Bepesan Ngena Jaku Ti Betul

Kemaya hari tu, bekomunikasyen ngena smartfon ukai pekara ke nyelai agi. Mensia mayuh udah milih smartfon nya nyadi kereban ti balat bendar beguna kemaya hari tu laban iya rumpas sereta nyamai dibai kin kitu.

 

Bepelasarka penerang ba atas nya dia kitai ulih nyimpul enggau ngelansa madahka smartfon ukai agi kereban orang ke kaya tang majoriti rayat ba menua tu udah bela bisi ngembuan kereban tu. Pengawa ke begunaka telefon tu nyerangkung genap ruang enggau sereta lapis komuniti. Indah bisi udah ngeruga atur sekula ngujungka bisi polemik senentang pematut nembiak sekula bebaika smartfon ke sekula. Pengamat pekara tu ulih dipeda kitai maya Opis Menteri Pelajar (KPM) masuk champur mutarka pekara tu munyi ke diripot ba Berita Nasional (Bernama) kena 17 April 2017. Dalam ripot nya, Menteri Pelajar Malaysia madahka enggau terit opis iya bisi sadang penemu deka ngemendarka bala nembiak sekula ngena telefon binching di sekula lebuh maya belajar.

 

Taja pia, siti ari penanggul ba nembiak sekula ti bekaul enggau pengawa begunaka smartfon iya nya nyengkaum penyalah guna jaku lebuh bekomunikasyen, kelebih agi maya sida nganjung pesan ngena jaku English, Melayu tauka jaku Iban. Pekara ti baka tu dipeda pia aja lalu jarang amat dipejurai raban apai indai laban sida ngumbai penanggul tu ukai penanggul ti tau ngeruga bala anak sida. Enti bisi pengirau pan mayuh nya ketegal bisi kaul  enggau empas negatif ketegal pengusut pengulih anak sida ba mata pelajar English, Bahasa Melayu tauka Bahasa Iban.

 

Enti diperati enggau lenak agi, pengurang pengulih sida dalam mata pelajar Bahasa Melayu mega tau meri empas negatif ngagai pengulih sida ba mata pelajar bukai kelebih agi lebuh sida nyaut sesebengkah tanya maya peresa baka Sijil Pelajaran Malaysia (SPM).  Utai ke ngirauka ati nya sida nembiak tu nyangka ngena jaku sirih pinang aja baka jaku ke tebalan dikena sida maya ngenataika sesebengkah pesan ngagai orang tauka malas teks pesan ti diterima sida ari orang bukai. Guna jaku ti enda betul dikena maya aplikasyen servis pesan pandak (SMS) tauka WhatsApp tu nyau ngerekai lebuh berkomunikasyen maya pengawa rasmi, ambika banding maya nganjung e-mel ke sesebengkah opis perintah kelebih agi maya minta kereja tauka lebuh minta nampung pelajar.

 

Pekara ti baka tu enda patut dilakka raban apai indai pia aja laban pelajar enggau pengawa nanka jaku nyadi sesebengkah budaya ti normal endang bepun ari rumah. Ketegal tu mih kitai patut ngemeran tanggung pengawa ti semitan dikena nukuh langkah rapat guna jaku ti betul dalam diri sebilik maya ke berandau ngena aplikasyen whatsApp tauka SMS. Baka selama mega lebuh ngenataika pesan ngena aplikasyen whatsApp ambika banding, aspek ayat, sepil enggau tanda bacha suah ke enda dikeibuh amat ngujungka kadang-kadang ngenusahka orang bukai ke macha sereta deka meretika pesan ke dikenataika nya.

