Meretika Jaku Literasi Ekonomi

 

Meretika Jaku Literasi Ekonomi

Lengkaka sesempa leka pinang, ngetu dulu ngenang pasal lebas jaku Iban. Sekali tu aku deka ngupas pekara senentang jaku literasi ekonomi.

Viral ba media sosial apin lama ti udah senentang dua leka jaku iya nya terma ceiling price enggau selling price. Enti dikalihka ngagai jaku Iban, ceiling price nya dikumbai aku rega siling lalu selling price disebut aku rega jual.  Nemban enggau enda jaku ke dikalihka aku ditu ukai pulaika penenaggul ba aku laban aku semina berandau utai ke bisi bekaul enggau nya. Ba aku jaku tu udah chukup engkeman nyadika buah randau.

Nama kebuah jaku ceiling price enggau selling price diviralka bala netizen ba media sosial? Utai tu nyadi bepun ari chiap Menteri Pengerai, Khairy Jamaluddin dalam jaku English ba twitter. Iya bisi nyebut jaku ceiling price lebuh ke ngenang sesebengkah isu. Jaku ceiling price nya ke dikemetulka sekeda netizen sepengudah ti macha chiap ari menteri nya. Sida madahka leka jaku selling price nya jaku ti nemban agi dikena nitihka penemu sida.

Enti diperati sekali rimbas, isu tu baka ke dipeda sunga  ba kitai ke ninga tauka macha, tang iya ke bendar iya meri ulu lungga senentang tikas literasi ekonomi mensia mayuh. Enti kitai nguji ngansau di internet dia kitai beratika penerang ti bekaul enggau literasi ekonomi tu mimit amat enti dibandingka enggau literasi finansial. Nama reti nya dih? Katika nya ngayanka literasi ekonomi tu enda tentu dikemeratka pia? Nya mih ke nyadi tanda tanya kitai. Nya mih ke nyadi buah kenang aku sekali tu.

Literasi ekonomi nya mai reti mensia mayuh ngembuan mayuh pugu penemu dalam bidang ekonomi lalu ulih nguna penemu nya dikena ngaga pemutus ke lebih agi lebuh ngaturka pun pengeraja asal enggau manah. Tekala nya mega  indikator ke baruh ungkup literasi ekonomi ketegal  pun pengeraja ekonomi enda diguna enggau efisyen.

Enti pugu terma dalam ekonomi pan agi baru ba mensia mayuh, baka ni kitai deka narak mensia mayuh ngena pun penatai ekonomi ke besekat tu enggau manah. Mensia mayuh pandai milih lalu nemu bida entara utai ti patut enggau utai ti dikinginka sida. Tu sigi udah masai ba pengidup selama sida. Nyau deka ninting hari, mensia mayuh betapi enggau pemutus penemu milih entara utai ti patut enggau utai ti dikeinginka ati.

Pekara ti besai agi nya lebuh literasi ekonomi tu dikiraka patut diangkatka dalam raban mensia mayuh ngambika sida ulih belematika pengawa ti digaga perintah lalu meretika pekara senentang pejalai polisi. Ari nya, iya ulih mantu perintah ngulihka  objektif polisi ti dipejalaika sida. Ambika banding, ba hal rega siling, mensia mayuh patut nemu tuju polisi tu dipejalaika, sapa raban ti nerima penguntung ari polisi tu lalu utai ke nyangka tau nyadi asil ari pejalai polisi tu.

Penemu baka tu deka ngasilka komuniti ti mereti sereta nyukung pengawa perintah. Kitai tentu dekaka komuniti ti kritis agi lebuh ngara lalu ngadarka konsep ekonomi tu. Ambika banding, sida ukai semina ngumbai orang ke nadai kereja tauka ba jaku English nya ‘unemploy’ nya nadai utai digaga tang reti ke bendar nya orang ke nadai kereja tang benung regas begigaka pengawa.

Baka nya mega ba konsep nerengka reti jaku inflasyen. Ba sukut literasi ekonomi, sida ukai semina nerangka jaku inflasyen nya nyadi maya rega niki aja tang rega ti majak sereta semampai niki lalu nemu pekakas dikena nyukat, bansa enggau empas impak inflasyen nya ngagai mensia mayuh.

Nambahka nya, pejah ari komuniti netizen ulih ngerempah sereta meri input dikena mutarka sesebengkah penanggul kelebih agi ba hal ekonomi. Nya alai, kitai beguna bendar netizen ke pandai ti alai pejah ari ari sida balat agi ngenataika penguntung lalu ukai semuti meda penyalah orang aja.  

Pengawa ngangkatka literasi ekonomi tu patut mungkur semua peringkat bepun ari sida ba  peringkat nembiak mit ngagai sida ke tuai. Kuasa tauka hak literasi ekonomi tu patut berengkah tumu, laban iya nyediaka raban ke agi biak mina diri sida sereta napi pengidup sosial sida lebuh sida begulai dalam komuniti.  

