DeepSar, kereban kalih pintar; negapka jaku lokal Sarawak

 

DeepSar, kereban kalih pintar; negapka jaku lokal Sarawak

 

Sarawak diatu mansang sesingkang agi dalam ngemansang jaku nengah perambu ti deka nempa aplikasyen Deepsar. Tu teknologi ti dikena ngalihka jaku ke bisi ba menua tu kelebih agi jaku etnik Dayak.

Teknologi nya deka dikemansangka Sarawak Information Systems (SAINS). Iya setipak enggau juluk perintah nengeri ke deka ngemansangka tukuh ekonomi baru bepelasarka teknologi.

Sarawak Information Systems Sdn Bhd (SAINS) nya gerempung ti ditumbuhka dalam taun 1991. Iya nyadi penyedia pemansang teknologi ti bekunsi nyukung inisiatif transformasyen digital enggau perintah Sarawak. Kompeni tu ngenataika mayuh macham servis IT, ari pengawa bejalaika sistem nyentukka pengawa ngaga chara mutarka penanggul, sereta meri sukung ti komprehensif ba selampur sektor perintah baka pengawa nyaga pengerai, pelajar, enggau dagang nengah 11 pampang opis iya di Sarawak.

Deepsar ke dikemansangka SAINS nya ila deka beoperasyen nyadi kelaing pengalih pintar ungkup mayuh macham jaku etnik. Tu nyengkaum jaku Melanau, Iban, Cina enggau English. Iya sebaka enggau aplikasyen global ti ngemudahka temuai beinteraksyen ngena teknologi 'mobile'.

Aplikasyen tu ukai pemintar artifisyel ti kompleks, tang balat agi meri fokus ngagai pengawa ngalih jaku enggau nadai risiko salah guna ti bisi tuju negatif.

Pemansang teknologi tu setipak enggau pematut ngenegapka pengelandik jaku enggau digital raban bansa Sarawak, seraya ngerembaika peluang ekonomi baru nengeri.

Kereban tu balat agi diguna lebuh orang ari menua luar tauka temuai bejalai ke menua ulu. Ambika banding enti orang nya nemuai ke menua Mukah tentu orang nya patut nemu jaku orang menua nya baka jaku orang Melanau tauka jaku Iban. Deepsar deka nyadi kaling ti chukup engkeman ungkup pejalai sida. Nya alai SAINS ke endang udah bisi applikasyen digital ti mandangka biodiversiti menua Sarawak diberi tanggung pengawa nempa applikasyen tu. SAINS begulai enggau Sarawak Multi Authority (SMA)  deka majak ngemaru (innovate) kereban digital dikena nyukung kaul temuai kelebih agi dalam bidang e-commerce.

E-dagang beguna amat sereta signifikan nyadika penyambung entara orang ti nemuai ngagai sesebengkah palan ti dituju sida. Peneleba tu ulih dibanding baka temuai ke nemuai ngagai Paris di menua France ke alai orang lokal tauka orang menua dia empu tebal agi deka bejaku ngena jaku French enti sida berandau enggau orang luar.

Nya alai, deepsar tu ngasuh pengawa ngalih jaku tu berebak maya enggau  jaku etnik kitai. Deepsar deka nyadi kaling ke chukup engkeman ungkup temuai maya sida bejalai di Sarawak. Enggau teknologi tu mega kitai ulih ngangkatka sektor hospitaliti enggau dagang temuai.

Nya alai ke pengujung iya, pengawa ngambu Al enggau inovasyen digital ti baka tu deka ngasuh Sarawak ulih ngangkatka kualiti servis dalam pengawa hospitaliti enggau dagang temuai seraya meri kelala metrik enggau chara baru dikena ngetanka penumbuh dalam industri nya. Ngagai aktivis jaku, kereban Deepsar tu ila ulih ngangkat jaku etnik ti bisi ba menua Sarawak ngambika dikelalaka bala temuai ari menua luar.

