Nama kebuah kitai begunaka Agama?

 

Nama kebuah kitai begunaka Agama?

Sekali tu aku berubah pindah ari ngenang pekara selama ngagai pekara ti jarang dikenangka orang mayuh laban kenu ku orang iya tau nyima sekeda orang ke macha tauka ninga pekara nya.

Siti ari topik ti sensitif amat dikenang sereta dirandau ba mua mayuh iya nya pekara ti bisi kaul enggau agama. Pelabaka aku tentu bisi orang nanya nama kebuah aku ngena leka jaku agama lalu ukai leka jaku pengarap. Nitihka penemu Vinson and Joanne Sutlive ba bup seduai iya Handy Reference Dictionary of Iban and English  1994, ngalihka leka jaku religion nya ngagai jaku Iban iya nya agama tauka ugama. Kebuah aku enda ngena leka jaku pengarap ba kenang aku ditu laban leka jaku pengarap nya balat agi mai reti faith enggau trust dalam leka jaku English tauka iman tauka kepercayaan dalam jaku Melayu.

Munyi ku aku ari pun tadi isu pasal agama endang iya sensitif amat. Enti salah patah tau ngujungka kitai kena pangka undang-undang kelebih agi enti iya bisi nyimaka ati  orang bukai.

Nama kebuah aku ngupas isu pasal agama?

Dalam orang berumpak nuju pengelantang, agama nyadi siti ari pemutus runding tang naka mih penyinu ati lebuh mensia mayuh dipeda nyau makin mansang sereta maju tang seraya enggau nya sida mega majak ngenyauhka diri ari agama.

Nama penyadi enti runding kitai terebai jauh ke bukai?

Keterubah, orang nya nyadi individualistik. Sida deka mayuh agi berunding pasal diri empu aja sereta enda ibuhka orang bukai. Ambika chunto, hal tu selalu nyadi dalam seminar ke alai pemakai disediaka ngena chara buffet. Sida ke bebaris ba belakang suah agi ke enda ampit pemakai laban sida ke ba mua nya ngambi asi enggau lauk nyau penuh pinggai indah enda baka Bukit  Kinabalu.

Chunto kedua iya nya maya pandemik bisi orang Samaria ke manah ati ngengkahka talam telu ba tisi jalai ngambika bisi diungkupka siti famili. Taja pan atur baka nya tang bisi mega famili ke ngambi lebih ari siti talam. Sinu ngenang tang nya utai ke ku aku sigi kala nyadi.

Enggau pemai ulah ke individualisma lalu ngujungka nyelediung sereta ngenusurka elemen moral. Pengawa ke salah baka majau enggau makai suap udah nyadi pekara ti tebalan dikereja sekeda orang. Ninting hari kitai labuh jauh ke dalam lubang penyai.

Bah baka ni agama ulih mantu kitai?

Kompas moral

Keterubah, agama fungsyen iya baka kompas moral. Uji keingatka tu. Enti nuan ngayanka pengerindu nuan ngagai Tuhan sereta ngagai orang bukai ke ngelingi nuan dia nuan ngasaika ulah ngemediska ati orang tauka meruan ngaga utai ke enda manah nya   pekara ti kepenudi ba runding nuan ketegal sistem pechaya mih ti deka madah ngagai kitai, kitai enda ulih sengapa kada ngereja nya laban Tuhan semampai meratika kitai. Kitai mega nyadi orang ke liat ati, lubah ringat, sereta mentas lalu ngembuan ati ti penuh pengasih.

Runding ti Tenang

Enti kitai arapka Tuhan nya sigi bisi, kitai sigi selalu besampi sereta ngiga pengelantang ati. Suah kitai napi penguji. Runding sereta semengat kitai lelang enda temu tunga lalu kitai empu pan baka orang ke tesat. Ngemedungka diri besampi mai pengelantang ngagai tubuh sereta runding ti tuchi.  

Semampai Beterima kasih

Suah amat kitai ngasaika diri tusah deka nyebut terima kasih. Kitai suah agi meri fokus ngagai utai ke nadai ba kitai, ngayanka serebana diri. Reti nya kitai lubah agi deka bekiraka berekat ti diterimaka kitai ninting hari. Tang enti kitai arapka Tuhan, kitai deka belajarka chara ngenataika terima tauka nyebut terima kasih ngagai Tuhan enggau ngagai orang bukai.

