Lenyau batang pengawa

 

Panyun Jaku

 

Sapa enda takut lenyau kereja? Kereja nya periuk asi dikena nampung pengidup diri empu sereta mega diri sebilik. Berita sentang ekonomi ti mambam enggau pengusut rega minyak taun 2016 mai empas ke enda manah lalu nekan raban ti bisi batang pengawa ti menuku. Sida nyangka dibuai orang gawa ketegal hal ekonomi. Nama menua kitai Malaysia pulai ngagai krisis mata duit baka ti nyadi dalam taun 1997, 1998 enggau 2009? Taun 2020 ngagai 2021 penanggul lenyau batang pengawa datai baru. Tang kediatu balat agi ketegal pandemik Covid-19 ke benung ngerekai ngagai selampur menua di dunya. Nama udah tu kitai mupuk meda mayuh orang bekejeluh minta kereja? Nya sekeda tanya ti tau ngeruga runding kitai maya penanggul ekonomi datai.

 

Batang Kenang

 

Kenyau ari taun nyin kemari mayuh kompeni besai enggau mit berengkah nukuh baru struktur gerempung pengawa sida lalu ngetuka mayuh pengereja pengawa laban ti deka ngurangka kos. Mudal enggau pengawa ti beranakka puku ti kurang mejal sekeda kompeni ngurangka pejalai pengawa sida. Bisi mega kompeni ti lalu tengkerap terus. Kompeni ari Malaysia mega nerima nasit ti sama. Mayuh kilang udah ngurangka barang ti dikeluarka sida, ngurangka maya bekereja, mutung gaji pekereja lalu bisi nya lalu nutup terus kilang sida. Maya pandemik tu mayuh bendar kilang dipejal tutup ngambika penyakit Covid-19 tu enda majak ngerekai.

 

Kitai tentu bisi ninga pengerawan ati sida raban pengereja pengawa laban nyangka tau diketu orang ari bekereja sebarang maya kelebih agi maya pandemik tu. Semua nya empas ari ekonomi ti enda manah bepun ari pengerekai penyakit Covid-19.

 

Empai lama mega, kitai bisi ninga berita kompeni pengeluar minyak nasional madahka perambu sida ke deka mansik penyadi pengawa ti deka ngemaduka raban pekereja sida. Perambu tu deka dipejalaika berenggat-renggat. Berita tu serius amat sereta berat laban mayuh ari penatai pemisi menua datai ari kompeni tu. Reti nya enti disimpulka penemu berita nya madahka menua kitai deka betapi enggau krisis ekonomi sekali da agi. Enti nya amat nyadi, nama utai ke deka nyadi kini?

 

Uji kitai meratika baru pekara ti nyadi dalam taun 2009. Lebih 80,000 iku pengereja pengawa di Malaysia udah diasuh badu gawa ketegal ekonomi menua ti enda manah. Serampur menua di Malaysia ngasaika pekara tu. Pia mega sekayu dunya raban pengereja pengawa mantaika protes. Indah Amerika Syarikat mega ngerikodka lebih 5 juta pengereja pengawa sida udah lenyau batang pengawa. Tu ngayanka berita ngemaduka pengereja pengawa nya mai empas ti udu serius ngagai sesebuah menua.

 

Naka bulan Mac 2015, statistik Pengereja Pengawa enggau Kuli bisi ngeripotka Malaysia ngembuan 20 juta pengereja pengawa, iya nya mungkur 67.4% ari penyampau tubuh rayat Malaysia. Data tu agi relevan ba menua ti ngemeranka pengawa industri baka Malaysia. Taja pia, kitai enda ulih nerima pengurang persin pengereja pengawa ti nyata bendar. Iya ukai semina enda manah ngagai menua tang mega ngagai institusyen diri sebilik.