Sanding Penemu:

• DayakDaily, December 6, 2025
• Utusan Borneo Online, November 29, 2025

 

13 Februari – Hari Radio Sedunya

 

13 Februari – Hari Radio Sedunya

 

Radio nya medium komunikasyen ti lama udah kala diguna mensia kenyau ari jeman perang kelia. Nitihka fakta sejarah, radio tu ngembuan mayuh orang ti meri bantu nempa iya, berengkah ari penemu saintifik pasal radiasyen elektromagnetik (gelombang radio) ba ujung taun 1800-an, lalu ditangkan enggau pemansang teknologi perengka ti manah agi dikena ngasilka sereta nerima transmisyen.

 Ari radio nyumbuk pengawa penabur tauka broadcasting. Penabur nya pengawa ngagihka isi audio enggau audiovisual ngagai audiens ti beserak nengah medium komunikasyen elektronik. Tebal agi iya ngena gelumbang radio dalam model siti ngagai mayuh model.

Pengawa naburka berita berengkah enggau radio AM (Amplitude Modulation), ti nyadi popular urung taun 1920 lalu pengerembai pemanchar enggau penerima radio tiub vakum. Sebedau tu, tebal agi implementasyen komunikasyen elektronik baka radio, telefon, enggau telegraf ke dulu suba nuju tauka entara siku enggau siku lalu pesan ti dituju nya ngagai penerima tunggal.

 Radio agi dikiraka relevan nyentuk ke sehari tu tang iya ngerembai nitihka putar evolusyen ti dipejalaika setipak enggau ubah jeman kemaya hari tu. Enda ngira sapa kitai, iya ke bisi kerita ku aku sigi tentu masang radio sida lebuh sida deriba sereta maya ba dalam kerita. Lama tauka sekejap nya ukai sukat orang ke rindu ninga radio. Idupka injin kerita, radio pan terus memunyi. Aku ke becherita tu bepelasarka peneleba aku empu ke semampai mendingka radio enti aku ba dalam kerita.

Taja pia, radio semampai betapi enggau mayuh leman penguji  teknologi ke bukai. Enti kitai meratika  bala peninga  endang dipeda agi ngembuan pengarap milih kelaing tauka platform radio alai sida ngulihka penerang ti nemban sereta amat senentang sesebengkah perkara. Kitai sama bela nemu kemaya hari tu kelalu mayuh informasyen tauka berita ke selebubu ngapa ke tau meba runding orang ke macha tauka meda pekara nya. Tu ke ngasuh sida peninga mindahka medium sida ngagai siti medium ke mantaika utai ke amat. Nya mih radio.

Hari Radio Sedunya keterubah iya diintu dalam taun 2012 kena 13 Februari. Pengerami tu diatur Gerempung Pelajar, Budaya enggau Saintifik (UNESCO), Gerempung Bansa-bansa Besatu (PBB).

Ngelama ke udah radio, semampai berubah ari sukut teknologi, ari sebuat set kutak elektronik enggau spika sereta mikrofon berubah nyadi mayuh macham tukuh enggau guna baka ke dipeda kitai kemaya hari tu. Dulu suba radio dikena nyadika medium komunikasyen ari jauh. Indah Guglielmo Marconi kala diangkat nyadi mensia keterubah mujur nganjung signal neresa Tasik Atlantik.

Udah nya, baru radio nyadika kereban dikena nyadung propaganda perintah maya Perang Dunya Keterubah (WW1) enggau Perang Dunya Kedua (WW2) sebedau iya digaga nyadi medium pemerindang kitai baka ke kemaya hari tu. Aku agi ingat taun 60an ngagai taun 70an saiz radio endang umbas iya pemesai. Udah nya kala ga aku ninga sereta sempat meda radio ke dikumbai bala Iban radio sandik. Radio nya bisi tali penyandik lalu sigi disandik sida  dibai ke umai tauka kebun.

Nangkanka nya, lebuh menua majak mansang, teknologi radio disikap enggau mayuh macham guna ke bukai baka pemain kaset enggau kereban rekoding nyawa, CD, MP3 enggau mayuh penteba ke bukai.