Dikena aku ngeraupka penemu aku pasal agama ku aku kitai mesti nyadika agama nya sesebengkah utai ti berat amat nadai ngira nama agama kitai baik nya Hindu, Islam, Kristian tauka agama bukai. Agama mesti bisi mai pemanah ngagai kitai enggau ngagai orang bukai. Reti nya, kitai mesti ngemeranka pekara ti diberitaka dalam agama kitai ngambika kitai semampai ngereja pengawa ti badas. Ari ke ngembuan agama kitai ulih ngasaika pemanah, pengerindu enggau pengasih.

 

Ulih tauka enda kitai idup enti nadai telefon pintar, FB enggau WhatsApp?

 

Ulih tauka enda kitai idup enti nadai telefon pintar, FB enggau WhatsApp?

Bisi klip video bedau lama viral sereta ngayanka randau media pengarang berita enggau sekeda atlet tenis indu antarabangsa beserimbai enggau siti pekit tenis Grand Slam. Dalam randau nya, bala atlet ti dikerandauka pengarang berita ditanya senentang pekara tauka barang ti enda ulih enda dibai sida maya sida mindah kin kitu. Ari randau nya, nyau deka semua lima atlet tenis nya bekunsi saut ti sebaka iya nya  telefon binching!

Kemaya hari tu, bejuta-juta mensia dipelabaka bekunsi saut ti nyau deka sama enggau atlet tenis nya laban telefon pintar ukai agi dikumbai gajet kena bekangauka pangan diri aja.

Telefon pintar diatu nya sebengkah ari kereban dikena kitai nemu mayuh leman informasyen kemaya hari, dikena ngulih mayuh bansa pemerindang, alai bebelika mayuh macham utai, bekereja sereta dikena ngerapitka kaul kitai enggau orang bukai  dalam komuniti dunya virtual.

Apin lama ke udah ambika chunto sekayu dunya begau ketegal sekeda ari aplikasyen  enggau media sosial jai sereta enda ulih diakses mensia mayuh. Tu mega nyengkaum raban pengguna ba Malaysia. Mayuh orang mutap ketegal utai tu nyadi maya tengah malam. Aku empu pan enda mukai-mukai meratika semua mesej di WhatsApp ba telefon enda ulih dianjung lalu mesej bukai pan nadai tama ngagai enggi kitai. Hal tu nyadi kira-kira jam 12.30 tengah malam.

Nyau hari siti baru nemu berita madahka bisi penanggul ba sistem lalu tu nyengkaum media sosial Facebook enggau Instagram. Penanggul pejalai aplikasyen  enggau media sosial ke diempu Mark Zuckerberg sepengelama beberapa jam nya ngasuh mensia mayuh mindah pengasai ati sida ngagai  Twitter. Tu mih ke ngasuh leka jaku WhatsApp enggau  #Facebookdown nyadi trending. Bepelasarka berita ke aku bacha naka lemai Hari Dua nya sehari nya, leka jaku WhatsApp udah dichiap sepemayuh 7.34 juta kali baTwitter.

Tu ngujungka aku bepikir, enti semina beberapa jam mensia mayuh udah begau sekayu dunya, uji kitai berunding ulih tauka enda kitai idup enti nadai telefon binching, Facebook, WhatsApp enggau internet? Pikirka dia mih saut kita, enda ibuh madah ngagai aku. 🤔

Udah besediaka kitai?

 

 

Udah besediaka kitai?

Manuk tuai, ngaga pansuh chukup nyamai... nya tibak ari leka lagu ‘Lauk kitai’ ke dibai penyanyi Urai. Taja pan enda gramatis munyi genteran nya tang ukai nya ke deka dikenangka aku sekali tu. Kenang aku sekali tu bisi kaul enggau leka jaku tuai iya nya orang tuai enggau menua tuai. Aram kitai sama beratika nama isu ke bekaul enggau tuai.