 

Uji peratika siku apai ke bisi anak dipelanja, rumah, kerita, ungkus sekula, duit jali enggau ti bukai tak dibuai kereja kemaya nya. Sapa ti deka mayar duit pupuk ninting bulan enggau pemakai sida sebilik? Taja pan kompeni bisi mayar pampas tang iya semina chukup kena mayar komitmen ninting bulan dalam awak ti serekat. Deka ngiga kereja ke bukai, palan kereja bukai mega deka ngemaduka pekereja sida. Pekara tu tau ngasuh pengidup orang mawa sereta nekan raban apai ti nyadi tuai bilik. Iya mega tau ngujungka ruang bilik bepechah belah. Sapa mih deka ngapuh nasit raban apai ti baka tu?  Dipelabaka tentu nadai. Kebuah pia, laban nya udah nyadi tanggung pengawa diri empu nerima sereta nukuh kuing tuju karier diri empu.

 

Kemaya hari tu, raban profesional mega nerima empias ari krisis tu. Anang enda ingat tikas pengidup rayat Malaysia deka nurun ketegal penatai pemisi ti kurang. Nyau deka semua rayat napi penanggul tu. Bah, nama pekara ti patut dikereja deka napi pekara tu enti iya amat nyadi?  Kenu ku artikel ba siti majalah madahka rayat enda ulih enda bekereja enggau bebendar agi. Rayat mega diansak ngiga kereja ti ukai dalam bidang ti dikerinduka iya sereta nerima gaji ti enda engkeman enggau peminta sida. Dipelabaka mega berengkah ari diatu kitai patut besimpanka duit enggau mayuh agi ari selama.

 

Simpul Penemu

 

Ngembuan perambu ti chukup nya beguna bendar dikena napi pekara ti nyadi enggau enda disadang. Kitai mesti besedia napi sebarang pekara ti nyangka nyadi jemah ila. Langit enda meruan terang, mua hari enda mega petang selama jeman. Baka belayan padi lebat bebuah, tiap utai ke nyadi tentu bisi tuju enggau kebuah. Nya mih kebuah, kitai patut belubah-lubah dani sereta beseranyat ngangkat kediri.

Ketuka ngaga media sosial palan buti siber

 

DUNYA moden mai chura pengidup baru ngagai mensia. Mensia mayuh nyadika teknologi nya medium perugu penyambung  kaul entara kitai enggau orang bukai. Empas iya diatu kitai meda komunikasyen digital nyadi sebagi ti besai ari chara idup semua orang ba mayuh bengkah aspek pengidup.

Anak serak baru udah nemu ngena teknologi maya ari hari keterubah sida ada sema jaku. Nya alai, endang enda alit ati enti meda sida landik ngena mayuh leman medium penyambung online lebuh sida udah besai. Nengah ruang internet ti nadai lapat, sida sepeneka ati begulai enggau nadai besekat taja pan sida bela enda nemu  identiti orang ke enggau sida bekelala ba media sosial.

Enti diperatika ari sukut rama, iya siti interaksyen  positif. Kebuah pia, sida ulih  besilih idea, semampai meri penguntung lalu nemu pengidup orang bukai ti bebida tirai juru enggau sida. Taja pia, pengelepas ba dunya siber mega tau mai empas ti negatif enti bisi utai enda manah nyadi baka pengawa penyalahguna media sosial. Entara isu ti nyadi penguji kemaya hari, iya nya dikumbai ba artikel tu  buti siber ti dikalihka ari jaku Melayu buli siber tauka jaku English nya cyber bullying. Buti siber sebaka enggau buti fizikal (physical bullying), tang semina nyadi dalam online. Orang ke mai bebuti nya orang ke dikelala tau mega orang ti enda ditemu identiti.

Kelalu mayuh empas negatif ngagai  dengah (mangsa) buti siber, ambika chunto baka orang ke kena uti nya deka berasai lemi semengat, nadai agi pengarap, takut deka betunga enggau mensia mayuh, ngasaika diri nadai rega, tusah deka ngasaika pengelantang sereta  ngeri.

Pekara tu raya agi nyadi lebuh orang ke nguti nya ngena pengelemi ba orang ke ti uti iya. Fizikal  ti enda manah, pengulih akademik ke enda berapa sereta isu personal, nyengkaum penanggul diri sebilik suah nyadika subjek uti sida.