Enti diperatika ari pesan kelebih agi ke dianjung bala nembiak redak ngagai pangan diri dia kitai meda sida suah amat sida ngena jaku ti enda betul ari sukut atur jalai jaku tauka ngena ayat ti enda gramatis. Tu mega nyadi lebuh bala anak nganjung pesan nuju apai tauka indai sida. Raban tu diperatika sengaja  ngena jalai jaku ti salah lalu sida mega berasai temegah enggau ulah sida ke ulih ngasilka ayat tauka leka jaku ti mudah taja pan iya salah ari sukut sepil enggau atur jalai jaku sereta tusah deka diperetika orang ke macha pesan nya. Nya alai raban apai indai patut mutarka pekara tu lebuh pekara tu agi mit. Sida patut madah ngagai anak sida chara enggau gaya ti enda betul nya tau ngemaruhka penuduk jaku nya empu. Enti enda dirara ari diatu lalu diajar sepemanjai maya sida ila deka teleba enggau jaku ti salah maya nganjung pesan ngagai sapa-sapa aja.

 

Peratika chunto jaku pesan ke dianjung nengah aplikasyen whatsApp:

 

Chunto 1

Tbi pai. Pai ma ga nun da? Aq da ka bs kls + lmi tu. Lih nun dti ngmbi aq d skul. Ang ln au. Aq lpr tu. Bdu mki ari pg tdi. Nda ingt mai dwt. Aq mga bdu mndi tu. Huhu...

 

Ayat di atas nya chunto pesan ke dianjung siku anak ngagai apai iya. Anak iya madahka diri bisi kelas tambah maya lemai. Iya mesan sereta ngarapka apai iya bisi di rumah lalu ulih datai enggau jampat  ngambi iya lebuh udah tembu kelas. Nengah jaku pesan nya mega, iya madah diri lapar lalu bedau makai laban enda ingat mai duit.

 

Bepelasarka chunto pesan tu, nyata amat jalai jaku ke dikena nya enda betul sereta ngelanggar atur jalai jaku. Enti enda dibacha enggau silik, tentu orang ke nerima pesan tu berasai tusah deka meretika pekara ti dikenataika nengah pesan nya. Nya kebuah, apai ke nyadi tuai bilik endang patut amat  narak anak iya ngena jaku ti betul, iya nya naip pesan ngena leka jaku ti betul disepil ukai ngedutka leka jaku ngujungka tusah diperetika orang ke macha. Nambahka nya mega, iya mega patut ngena jaku ti betul nitihka lebas randau. Peratika banding entara teks pesan asal enggau teks ti udah dimanahka agi baka ke diayan ba baruh tu:

 

Pesan	Teks Asal	Teks ti Betul
1	Tbi pai. Pai ma ga nun d umh da? Aq da ka abs kls + lmi tu. Lih nun dti ngmbi aq d skul. Ang ln au. Aq lpr tu. Bdu mki ari pg tdi. Nda ingt mai dwt. Aq mga alu bdu mndi tu. Huhu...	Tabi apai. Nama gaga nuan di rumah dia? Aku nyau deka abis kelas tambah lemai tu. Ulih nuan datai ngambi aku di sekula. Anang laun au. Aku lapar tu laban bedau makai ari pagi tadi. Aku enda ingat mai duit. Aku mega lalu bedau mandi. Huhu...

 

Pesan ke ditulis di atas tadi mega ulih dikedutka agi, engkeman enggau konteks enggau konsep komunikasyen nengah aplikasyen WhatsApp tauka SMS. Pekara tu mega patut diajar tuai bilik ngagai raban sida sebilik. Chunto nangkan tu nya teks pesan ti udah dikedutka. Teks nya dipeda engkeman, nyamai diperetika lalu ngembuan reti ti sama baka teks asal. Uji peratika chunto teks tu enggau silik:

 

 

Chunto 2

Tabi. Apai, nama gaga? Kelas lemai tu nyau deka tembu. Datai mih nuan diatu. Anang laun. Aku lapar sereta bedau mandi.

 

Ba teks ti udah digaga manahka agi baka ke dibantai ba chunto 2, kelimpah ari ngena sepil ti betul enggau rambai jaku ti nemban sereta engkeman enggau konteks, sekeda leka jaku mega bisi dibuai. Taja pia, iya nadai ngubah reti semua kaul jaku nya ke bisi dalam teks nya.

 

Peratika chunto ketiga iya nya timbal apai ngagai anak iya.