Sepengudah 100 taun ari pun dataika diatu, radio agi ulih beretan sereta mansang jauh ke mua agi. Nithka pansik, agi mayuh peninga ke deka ngulihka sesebengkah pekara datai ngena  medium radio ambika chunto baka RTM ti udah lama ditumbuhka perintah. Inisiatif stesyen radio ke ngeluarka mayuh macham program ngasuh kelaing  radio nya balat agi  dikearapka nyadi medium penyadung berita enggau informasyen kelebih agi iya ke bisi elemen belajar.

Kelimpah ari elemen belajar, radio ke endang baka selama nyadika kereban dikena kitai merindangka ati, ninga mayuh macham lagu ti ditebah sereta nyadika kelaing alai ngenataika mayuh macham pesan nengah mayuh bengkah stesyen.

Nya alai, ba penemu aku, radio tu taja pan medium komunikasyen keterubah dikena mensia mayuh tang iya endang agi releven nyentukka sehari tu. Radio udah mujur nerenak pengarap ngagai raban peninga enggau mayuh macham infomasyen ti kenataika sida penabur radio ke mungkur semua aspek pengidup.

Empat strategi dikena kontrol ulah nembiak rebak baru

 Empat strategi dikena kontrol ulah nembiak rebak baru

 

Penyampau video game ti mayuh ke bisi ngayanka elemen jenayah, ulah kasar enggau ulah ti enda beradat majak ngirauka ati mensia mayuh laban iya dipeda ulih ngeruga runding enggau ulah nembiak rebak baru.

Isu tu enda ulih diambi mudah pia aja laban diatu majak mayuh main interaktif digaga enggau konsep ‘dunya tebuka’ ti meri pemain pengelepas ti ekstrim, nyengkaum pengawa ngerumpak, bedagangka dadah, nimbak enggau ngereja pengawa vandalisma dalam main online. 

Dikena nagang pekara negatif tu ari majak nyadi, menua tu begunaka chara ti komprehensif agi ti ngaul semua raban laban aplikasyen sereta main video baru dilanchar enggau nadai ngetu-ngetu ninting hari.

Empat batang strategi dikemendarka dalam pengawa ngelaban tauka nagang gaya main jenayah.

Keterubah, perintah begunaka atur ti terit agi ba industri main digital nengah chara numbuhka malin tauka garis lalau ti silik agi nyengkaum klasifikasyen umur ti terit agi sereta napis isi ti tau ngeruga.

Raban bekuasa kelebih agi Suruhanjaya Komunikasyen enggau Multimedia Malaysia (SKMM) mega dipinta bekerejasama enggau platform baka Google Play enggau Apple App Store dikena nyekat main ke bisi elemen jenayah ari dikelakuka enggau chara tebuka. MCMC dilalau ngerembaika sistem matau enggau neritka atur automatik ngelaban aplikasyen ti berisiko tinggi. Akta baru baka Akta Pengelikun Online (OnSA) ulih nyadi ‘dinding digital’ dikena nagang aplikasyen ti ngundan elemen jenayah ari ngerekai ngagai perengka guna setempat.

Enti kitai ulih nyekat laman web ti tau mai penusah tumu agi, enda patut ga main ti bisi elemen jenayah enda ulih ditapis tumu ga agi.

Ketiga, apai indai patut bejalaika tanggung pengawa laban sida ke pemadu semak enggau anak sida. Sida nentuka bisi pengawa matau perengka, pengawa masang ‘parental control’ enggau sekat ngena skrin digaga nyadi pengawa mandatori.

Entara tuduh penemu ti ulih ambika chunto ngena aplikasyen baka Google Family Link, Screen Time enggau Samsung Kids dikena kontrol akses ngagai main ke enda patut. Bala nembiak kemaya hari tu nya nembiak rebak digital. Sida jampat belajarka pekara baru, tang sida agi begunaka iring kitai ke tuai. Enti nadai dikuasa, dikemata dunya maya tu tau nyadi peti tau disemaka baka taju.