Iya majak balat lebuh sida nyau mantaika isu sensitif baka pengawa ngemaruhka  agama bukai, nyima sereta ngeruga  bansa lalu ngelanyaika prinsip komuniti bansa bukai. Pekara tu ulih narit ati mayuh agi orang bekenaka media nyadika palan alai bekelikuh nengah komen ti dibantaika sida ngena jaku ti enda belapis. Taja pan suah dipeda enda serius laban orang ke nguti enggau orang ke ti uti nya enda ngelala pangan diri tang empas  negatif ulah tu deka  diau entap  dalam runding orang ke kena uti nya.

Dikena mutarka isu tu, orang ke kena buti siber patut minta tulung orang bukai kelebih agi  ari orang ke sempil enggau sida baka sida sebilik enggau apai indai. Sida mega mesti nyeliahka diri ari meri respons ba media sosial dalam siti timpuh awak ti chukup alai situasyen nya pulai stabil baru. Enti  nyau enda ulih dikelaungka, dia sida mesti minta lalau ari orang ke tebangkar ngubat emosyen enggau psikologi sida.

Sida mega ulih begulai enggau raban komuniti ba genturung endur sida diau baka sida ke berimbai pendiau tauka kaban belayan ke suah agi enda  mudah ngukum sida sengapa sereta nemu ati enggau runding sida lebih ari orang ke dikelala sida ba media sosial.

Orang ke kena buti mega ulih ngisi maya lepa sida enggau hobi ti meruan ngambika situasyen pulai manah baka selama. Ba hal tu, sida ulih ngaul diri enggau raban ke sama hobi enggau sida. Berindik ari nya, topik randau sida mega  deka mekuh ngagai hobi enggau pengerindu aja. Pekara tu ulih ngasuh orang ke kena uti siber nya pulai kering semengat baru. Lebuh udah kering, buti ba media sosial nadai agi nyadika penanggul tauka meri empas ngagai sida agi. Sida pan nyau bisi agi pengarap napi mayuh leman penguji jemah ila.

Orang ke kena buti siber mega begunaka sukung orang buka dikena nambah pengering diri sereta berani ngatur singkang ti proaktif dikena nyeliahka diri ari majak nyadi dengah orang.

Nya alai, semua raban komuniti mesti berakup nagang isu tu ari majak ngerusakka komunikasyen ti  temuli entara sida. Sapa-sapa pan enda patut nyadi dengah buti siber. Media sosial ukai palan alai ngayanka dengki ngagai pangan diri tang  medium ti manah deka ngerapitka kaul.

Glosari

perugu – utama

serak – generasi

nadai lapat – tanpa sempadan

buti siber – buli siber

tirai juru - latar belakang

dengah – mangsa

mekuh - focus

 

Beri mih pejah ti mai ajar

Leka jaku pejah dalam jaku Melayu nya kritik ke diinjau ari leka jaku English iya nya critic. Pejah nya pengawa ke ngaga timbang penemu senentang sesebengkah pekara. Ba mayuh kes, leka jaku tu sinonim enggau leka jaku analisis. Dalam konteks litericha enggau akademik, leka jaku tauka terminologi nya mih ke pengabis tebalan dikena lalu dikena madah pengawa ke dikumbai pejah litericha, pejah seni enggau  bidang bukai ke sebaka. Iya mega pengawa sida ke pandai ke deka nguji meretika sesebengkah objek estetik enggau silik agi. Dalam konteks baka tu, leka jaku ‘pemejah’ tauka pengkritik ke dikena enggau nadai ubah tauka enda besekat, suah dikena madahka pengawa ba bachelor litericha tauka tukuh seni ti bukai.

Ba konteks ti bukai, terminologi ‘pejah’ tauka kritikan mai reti ti belaban senentang sesebengkah pekara ti dipejah. Bisi maya, konteks enggau belaban penemu nya faktor ke mida entara kedua-dua langkah rapat nya. Ambika banding, dalam bidang politik (baka ba rambai jaku ‘pejah senentang polisi menua luar’), ‘pejah’ nya kiraka suah ngembuan reti ti belaban, tang dalam bidang akademik, seni, enggau litericha (baka ba rambai jaku ‘pejah senentang leka main romantik’), suah agi dipeda baka pengawa ke ngaga analisis senentang sesebengkah pekara. Arapka kitai bela enda beba runding lebuh leka jaku pejah nya dikena ba bidang litericha tauka politik.