Tanya keterubah nya nanyaka reti ‘menua tuai’. Nitihka Wikipedia menua tuai bepun ari pemayuh orang ke tuai umur ba sesebengkah menua. Population ageing is a shift in the distribution of a country's population towards older ages and is usually reflected in an increase in the population's mean and median ages, a decline in the proportion of the population composed of children, and a rise in the proportion of the population composed of elderly  (https://en.wikipedia.org/wiki/Population_ageing).

Menua kitai Malaysia dipelabaka bulih status 'menua tuai' lebuh iya ngampir taun 2030 ila. Maya tu ila, 15.3 persin ari  penyampau rayat Malaysia deka berumur 60 taun ke atas. Bepelasarka anggar Opis Pengitung Tubuh Malaysia, populasyen orang tuai maya nya  dipelabaka datai ngagai kira-kira 5.8 juta iku. Katika kitai, perintah enggau rayat bela udah besedia nyadi menua tuai?

Tu siti penanggul ti chukup signifikan dipikirka kitai semua enda milih nya perintah tauka kitai semua laban ari nya semina tinggal semilan taun da agi ungkup menua kitai deka datai ba status nya. Tu terang bendar ngayanka jam jampat amai beputar sereta ninding amat enggau kitai semua. Enda berasai kitai deka datai ba taun 2030 nya ila. Nya alai, kitai semua nyengkaum perintah mesti bisi inisiatif ti agresif dikena nentuka  semua orang kelebih raban ke deka ngenataika diri ba umur 60 taun dalam taun 2030 mupuk besedia ari sukut mental enggau fizikal.

Ironi iya, umur 60 taun ke atas nya siti penggal ti chukup kritikal ngagai raban orang tuai kelebih agi  dalam proses sida mungkal neruska pengidup kelebih agi ari aspek pengerai, ekonomi, pengelikun enggau pengelantang pendiau sepengudah sida pinchin tauka ngetu gawa.

Nya alai, penanggul ti bepatut dirundingka iya nya, ni naka individu udah besedia kelebih agi sida ke benung berumur  50-an diatu sereta agensi perintah ti bisi kaul enggau pekara tu sama-sama napi status menua tuai nya ila.

Dalam hal tu, endang udah tentu kitai ngarapka genap peranak menua ti deka masuk kategori orang tuai maya 2030  nya ila ulih besedia tauka ngiraika diri ari diatu. Reti nya, dalam jaku mudah iya, kitai patut betanggungjawab ngagai diri empu. Ambika banding, ari sukut pengerai, kitai ke tuai patut berengkah ‘mentin’ diri ari diatu ngambika enda nesal jemah ila laban munyi ke leka lagu Christopher Kelly, ‘Nesal dudi nadai reti’. Kemeranka pemakai ti setimbang sereta bepengerai dikena nyeliahka  mayuh leman penyakit kritikal kelebih agi penyakit tiga beserak ti balat ngenakutka orang mayuh baka penyakit tungkul atau, penyakit kemi manis enggau  darah tinggi kelimpah ari penyakit bukai. Munyi ke suah didinga kitai, penyakit sigi enda milih  umur, tang nadai mih pulai ke penyalah enti kitai semampai ngingatka diri, tambah mega pun semua penyakit endang datai ari gaya enggau tebiat pemakai kitai empu. Selabuh enggau nya, aspek besenam enggau gaya idup ti  bepengerai mega patut diperatika enggau serius agi laban aktiviti cheregas ulih mantu kitai gerai nyamai baik nya ari sukut mental tauka fizikal lebuh umur kitai nyau semak 60 taun ke atas.

Ngagai raban perintah, kitai ngarapka Opis Pengerai Malaysia (KKM) deka majak ngangkatka sistem pemela pengerai menua. Endang amat, sistem pemela pengerai menua kitai kemaya hari tu udah lati, tang  ketegal penyampau peranak menua ke tuai dijangka betambah ari selama nya alai sigi patut bisi penambah enggau pemanah ari chara sida nyediaka diri nyaga pengerai sida ke tuai. Nambahka nya, dikena nagang pekara ti enda manah nyadi, kitai mega ngarapka KKM ulih  nambahka inisiatif bekimpin gaya idup bepengerai ngagai rayat Malaysia, kelebih agi ngagai sida ke berumur 40 taun ke atas.