 

Chunto 3

Tbi ndu. Pai bnung mui abs ba slpak kmpter d rai umh. Phl kls lmi jmpt mai abs? K ndu ngti, dlm stgh jm pai dti. Ang nn mindh kni2 au. Lgi ps pai nga.

 

Chunto ba atas tu mega sama enda ngena jalai jaku ti betul.

 

Uji peratika siti agi banding entara teks asal enggau teks ti udah digaga manahka agi ba ke dibantai di baruh tu:

 

Pesan	Teks Asal	Teks ti Betul
2	Tbi ndu. Pai bnung mui abs ba slpak kmpter d rai umh. Phl kls ndu lmi jmpt mai abs? K ndu ngti, dlm stgh jm pai dti. Ang nn mindh kni2 au. Lgi llak pai niga ndu.	Tabi endu. Apai benung muai abus ba selepak komputer di ruai rumah. Nama hal kelas endu lemai tu jampat abis? Okey, endu nganti, dalam setengah jam apai datai. Anang nuan mindah kini-kini, au. Lagi lelak apai ngiga endu.

 

Baka ke udah diterang dulu ari tu mega, pesan nya sebaka enggau chunto ke dulu ari tu. Chunto 2 udah dikedut tang nadai ngubah reti ari teks asal nya. Iya ti nangkan tu mega teks ti udah dikedutka ari chunto 3. Teks nya diperatika engkeman, nyamai diperetika sereta ngembuan reti ti sama baka teks asal nya.

 

Chunto 4

Tabi. Apai benung meresi komputer. Badas, endu anti kurang lebih setengah jam. Anang mindah ke bukai, ya.

 

Ba chunto 4 tu, sepil udah dikemetulka lalu jaku ti dikena mega nemban sereta engkeman enggau konteks ke udah dikena dikena nganti leka jaku ti enda tentu nemban. Sekeda leka jaku enggau rambai jaku ti betandu udah mega dibuai. Jaku nya dibuai ketegal iya enda ngubah reti genteran teks nya.

 

Dalam konteks jaku ke enda betul lebuh bekomunikasyen ngena aplikasyen WhatsApp enggau SMS, mayuh orang nyalahka radio, gerempung jaku (NGO), orang ke tebangkar ba bidang jaku, enggau pengajar ke ngajar jaku di sekula. Sida ngumbai raban sida tu semina diau diri lebuh meda utai ke nyadi kelebih agi bala nembiak redak lebuh sida bekomunikasyen ngena aplikasyen tu. Tang ke bendar sida enda ingat tanggung pengawa nempa rampa guna jaku ti manah sereta betul nya dilempai ba bau semua kitai.

 

Dalam konteks tu, hal ke ngemeranka jaku ti salah baka tu enda patut dikumbai pekara selama tauka biasa. Penanggul tu patut diketu ari ngerembai ke ujung agi ngambika enda terus nimpangka pemanah jaku kitai. Nya kebuah, setipak enggau penuduk iya ke udah dipelajar di sekula dia kitai semua ke sayau ke jaku tu patut ngena jaku ti betul sereta manah ba nama-nama medium komunikasyen ke dikenaka kitai. Ingat jaku tuai ke madah, dikelala buah ari langgu, dikelala bansa ari jaku. Semampai ngena iya ke betul lalu kemetulka iya ke semampai salah dikena. Telebaka ngena jaku Iban ti betul. Kemetulka jaku Iban ti teleba dikena.

Begempung ngemansangka jaku diri

Pemuka Kenang

JAKU IBAN udah datai ba tikas ti patut nerima paradigma baru ngambi ke seraris enggau pemansang dunya ti balat kena segang umbak dunya globalisasyen. Berindik ari tu, semua Iban udah datai ba maya ti besengkukut, maya besaup, maya berakup begembar bau sama-sama menatika pemansang jaku Iban Iaban enda ngira asal penatai pendiau enggau pengidup, enda ngira pengaya enggau pemerinsa, enda ngira pemandai enggau penambap, enda ngira ideologi politik lalu enda ngira penatai ari ai enggau menua siti-siti.

