat ke diambi mangku pengawa High Constable nadai diberi gaji laban sida dikira mela mensia mayuh. Udah tembu Perang Dunya Kedua dia baru bisi siti aja gempung polis ke dikumbai ‘Civil Affair Police Force’. Perintah British udah nya negapka agi gempung polis tu lebuh penyarut bisi nyadi kelebih agi maya jeman perintah Jipun. Entara penyarut ti bisi nyadi maya nya iya nya pengawa ke dikerugaka raban komunis.

Kena 15 December 1952, Komisioner Polis Tanah Melayu, Sir Arthur E. Young mantaika konsep baru ke dikumbai ‘Bersedia Berkhidmat’ ngambika ulih ngerapitka kaul entara polis enggau mensia mayuh. Konsep lalu dikena nyentukka sehari tu. Lagu polis pan lalu ditempa bepelasarka konsep tu.

Udah nenak kitai ngenangka cherita pasal sejarah polis diatu kitai ngalih ngagai pugu polisi polis. Aku enda nemu berapa iku orang nemu pasal pugu polisi polis tu. Nama pugu pekara alai berindik dikena bejalaika pengawa besehari-sehari? Ke temu aku agi mit kelia nama orang jai tauka anak mit machal sigi ditangkap polis. Kitai agi mit selalu diemba sida ke tuai – ‘anang manchal, tangkap polis lagi’. Nya kiraka jaku tundi aku. Sekeda orang lalu dataika tuai takutka polis ketegal diemba orang tuai. Bisi nya lalu meda polis nya ari sukut negatif. Ke bendar bisi lima pugu polisi polis. Iya nya:-

• Nyaga Undang-undang enggau Pemaik
• Ngenanka Pengelikun Malaysia
• Nyakang sereta Nyidi Orang ke Jai
• Nangkap sereta Nawa Pesalah
• Ngumpul/Matau Penemu Sekuriti (Risikan Keselamatan)

 

Bepelasarka polisi di atas bisi dua akta ke ngerintaika ripih pengawa polis. Akta nya  ulih dipeda ba Seksyen 20 enggau 21 Akta Polis. Ba Seksyen 20 bisi 13 rintai pengawa polis lalu ba Seksyen 21 madahka pengawa polis mega mungkur ngatur enggau nyaga trafik ba jalai.

 

Kuing tuju gempung polis tu chukup manah tang enda ulih dirintaika siti-siti ditu. Taja pan kuing tuju gempung polis chukup manah sereta patut ditan sereta dipejalaika, agi mayuh pekara ba kuing tuju nya ulih dikemanahka agi kelebih agi imej raban polis kemaya hari tu.

 

Kitai ke rayat selama bela ngarapka gempung polis tu semampai ngemanahka agi chara sida mela mensia mayuh ngambika orang enda meda sida ari sukut negatif. Rayat merati sereta nisih raban polis nya nyadi siti gerempung penerit undang-undang ti rentang, amanah sereta mentas. Genap iku pemesai polis dikiraka peninding nyawa enggau reta tengkira sida. Enti polis nya mentas enggau mensia mayuh tentu sida ngasaika kaul ti harmoni sereta stabil. Tu meri pengarap ti tinggi rayat ngagai raban polis.

 

Selamat Hari Polis.    

 

Glosari :

mela mensia mayuh – memberi perkhidmatan masyarakat

nyakang – mencegah/prevent

Ngumpul penemu sekuriti – Mengumpul risikan keselamatan/gathering security intelligence

kuing tuju – hala tuju

 

 

'Radio enggau Pengarap', tema pengerami Hari Radio Sedunya 2022

 

Radio nya medium komunikasyen  ti pengabis lama udah kala diguna mensia kenyau ari jeman perang kelia. Iya agi dikiraka relevan nyentukka sehari tu tang nitihka putar evolusyen ti  dipejalaika setipak enggau ubah jeman kemaya hari. Enda ngira sapa, iya ke bisi kerita ku aku sigi tentu masang radio sida lebuh sida deriba. Lama tauka sekejap nya ukai penyukat orang ke rindu ninga radio. Asal diidupka injin kerita, radio pan terus memunyi. Tu aku bejaku bepelasarka peneleba aku empu.