Pia mega ari sukut ekonomi, individu ke berumur 40 taun ke atas patut berengkah berunding ari diatu guna finansial dikena napi diri empu enggau diri sebilik sepengudah sida pinchin ila. Ambika banding, baka ni enggau atur bayar loan rumah, kerita sereta hal diri empu, kelimpah ari ke guna ungkup pengerai, ke penabat sereta dikena nampung pengidup besehari-sehari ila. Mesti bisi  perambu  finansial ti strategik sereta sistematik ngambika ulih neruska pengidup  enggau lanchar sepengudah pinchin ila.

Kelimpah ari nya, aspek pengelantang pendiau, dinding diri enggau pengelikun patut diperatika mega. Pekara tu meri empas ngagai penyampau populasyen orang tuai ti dipelaba majak nambah ba rumah pengandai tuai, baka nya mega penyampau orang tuai ke palan aktiviti orang tuai ba selampur menua. Penanggul iya, katika kitai besedia napi populasyen ke majak betambah tu?

Dalam hal tu, kita ngarapka gerempung ukai kuasa perintah  (NGO) ke mina rumah pengandai tuai deka chukup besedia nerima enggau ngenyit pemayuh raban baru tama kia  ila. Tu mih maya iya mega alai orang ke gerah jari ngenjuk sedekah meri seringgit dua dikena  ngangkatka pemanah perengkaguna enggau infrastruktur ba tiap-tiap rumah pengandai tuai nya.

Beserimbai enggau nya mega, kitai nerima enggau manah pengangkun perintah deka numbuhka 222 Palan Aktiviti Orang Tuai (PAWE), iya nya sekurang-kurang iya siti ba tiap-tiap sitak Parlimen di serata menua. PAWE nya mih tempat orang tuai bejalaika aktiviti ninting hari sida dalam komuniti. Tu mega siti servis ti betukuh mantu ari sukut penyempulang sosial enggau pemansang (developmental) ngagai orang tuai ti mungkur  kerejasama strategik entara agensi perintah enggau NGO.

Kelimpah ari nya, kitai mega ngarapka perintah ulih  nyediaka mayuh utai ke diguna baka guna infrastruktur ba semua palan rama nyadika  perengkaguna ngagai raban orang tuai mega. Ambika chunto, mesti bisi disediaka tempat duduk ungkup sida ke tuai ba  palan rama, lalu ruang pejalai kaki mesti iya ti ulih dikena  sida ambika banding, geladak tauka jalai ti enda lichin tauka renjan lalu endur meraka jalai.

Kena ngeraupka kenang sekali tu ba penemu aku perintah mesti bisi komitmen ngamatka isi pekara ti bisi dalam Polisi Orang Tuai Menua (DWEN) enggau Perambu Pengawa Orang Tuai Menua (PTWEN) ngambika ulih ngangkatka pengelantang pengidup raban orang tuai setipak enggau pemansang menua.

Realiti iya raban orang tuai ngembuan hak ke sama ngasaika pengidup ti nyamai nengah sukung ari pengawa nyaga pengerai, pengelantang pendiau enggau pendiau diri. Nya kebuah, pengawa nengkira pekara tu  mesti bisi diaduka enggau alus dikena napi  status menua tuai lebuh ngampir taun 2030 ila.

Glosari :

tiga beserak – tiga serangkai

sistem pemela pengerai menua   - sistem perkhidmatan kesihatan negara

Palan Aktiviti Orang Tuai – Pusat Aktiviti Warga Tua (PAWE)

penyempulang sosial  - pendampingan sosial (reaching out)

pemansang - developmental 

Polisi Orang Tuai Menua - Dasar Warga Emas Negara (DWEN)

Perambu Pengawa Orang Tuai Menua - Pelan Tindakan Warga Emas Negara (PTWEN) 

 

Milih Arus Pelajar Ke Pom Empat

 