Batang Kenang

Semua orang ke ngumbai diri Iban patut ngembuan tanggung pengawa berakup ngemansangka jaku Iban tu. Bala Iban patut begempung nuruka wang enggau ringgit, ngelumuka akal enggau kira, ngukun kuasa enggau autoriti sereta ngemukuka pengering enggau pengeliat ari deka ngambat paradigma baru dalam ubah sistem jaku Iban.

Semua tuai bansa Iban ke bisi kuasa enggau autoriti mesti nyimpan pengeransing sereta pengandal ati ‘bejakuka’ hal jaku Iban ba dini-dini pelasar ti alai sida bediri megai pengawa ngambika jampat didinga orang ke lebih bekuasa. Sida enda patut berasai malu tauka takut madahka pemesai guna jaku Iban ba bansa Iban enggau bansa bukai ke bisi pengerindu belajarka jaku tu.

Dalam millennium ti balat ditujah mayuh penguji baka ke diatu, jaku Iban mega enda ulih rari ari napi mayuh macham penanggul ngetanka sereta ngemansangka jaku tu. Nya kebuah dikena napi penguji kemaya hari tu dia jaku patut ngembuan siti jaku ti lati, siti sistem ti tuchi sereta ngambika jaku enggau bansa tu pegari.

Udah datai ba maya alai semua opis perintah, agensi perintah, gerempung enggau serakup, kompeni penyelak, media sosial enggau semua ti bukai saum lalu ngerengkun siti sistem jaku Iban ti nyerangkung sistem sepil enggau sistem jalai jaku ti standard ngambika jaku tu dipeda sama peninggi enggau jaku bansa bukai. Sistem Jaku Iban Di Sekula ti dikena diatu udah patut diangkat nyadi Sistem Jaku Iban Standard ke dikena ukai semina ba sekula tang ba luar kandang sekula baka ba opis perintah (RTM, Opis Pemadah, Opis Betanam betupi, Opis Pengerai, Majlis Adat Istiadat), Radio Prebet baka Cats FM, Yayasan Tun Jugah, media chelak baka surat berita (Utusan Borneo, Utusan Sarawak), Majalah Pegari enggau media sosial baka ba laman siber. Tu sekeda ari media massa ke bisi bekenaka jaku Iban dalam artikel tauka karang sida. Juluk ati bala Iban patut ngembuan 1Sistem, 1Jaku, 1Bansa lalu tu mesti dipenyadi ngambika nyata dipeda Iban empu enggau orang bukai.

Enti dipeda ari pemansang jaku Iban di sekula diatu jaku Iban udah datai ba tikas pelajar tinggi baka ke dikena ba institut pematih pengajar enggau universiti. Ba tikas SPM diatu jaku Iban udah diambi bala nembiak ba peresa SPM kenyau ari taun 2008 nyentuk ngagai 2018. Reti nya keretas jaku Iban ba tikas SPM udah diambi bala nembiak sepengelama 11 taun. Enti dikira penyampau ke ngambi keretas tu ngena chara mudah enti bisi seribu iku ngambi ninting taun, dalam timpuh 11 taun bisi 11,000 iku nembiak. 

Nya alai, peneras pemansang jaku Iban ba dunya kemaya hari tu balat bendar bepanggai ba pengangkun semua bansa Iban ke ngena jaku nya maya situasyen formal enggau dalam komunikasyen besesehari. Ari ti angkun, andal sereta temegah ngena jaku diri empu, nya tau ngujungka jaku Iban ukai semina entap agi, tegap agi tang mega nyadi pugu tangkai penyerakup bansa Iban sepemanjai maya.

Kelimpah ari bansa Iban empu, bansa bukai ke masai mendingka jaku Iban tau jampat mereti ti ngujungka jaku tu tau dominan lalu ngerembai ngagai bansa bukai. Berindik ari nya, jaku Iban mesti ngembuan daya besemekih enggau jaku bukai ti lama udah bisi pengentap sereta penegap.