Baka kitai ke ngemeratka pelajar sains ti bepun ari sekula primari, pelajar ekonomi mega patut dikemeratka baka nya mega. Kebuah pia, laban ekonomi bisi kaul enggau ulah mensia dikena ngulih sereta memproses pengeraja asal ti besekat ba rampa diau sida ngambika sida nemu nguna iya enggau betul.  

Dikena aku ngeraupka penemu aku ditu, ba penemu aku dua bidang ekonomi iya nya mikroekonomi enggau makroekonomi ti semampai bepanggai ba pangan diri patut bendar dipelajar ngambika pengelantang mensia mayuh deka nyadi manah agi.  Reti nya, pengawa ke ngangkatka literasi ekonomi enda ulih ditawarka  sengapa tang patut dikemeratka ungkup semua peringkat komuniti.

Glosari:

Sunga  - remeh

LEBAS JAKU IBAN FORMAL TUSUN KEDUA

 

 

Lebas Jaku Iban Formal - Tusun Kedua

 

PANYUN JAKU

Tu tampung ari artikel keterubah senentang lebas jaku Iban formal. Dikena mulaika pengingat, lebas jaku nya dikena berandau dalam mayuh bengkah kaul sosial. Pengawa ngena mayuh bengkah lebas jaku dalam kaul sosial ke bebida endang beguna bendar ngambika pekara ti dikenatai tauka dikerandauka nya terang sereta nyemetak. Nya alai, berindik ari tukuh enggau mayuh bengkah lebas jaku ti dikena,  karang tu nguji mantaika dua chunto lebas jaku Iban.

Dalam artikel ba tusun kedua tu, lebas jaku Iban ngenangka pasal jaku ke dikena ba pekara sains enggau berita.

LEBAS JAKU SAINS

Aram kitai meratika tukuh ke nyeratan dalam lebas jaku sains. Lebas jaku sains ngundan terma ti nyemetak. Jalai ngena leka jaku lebat agi ngundan kelas jaku ari jaku pengawa tang kurang leka jaku adjektif. Kelimpah ari nya pekara sains tu diterang ngena ayat enggau gaya nulis. Iya mega ngena jaku perintah enggau jaku tanya ke praktikal lalu ngemeratka akalchara. Peratika chunto ba genteran ke nangkanka tu.

 

Fibroid tu siti ari penyakit ti selalu bendar ditemu nyadi ba sida indu ti beumur dalam 30-40 taun, lebih agi ba sida ti enda beranak tauka mandul sereta indu ti kelalu gemu. Fibroid tu nyadi ketegal hormone estrogen ti bisi ba tiap iku orang indu, nya mih kebuah fibroid selalu bendar ditemu ba indu ti benung peridi. (Dr. Awi Idi)

Chunto kedua nangkan tu iya nya lebas jaku ti dikena lebuh bekenangka sesebengkah berita baik nya ba radio, televisyen enggau surat berita.

 

LEBAS JAKU BERITA

Tukuh lebas jaku berita ulih diperatika belalauka sekeda pekara tu. Kesatu, lebas jaku berita ngembuan topik ke nyengala belalauka frasa topik tauka ayat topik. Teks berita mega ngembuan siti idea dalam siti ayat lalu iya suah ngelengkaka jaku penyambung, jaku tesa, & penambah. Kelimpah ari nya berita mai penerang randau sebut (lisan) ari siku ngagai siku. Uji peratika chunto ba genteran ke nangkanka tu.

Sri Aman- Hari Empat ,22 Sept. Tiga puluh bakal lebuh bas ti ngundan nembiak sekula belantak enggau lori tangki di Jalai Sabu.   Sri Aman- kena Hari Empat,22 Sept.Tiga puluh iku orang bakal lebuh sebuah bas ti ngundan nembiak sekula belantak enggau sebuah lori tangki di Jalai Sabu.

 

Lebas jaku dalam berita tauka surat kabar ngundan tanda selama lalu ukai formal, lebih ngagai kasual, kumulative lalu enggau penteba ti dikumbai situated structure of conversation tauka struktur bejaku belalauka penempat. Kelimpah ari nya leka jaku ke dikena nya mega jaku randau besehari-sehari, reti nya leka jaku ti mudah diperetika mensia mayuh.

Berita ke ngena rapat ripot ngembuan leka jaku ke dikena baka ke dirintai ba baruh tu:

-     Nitihka penemu….

-      Iya madahka ….

-      Iya bejaku nambahka nya…

-      Bejaku lebuh ….iya madahka…..

-      Mr. Atan madah ngagai …..

-      En. Atan nyemetak ……

-      Lebuh ngenang pekara nya….

-      Mr. Atan nangkan…..

-      Bejaku dalam pengerami….

-      Lebuh baum/seminar ….

 

Lebas Jaku surat berita (surat kabar) sama ari siti surat berita ngagai iya ke bukai tang tiap-tiap bengkah kompeni surat berita suah ngena gaya ke dikedeka diri dikena ngayanka imej enggau identiti kompeni sida.