Ari leka jaku pejah tu kitai mindah ngagai leka jaku pejah seruri. Pejah seruri tu dikena aku ngalihka rambai jaku Melayu iya nya kritikan membina tauka analisis membina. Pejah seruri tu bisi elemen penyiru ngagai orang ke dipejah nya. Ngembuan peneleba ti tinggi agi, penerima enggau penemu ba sesebengkah bidang lalu ulih meri pengarap dikena mantu ngangkatka material, basa, emosyen enggau spiritual orang bukai ke dipejah nya.

Enti deka mujur dalam pengawa pejah seruri (siru), orang ke mejah nya mesti bisi kaul ti manah enggau orang ke dipejah. Suah agi sida tu baka kaul apai enggau anak, bakih enggau bakih, pengajar enggau nembiak iya, laki enggau bini tauka sapa-sapa ke bisi autoriti ba sesebengkah bidang. Nya alai, leka jaku seruri dipilih sereta dikena ngambika pengudah asil iya ulih dipeda banding enggau iya ke belaban enggau pekara nya. Ba bidang pedagogi, pelajar prinsip pejah seruri nya meri fokus ngagai teladan positif ti patut dititih, bebanding enggau leka jaku lalau ti patut dititih.

Taja pia agi bisi maya alai beserekang penemu ti bebasa enggau pejah ti beguna nya nyadi lebuh ke bejuraika sesebengkah pekara nya. Amat mih tukang pejah ulih mantu orang nentuka pekara ti kurang tauka sengapa kada ba karang tauka karya iya tang chara mejah nyangka dipeda terit tauka berat sepiak. Taja pia, pejah ti beguna agi dikira sebagi ari pejah seruri.

Tukang pejah dikumbai psikik tunsang. Timpai runding nya disebut kenyau ari jeman Gotthold Ephraim Lessing. Kenu ku iya “ukai semua tukang pejah nya genius tang tiap-tiap genius nya ada nyadi tukang pejah  genius, ngembuan  bukti tauka kelai ngagai semua atur ke bisi ba iya empu." Tu enda sama enggau tukang pejah ti berorientasyenka utai luar lalu besandar ba budaya aja. Jane Kneller, siku  sarjana ari Jereman, mantaika jaku nya dikena ngayanka "genius nunjukka pengelepas iya ukai ari enda bedulika  semua atur, tang ngeluarka atur ari atur ke udah bisi".

Ditu aku ngerintaika sekeda utai ke dipejah orang. Tu mungkur pengawa mejah filem, litericha, seni, sosial enggau teks. Kemaya hari tu bisi mega tukang pejah budaya enggau tukang pejah pemakai.

Enggau penatai media sosial kemaya hari, mayuh bendar orang ngaku diri nyadi tukang pejah lalu nyau deka selampur utai ke nyadi di dunya tu dipejah sida. Chunto klasik ke dikingatka aku nya idea pasal  siku Menteri Kabinet ke madahka perintah deka bejalaika projek kerita terebai ti keterubah di Malaysia lalu iya ti kedua nya lebuh Menteri Pelajar mai idea ngasuh nembiak ngena kasut chelum ari kasut burak. Mayuh orang tauka sida netizen ngelanyaika idea enggau jaku gerah menteri dua iku tu. Sida minta perintah meratika pekara ti nyadi diatu ari meda utai ti jauh ke mua.

Taja pia, respons baka nya ukai pekara ti tau ngasuh tekenyit laban udah ulih dipelabaka kitai semua. Kedua-dua insiden tu ngayanka rayat Malaysia endang semampai kiruh sereta siru ke utai tauka isu ti nyadi kemaya hari. Nama-nama isu pekara ke nyadi lalu tau nyadika isu dikena bala mensia mantaika pejah sida. Tang taja pia, pengiruh sida nya nyau udah ‘ditengelamka’ ketegal pengagit sereta ulah sekeda individu tauka netizen ke bejaika orang lebih-lebih.