Jaku Iban endang amat jaku lama, jaku kelia, jaku tuai ti nyadi pesaka diaris ari aki ini jeman kelai.

Kenyau ari jaku tu dibai pindah ari menua asal neresa mayuh jeman, nujah mayuh menua, iya sigi agi tuchi beresi, agi lati ti ngasuh iya meruan dikeangkun, dikeandal bansa Iban nyentuk ke millineum tu. Mayuh ubah enggau pemansang udah nyadi dalam jaku Iban.

Diatu pemansang jaku Iban nyau jauh nyulut enti dibandingka enggau jeman kelia menya. Kelimpah ari ti dikena bejaku, jaku Iban mega dikena berandau dalam media sosial baka dalam whatsap, internet, blog, facebook enggau twitter tauka dalam media chelak ti nyadi kereban bacha baka bup, majalah, lambar keretas enggau utai bukai.

Penutup Kenang

Berindik ari peneras ubah nya, dia Sistem Jaku Iban Di Sekula ti dikena patut diserenih, ditisih, diseruri sereta patut ditambah manah agi ngambika iya ukai semuti ulih nangkup ungkup dalam sistem pelajar sekula tang mega mungkur semua bidang ti bukai.

Jaku Iban patut ngembuan siti dokumen menuku iya nya Sistem Jaku Iban ti nyadi kereban sanding ke semua orang ti belajar sereta semua bidang pelajar ti begunaka iya jemah ila.

Pengentap enggau penegap jaku Iban bepanggai ba penguat iya besemekih enggau jaku bansa bukai ti seruran nyeging, semampai nating, selalu ngining deka ngerengkap, deka nengkerap, deka munas, deka mukaska iya ngambi ke iya lalu nyelelang midang.

Betarak Ketegal Penemu, Nempa Nembiak Rebak Baru

16 May genap taun tau disemaka baka haribulan ti tuchi dikena kitai ngingat sereta ngintu hari pengajar berengkah ari peringkat sekula nyentuk ngagai tikas nasional. Tang, kesekali tu taun 2020 bebida amat enggau chara ngeramika hari nya bebanding enggau taun-taun ke udah. Berengkah enggau tempuh Atur Perintah Mindah Betagang (PKP) kena 18 March 2020, pun sejarah tu nyadi iya nya maya peranak sekula benung kemisi tengah penggal keterubah sekula lalu nyentuk ngagai sehari tu, sekula lalu bedau dibuka ke bala nembiak di serata menua Malaysia lalu pia mega enggau pengerami hari pengajar.

 

Tema hari pengajar taun tu iya nya Betarak Ketegal Penemu, Nempa Nembiak Baru ti dikalih ari jaku Melayu iya nya Berguru demi ilmu, membina generasi baharu. Chara ngintu hari pengajar sekali tu taja pan enda diatur enggau chukup rami baka ke udah-udah baka ti kala diatur ba balai gempuru sekula sereta disempulang enggau mayuh leman pengawa dikena ngingatka basa mensia ke dikumbai pengajar tang kesekali tu setipak enggau atur perintah mindah betagang belebas pengerami hari pengajar tetap mega diintu lalu iya ukai dintu semadi dikena ngudahka hari nya aja.

 

Dipelabaka tentu mayuh macham inisiatif udah diperambu sereta dipejalaika sida pemesai sekula sereta institut pelajar dikena ngeramika hari pengajar kesekali tu.

 

Nitihka berita ke dibacha ari media massa bisi sekeda sekula ke ngintu pengerami tu nengah chara online, lalu bisi mega ke ngintu iya enggau chara meri tepa ti dikirum ngena pos ngagai bala pengajar.