Langkah keempat, institusyen pelajar, komuniti enggau kaunselor begunaka pengawa bejalaika kimpin penyedar ti seruran dipejalaika bekaul enggau penusah normalisasyen pengawa jai dalam isi pemerindang digital.

Program pelajar siber ba sekula patut ngemeratka empas psikologi enggau jenayah ti tau nyadi ketegal gian bemain utai ti tau mai penusah. Pengerembai main ti bisi elemen jenayah endang enda ngetu enti mensia mayuh majak ngumbai nya semina ungkup pemerindang aja.

Kitai patut bejalaika pengawa ari diatu. Anang nganti raban nembiak kitai belajarka pengawa salah nengah chara nekanka kanchin main online. 

 

.

GIAN MAIN ONLINE BA RABAN NEMBIAK GEN Z SERETA LANGKAH RAPAT KENA MUTAR NYA

 GIAN MAIN ONLINE BA RABAN NEMBIAK GEN Z SERETA LANGKAH RAPAT KENA MUTAR NYA

 

Jaku Pemuka

Penyulut teknologi digital kemaya hari tu udah mai mayuh macham pengelantang ngagai mensia mayuh, kelebih agi ngagai sida rebak baru. Taja pia, pemansang dunya main online ti sedanah mega udah meri pangka ngagai fenomena baru iya nya gian main video ba raban nembiak Gen Z. Rebak tu ti mansang sereta besai enggau telefon pintar, internet enggau media rama suah nyadika pekara main online tu nyadika batang pemerindang sida.

Taja pan main online ulih meri sekeda penguntung baka ngangkatka koordinasyen jari-mata enggau pengelandik strategi, tang enti enda dijaga, iya tau mega meri empas negatif ngagai pengawa belajar enggau pengidup rama. Baka belayan padi lebat bebuah, tiap utai ke nyadi tentu bisi tuju enggau kebuah. Aram kitai meratika kebuah orang gian bemain ‘main online’.

Pun Gian Bemain Main Online

Akses ti Mudah sereta Murah

Main online diatu ulih diakses ba sebarang endur baka nengah telefon pintar enggau komputer. Tu ngasuh nembiak rebak baru senang tepejuh bemain dalam timpuh ti lama. Nyau deka semua apai indai kemaya hari tu mekal anak sida enggau telefon pintar.

Elemen Upah enggau Pekit

Tebal agi main moden digaga enggau sistem upah baka ranking, lencana enggau pengulih ti ngasuh pemain deka terus bemain ngambika ulih datai ba tikas ke nangkanka nya. Bala nembiak sanggup bejam-jam nunga telefon sida bemain laban deka ngulihka ranking tauka perais.

Tekan  ari Sosial enggau Dirempah Ulah Kaban

Mayuh nembiak bemain ketegal deka setipak enggau kaban sida. Tekan ari sosial tu ngasuh sida tusah deka ngetu tauka kontrol jam bemain sida.

Kurang Kemata ari Apai Indai

Ba dunya moden ti kiruh, mayuh apai indai enda sedarka pemayuh awak anak sida ba mua skrin. Sida ke apai indai nadai hari ngemataka anak sida laban ti kiruh enggau pengawa sida empu.

Nama empas ari gian main online ba nembiak?

Empas ari Gian Main Online ba Nembiak

Prestasi Akademik Kusut

Nembiak ke gian bemain suah agi enda ibuhka pengawa sekula sereta ngurangka awak belajar. Tu ngasuh gred akademik enggau disiplin nurun. Tiap awak ke bisi dikena enggau penuh bemain.

Penanggul Konsentrasyen enggau Pengingat

Bemain kelalu lama tau ngeruga konsentrasyen laban untak balat agi tetarit ati ngagai upah bemain tekala nya ari pengawa akademik ti begunaka fokus timpuh ke panjai. Belajar sereta macha bup ukai pengawa ke dikerindu sekeda nembiak laban nya enda merindang ati sida.