Nyata bendar, semua orang endang bisi kuasa mejah lalu pia mega sida bisi kuasa enda besetuju enggau penemu orang bukai. Semina utai ke patut dikingatka iya nya pengagit kitai mejah orang enggau nadai meri jalai dikena mutarka pekara nya patut dibuai ari ulah kitai. Anang ngasuh orang ngumbai kitai beambi ulih ari peluang pekara ke nyadi nya. Bisi orang semina nemu mejah tang nadai nemu meri chara dikena mutarka pekara ti dipejahka iya.

Iya ti patut dikereja iya nya, enti orang ke baka tu bangat nadai penemu ti meruan deka dibantaika iya , manah agi iya diau jenuh aja. Enti agi deka enggau meri penemu diri manah mih bejurai enggau chara ti konstruktif. Bantaika penemu ti engkeman ti ulih mantu orang.

Bah, nama rasional kitai mejah orang tauka penemu orang? Katika ketegal kitai minta didingaka orang bukai? Tauka kitai minta peda orang aja? Kada enda sida ke mantaika pejah nya ke bendar bisi niat ti manah tang enda tentu nemu ngenataika mesej sida?

Endang enda ulih disakalka penemu ti madahka pejah nya beguna dikena mantu kitai ngemanah sereta ngubahka diri empu. Tang enti pejah nya nyau lebih ngagai personal sereta enda disempulang enggau chara mutar, nya dikira ukai pejah ke ulih mantu orang.

Nya alai, ngagai kitai ke peranak Malaysia, jadi mih peranak menua ke rasional lalu enda mudah ngakim sesebengkah pekara tauka siku-siku orang sebedau kitai nemu enggau silik tirai juru sesebengkah isu nya. Ulah ti baka tu beguna dikena kitai nempa siti rampa endur ti harmoni sereta lepas ari pengasai ati ti suah beperagamka penemu ti enda manah.

  

Pengelandik bepikir nembiak sekula patut diterenak ditelesak

 

Ubah landskap pelajar menua minta mayuh bengkah raban semampai berundingka alternatif ti engkeman dikena ngenataika proses ngajar enggau  fasilitator (PdPc) ti semitan. Ke baru iya nya  konsep bejalaika pengawa ngajar enggau belajar di rumah (PdPR). Konsep tu mega nerima mayuh macham respons ari mensia mayuh.

Nadai kereban teknologi ke chukup, pengulih internet ti besekat sereta kaul apai indai ti kurang nya entara serebana mensia mayuh empas ari pengawa PdPR nya. Kelimpah ari chara mantaika undan isi mata pelajar, pengelandik bepikir nya elemen ti beguna bendar sereta patut diperundingka dalam semua sesi ngajar enggau belajar. Bah, katika ulih tauka enda pengajar nerenakka pengelandik bepikir ba nembiak lebuh  sida bejalaika proses belajar chara online ke dikiraka agi baru nya?

Pengelandik bepikir mungkur pengelandik kreatif, bepikir kritikal tauka pengelandik bepikir tikas tinggi, sigi udah diberi fokus Opis Menteri Pelajar (KPM) ngelama tu. Mayuh macham inisiatif bisi  dipejalaika dikena nerenak pengelandik bepikir tu ba raban nembiak sekula. Taja pia, nitihka pansik sereta ripot evaluasyen antarabansa ngayanka mayuh agi pengawa ti patut dipejalaika dikena ngangkatka pengelandik bepikir nembiak sekula Malaysia.