 

Pengajar udah nyerahka nyawa enggau pengidup sida ngajar nembiak ari ke enda nemu, ari ke nadai penau nyadi nembiak ke nemu, bepenau sereta pandai. Pemendar sereta pengeransing bala pengajar di Malaysia gawa endang enda ulih disakalka agi. Bukti nya ulih dipeda kitai ke apai indai nembiak. Taja pan mayuh macham penanggul maya timpuh PKP enggau PKPB dipejalaika, nitihka ripot media, naka jam 2.30 ngalih hari kena 17 April 2020 madahka menua Malaysia dulu ari 51 buah menua bukai nyengkaum menua ke udah mansang didijir dalam injin pengiga ke popular ngena frasa ‘Google Classroom’. Reti nya Malaysia nya ba penuduk ti pengabis tinggi dalam timpuh sebulan nya lalu menua Indonesia ba tangga ke-2 lalu ditangkanka Albania, Serbia enggau Hungary ba penuduk kelima atas.

 

'Google Classroom' nya sebengkah ari aplikasyen dikena ngajar enggau belajar ti dipejalaika ngena chara online.  'Google Classroom'  tu ti diaturka Google lalu nyadika platform dikena Opis Menteri Pelajar Malaysia (KPM) nyadi sebengkah ari langkah rapat dikena bala pengajar ngajar chara digital maya timpuh PKP tu.

 

Nya semina sekeda ari cherita penyanggup sereta pengeransing bala pengajar ngenjuk tubuh enggau nyawa sida seratus persin ungkup anak nembiak ke dikesayauka sida. Penyanggup bala pengajar tu enda ulih diganti enggau mata duit sereta reta tengkira ke bisi ba dunya tu.

 

Mayuh bendar cherita senentang pengeransing pengajar enggau naka ulih ngajar nembiak taja pan betapi enggau penusah penyakit Covid 19 ke benung ngerekai ngagai semua menua di dunya. Bisi cherita pengajar ke sanggup berambunka nyawa neresa jalai balak sepengelama enam jam ke 13 buah genturung pendiau laban semina deka nganjung set keretas tanya ngagai nembiak ke diajar iya ngambika sida enda tinggal pelajar ketegal ke nadai akses internet ba endur nya.

 

Klip video ke dibantai ba laman media sosial Menteri Kanan Pelajar, Dr Radzi Jidin mulaika pengingat maya iya agi nyadi pengajar suba mega sebengkah agi cherita senentang pengeransing raban pengajar ngajar nembiak sida. Dalam klip video nya mega, iya ngangkatka baru watak Cikgu Hairul Badarul Shah bin Md Hashim, ke kala enggau iya ngajar dikena iya ngenang sereta masa bala pengajar. Klip video ti dikeluarka  Unit Komunikasi Koperat, Menteri Pelajar Malaysia nya ngayanka tema hari guru taun tu ngambika iya amat-amat dipelematika genap iku peranak KPM.

 

Malaysia entara menua ti ngembuan daya besemekih ti kompetatif sereta progresif dalam pengawa ngangkatka bidang pelajar. Enti kitai malik ke belakang mayuh bendar pekara ti besejarah ti bisi kaul enggau pekara tu. Ambika banding dalam taun 2018 Malaysia diangkat nyadi menua ti ngembuan tikas besemekih ti manah dalam bidang pelajar munyi ke digerahka maya Forum Ekonomi Dunia (World Economic Forum). Malaysia diberi penuduk ke-19 ari 141 buah menua  di serata dunya, ngelui ari menua ke udah  maju baka United Kingdom (UK) ke ba tangga 20, Perancis (26), enggau Jepun (31). Ba menua Asia Tenggara mega, kualiti pelajar di Malaysia, ba tangga kedua sepungudah Singapura (1), Indonesia (3), Thailand (4), sereta Vietnam (5).

 

Lebuh belematika tema betarak ketegal penemu, nempa nembiak baru, kitai enda ulih enda meratika mega budaya ke meransang aktiviti belajar sepemanjai maya. Iya patut  ulih nyelit masuk ngagai runding nembiak ti diajar kelimpah ari ngagai sida ke digela pengajar tauka tukang tarak.

 

Engkeman enggau jaku tuai ke nyebut tuntutlah ilmu daripada buaian hingga ke liang lahad, nyadika malin sereta pengering semengat bala nembiak, raban pengajar, kaki jari sereta pemesai sekula sama bela ngeransauka penemu enggau naka ulih.