Lelak enggau Penanggul Tinduk

Bemain nyentuk ke tengah malam ngachau pusin tinduk. Ketegal nya, nembiak nyadi buntau, ngantuk sereta nadai motivasyen ba sekula. Sekeda selalu ngiga dalih enggai datai sekula nyepi diri lelak sereta buntau.

Langkah Dikena Mutarka Penanggul Gian Main Online

Pelajar enggau Penyedar Tumu

Apai indai enggau pengajar patut meri eksposur tumu ngagai penusah gian main sereta ngajar konsep nagang diri sereta chara ngatur jam.

Sekat Jam Bemain

Tetapka taga jam ninting hari ti setimbang baka maya belajar, belelak, enggau pemerindang. Ambika chunto, apai indai tau semina ngemendarka sejam bemain sehari pengudah tembu kereja sekula.

Monitor enggau Tanggung pengawa Apai Indai

Ngena aplikasyen kontrol apai indai (kawalan apai indai) dikena nyaga timpuh ngena gajet. Apai indai mega dilalau ngena awak ti bekualiti begulai enggau bala anak ngambika sida enda ngiga pemerindang  nengah main digital aja.

Peransang Aktiviti Fizikal enggau Sosial

Nembiak rebak baru diperansang masuk lumba enggau main, kelab, tauka pengawa nadai bepampas tauka volunteerism ti ulih ngurangka awak lepa sereta ngangkatka pengelandik sosial. Sekeda pengawa nadai bepampas baka masuk gerempung Anak Bulan Mirah tauka Gerempung St. John.

Iring Kaunseling Sekula

Sekula tau ngatur sesi kaunseling tauka Woksyop penyedar digital dikena mantu nembiak meretika empas gian enggau chara nagang diri.

Ngena Main enggau Positif

Ukai semua main bisi empas negatif. Nembiak rebak baru tau diperansang bemain main pelajar tauka main strategi ti nempa pengelandik bepikir abika chunto baka main scrabble enggau main chicktionary.

Penanggul Sosial enggau Emosyen

Gian tau ngujungka diri diau diri, tusah ati tauka enda ulih begulai enggau kaban belayan ba dunya nyata.

Jaku Penutup

Ketagih main online ba raban nembiak Gen Z nyadi isu sosial enggau pelajar ti begunaka perati ti berat. Main digital ukai munsuh, tang guna iya patut ditengkua enggau chara ti setimbang ngambika enda ngeruga pelajar enggau pengidup dudi hari raban nembiak. 

Nengah kerejasama entara apai indai, pengajar sereta komuniti, nembiak rebak baru ulih dilatih pintar ngena teknologi lalu ukai ngelengkaka diri empu, tang nambahka potential enggau pengelandik sida ba jeman digital tu.

 

 

Sekat Umur ba Media Rama Nyadi Chara Nagang Pengawa Jai Ba Sekula

 Sekat Umur ba Media Rama Nyadi Chara Nagang Pengawa Jai Ba Sekula

 

Perambu perintah ti deka nikika tikas umur ngena media rama ngagai 16 taun dipeda nyadi singkang ti engkeman dikena nagang kelalu ngeruga nembiak di sekula. Atur tu enti diterit, ulih mutarka mayuh macham penyalah rama nyengkaum pengawa ngachau enggau ngachau seksual ba sekula, ke diatu ba tikas ti ngirauka ati.

Semua raban patut bekerejasama nagang penyalah rama ti bekaul enggau media rama.

Ulah ti deka nerenak budaya enda beradat ba nembiak sekula ukai semina ketegal dirempah ari media rama aja. Nya alai, apai indai dilalau ngambika nemu agi bansa video game ke dimain anak sida, kelebih agi iya ti ngundan elemen kasar sereta enda setipak enggau umur sida. Mayuh apai indai kemaya hari tu semina ngelakka anak sida bemain enggau enda meresa isi tauka rating main nya.