Betemaka 'Radio enggau Pengarap' ti diungkup pengerami Hari Radio Sedunya 2022, tema tu dikiraka agi relevan enggau penuduk radio nya kemaya hari tu. Kebuah pia, radio semampai betapi enggau mayuh leman penguji  teknologi ke bukai. Enti kitai meratika  bala peninga  dipeda agi ngembuan pengarap milih kelaing radio alai sida ngulihka penerang ti nemban sereta amat senentang sesebengkah perkara. Kitai sama bela nemu kemaya hari tu kelalu mayuh informasyen tauka berita ke selebubu ngapa ke tau meba runding orang ke macha tauka meda pekara nya. Tu ke ngasuh sida peninga mindahka medium sida ngagai siti medium ke mantaika utai ke amat. Nya mih radio.

Hari Radio Sedunya keterubah iya diintu dalam taun 2012 kena 13 Februari. Pengerami tu diatur Gerempung Pelajar, Budaya enggau Saintifik (UNESCO), PBB.

Ngelama ke udah radio semampai berubah ari sukut teknologi, ari sebuat set kutak elektronik enggau spika sereta mikrofon berubah nyadi mayuh macham guna baka ke dipeda kitai kemaya hari tu. Dulu suba radio dikena nyadika medium komunikasyen ari jauh. Indah Guglielmo Marconi kala diangkat nyadi mensia keterubah mujur nganjung signal neresa Tasik Atlantik. Udah nya baru radio nyadika kereban dikena nyadung propaganda perintah maya Perang Dunya Keterubah (WW1) enggau Kedua (WW2) sebedau iya digaga nyadi medium pemerindang kitai kemaya hari tu. Aku agi ingat taun 60an ngagai taun 70an saiz radio endang umbas iya pemesai. Udah nya kala ga aku ninga sereta sempat meda radio ke dikumbai bala Iban radio sandik. Radio nya bisi tali penyandik lalu sigi disandik sida  dibai ke umai tauka kebun. Nangkanka nya, lebuh menua majak mansang, teknologi radio disikap enggau mayuh macham guna ke bukai baka pemain kaset enggau rekoding nyawa, CD, MP3 enggau mayuh penteba ke bukai.

Sepengudah 100 taun ari pun dataika diatu, radio agi ulih beretan sereta mansang jauh ke mua agi. Nithka pansik, agi mayuh peninga ke deka ngulihka sesebengkah pekara datai ngagai  medium radio ambika chunto baka RTM ti udah lama ditumbuhka perintah. Inisiatif stesyen radio ke ngeluarka mayuh macham program ngasuh kelaing  radio nya balat agi  dikearapka nyadi medium nyadung berita enggau informasyen kelebih agi iya ke bisi elemen belajar.

Kelimpah ari elemen belajar, radio ke endang baka selama nyadika kereban dikena kitai merindangka ati, ninga mayuh macham lagu ti ditebah sereta nyadika kelaing alai ngenataika mayuh macham pesan nengah mayuh stesyen. Nya alai, ba penemu aku, radio tu taja pan medium komunikasyen keterubah dikena mensia mayuh tang iya endang agi releven nyentukka sehari tu. Radio udah mujur nerenak pengarap ngagai raban peninga enggau mayuh macham infomasyen ti kenataika sida penabur radio ke mungkur semua aspek pengidup.

Asai aku enda kelalu laun alai aku ngambi peluang tu meri Selamat Hari Radio ngagai bala penabur ba radio kelebih agi sida ke ngelala aku ba Radio Wai FM. Selamat Hari Radio ari Wai Seberai.