 

Pengerami hari pengajar ukai semina nyadika tanda dikena ngingatka penyakah pengajar ngajar, narak, ngiring ngembing sereta nempa anak bansa tang mega dikena ngingatka pengawa sida ti enda ulih disukat ngena penyampau rega. Leka jaku  ‘pengajar’ deka meruan disebut sampaika sida pinchin sereta mega sampai ke sida lesi dibai hari.

Pengajar ti nyadi ikon ba pengawa pelajar sepemanjai maya patut nerenak semengat ke semampai aus ke penemu sereta enda mudah bansu nyikap diri enggau mayuh leman penemu sereta pengelandik. Belajar ukai semina nengah chara formal aja tang pengawa betarak kemaya hari tu tentu bebida amat setipak enggau gaya klimet revolusyen teknologi industri ti bepelasarka teknologi pemadah ti sofistikated.

 

Penguji ti ditapi raban pengajar kemaya hari tu ukai semina datai ari pugu pelanggan sida baka bala nembiak ke diajar di sekula tang mungkur mayuh utai bukai baka apai indai, enggau komuniti endur sida ngajar. Suba pengajar dipebasaka apai indai lebuh sida ngerutan anak sida. Pengawa pengajar baka nya dikumbai sebengkah ari chara ngajar bala anak ngambika sida enda nandu penyilap nya agi. Tang kemaya hari tu pekara ti baka tu udah jarang bendar nyadi.

 

Kelimpah ari nya, ba konteks betarak mega, sesebengkah penemu ti deka dipelajar mesti diterima ari orang ke tebangkar tauka bepengelandik sereta bepelasarka penyanding penemu ti betul, autentik sereta beautoritatif. Berindik ari nya, bala nembiak mesti  nemu nadai siku mensia ti bulih pemujur di dunya enti nadai mensia beatika mas ke benama pengajar.

 

Berekat asil ari bebasaka budaya bepenemu maya proses narak orang nyadi pengajar meri empas positif ngagai serak nembiak bepenemu ti deka meri penguntung ukai semina ngagai diri empu aja tang mega ngagai orang bukai. Serak rebak baru ti diadaka asil ari ngaul penemu dalam proses betarak ukai semina ngembuan pengelati alur penemu, tang mega ngembuan seregah enggau penteba diri ti mulia sereta terpuji. Nya kebuah, pengajar enda ulih enda dulu ngayanka chunto enggau teladan ti manah ngambika penemu ti lilih ngagai roh nembiak ti diajar deka mudah dikemeranka sida.

 

Peratika jaku ari sasterawan negara, Datuk A Samad Said;

“guru adalah awan indah terbang rendah, melimpahkan hujan pada musim gersang, menyegarkan benih ilmu, berbuah hikmah, ia renjis embun pada tanah bakat, suara insan ketika manusia kalah, sepi yang syahdu dalam dunia resah.

Guru... minda segar dan kukuh akar menghidupkan batin yang bersih, di daerah dunia cemar kasih dan pada ketika tak tersangkakan, walau diambilnya kembali semua buku, sempat ditinggalkannya asas ilmu. Guru adalah batin suci hati nurani, penjunjung budi, manusia yang taqwa..

 

Ingat mih, enda ngira sapa pan kitai kemaya hari tu, anang enda ingatka pengawa, pengiruh sereta pemendar pengajar narak kitai semua nyadi mensia ti mujur. Ungkup semua mensia ke digela pengajar, endang enda ulih dibalas pemanah pengawa ti udah digaga sida ngajar sereta narak peranak menua.

Terima kasih pengajar!

 

Pemuka Jaku

Ketegal penanggul teknikal ba blog Tempalai Kenang dia penulis dipesul nampung pengawa nulis ba blog baru. Blog baru tu dikumbai aku Arus Kenang dikena ngelaika asal penatai penulis nya ari menua Arus.

Niat ati penulis agi sama enggau penempa blog ke lama iya nya ditulis ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu diarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"