Apai indai suah ngambi jalai ti mudah nengah chara meri anak sida telefon tauka tablet ngambika sida enda memunyi sereta enda ngachau orang tuai. Telefon yau nyadi amah apai indai mantu sida ngibun anak sida. Bala apai indai enda sedar anak sida benung belajar nengah dunya maya chara ngakal, bula sereta enda sensitif ari media sosial. 

Berindik ari nya, semua raban nyengkaum aki ini enggau orang ke ngibun anak mit mega patut bejalaika tanggung pengawa matau isi pemerindang digital anak mit sida. Sida mega enda ulih ngaga diri enda meda. Nembiak ukai nya ada jai, tang enti sida dilak pia aja ngagai dunya  ngajar sida tentu ati sida tau nyadi kering baka batu.

Perintah mega ukai semina fokus ngagai chara media rama ulih ngerempah runding nembiak, tang mega beratika penusah isi program ari platform streaming ti bebayar. Opis Menteri Komunikasyen enggau Opis Menteri Pelajar patut bekerejasama dalam beratika sereta napis isi media rama ti kasar, seksual, jenayah enggau buli ti mudah dipeda nembiak rebak baru.

Nya kebuah, pematut pelasar media rama nya bejalaika sistem netapka umur penguna nyadi singkang ti beguna dikena nentuka pengelikun nembiak mit ba ruang digital.

MEDIA RAMA KELAING TI ULIH DIKENA

 MEDIA RAMA KELAING TI ULIH DIKENA

 

Media rama iya nya kelaing tauka platform digital ti ngemudahka interaksyen sereta bekunsi isi entara penguna nengah chara online. Batang penguntung iya nyengkaum pengelantang komunikasyen, chara pemerindang enggau kreativiti, sereta mega kereban makit ti efektif. Taja pia, media rama mega bisi empas negatif, baka tau ngasuh gian, tusah ati, buli siber, sereta mega risiko ditipu enggau salah guna data diri.

 

Reti enggau fungsyen media rama .

Definisyen: Media rama nya kelaing digital dikena beinteraksyen enggau pangan diri sereta bekunsika isi baka teks, gambar tauka imej enggau video nengah online enggau nadai disekat ruang enggau jam ngena. Tuju iya ngambika individu ulih begulai, nempa kaul enggau orang bukai, sereta nempa kaul dalam dunya maya.

 

Baka belayan padi lebat bebuah, tiap utai ke nydi bisi tuju enggau kebuah. Tiap utai ke ditempa tentu bisi empas positif enggau negatif lalu baka nya mega media rama tu.

 

Empas positif

Komunikasyen enggau kaul rama:

Media rama udah meri definisyen baru ngagai chara mensia ngaul pangan diri. Iya ngasuh pengawa mudah agi ari ke udah ari sukut ngerapitka kaul, belajar, sereta bekunsika informasyen. Mayuh orang ngasaika iya nyadi kereban ti beguna amat dikena sida seruran nemu sereta ngaul diri enggau dunya. Media rama ngemudahka komunikasyen ba orang ke jauh ari pangan diri, ngetanka kaul entara diri sama diri sereta nyadika chara dikena ngemansangka kaul profesional kelebih agi dalam pengawa sereta ba bidang pelajar. Maya penyakit COVID-19 ngerekai suba bala nembiak sekula enggau bala pengereja pengawa ngaga kaul kereja entara pangan diri nengah media ke dikumbai zoom tauka google-meet.

 

Pemerindang enggau kreativiti:

Media rama mega nyadi pun pemerindang sereta palan mantaika diri tauka penau diri enggau kreativiti nengah mayuh macham konten. Kemaya hari tu kitai ulih meda mayuh bala Iban mantaika diri nengah media rama sereta nempa mayuh macham undan ti kreatif. Nampak bendar bisi pemansang bala Iban lebuh mayuh sida nguji mantaika adat asal bansa Iban. Sida nyau sedar ke pemanah mantaika adat asal Iban ngagai mensia mayuh negah chara online.

