Tempa dinding sosioekonomi ti komprehensif napi ‘renyang umur’.

 

Tempa dinding sosioekonomi ti komprehensif napi ‘renyang umur’.

Dunya benung nujah ubah demografi dramatik ke dikumbai aku ngena rambai jaku  'renyang umur'. Trend umur pengani dunya ke majak tuai nyadika buah kenang aku kesekali tu laban isu tu betukuh global lalu begunaka perambu ti silik dikena napi pekara nya.

Isu penyampau raban orang ke majak tuai ti nambah seruran dikerandauka enggau elemen bukai baka penambah penyampau timpuh rayat ti idup, penurun penyampau sida ke peridi enggau penyampau sida  ke mati.

Nitihka Gerempung Bansa-Bansa Bersatu (PBB), penyampau peranak tuai dipelabaka nambah dua kali lipat dalam taun 2050 enggau tiga kali lipat ba taun 2100. Malaysia nya entara menua ke ngembuan peranak iya ti majak  tuai sereta dipelabaka lebih 15 persin ari penyampau populasyen nya deka nyapai umur 60 taun ke atas ila. Raban ke anda dalam hal tu bepenemu madahka COVID-19 nyangka tau ngasuh menua nyapai status tu tumu agi ketegal trend penyampau nembiak mit ke ada mega majak nurun.

Ba menua kitai, perintah udah nempa sekeda polisi rama dikena napi isu tu baka Dasar Warga Tua Negara 1995, Dasar Kesihatan Warga Emas 2008 enggau Dasar Warga Emas Negara 2011. Pugu objektif tu nuju ngagai pengawa nyediaka servis ti mentas orang tuai, semitan sereta lanchar agi ngambika rampa alai diau sida mega nyukung pengelantang pengidup sida.  

Menua ti bisi penyampau tubuh orang tuai ti tinggi deka meri empas ngagai mayuh bengkah sektor baka sektor pengerai, alai diau, servis finansial, perambu bandar enggau servis sosial.

Sekeda ari penguji ti ditapi nya nyengkaum belanja perintah ti betambah dikena ngangkatka peminta dalam pengawa nyaga pengerai infrastruktur enggau pinchin. Menua nyangka deka betapi enggau pengurang chukai ti digumpul enti  populasyen rebak baru mega majak kurang. Penyampau orang tuai ke majak mayuh mega tau ngasuh belanja mina pengawa perintah mega niki. Tu tau ngujungka perintah dipejal nginjau duit sekalika ari dalam tauka menua luar enti agih belanja mayuh agi diguna ba kos dikena nyamin pengelikun peranak tuai.

Sekeda ari pengirau ati ti patut diperatika nya bekaul enggau duit penabat dikena napi pengidup jemah ila. Individu ti nadai tauka kurang duit simpan maya sida tuai ila deka betapi enggau penanggul ke besai, nyengkaum  orang ke bekelingi enggau sida.

Mayuh rayat Malaysia agi kelalu bepanggai ba Gempung Wang Turu Pengereja Pengawa (KWSP). Taja pan pia, sebagi ari duit simpan nya dikemendarka perintah ulih dipansutka sida dikena meli rumah enggau ke guna ba bidang pelajar. Tebiat rayat Malaysia mega patut seriran enggau pemansang menua. Enti deka nyadi menua ti maju, ulah ke bebasaka orang tuai patut balat agi dikemeranka sereta diterenak ba nembiak rebak baru.

Enti diperatika ari sukut global, ngemansangka komuniti orang tuai udah nyadi tuju mayuh bengkah menua di dunya kelebih agi baka menua Jipun. Menua tu tebilang enggau penyampau peranak tuai ti  tinggi, iya nya 25 persin peranak iya ke berumur atas 65 taun lalu dipelabaka  nambah ngagai 40 persin (2060). Menua tu mega suah betapi enggau penusah kudi tang sida diperatika udah besedia napi segala macham pekara ti deka nyadi. Jepun mega ngadaka Long-Term Care Insurance. Tu pelin insurans mungkur semua pekara sereta bayar ti patut ungkup rayat ke berumur 40 tahun ke atas. Sida dipinta mayar premium nitihka gaji.

Ketegal kos ngidupka diri dipelabaka niki dia pengawa nyediaka kaul pengelikun  sosial mega beguna amat. Tu nyengkaum ngemendarka peranak tuai ti gerai nyamai sereta mayuh peneleba terus bekereja baka selama. Raban sida nya patut semampai regas dikena nyaminka pengelantang sepengudah sida pinchin laban sida diperatika agi ulih mela sereta ngenjuk servis sida baik ba sektor formal tauka ukai formal.