Mupuk aku!👲

 22hb March - Pengerami Nama?

Sekali tu aku deka ngenang siti pekara ti bekaul enggau pemerindang. Pemerindang tu mayuh macham. Dalam jaku Iban leka jaku ke semak nerangka reti orang ke ngereja pengawa merindang nya pemerindang lalu dalam jaku Melayu dikumbai penghibur. Ba kenang tu aku deka ngupas senentang  seniman tauka artis. Leka jaku artis ba penemu aku mungkur orang indu enggau lelaki.

Nitihka Kamus Dewan Edisi Keempat, leka jaku artis tauka seniman nya orang ke bisi penau seni lalu ulih nengkebang asil seni sereta ulih mantaika asil seni sida nya,  ambika chunto baka tukang lukis, penyair, penyanyi, enggau ke bukai); bintang filem (lelaki) ke udah lama ngelumaika diri dalam pengawa filem lalu udah datai ba tikas ke tinggi baka P. Ramlee.

Bisi aku kala macha majalah pemerindang dalam jaku Iban, sida ngumbai orang ke ngelumai diri dalam dunya pemerindang nya dikumbai sida retis. Aku enda tentu setuju enggau leka jaku nya lebuh aku tepedaka leka jaku nya laban iya lalu nyadi isu sensitif ba raban bala artis empu. Mayuh raban netizen ngena leka jaku ba komen sida laban baka sempama ga sida netizen tu mudah nitihka pengerarat ai. Nitihka pelakon bekaliber, Beto Kusyairy leka jaku retis nya jaku puntang dikena mensia mayuh sepeneka ati ngelarka artis.  Nitihka Beto mega, leka jaku ‘retis’ nya ukai jaku puntang ngagai leka jaku ‘artis’ baka ke dipelabaka mensia mayuh tang lebih ngagai jaku ke enda tentu manah diinga sereta tau nyimaka ati kelebih agi ati bala artis. (https://www.astroawani.com/berita-hiburan/jangan-guna-istilah-retis-beto-kusyairy-76398). Bepelasarka pansik nya, aku mega milih enda ngena leka jaku nya dikena aku meri basa ngagai bala pemerindang.

Pulai ngagai pugu pekara ti deka dikenang aku sekali tu iya nya Hari Artis Bansa 2022.  Hari Artis Bansa tauka Hari Seniman Negara ngelama tu diintu kena 29 May ninting taun tang berengkah ari taun tu iya  ditukar ke 22 March ninting taun. Ubah hari pengerami nya udah ditaburka Menteri Komunikasyen enggau Multimedia Malaysia (KKMM), Tan Sri Annuar Musa sereta udah dikemendar dalam  Memorandum Kabinet Menteri.

Haribulan nya diubah beserimbai enggau hari pengada Niang Tan Sri P Ramlee, siku artis ke tebilang tampak rita. Dipelabaka aku nadai enda orang nemu sapa P. Ramlee tu. Signifikan ubah haribulan pengerami Hari Artis Bansa nya dikena ngingatka pengawa enggau asil ke udah  dienjukka P Ramlee dalam industri kreatif ba menua tu.

Kelimpah ari ngangkat karya tauka karang P Ramlee ti ukai semina mujur ngasilka mayuh orang ke tebangkar ba industri kreatif tang mega ulih mantaika Malaysia ba mata dunya. Hari Artis Bansa  ke diintu nya mega ukai semina dikena ngingatka servis enggau pemeri ari artis besai menua kitai tang iya mega nyadika menasan dikena negapka pengawa seni sereta budaya.

Nambahka nya mega, Hari Artis Bansa tu diintu dikena nerima sereta ngangkatka pengelati pengawa sida ke regas ba industri kreatif ti bisi dalam bidang seni. Berindik ari nya, Hari Artis Bansa tu mega diintu dikena ngangkat pemereti ati enggau apresiasyen  mensia mayuh senentang tanggung pengawa seni budaya dalam ngasilka komuniti Malaysia ke ngembuan  identiti diri sereta ulih nerima seni budaya enda ngira bansa dalam Malaysia.