 

PENUTUP

Dua iti chunto iya nya lebas jaku sains enggau lebas jaku berita udah diayanka ditu dikena madahka bida jaku ke dikena nitihka lebas. Ba artikel ke bukai deka dibantaika lebas jaku bukai mega.

 

Glosari:

akalchara – method

randau sebut - lisan

kasual – ukai formal, selama

kumulative – nambah-menambah

situated structure of conversation  - struktur bejaku belalauka penempat

Lebas Jaku Iban Formal

 

Lebas Jaku Iban Formal - Tusun Keterubah

 

Jaku Pemuka

 

Karang tu nguji nyaut pekara ke nanya nama utai ke dikumbai lebas jaku lalu ni maya lebas jaku tu dikena orang berandauka sesebengkah pekara.

Penganda linguistik, Halliday (1968), mai kita meratika konsep jaku beduduk ari guna jaku enggau orang ti ngena jaku nya. Kenang iya endang berindik ari pun penemu ke madahka jaku nya sebengkah ari sistem kelai tauka lambang munyi arbitrari ke dikena mensia ba sesebengkah genturung pendiau berandau enggau pangan diri.

Konteks Maya /Gaya 

 

Sesebengkah lebas jaku ditengkebang lalu dikena ba maya tauka nitihka konteks randau tauka buah kenang orang ke berandau nya. Pansik J.R. Firth (1956), endang udah dulu nempa konsep jaku ke beduduk ari konteks gaya enggau maya tauka context of situation. Tu dikena ngayanka pemetul jaku ke dikena dalam sebengkah-sebengkah pekara. Nya alai Lebas Jaku endang berubah nitihka endur, gaya enggau maya. (berandau, betulis, formal, enda formal, sains & teknologi,sembiang,..)

Nya kebuah, jaku ke dikena enggau nyemetak lebuh betungkap ke sesebengkah pekara tauka bidang penemu nya mih ke dikumbai LEBAS JAKU. Ba jaku English, lebas jaku tu dikumbai language register tauka dalam jaku Melayu dikumbai laras bahasa.

 

Nentuka Lebas Jaku

 

Chara dikena nentuka sebengkah-sebengkah lebas jaku bepanggai bendar ba jalai jaku enggau leka jaku tauka vocabulary ke dikena. Nya alai, lebas jaku tau dikategorika beduduk ari tiga faktor baka ti disebut di baruh tu:

 

1. Batang Pekara (Field of Discourse)

2. Chara Mantaika Pekara (Mode of Discourse)

3. Gaya Batang Pekara (Manner of Discourse)

 

 

Kebuah Lebas Jaku Beguna

 

Lebas jaku dikena berandau dalam mayuh bengkah kaul sosial. Ngena mayuh bengkah lebas jaku dalam kaul sosial ke bebida endang beguna bendar. Berindik ari tukuh enggau mayuh bengkah lebas jaku dalam sesebengkah jaku kelebih agi ba karang tu nguji ngenangka lebas jaku Iban. Lebas jaku tu ulih mandangka pemesai guna iya.

Lebas jaku baka lebas jaku Iban dikena mantaika penerang tauka informasyen ke nyemetak sereta terang. Sesebengkah pekara ti deka dikenataika patut terang sereta nyemetak didinga orang bukai ngambika sida ke ulih meretika pekara ti dikenataika orang ke empu jaku nya.

 

Kedua, lebas jaku mandangka tirai juru  iya ke mansutka penemu. Enti sema orang ke bejaku nya pengajar, dia leka jaku ke dikena mayuh bendar ke bisi kaul enggau pengawa ngajar sereta belajar. Baka nya mega chunto bukai baka enti sema orang ke bejaku nya orang ke ngemeranka pengawa bumai tentu bendar pekara ke dikenataika iya nya bekaul enggau pengawa bumai.

Ketiga, lebas jaku mega ulih dikena nerenakka rukun pendiau ngatur diri bekempit enggau rampa endur diau.

Kelimpah ari nya lebas jaku ulih ngerapitka kaul sosial enggau diri empu. Lebas jaku ke dikena maya nampil diri berandau enggau orang bukai ulih ngerapitka kaul sosial kitai enggau orang bukai. Leka jaku ke dikena kitai lebuh berandau enggau orang endang iya ti engkeman dikena maya berandau nya.

Kepenudi bendar lebas jaku dikena mandangka penerang isu ke dipetungkapka orang ke bejaku tauka penulis nya. Lebas jaku ke dikenataika nya endang ngundan leka jaku ke bisi kaul enggau isu ke dipetungkapka orang ke ngenataika penerang nya baik nya maya bejaku ba mua mayuh tauka lebuh nulis.

 

Belalauka kebuah ke udah dikenang nya tadi, chunto lebas jaku ke dikena ba mayuh bengkah pampang penerang tauka randau deka ditampung ba kenang ti nangkan tu.