Pengerai nya pugu isu, kelebih agi lebuh umur udah manggai 60 taun. Nya alai perintah dipinta nyediaka pengawa meresa pengerai ninting taun ti enda bebayar sereta pengawa berubat di hospital perintah ungkup peranak tuai.

Local authority (PBT) mega patut nentuka bangunan enggau infrastruktur rama ti digaga nya engkeman enggau guna raban ke patut diperatika baka sida ke tuai. Pia mega, Sektor prebet mesti bekerejasama ngaga infrastruktur ti mentas umur dikena napi peranak menua ke majak tuai.

Endang amat, penyampau peranak menua di menua tu ke majak betambah sigi enda ulih diseliahka. Taja pia, patut bisi ulah ke bekunsi  tanggung pengawa entara perintah, prebet enggau mensia mayuh. Genap iku orang deka neresa fasa umur tuai lalu sida tu bisi kuasa nerima bela ti manah ketegal tiap utai ke nyadi kemaya hari tu ukai segenda datai pia aja enti ukai ari korban ti udah digaga sida dulu ari kitai ngelama tu.  

Glosari :

renyang umur – gempa usia

peranak tuai – warga emas

penusah kudi – bencana (alam)

Mayuh agi nembiak sekula teruan enti PdPR dipejalaika baru

 

Mayuh agi nembiak sekula teruan enti PdPR dipejalaika baru

 

 

DIPELABAKA aku kitai semua nemu Opis Menteri Pelajar (KPM) semampai ngiga jalai ti pengabis engkeman ngambika sesi besekula terus dipejalaika enggau lanchar. Nya kebuah, enda milih nama penatai varian tauka kluster baru semua nya bepanggai bendar ba diri empu. Sida ke meruan nyadi terabai menua sigi patut nitihka prosedur operasyen standard (SOP) ti udah diaturka perintah.

Pengawa Atur Mindah Betagang (PKP) nundaka raban pengajar sebedau tu diperatika ngasuh mayuh nembiak majak tinggal dalam pelajar. Kitai endang nemu mega perintah patut bejalaika PKP laban kes COVID-19 ti tinggi, tang ba awak ke sama patut mega lansik meratika enggau silik ukai mayuh nembiak ulih enggau PdPR di rumah lalu persin sida ke enggau mega chukup mimit.

Sida nembiak ke kurang agi nemu, lalu terus lesap ari radar lalu meri dalih madahka diri nadai gajet dikena enggau PdPR tauka suntuk duit dikena meli top up. Taja pia, ba kitai ke nemu semua jaku sida nya semina kedalih sida aja. Lebuh perintah meri bantu ti patut, sida mega enggau orang bukai bela ngambi bagi, tang iya diguna sida munggah nurun mayuh leman software ke dikena bemain.

Ba sida ke bepenatai pemisi ti baruh hal penanggul bekaul enggau nambahka data sigi amat. Sida mesti masuk kelas ninting hari lalu pia mega  data mesti ditambah nitihka guna. Pekara baka tu dipikirka enda mayuh berubah sema PdPR dipejalaika baru. Mayuh agi nembiak ke patut diiring diembing deka tinggal ari pengawa belajar.

Udah puas ke meratika pekara tu, aku empu endang enda besetuju enti PdPR tu dipejalaika baru. Kitai enda nemu dini endur bala nembiak maya sida ke  patut iya masuk ke kelas. Kadang-kadang sida sebilik empu pan enda tentu deka meri kerejasama ngagai pengajar.

Enti diperatika ari sukut nembiak ke sekula, sida nembiak endang diberi sekula kemisi ungkup kes COVID-19, tang bisi sekeda nembiak nyau enggau apai indai sida raun kin kitu maya timpuh kemisi nya.

Lebuh diasuh pulai belajar ke sekula, sida tu mih ke berisiko mai igi penyakit tu ngagai nembiak bukai. Lalu lebuh kes tu niki baru dia PdPR pan dipejalaika baru mega. Taja pia, nemu tauka enda bala apai indai tanggung pengawa ti patut ditapi sida? Utai ke nyata ditu, nya bisi sekeda orang beambi ulih ari semua pekara tu.

Aku endang enda bangat setuju enti PdPR tu dipejalaika baru laban nya semina muai jam bala pengajar, ngasuh sida lelak lalu mimit pan nadai mai asil laban agi mayuh nembiak ke agi enda nemu utai ti dipelajarka sida.

Kitai bala ngarapka KPM ulih bepikir enggau rasional agi enti PdPR deka dipejalaika baru laban kitai bela nemu ari sukut realiti iya endang nadai mai impak ti engkeman ngagai nembiak kelebih agi sida ke ba sekula primari.

Mupuk aku. 😐