Beserimbai enggau Hari Artis Bansa tu, KKMM mega ngembuan juluk ati deka ngerapitka kaul sereta ngaturka kerejasama strategik enggau raban stakeholders lebuh ke ngatur pengerami tu.

Nya alai, ba penemu aku ulah ke nerima asil seni patut bendar diterenak dalam peranak menua dikena kitai sama-sama ngangkat sereta mantaika asil karya lokal ti ngembuan rega ke tinggi. Nya kebuah, kenu aku nadai salah kitai mega ingat sereta ngenang bala artis Iban ke enda putus-putus nyadaka nyawa sida merindang kitai semua ngelama ke udah.

Mupuk aku! 👲

 

Hari Ai Sedunya 2022

Hari Ai Sedunya (World Water Day) diintu kena 22 March ninting taun. Haribulan tu udah ditetapka PBB kena 22 December 1992 maya Aum Rama PBB ke-47 di Rio de Janeiro, Brazil.

Hari Ai Sedunya diarapka ulih nerenak pengerindu mensia mayuh senentang pemesai guna ai. Kebuah pia, Hari Ai Sedunya diintu dikena ngingatka mensia mayuh serata dunya ngambika semampai ngiga akal chara ngetanka pun penatai ai. Dalam pengidup besehari-sehari, kitai suah enda ingatka pemesai guna ai. Nya alai, bisi sekeda orang endang dipeda menyati ai, ngamahka ai sereta ulah negatif ke bukai.   

“Groundwater: Making the invisible visible” udah diangkat PBB nyadika tema Hari Ai Sedunya taun tu. Ai dalam tanah nyadi fokus pengerami taun tu. Taja pan iya enda dipeda tang iya besai bendar guna ngagai utai idup. Iya ngenanka ekosistem, ngenanka pengelilih ai ba buntut sungai sereta nagang tanah ari tengelam lalu nagang ai tasik tama ngemenuhka sungai.  Ai dalam tanah nya sebagi ari proses ngubah klimet sereta dikena mutarka penanggul ungkup  orang ke nadai akses ngagai ai ti likun.

Tuju Pemansang Sustainable tauka  Sustainable Development Goals(SDG) mungkur 17 tuju bukai ke dibantaika Gerempung Bansa-Bansa Besatu dalam Aum Besai PBB kena September 2015, di New York, Amerika Syarikat. SDG tu dikena ngulihka juluk ati dalam 2030 iya nya agenda pemansang enggau pengelantang pendiau manesia enggau Bumi ngambika pengidup jemah ila nyamai sereta manah agi ungkup  semua. Berindik ari nya, SDG mai “transformasyen dunya kitai” iya nya dunya ti lepas ari penyeranta, keberuran, penyakit enggau perengka guna besehari-sehari ke alai semua utai idup ulih mansang. Taja pia tuju nya jauh ngelui ari nya laban iya mega mungkur pengawa nyaga rampa menua, pelajar enggau kuasa ke sama  sereta ekonomi ti tegap sereta stabil.

Malaysia nya sebengkah ari menua ti komited enggau tuju tu lalu iya idah ngatur ripih pengawa dikena bejalaika strategi SDG lalu  numbuhka Perambu Indu Teknologi Ijau (GTMP) dalam taun 2017. GTMP ngembuan tanggung pengawa ti berat nyapai tuju  SDG, baka Tuju ke-6 (ai beresi enggau  sanitasyen), Tuju ke-7 (energi ti beresi sereta patut), Tuju ke-11 (bandar raya enggau komuniti ti tegap), Tuju ke-12 (guna enggau asil ti betanggungjawab) enggau Tuju ke-13 (Pengawa Bekaul enggau Klimet).