 

Akses ngagai penerang tauka informasyen:

Ketiga, media rama ngemuntangka pengawa ngerembaika penerang enggau jampat sereta luas. Iya  mega nyadika kereban belajar ti mudah diulih tauka diakses bala nembiak sekula. Enti suba agi jeman media chelak bala pemacha nyau nganti hari siti lebuh surat berita udah dichelak sereta disadung di pasar. Kemaya hari tu penerang berita ulih datai sekejap mata laban informasyen sema jaku nyau ba ujung tunjuk memagang.

 

Pengawa dagang:

Empas positif ti kepenudi nya media rama meri peluang ngagai bala  dagang beinteraksyen terus enggau bala pemeli. Sida ke dalam pengawa dagang mega ngerembaika chap diri sereta bejalaika promosyen ti semitan agi ngagai semua orang enda milih dini-dini endur.

 

Empas negatif

Genap utai ke positif tentu bisi utai ke negatif lalu baka nya mega media rama. Taja pan media rama bisi mai empas positif ngagai mensia tang ukai semua nya baka panchar mata panas enggau solidariti ninting hari. Kelaing ti sama ke nyambung kitai ngagai dunya mega ulih dimanipulet, ulih ngelimpangka runding sereta ulih meri empas negatif ngagai kitai semua.

 

Pengerai runding:

Ari sukut negatif, media rama mega tau ngeruga runding sida ke bekenaka iya. Orang ke kelalu ngena media rama tau nambahka risiko tusah ati, irau, sereta enda puas ati ketegal banding standard ba media rama. Sida iya jampat tusah ati enti sema orang ke dipeda sida ba media rama nya jauh nyulut agi ari sida iya. Sida mega mudah irau enti orang mayuh mejah sida enggau chara negatif.

 

Gian:

Kedua, media rama tau ngasuh penguna nya gian baka ke gian nginsap dadah. Sida semampai deka muka komputer tauka telefon pintar, deka nemu utai ke nyadi ba rampa dunya ti ngelingi sida. Tumu pagi lebuh dani udah dulu ngabas sereta muka telefon. Hal tu  meri empas ngagai kualiti interaksyen terus enggau orang ti pemadu semak. Ambika banding sida serumah nyau enda tentu bejaku enggau pangan diri nengah chara randau fizikal laban tembu bechulikka telefon pintar sida.

 

Penyalah enggau risiko:

Konsep manah enggau jai nyadika pelasar pengidup enggau runding mensia, lalu ngerempah pemutus runding pasal etika, pengawa nyentukka undang-undang kitai. Tang, pemisi konsep tu sekalika iya nya kualiti ti bisi dalam dunya tauka semina utai ti digaga mensia aja—udah nyadi batang pekara ti mayuh dipejuraika bala ke tebangkar ba bidang filosofi, teologi, enggau orang ti bepenemu sepengelama beratus taun. 

 

Kelaing media rama ngena model dagang ti ngemeratka pengawa komersial lalu meri perati penuh ngagai penguna. Data penguna digumpul, dianalisis, lalu dikena nagit iklan sereta ngerempah ulah mensia. Ari nya mensia muntang bendar kena tipu kelebih agi sida ke amu mata ke deka jampat kaya.  Media rama mega palan ngerembaika berita bula (hoax news) berita selebebu ngapa, sereta penyalah guna data diri.

 

Media rama mega ruang alai buli siber ngelanyah orang ke lemi semengat. Fenomena buli tu ukai semina nguti chara kasar fizikal tang mega ngerembai ngagai tukuh buli  ba laman siber. Isu buli nyadi ketegal mayuh macham faktor baka kurang angkunka nilai agama, kurang perati ari apai indai sereta kena rempah media rama enggau kaban belayan.

 

Interaksyen sosial:

Media rama mega ngurangka interaksyen betunga mua lalu ulih ngasuh orang nya enda kiruh agi enggau rampa dunya ke ngelingi iya. Sida ke ngena media rama tau ngujungka kualiti maya begulai enggau orang ti dikesayau sereta pengasai ati sereta kaul sida  ti majak kurang. Penanggul tu engka bekaul enggau isu kaul ti udah bisi sebedau tu tauka gaya psikologi.