Kemaya hari, enggau ubah rampa belajar nengah chara online, pengajar patut merambu strategi nerenak pengelandik bepikir ti manah ba nembiak sida. Bepikir begunaka  kapasiti kognitif tauka akal. Siti ari aktiviti ti patut suah dipejalaika pengajar iya nya nanya bala nembiak sida ngena tanya ti engkeman sereta relevan. Sesi betanya saut endang kritikal bendar dikena nyaup ngerembaika potensi pengelandik bepikir. Dalam konteks belajar nengah online, pengajar nyangka napi penanggul ngulihka respons ari nembiak sida. Dikena mutarka penanggul tu, dia pengajar patut pandai ngena teknik nanya ti efektif maya sida ngajar nengah online. Pengajar patut ngenataika tanya ti bisi kaul enggau peneleba enggau iya ke udah dikemisika sida nembiak. Ambika chunto, lebuh sida belajarka mata pelajar Bahasa Iban, pengajar ulih ngena statistik pengerekai COVID-19 ninting hari nyadika kereban stimulus maya  sesi betanya saut enggau nembiak sida. Tanya ti betukuhka kaul, empas enggau pangka sereta pematau entara teknik ulih dikena bala pengajar. Inisiatif baka tu beguna dikena nentuka nembiak ulih meda undan isi mata pelajar ti dipelajar sereta kaul enggau guna iya ba pengidup sida besehari-hari.

Lebuh nembiak udah  teperansang enggau situasyen tu, dia pengajar ulih ngambi peluang ngena kelaing teknologi enggau naka iya, ambika chunto baka  ruang forum tauka bejurai nengah online ngambika nembiak ulih enggau aktiviti bepikir ngena chara kolaboratif.

PdPR ti digaga mega mesti nyengkaum langkah rapat belajar ke engkeman enggau pengulih nembiak ngena medium komunikasyen sereta aplikasyen belajar. Ngajar ngena online chara terus ngembuan risiko ngaga penyilap teknikal ti deka ditapi pengajar tauka nembiak baka arus penyambung tak enda mukai-mukai putus ngujungka topik ti deka diajar sehari nya ditinggalka pia aja.

Nya kebuah, PdPc ke manah agi iya nya ke ngena kereban belajar ari video ti udah direkodka dulu. Chara tu ulih meri penguntung ngagai apai indai meratika pengawa anak sida di rumah ke enda ulih enggau belajar maya online dipejalaika.

Tang ke nyadika ironi nya, lebuh betapi enggau maya belajar era pandemik endang begunaka kereja kolektif semua endang milih nya pengajar, nembiak tauka apai indai. Ngelama tu, kitai pama bendar merambu sereta meri tuduh penemu senentang sistem pelajar ti meri fokus ngagai pengelandik bepikir. Siti ari aspek ti patut diterenak ba nembiak nya empu iya nya belajar ukai semuti deka nyapai sistem enggau peresa, tang mega ngarapka nilai penemu nya ulih diterima masuk dalam diri sida. Nya alai, komuniti mesti meretika konsep sekula nya palan ngulihka penemu lalu ukai  kilang meroses nembiak ngambika sida  'mayuh A dalam peresa'.

Berandau mih enggau sida sekula dikena ngulihka chara ti pengabis manah dikena nentuka pelajar nya ulih dibantaika ngagai nembiak ngena chara ti engkeman sereta manah. Retinya sekalika nengah chara online tauka enda, pemendar pengajar nya ngenataika penemu ngagai nembiak iya endang nadai utai ulih dikena mandingka iya. Terima kasih pengajar!

Penanggul sistem pelajar ukai semuti isu ngasika SOP

 

4 enggau 5 April 2021 tu idar bala nembiak sekula sekondari ngemunka  sesi sekula taun baru ungkup 2021. Nitihka atur, semua sekula mesti nyikap diri ngatur hal ti bisi kaul enggau pekara sekula ngambika prosedur operasyen standard (SOP) maya nerima nembiak pulai ke sekula ulih dititihka semua. Kelimpah ari meratika  aspek ngasika SOP, bisi sekeda hal bukai ke patut diperatika mega.

Maya selampur menua di dunya nutupka sekula bulan March 2020 taun nyin kemari lalu pindah ngagai langkah rapat alternatif ketegal deka nyeliahka ari pandemik, maya nya mega rayat baru ngeleda sereta nemu sektor pelajar menua ukai semina dilempaika ba bau pengajar enggau pemesai sekula aja. Iya mega mungkur tanggungjawab apai indai enggau  komuniti. Ngelama tu sida apai indai enggau komuniti baka ke enda tentu ibuhka utai ke nyadi di sekula. Nya alai, pandemik nyadika tanda kolaborasyen apai indai enggau komuniti mai pemansang enggau pelajar anak ti positif ke ngelama tu ukai nyadika pugu juluk pengawa sida.