SDG 13 nya ripih pengawa dikena nyaga klimet. Iya enda ulih enda ngerunding bepelasarka  pemansang global kemaya hari tu. Pengawa nyaga klimet mesti dipegulaika ke dalam polisi, strategi enggau perambu menua. Kebuah pia, guna ai kemaya hari udah lebih ari pemansang pemayuh tubuh mensia di dunya. Amat mih penyampau mensia kemaya hari tu nyau banyak baka lemetak tinting kalang, mayuh baka beluh danau langkang tang setengah ari peranak  bumi  nya diatu tentu bisi ke betapi enggau penanggul nadai ai enda kurang ari sebulan sekali dalam setaun. Kitai mega suah napi penusah lebuh guna ai ditekat kelebih agi maya   musim kemarau. Akses ngagai ai, sanitasyen enggau pemeresi nya hak tauka kuasa genap iku orang. Taja pia agi bisi bebillion iku mensia diatu napi penusah enggau penguji ketegal deka ngulihka ai. Hal tu ulih dipeda kitai ba menua di Sub Afrika enggau kandang menua pesisir nyengkaum komuniti ke kurang benasit manah di Malaysia.

Nya alai, dikena aku nyimpulka kenang aku sekali tu senentang Hari Ai Sedunya, aku mai kitai sedada sama seati ngintu pemeresi ai baik nya ai sungai tauka ai paip sereta ai ari pun penatai ke bukai. Enti ai kitai kamah, nama mih ke ditinggalka kitai ngagai sida uchu ambu enggau utai idup kitai jemah ila? Uji perundingka dia mih. 

Mupuk aku! 👲

Glosari :

ai dalam tanah – ground water / air tanah

buntut sungai – river bed / dasar sungai

ai ti likun – air selamat / safe water

GTMP - Green Technology Master Plan

ditekat – dicatu / rationing

 

Nadai Pengaga Ati Enti Nadai Pemaik

20hb March ninting taun dunya ngintu Hari Pengaga Ati Antarabansa tauka Happiness Day. Tema Hari Pengaga Ati Antarabansa  taun 2022 iya nya “Build Back Happier” tauka enti dikalihka ngagai jaku Iban kurang lebih munyi tu – ‘Ngambi pulai pengaga ati’. Bah baka ni enggau hal nuan enggau aku dih? Katika dua taun ke udah tu udah mujur ngubah kitai sebuat?

Katika pengaga ati nya agi meruan ngembuan reti ti sebaka baka ke diasaika kitai dulu suba? Ulih kini pengaga ati nya dibeli kitai enggau duit ringgit? Dalam komuniti materialistik sereta dipansal pengguna kemaya hari tu nyau deka semua utai ke ba dunya tu bisi rega iya empu. Ari beranakka puku bejuta-juta lalu ngena token ngagai pengawa nepan kapal singka miga, duit nyau nyadi utai ke mayuh guna dikena ngulihka mayuh macham pengingin.

Lebuh pengidup kitai berubah, prioriti enggau nilai idup kitai mega berubah. Mayuh ari kitai puas ati deka bempuka rumah, bepengerai, bisi pengawa ti meruan sereta ulih nyediaka utai ungkup guna orang bukai. Nya udah nyadi berekat.

Bah, dini endur kita bulih pengaga ati? Katika bisi kini di Amerika Syarikat, menua ke pengabis kaya di dunya? Tauka di Finland, ti dirintaika nyadi menua ke pengabis gaga dalam Ripot Pengaga Ati Dunya Gerempung Bansa-Bansa Bersatu (PBB)? Katika enggau menua  Bhutan dih, ti nyukat pemansang sida ngena Indeks Pengaga Ati Menua Kasar lalu ukai bepelasarka Pengeluar Dalam Menua Kasar(KDNK)?