Milih Arus Pelajar Ke Pom Empat

Enda lama agi kitai deka nyingkang ngagai taun baru taun 2022.  Nitihka atur selama enti kitai ngenangka pasal sekula dia nembiak sekula deka niki ari siti kelas ngagai siti kelas ke tinggi agi. Tang kemaya hari tu ketegal pandemik COVID 19, atur buka tutup sekula udah jauh bendar berubah lalu balat bepanggai ba gerah ari Menteri Kanan Opis Menteri Pelajar bepelasarka lalau ari Majlis Keselamatan Negara (MKN). Kenang aku sekali tu bisi kaul mega enggau singkang pelajar nembiak ari kelas baruh ngagai iya ke tinggi agi. Ba kenang sekali tu aku deka ngupas isu pasal milih arus pelajar ke engkeman ba pom empat.

Pengawa milih arus pelajar ke pom empat nya sebengkah pemutus penemu ti berat dikena nampung pelajar ari sekondari baruh ngagai ke tinggi agi  jemah ila. Nya alai, nembiak sekula patut nemu ngaga pemutus penemu ti betul sereta engkeman ngambika sida enda nesal dudi hari.

Taja pan pia, pemutus penemu nya balat bendar bepanggai ba pengulih nembiak bepelasarka  Tisih Bilik Kelas tauka Pentaksiran Bilik Darjah (PBD). Nambahka nya mega, enti diperatika ari sukut rama, kelimpah ari PBD chara milih arus pelajar ke pom empat mega patut diperatika bepelasarka aspek trend tauka pengerindu nembiak nya, sungkak ari apai indai enggau sadang penemu ari sekula.

Nya kebuah, semua orang patut nyaup nembiak nemu potensi sida empu lalu milih arus pelajar ti engkeman sereta setipak enggau  Filosofi Pelajar Bansa ti ngembuan tuju nempa individu ke setimbang ari aspek selangkuh tubuh, emosyen, spiritual enggau intelek.

Faktor prestasi pengulih nembiak amat dikemeratka dikena nentuka bidang arus pelajar sida maya sida ba pom empat. Genap iku nembiak  patut diberi penerang senentang atur masuk arus akademik tauka arus pengelandik lebuh sida ba pom tiga. Pengawa nyediaka nya beguna nyadika malin sida nembiak  milih bepelasarka potensi enggau pengerindu siku-siku. Kebuah sida patut tumu nemu milih arus pelajar ngambika sida ulih nyikap diri enggau tumu agi dikena sida ngulihka pemutus bepelasarka atur ti udah ditetapka perintah.  Pengulih maya ba pom tiga diperati bepelasarka PBD sepengudah Tisih Pom Tiga (PT3) dipadamka Opis Menteri Pelajar ungkup taun 2021. PBD tu beguna dikena nentuka pengulih nembiak maya nya lebuh nengkua enam tikas pengelandik bepelasarka Dokumen Standard Kurikulum dan Pentaksiran (DSKP) nitihka mata pelajar ti disediaka Opis Menteri Pelajar Malaysia (KPM). Nya kebuah, faktor tu ulih ngerempah runding sida nembiak lalu nentuka arus pelajar maya sida ba pom empat ila.

Faktor pengerindu nembiak dalam bidang pelajar enda milih nya bidang akademik di sekula sekondari selama, sekula buding penuh (sekolah berasrama penuh) enggau arus pelajar pengelandik  di Kolej Vokasional tauka palan pengelandik ke bukai mega ulih nguing runding sida dalam isu tu. Potensi enggau pengerindu ulih dipeda maya nembiak nya  belajar sepengelama tiga taun berengkah ari pom satu ngagai pom tiga. Penau sida tu mesti dikilir bala pengajar kenyau ari pun sereta disukung enggau  aktiviti ti meransang pemansang pengelandik siku-siku nembiak nya. Peransang enggau sukung nengah program ti diperambu sida sekula baka pekit betukuh akademik enggau pengelandik teknologi tentu ulih ngayanka pengulih nembiak seraya ke ngayanka pengerindu genap iku sida nya.