Asil iya, pengawa belajar ti dipejalaika nengah online ke nyadi kelaing alternatif ti disadangka Opis Menteri Pelajar(KPM)  nyau nadai temu tuku. Tu mega kelai pelajar bekualiti ti beteraska pengerentang, ekuiti sereta inklusif dipeda jauh panggang ari api munyi ku sempama Melayu. Malaysia mega enda ulih ngelepaska diri ari panjuk pemerinsa tu. Nyauka 36 persin tauka 1.8 juta nembiak sekula ditemu nadai akses belajar chara online ketegal mayuh macham faktor. Penyampau ke nyau deka datai ngagai dua juta tu mih penyampau serak nembiak rebak baru ke  ditisih sereta disangkal hak sida ngagai pelajar, nama dih agi enti deka bejakuka pasal pelajar ti  bekualiti.

Nya alai, enggau tebuka sekula taun tu mega meri peluang kitai nyilak siti lambar baru dikena  nukar chara kereja, tang ba awak ke sama mega kitai agi ngadap ngagai peminta Filosofi Pelajar Menua iya nya nuju ke pemansang individu ti holistik.

Bepelasarka penerang ke dibacha ari surat berita, sekeda langkah patut ditentuka dulu, kelimpah ari mata kitai meri fokus ngagai SOP ti enda ngira penuduk, pangkat enggau status sosioekonomi.

Lebuh Pansik Pengerai enggau Morbiditi Bansa (NHMS) 2019 ngeripotka 424,000 anak mit Malaysia bisi penanggul pengerai pengelantang mental, dia iya lalu nyadika terantang ngagai menua ngambika angkat ngeleda ari tinduk ti jenak ngelama tu. Statistik nya dipelabaka bisi nambah, belalauka pemansang penyampau penanggul pengerai mental baka sida nembiak ke stres maya belajar online. Semua tu dipeda betambah ba semua peringkat pelajar sekula. Tu mega disempulang enggau pengasar domestik (domestic violence) ba sesebengkah ruang bilik baka kes bejamah enggau ngayah pangan diri chara mental ti betambah tiga kali lipat maya atur Perintah Mindah Betagang (PKP) taun nyin kemari.

Taja pan mayuh raban anak kitai ke udah chukup fasiliti kena belajar chara online tang anang mega kitai enda ingat bisi sekeda ari kitai ke enda ulih enggau belajar ketegal pengelantang mental sida ke enda bepengerai. 

Enti menya isu sekula sarat enggau penanggul sosial baka buli, teruan enggau nginsap, tang kemaya hari pengerai mental patut kitai peratika mega laban iya disemaka baka sempama Melayu, baka api dalam seku ke tau munuh kitai belubah lubah. Nambahka nya mega, anang sekali-kali kitai mejam sepiak mata lalu enda tepedaka pengerai raban pengajar laban sida mega nyau merundu (burnout) maya ke betapi enggau bala nembiak sepemanjai sekula ditutup. Peranak tukang tarak semampai dipeda ngangkatka pemendar diri dikena nentuka nembiak sida enda tinggal ari aspek pelajar sekula.

Ku penemu aku, endang patut alai KPM diatu ngiga sereta nambahka chara mutarka penanggul penyampau nembiak sekula enggau pengajar ti betapi enggau penanggul mental  sereta merundu nya. Dalam konteks sistem pelajar ti badas, iya patut dibantu sida pemegai taruh ngambika ulih nyapai pelajar ti semitan sereta bekualiti. Nengah konteks tu, semua entiti diperatika ulih nyaup menua Malaysia ukai semina deka nulung anak bansa ngulihka kuasa belajar ke patut iya ulih sida. Tu ukai semina pengawa siku hero ke nyaup nembiak sekula tang mensia mayuh patut mega segulai sejalai meri bantu dikena nentuka menua kitai ba lantar ti betul.