Kada enda iya bisi dalam metaverse? Ditejal ke dalam rampa ilusyen ngambika ulih ngelarika diri ari bansu tauka stress, kitai ulih nyadi nama-nama utai tauka ngereja nama-nama utai ba dalam nya. Taja pia, realiti iya ke bendar nya pengaga ati nya minda tauka runding kitai empu. Nadai ngira dini nuan endur nuan. Iya bepanggai ba kitai empu. Iya bisi dalam tubuh kitai empu.

Baka ni chara  kitai ngulihka pengaga ati? Nama definisyen gaga? Nama reti gaga dalam konteks kitai bejaku pasal Hari Pengaga?

Kenyau ari orang Yunani, raban filosofi udah lama berundingka hal nya, tang nyentukka sehari tu saut tetap enda ulih diperetika orang. Nyangka saut kelalu abstrak sereta mar diperetika mensia selama. Katika kitai ngarapka kurikulum moden — baka coding tauka sains, teknologi, injinir enggau matematik (STEM) — dikena kitai mutarka pengawa nya? Bisi datai dia kini runding sekeda ari kitai?

Mensia dekaka diri gaga tang pengaga ati  ukai utai ke datai enggau muntang baka pengelabuh buah embawang. Enda ngira nama pekara ke digaga kitai, enti deka idup enggau ati ti gaga kitai mesti bisi pengelandik. Iya begunaka kitai bekereja sepemanjai maya belajarka pengelandik nya. Mayuh bepanggai ba chara kitai meratika sesebengkah pekara tauka nimpai utai ke nyadi.

Kitai berasai teperasa enti asil utai ke dipelabaka kitai nyadi enggau realiti utai ke nyadi nya bebida. Pelajar  tentang chara  ngubahka diri enggau mutarka penanggul endang nadai diajar di sekula. Sekula dipeda aku diatu dipejal kepala pengajar bala nembiak ngulihka gred A aja.

Nya mih, arapka utai ke udah nyadi beberapa taun ke udah sekumbang pandemik tu enda tebasau pia aja. Taja pan kitai enda nemu utai ti deka nyadi pagila lusa, pengaga ati ada ari kitai ke meruan beterima kasih ketegal ulih napi maya tu.

Pengidup ulih nyadi bebalut sereta tusah tang  pengelantang nya ulih dijapai indah enda dalam pekara ke dikira muntang. Pengaga ati mega ukai pasal diri empu aja. Maya bisi penusah, enti kitai nemu bisi orang ibuhka kitai nya mega tau dikiraka udah udah chukup manah.

Kepenudi sekali, ati enda ulih gaga sengapa enti nadai pemaik.

Dalam dunya ti penuh enggau perang sereta konflik, aram mih kitai sama ngangkatka jari besampi lalu nguji ngulihka pemaik nyadi juluk ati ungkup semua orang. Nyangka agi bedau kelalu laun alai kitai beandi-andi sereta bemimpika pekara nya.

Nya alai, baik ga aku ninggalka kitai sebuat enggau genteran leka lagu ari John Lennon ti chukup dalam reti iya ba aku ke benama Imagine:

"You may say I'm a dreamer,

But I'm not the only one.

I hope someday you'll join us,

And the world will live as one."

Mupuk aku! 👨

 

Fokus ngagai chara pengabis manah dikena ngajar enggau belajar

 

Fokus ngagai chara pengabis manah dikena ngajar enggau belajar

Ninting pagi, aku nerima mayuh macham mesej nengah WhatsApp. Tetiap iti jaku pesan nya bebida ari ke siti ngagai ke bukai. Bisi nya nyelai, bisi nya tau ngeringka semengat, bisi nya mega bansa ke ngelugi ngasuh ketawa. Genap mesej pagi dikenataika bala ba ruai Whatsapp endang aku bacha magang.