Berindik ari nya, sungkak ari apai indai ngagai pengerindu nembiak lebuh milih arus pelajar mega patut mega dikemeratka. Penerang pasal arus pelajar ba pom empat ti engkeman patut dibantai sereta dipadah mega ngagai apai indai ngambika sida nemu lalu nyukung sereta mantu anak sida ba aspek nyediaka pelajar sereta meri input positif maya nentuka pengerindu arus pelajar ti dipilih bala anak sida ila. Hal  bidang pelajar akademik tauka pengelandik ukai tatak ngagai bala anak tang potensi ti kemisika sida bereta enggau pengerindu sida nya ti patut diperatika. Sida patut diberi peluang milih arus pelajar ti engkeman ngambika pemansang potensi ti dikemisika sida ulih  ditanka sereta mansang ngagai kuing  tuju karier sida jemah ila. Sukung ari diri sebilik mega patut dikemeratka laban iya ulih nyungkak nembiak nyura pengidup jemah ila setipak enggau  bidang ke deka dipasukka sida.

Faktor sadang penemu sida sekula mega dikemeratka laban sida meri malin enggau peransang ngagai nembiak milih arus pelajar ke pom  empat. Milih bidang akademik baik di sekula sekondari selama tauka sekula berasrama penuh diatur penguasa sekula bepelasarka pengulih nembiak. Raban Unit Bimbingan enggau Kaunseling ngembuan tanggung pengawa mantu nembiak milih arus pelajar nitihka pengulih sida maya nya. Ujian Pentaksiran Psikometrik Kecenderungan Minat nembiak mega mantu penguasa sekula ngaga sadang pemutus milih pelajar nembiak sekalika nya lebih ngagai bidang akademik tauka pengelandik. Bidang akademik mungkur pelajar  baka arus sains tulen, sains sukan, arus litericha, pedagang  enggau pelajar seni, lalu bidang pengelandik befokus ngagai latih vokasional baka ekonomi rumah tangga, injinering elektrik, penyedia pemakai, asas tanaman enggau ti bukai. Tanggung pengawa sida sekula mega meri rega tambah dalam pengawa nyaup nembiak milih arus ti betul sereta nemban.

Taja pia, pelajar pendiau pengidup mega patut dikemeratka dalam pelajar nembiak. Ajar manah enggau rukun pendiau patut diterenak  ba sida nembiak ngambika iya setimbang enggau pengulih akademik kemaya hari. Pengajar nyadi ijin pengubah patut sensitif agi lalu nentuka genap iku nembiak sida ditarak enggau lelemu pendiau pengidup ti positif dikena nyediaka serak dudi ti kaya rega mensia dalam pengidup sida. Proses ngajar enggau belajar patut semitan agi nengah mayuh bengkah langkah rapat ti  realistik lalu ulih ngangkatka pengadang nembiak ngemanahka pengulih diri. Program motivasyen enggau pengadang ulih dikemanahka di baruh pegai Unit Bimbingan enggau Kaunseling sekula ngambika pengawa nukuh individu nya setipak enggau pengingin Rukun Menua, Polisi Pelajar Bansa enggau objektif pemansang modal mensia sivil ti bisi disebut dalam Wawasan Kemakmuran Bersama 2030.

Nya alai, chara milih nembiak nentuka arus pelajar ba pom empat berat bendar dikena nyediaka rebak dudi ti bepenemu dalam akademik enggau pengelandik ba bidang latih industri tauka teknologi jemah ila. Pengeran juluk ati Malaysia mansang nyadi menua maju ulih  dijapai enggau sukung raban orang ke tebangkar ba penemu tu dikena nempa pemansang menua ke   beteknologi tinggi sereta ngembuan tikas ekonomi ti tegap. Serak dudi ti disikap enggau penemu akademik, pengelandik beteknologi tinggi lalu ngembuan seregah diri ti ideal ulih ngangkat penuduk Malaysia ke tikas ke tinggi agi.

Glosari:

arus pelajar – aliran pelajaran

sekula buding penuh – sekolah berasrama penuh

arus pelajar pengelandik  - aliran kemahiran

asas tanaman – pun pengawa betanam

rega tambah – nilai tambah

pelajar pendiau pengidup - pendidikan sahsiah

Ajar manah enggau rukun pendiau - nilai murni

lelemu pendiau pengidup - ilmu sahsiah

pemansang modal mensia sivil  - pembangunan modal manusia madani