Selampur menua di dunya nerima pengiruh komuniti nyaup mutarka penanggul nembiak sekula ke drop out tauka badu sekula enggau nadai kebuah. Di Malaysia, gerempung ukai kuasa perintah (NGO) udah ngayanka pengawa ti sama progresif enggau perintah. Sida pan bisi inisiatif deka bekerejasama enggau perintah. Ba hal tu kitai enda ibuh nunjuk sapa ke salah lalu sapa ke patut empu tanggung pengawa nya. Kebuah pia, iya semina ngelubahka proses kereja ke deka nyelamatka nembiak sekula ke badu enggau ngenyit ari pengawa belajar. Sempama Afrika bisi nyebut, 'Enti deka mesaika anak, begunaka saup sekayu genturung pendiau.' Amat, enti manah utai ke digaga sida, segenturung nya dipuji. Enti enda, segenturung nya  mega patut dipakai anu mensia mayuh.

Taja pan apai indai enggau anak gagit ati deka nurun ke sekolah sepengudah lama kemisi, mensia mayuh tauka komuniti patut nemu agi laban bisi sekeda ari sida nya ke bedau ngeregisterka diri ke sekula. KPM agi bejalaika polisi zero buai dikena  meri bukti ratifikasyen menua kitai ngagai Konvesyen Hak Asasi Anak Mit Sedunya. Tu ukai utai main-main lalu perintah endang nadai nagang hak anak mit  ngulihka pelajar ti bekualiti.

Isu ke segenda bisi patut ditemuka kitai iya ke bekaul enggau akses sereta mobiliti. Gerempung Bansa-Bansa Bersatu (PBB) madahka krisis COVID-19 mejal bejuta nembiak mit bekereja sereta napi risiko nyadi kuli ukai maya umur sida ke patut iya. Ditambah mega enggau isu penatai nembiak sekondari ke nyadi penanggul ketegal deka ngiga pemakai lalu bekunsi penatai pemisi sereta gaji enggau diri sebilik. Indah,  status apai indai ke diasuh badu kereja deka mega meransang bala nembiak sekula ngiga jalai bukai begigaka duit ba sebarang endur, bebanding enggau maya sida ba kandang sekula.

Pengarah Eksekutif Tabung Anak Mit PBB (UNICEF), Henrietta Fore, madahka  pelajar ti bekualiti, servis bungkur sosial enggau ekonomi ti manah agi deka ngubah kes kediatu ari majak nyadi.

Enda ulih disangkalka mih, nengah sukut penemu pelajar madahka COVID-19 ngemendarka semua teori enggau langkah rapat pelajar nya dipejalaika. Taja pan baka nya, COVID-19 mega tu mega ngayanka pengelemi atur sereta langkah rapat pelajar. Nitihka ripot, iya begunaka  1,001 macham chara dikena ngemanahka atur nya. Nadai  guna enti kitai ngelayang laju ke legit ti pengabis tinggi, enti maya ke sama nembiak serak dudi nyadika piring genselan kitai.

Nembiak sekula nya mih modal mensia ke patut kitai liska ngambika sida begenyeling manah jemah ila. SOP nya langkah fizikal ti patut dikenangika kitai. Kati  ulih tauka enda iya napi pejalai atur maya sekula udah dibuka?

Kelimpah ari nya, aspek bukai baka pengawa nyaga pengelantang mental nembiak enggau anak mit, penanggul sosioekonomi rayat ti majak nambah sereta kerejasama mensia mayuh patut mega ba penuduk di atas dalam polisi enggau atur pengawa menua kitai Malaysia. Taga japai ke deka nentuka semua penanggul tu ulih diputarka sama-sama patut semampai diperundingka lebuh ngemujurka pelajar anak kitai.

Glosari

serak nembiak rebak baru – generasi baharu

pengasar domestik – keganasan domestik

merundu – lesu upaya

pemegai taruh – pemegang taruh / stake holder

Lantar – landasan

Taga japai - sasaran