Pesan sida tu mai pengelantang enggau pengeransing ngagai aku napi pengawa besehari-sehari. Aku beterima kasih ngagai semua ke ngenataika pesan ninting pagi lalu ngaga iya nyadika siti peluang dikena aku bekunsi enggau orang bukai sereta bala bakih aku. Siti ari pesan pagi ke kala ngeruga ati iya nya ditulis dalam jaku English munyi tu "If you are stressed, you get pimples. If you cry, you get wrinkles. So, just smile and get dimples." Enti dikalih ngagai jaku Iban tentu enda tentu puitis munyi iya tang ayat nya kurang lebih munyi tu, “Enti nuan stress, nuan bulih semua. Enti nuan nyabak, mua nuan ga bekerutu. Nya alai, tak tuchum lalu nuan deka ayan lubang pemula nuan.”

Pesan baka nya chukup ngasuh aku teperindang. Baka selama aku begaut bekunsi pekara ke manah nya enggau bala bakih ke semampai bebuti ba ruai whatsapp enggau raban bakih ke bukai. Siku pengajar nimbal aku madahka iya rindu macha pesan nya. Iya meri respons dalam jaku English, “Thank you. Spit on.” Lebuh tebachaka respons iya keterubah nya aku tekenyit tang  udah nya aku nemu tunjuk jari iya udah salah natuk pad kunchi telefon iya ungkup leka jaku "spot on". Enti kitai beratika papan kunchi telefon binching kitai urup "I" enggau "O" endang berimbai entara pangan diri. Spit on enggau spot on jauh bendar bida ari sukut reti.

Dipelabaka aku laban iya ke pengajar dia iya jampat tepedaka penyilap diri empu lalu beguai ngemetulka penyalah nya sereta minta ampun. Latih nyadi pengajar nya ke udah nempa iya nyadi orang lelaki tulin. Pelaba aku mih.

Lengkaka dulu isu tu enda lama sesempa leka pinang. Pekara ke deka dikupaska aku sekali tu nya bekaul enggau pengawa ngajar enggau belajar. Taja pan udah 14 taun ninggalka batang pengawa ngajar tang iya semampai semak ba ati aku, semampai bisi pekara ke deka dikenang.

Dalam bup, The Aristocracy of Talent, ditulis Adrian Woodridge bisi mansik pasal chara ngiring ngembing mensia mayuh ke jalai tinggi ke universiti elit enggau pemujur profesional. Baka nya mega ba penemu aku, dikena ngemunka pengawa belajar, sekula patut  nentuka chara sida milih nembiak. Iya patut bendar bepelasarka danji jemah ila lalu ukai nya bepelasarka pengilir kemaya hari, diansah nitihka pemansang kemaya hari.

Tisih pengulih meratika nembiak ari belakang, ngasuh chara milih nembiak nya tepawah ngagai milih nembiak ke diintu sereta diajar enggau manah aja. Taja pia, sida ke milih nya mega betapi enggau risiko nembiak ke udah leju sereta lelak belajar laban ke seruran diiri enggau penemu kenyau ari sida agi mit. Nya kebuah, suah kitai meda sida tu lebuh udah besai suah jelungan ngereja mayuh macham pekara sepemanjai pengidup sida.

Pekara ti ditemu baka nya sigi tau narit ati. Iya meri penerang tentang chara ngauk utai ke pengabis manah ari individu, lalu udah nya terus ngiri ngagai kohort  serak nembiak rebak baru jemah ila.

Pengawa ti berat baka nya tadi patut bendar dilempai ngagai tukang tarak profesional, pengajar, raban ke tebangkar enggau opis menteri baik nya KPM enggau KPT. Chara ti pengabis manah dikena ngajar enggau belajar nya beguna agi ari pekara ti deka diajar enggau dipelajar. Menua maju di dunya ngembuan sekula enggau universiti ti pengabis manah.