 

Pemesai guna ngena media rama enggau pemintar .

Ngena media rama enggau chara ti pintar beguna amat dikena ngurangka empas negatif. Tu nyengkaum bejimat lebuh ngerembaika penerang diri sereta seruran kritikal ngagai isi ti dipeda tauka dibacha ba laman siber. Ngatur awak bekenaka media rama ngambika enda ngachau pengidup ti bendar nya kunchi lalau pengidup ti patut dikembuanka genap iku orang.

 

Nya alai, enti disimpul enggau jaku puntul, media rama ke nyadi kereban ti bisi mai empas positif enggau negatif bepanggai bendar ba chara kitai milih chara kitai beinteraksyen enggau iya. Sekalika iya nulung tauka ngeruga nya bepanggai bendar ngagai penyedar kitai, runding ti kritikal, sereta pengulih kitai nimbang pengidup online enggau dunya nyata.

 

Pengelama idup peranak Sarawak ngelui ari tikas nasional

Nitihka berita ke baru, Sarawak udah nyadi siti ari nengeri ti ngerikodka tikas idup ngelui ari tikas nasional setipak enggau pemanah pengerai enggau pengelantang rama rayat, begulai enggau tiga buah nengeri bukai iya nya Selangor, Wilayah Persekutuan Kuala Lumpur enggau Wilayah Persekutuan Labuan. 

Data nya mandangka Malaysia diatu jampat nyingkang nuju status raban bansa ti majak tuai lalu begunaka pengawa nyikap diri ti komprehensif ari sukut rama, ekonomi enggau pengerai ngambika pengelantang pendiau peranak tuai terus dijaga.

Sepenyampau 30 ari 156 pelilih menua di Malaysia udah ngelui ari tikas umur nasional, enggau umur pemadu tinggi ungkup lelaki direkod di Kinabatangan, Sabah (79.8 taun) enggau ungkup orang indu di Telupid, Sabah (82.8 taun).

Berebak enggau nya, ungkup pelilih menua di Sarawak, ambika banding baka ba Kota Samarahan, umur maya ada majak nambah, iya nya 79.8 taun direkod ba taun 2023, 80.4 taun ba taun 2024 enggau 80.9 taun ba taun 2025, pemadu tinggi di menua tu. Nangkanka nya, umur ti pemadu baruh direkodka di Kanowit iya nya 66.5 taun. 

Tu realiti ke enda ulih disalam pia aja lalu atur proaktif patut dipejalaika nengah kerejasama enggau ejensi strategik, PBT enggau kaban komuniti dikena ngenegapka sistem sukung. Iya mega patut nempa peluang ngagai orang tuai di nengeri tu ulih idup enggau regas, likun sereta ngembuan basa.

Chunto sistem sukung ke bisi disediaka nya baka Kad Emas Kenyalang (KGC). Kad tu meri diskaun special, penguntung enggau akses ngagai servis ti mantu sida ari sukut belanja. Baka nya mega  Bantu Pengerai Orang Tuai (SCHB), skim RM50 juta, bisi mega nyediaka perubat nadai bebayar nyentuk RM500 setaun ba lebih ari  290 klinik panel di serata Sarawak.

Dikena mantu ungkus pengidup besehari-sehari, orang tuai mega bisi nerima Sumbangan Keperluan Asas Sarawak (SKAS), iya nya bantu belanja ninting taun entara RM250 ngagai RM800.

Nya alai, batang fokus patut ngangkatka pengelantang sosio-ekonomi rayat laban penatai pemisi ti nambah, pengawa ti entap, sereta akses ngagai pelajar enggau servis pengerai ti bekualiti nyadi kunchi besai dikena ngasaika umur ti panjai agi.

 

Sanding Penemu:

Sarawak International Conference on Ageing (SICA) 2025

https://www.utusanborneo.com.my/2025/10/28/

https://institutmasa.com/