Ambika chunto, iya ke bisi ayan ba runding aku diatu iya nya Oxbridge enggau universiti Ivy League. Nya kebuah, menua ke megai kunchi ngagai reta tengkira bekaul enggau pelajar mega megai kunchi ngagai pengidup jemah ila ke manah agi tauka lebih manah munyi ku jaku bala Iban kemaya hari.

Berindik ari nya, arapka mayuh agi orang ke tebangkar betungkapka pasal aspek tu. Palan pelajar tinggi nya mih ke mai penampak ngagai pengadang kitai, nyadi pemai kayu tenggau meritokrasi enggau pengelati ba bidang pelajar.

Kepenudi iya, anang enda ingat, modal mensia kitai nya mih aset menua kitai. Kitai mesti semampai ngidupka baru sida nembiak rebak baru ngambika menua kitai semampai lantang.  

Mupuk dulu aku. 👨

Glosari:

semua /semua’/ - pimples/jerawat

lubang pemula – dimples/lesung pipit

kayu tenggau – obor/ torch

ngidupka baru - rejuvenate and revitalise

 

 

Entara Dikena enggau Disayau

Dipelabaka aku kala kita macha artikel ke deka dikunsika aku tu lagi tang artikel iya asal iya ditulis dalam jaku bansa bukai. Artikel tu bisi kaul enggau siti cherita ti chukup nuchuk ati sereta nyelai mimit nyangka tau mega ngerugaka ati kitai ke macha nya. Cherita iya munyi tu:

Bisi sekali siku lelaki benung nuchi kerita baru ba laman rumah iya. Maya ke nuchi enda mukai-mukai anak lelaki iya ke berumur empat taun lalu ngambi siti kerimpak batu lalu ngurikka batu nya tadi ba tisi dinding kerita apai iya.

Lebuh tepedaka pekara nya, enggau naka pemedis ati, lelaki nya lalu ngeranggam jari anak iya sereta diempaska iya enggau naka alah tang iya enda nemu iya musin sereta mulas jari anak iya enggau penapat-inat.

Udah nya, anak nya lalu ditaban ke hospital. Di hospital, anak nya putus semua jari laban kelalu balat patah. Nyadi lebuh anak nya meda apai iya nyabak sereta labuh ai mata, iya lalu nanya, “Apai, kemaya jari aku tu tau tumbuh baru?” Ninga tanya nya, apai iya padam sedu sereta enda tepansutka jaku. Iya bejalai ke belakang pansut ari hospital lalu nendang kerita iya kena iya mantupka ati diri. Nesalka pengawa diri,  iya lalu duduk ba luan kerita sambil beratika bekau urik anak iya nya sehari nya. Iya tepedaka sebaris ayat ke munyi tu – ‘Love you dad ‘ .

Hari siti lelaki nya diberitaka lalu munuh diri.

Raban pemacha blog tu, ba penemu aku, pengeringat enggau pengerindu endang nadai tatak. Tang taja pia, pilih mih pekara tauka utai ti tau mai pengelantang. Pelaba aku mayuh bala besetuju enggau aku madahka utai tauka barang endang patut dikena lalu mensia sigi patut dikesayauka. Taja pia enti kitai meratika rampa ke ngelingi kitai, kiba kanan kemaya hari tu, suah agi kitai meda mensia nya dikena tauka diguna orang lalu ukai agi dikesayauka. Enggau nya aku nutupka kenang aku ngena genteran jaku di baruh tu:

Bepikir mih enggau panjai. Utai tauka barang endang patut dikena. Mensia patut dikesayau. Peratika runding nuan laban iya deka ayan nyadi jaku nuan lalu jaku nuan nya tau berubah nyadi pengawa nuan. Ari pengawa nuan nya iya tau nyadi ulah nuan lalu ulah nuan nyadika tebiat sereta perangai nuan. Perangai nuan nya mih ti nentuka nasit nuan diatu enggau dudi hari ila.

Mupuk dulu. Betemu baru.😏